מאגר הכתר בראשית פרק יב עם תרגום אונקלוס

פרק יב
{פרשת לך לך} [א] וַאֲמַר יְיָ לְאַברָם אִיזֵיל לָך מֵאַרעָך וּמִיַלָדוּתָך וּמִבֵּית אֲבוּך לְאַרעָא דְּאַחזֵינָך :
[ב] וְאַעבְּדִינָך לְעַם סַגִּי וַאֲבָרְכִינָך וַאֲרַבֵּי שְׁמָך וּתהֵי מְבָרַך :
[ג] וַאֲבָרֵיך מְבָרְכָך וּמלָטְטָך אֲלוּט וְיִתבָּרְכוּן בְּדִילָך כֹּל זַרעֲיָת אַרעָא :
[ד] וַאֲזַל אַברָם כְּמָא דְמַלֵיל עִמֵיהּ יְיָ וַאֲזַל עִימֵיהּ לוֹט וְאַברָם בַּר שִׁבעִין וַחֲמֵישׁ שְׁנִין בְּמִפְּקֵיהּ מֵחָרָן :
[ה] וּדבַר אַברָם יָת שָׂרַי אִתְּתֵיהּ וְיָת לוֹט בַּר אֲחוּהִי וְיָת כָּל קִניָנְהוֹן דִּקנוֹ וְיָת נַפשָׁתָא דְּשַׁעֲבִידוּ לְאוֹרָיתָא בְחָרָן וּנפַקוּ לְמֵיזַל לְאַרעָא דִכנַעַן וַאֲתוֹ לְאַרעָא דִכנָעַן :
[ו] וַעֲבַר אַברָם בְּאַרעָא עַד אֲתַר שְׁכֶם עַד מֵישַׁר מוֹרֶה וּכנַעֲנָאָה בְּכֵין בְּאַרעָא :
[ז] וְאִתגְּלִי יְיָ לְאַברָם וַאֲמַר לִבנָך אֶתֵּין יָת אַרעָא הָדָא וּבנָא תַמָן מַדבְּחָא קֳדָם יְיָ דְּאִתגְּלִי לֵיהּ :
[ח] וְאִסתַּלַק מִתַּמָן לְטוּרָא מִמַדנַח לְבֵית אֵל וּפרַסֵיהּ לְמַשׁכְּנֵיהּ בֵּית אֵל מִמַערְבָא וְעַי מִמַדנְחָא וּבנָא תַמָן מַדבְּחָא קֳדָם יְיָ וְצַלִי בִּשׁמָא דַייָ :
[ט] וּנטַל אַברָם אָזֵיל וְנָטֵיל לְדָרוֹמָא :
[י] וַהֲוָה כַפנָא בְּאַרעָא וּנחַת אַברָם לְמִצרַיִם לְאִתּוֹתָבָא תַמָן אֲרֵי תְקֵיף כַּפנָא בְּאַרעָא :
[יא] וַהֲוָה כַּד קְרֵיב לְמֵיעַל לְמִצרָיִם וַאֲמַר לְשָׂרַי אִתְּתֵיהּ הָא כְעַן יָדַענָא אֲרֵי אִתְּתָא שַׁפִּירַת חֵיזוּ אַתּ :
[יב] וִיהֵי כַּד יִחזוֹן יָתִיך מִצרָאֵי וְיֵימְרוּן אִתְּתֵיהּ דָּא וְיִקטְלוּן יָתִי וְיָתִיך יְקַיְימוּן :
[יג] אֵימַרִי כְעַן דַּאֲחָת אַתּ בְּדִיל דְּיִיטַב לִי בְדִילִיך וְתִתקַיַים נַפשִׁי בְּפִתגָמַכִי :
[שני] [יד] וַהֲוָה כַּד עָל אַברָם לְמִצרָיִם וַחֲזוֹ מִצרָאֵי יָת אִתְּתָא אֲרֵי שַׁפִּירָא הִיא לַחדָּא :
[טו] וַחֲזוֹ יָתַהּ רַברְבֵי פַרעֹה וְשַׁבַּחוּ יָתַהּ לְפַרעֹה וְאִדְּבַרַת אִתְּתָא לְבֵית פַּרעֹה :
[טז] וּלאַברָם אוֹטֵיב בְּדִילַהּ וַהֲווֹ לֵיהּ עָאן וְתוֹרִין וּחמָרִין וְעַבדִין וְאַמהָן וַאֲתָנָן וְגַמלִין :
[יז] וְאַיתִי יְיָ עַל פַּרעֹה מַכתָּשִׁין רַברְבִין וְעַל אֱנָשׁ בֵּיתֵיהּ עַל עֵיסַק שָׂרַי אִתַּת אַברָם :
[יח] וּקרָא פַרעֹה לְאַברָם וַאֲמַר מָא דָא עֲבַדתּ לִי לְמָא לָא חַוֵית לִי אֲרֵי אִתְּתָך הִיא :
[יט] לְמָא אֲמַרתּ אֲחָת הִיא וּדבַרִית יָתַהּ לִי לְאִתּוּ וּכעַן הָא אִתְּתָך דְּבַר וְאִיזֵיל :
[כ] וּפַקֵיד עֲלוֹהִי פַּרעֹה גֻּברִין וְאַלוִיאוּ יָתֵיהּ וְיָת אִתְּתֵיהּ וְיָת כָּל דְּלֵיהּ :