מאגר הכתר בראשית פרק יב עם עין המסורה

פרק יב
{פרשת לך לך} [א] וַיֹּ֤אמֶר יְהוָה֙ אֶל־אַבְרָ֔ם לֶךְ־לְךָ֛ מֵאַרְצְךָ֥ וּמִמּֽוֹלַדְתְּךָ֖ וּמִבֵּ֣ית אָבִ֑יךָ אֶל־הָאָ֖רֶץ אֲשֶׁ֥ר אַרְאֶֽךָּ:
[ב] וְאֶֽעֶשְׂךָ֙ לְג֣וֹי גָּד֔וֹל וַאֲבָ֣רֶכְךָ֔ וַאֲגַדְּלָ֖ה שְׁמֶ֑ךָ וֶהְיֵ֖ה בְּרָכָֽה:
[ג] וַאֲבָֽרֲכָה֙ מְבָ֣רְכֶ֔יךָ וּמְקַלֶּלְךָ֖ אָאֹ֑ר וְנִבְרְכ֣וּ בְךָ֔ כֹּ֖ל מִשְׁפְּחֹ֥ת הָאֲדָמָֽה:
[ד] וַיֵּ֣לֶךְ אַבְרָ֗ם כַּאֲשֶׁ֨ר דִּבֶּ֤ר אֵלָיו֙ יְהוָ֔ה וַיֵּ֥לֶךְ אִתּ֖וֹ ל֑וֹט וְאַבְרָ֗ם בֶּן־חָמֵ֤שׁ שָׁנִים֙ וְשִׁבְעִ֣ים שָׁנָ֔ה בְּצֵאת֖וֹ מֵחָרָֽן:
[ה] וַיִּקַּ֣ח אַבְרָם֩ אֶת־שָׂרַ֨י אִשְׁתּ֜וֹ וְאֶת־ל֣וֹט בֶּן־אָחִ֗יו וְאֶת־כָּל־רְכוּשָׁם֙ אֲשֶׁ֣ר רָכָ֔שׁוּ וְאֶת־הַנֶּ֖פֶשׁ אֲשֶׁר־עָשׂ֣וּ בְחָרָ֑ן וַיֵּצְא֗וּ לָלֶ֙כֶת֙ אַ֣רְצָה כְּנַ֔עַן וַיָּבֹ֖אוּ אַ֥רְצָה כְּנָֽעַן:
[ו] וַיַּעֲבֹ֤ר אַבְרָם֙ בָּאָ֔רֶץ עַ֚ד מְק֣וֹם שְׁכֶ֔ם עַ֖ד אֵל֣וֹן מוֹרֶ֑ה וְהַֽכְּנַעֲנִ֖י אָ֥ז בָּאָֽרֶץ:
[ז] וַיֵּרָ֤א יְהוָה֙ אֶל־אַבְרָ֔ם וַיֹּ֕אמֶר לְזַ֨רְעֲךָ֔ אֶתֵּ֖ן אֶת־הָאָ֣רֶץ הַזֹּ֑את וַיִּ֤בֶן שָׁם֙ מִזְבֵּ֔חַ לַיהוָ֖ה הַנִּרְאֶ֥ה אֵלָֽיו:
[ח] וַיַּעְתֵּ֨ק מִשָּׁ֜ם הָהָ֗רָה מִקֶּ֛דֶם לְבֵֽית־אֵ֖ל וַיֵּ֣ט אָהֳלֹ֑ה בֵּֽית־אֵ֤ל מִיָּם֙ וְהָעַ֣י מִקֶּ֔דֶם וַיִּֽבֶן־שָׁ֤ם מִזְבֵּחַ֙ לַֽיהוָ֔ה וַיִּקְרָ֖א בְּשֵׁ֥ם יְהוָֽה:
[ט] וַיִּסַּ֣ע אַבְרָ֔ם הָל֥וֹךְ וְנָס֖וֹעַ הַנֶּֽגְבָּה: פ
[י] וַיְהִ֥י רָעָ֖ב בָּאָ֑רֶץ וַיֵּ֨רֶד אַבְרָ֤ם מִצְרַ֙יְמָה֙ לָג֣וּר שָׁ֔ם כִּֽי־כָבֵ֥ד הָרָעָ֖ב בָּאָֽרֶץ:
[יא] וַיְהִ֕י כַּאֲשֶׁ֥ר הִקְרִ֖יב לָב֣וֹא מִצְרָ֑יְמָה וַיֹּ֙אמֶר֙ אֶל־שָׂרַ֣י אִשְׁתּ֔וֹ הִנֵּה־נָ֣א יָדַ֔עְתִּי כִּ֛י אִשָּׁ֥ה יְפַת־מַרְאֶ֖ה אָֽתְּ:
[יב] וְהָיָ֗ה כִּֽי־יִרְא֤וּ אֹתָךְ֙ הַמִּצְרִ֔ים וְאָמְר֖וּ אִשְׁתּ֣וֹ זֹ֑את וְהָרְג֥וּ אֹתִ֖י וְאֹתָ֥ךְ יְחַיּֽוּ:
[יג] אִמְרִי־נָ֖א אֲחֹ֣תִי אָ֑תְּ לְמַ֙עַן֙ יִֽיטַב־לִ֣י בַעֲבוּרֵ֔ךְ וְחָיְתָ֥ה נַפְשִׁ֖י בִּגְלָלֵֽךְ:
[שני] [יד] וַיְהִ֕י כְּב֥וֹא אַבְרָ֖ם מִצְרָ֑יְמָה וַיִּרְא֤וּ הַמִּצְרִים֙ אֶת־הָ֣אִשָּׁ֔ה כִּֽי־יָפָ֥ה הִ֖וא מְאֹֽד:
[טו] וַיִּרְא֤וּ אֹתָהּ֙ שָׂרֵ֣י פַרְעֹ֔ה וַיְהַֽלֲל֥וּ אֹתָ֖הּ אֶל־פַּרְעֹ֑ה וַתֻּקַּ֥ח הָאִשָּׁ֖ה בֵּ֥ית פַּרְעֹֽה:
[טז] וּלְאַבְרָ֥ם הֵיטִ֖יב בַּעֲבוּרָ֑הּ וַֽיְהִי־ל֤וֹ צֹאן־וּבָקָר֙ וַֽחֲמֹרִ֔ים וַֽעֲבָדִים֙ וּשְׁפָחֹ֔ת וַאֲתֹנֹ֖ת וּגְמַלִּֽים:
[יז] וַיְנַגַּ֨ע יְהוָ֧ה ׀ אֶת־פַּרְעֹ֛ה נְגָעִ֥ים גְּדֹלִ֖ים וְאֶת־בֵּית֑וֹ עַל־דְּבַ֥ר שָׂרַ֖י אֵ֥שֶׁת אַבְרָֽם:
[יח] וַיִּקְרָ֤א פַרְעֹה֙ לְאַבְרָ֔ם וַיֹּ֕אמֶר מַה־זֹּ֖את עָשִׂ֣יתָ לִּ֑י לָ֚מָּה לֹא־הִגַּ֣דְתָּ לִּ֔י כִּ֥י אִשְׁתְּךָ֖ הִֽוא:
[יט] לָמָ֤ה אָמַ֙רְתָּ֙ אֲחֹ֣תִי הִ֔וא וָאֶקַּ֥ח אֹתָ֛הּ לִ֖י לְאִשָּׁ֑ה וְעַתָּ֕ה הִנֵּ֥ה אִשְׁתְּךָ֖ קַ֥ח וָלֵֽךְ:
[כ] וַיְצַ֥ו עָלָ֛יו פַּרְעֹ֖ה אֲנָשִׁ֑ים וַֽיְשַׁלְּח֥וּ אֹת֛וֹ וְאֶת־אִשְׁתּ֖וֹ וְאֶת־כָּל־אֲשֶׁר־לֽוֹ:

פרק יב
(א) אל - הארץ - ד' בסיפרא: *בר' יב , א; כד , ה (פעמיים); נ , כד. אראך - ב' (בפתח): *בר' יב , א; *זכ' א , ט. וחד: ואראך - שו' ד , כב. (ב) ואברכך - ב' , אחד חסר ואחד מלא: בר' יב , ב; כז , ז. והיה - ו': בר' יב , ב; יז , א; שמ' כד , יב; לד , ב; שו' יז , י; יח , יט. (ג) ואברכה - ב': בר' יב , ג; תה' קמה , א. משפחת האדמה - ג': *בר' יב , ג; כח , יד; עמ' ג , ב. (ה) ואת - לוט - ב': בר' יא , לא; יב , ה. ארצה כנען - ח': ראה בר' יא , לא. (ז) וירא - כ': בר' יב , ז; יז , א; יח , א; כו , ב , כד; לה , ט; מו , כט; שמ' ג , ב; וי' ט , כג; במ' טז , יט; יז , ז; כ , ו; דב' לא , טו; שו' ו , יב; יג , ג; ש"ב כב , יא; מ"א ט , ב; יח' י , ח; יט , יא; דה"ב ז , יב. הנראה - ב' בסגול: *בר' יב , ז; לה , א. (ח) ההרה - י"ג: בר' יב , ח; יט , יז , יט; שמ' כד , יב; *דב' א , כד , מא , מג; ט , ט; י , א , ג; יהו' ב , טז , כב; שו' א , לד. אהלה - ד' כתיב ה"א: *בר' ט , כא; יב , ח; יג , ג; לה , כא. (ט) הנגבה - ב': בר' יב , ט; יג , א. (י) מצרימה - כ"ח: *בר' יב , י , יא , יד; כו , ב; לז , כה , כח; לט , א; מא , נז; מה , ד; מו , ג , ד , ו , ז , ח , כו , כז; מח , ה; נ , יד; שמ' א , א; ד , כא; יג , יז; במ' יד , ג , ד; כ , טו; דב' י , כב; יז , טז; כו , ה; דה"ב לו , ד. (יא) מצרימה - כ"ח: ראה לעיל. (יב) המצרים - ד' בתורה: בר' יב , יב , יד; מג , לב; דב' כו , ו. המצרים - ה': בר' יב , יב , יד; מג , לב; דב' כו , ו; יהו' כד , ז. יחיו - ב': בר' יב , יב; הו' יד , ח. (יג) אמרי - נא - ב': בר' יב , יג; מ"א ב , יז. אחתי את - ב': בר' יב , יג; מש' ז , ד. וחיתה - ב': בר' יב , יג; יר' לח , יז. (יד) מצרימה - כ"ח: ראה לעיל , י. המצרים - ד' בתורה: בר' יב , יב , יד; מג , לב; דב' כו , ו. המצרים - ה': ראה לעיל , יב. (טו) ויהללו - ד': *בר' יב , טו; שו' טז , כד; *נחמ' ה , יג; דה"ב כט , ל. (יז) וינגע יי' - ב': בר' יב , יז; מ"ב טו , ה. ואת - ביתו - ז': בר' יב , יז; יח , יט; ש"ב יט , מב; מ"א ד , ז; ז , א; ט , טו; דה"ב ח , א. (יח) אשתך - ז': בר' יב , יח , יט; יז , טו , יט; יט , טו; כו , ט; עמ' ז , יז. (יט) למה - ג' ראשי פסוקים: בר' יב , יט; תה' י , א; פח , טו. אשתך - ז': ראה לעיל , יח. ולך - ה' (בקמץ): *בר' יב , יט; כד , נא; מ"ב ד , כד , כט; יר' לו , יד. (כ) ויצו עליו - ב': *בר' יב , כ; כח , ו.