מאגר הכתר בראשית פרק יט עם עין המסורה

פרק יט
[שלישי] [א] וַ֠יָּבֹאוּ שְׁנֵ֨י הַמַּלְאָכִ֤ים סְדֹ֙מָה֙ בָּעֶ֔רֶב וְל֖וֹט יֹשֵׁ֣ב בְּשַֽׁעַר־סְדֹ֑ם וַיַּרְא־לוֹט֙ וַיָּ֣קָם לִקְרָאתָ֔ם וַיִּשְׁתַּ֥חוּ אַפַּ֖יִם אָֽרְצָה:
[ב] וַיֹּ֜אמֶר הִנֶּ֣ה נָּא־אֲדֹנַ֗י ס֣וּרוּ נָ֠א אֶל־בֵּ֨ית עַבְדְּכֶ֤ם וְלִ֙ינוּ֙ וְרַחֲצ֣וּ רַגְלֵיכֶ֔ם וְהִשְׁכַּמְתֶּ֖ם וַהֲלַכְתֶּ֣ם לְדַרְכְּכֶ֑ם וַיֹּאמְר֣וּ לֹּ֔א כִּ֥י בָרְח֖וֹב נָלִֽין:
[ג] וַיִּפְצַר־בָּ֣ם מְאֹ֔ד וַיָּסֻ֣רוּ אֵלָ֔יו וַיָּבֹ֖אוּ אֶל־בֵּית֑וֹ וַיַּ֤עַשׂ לָהֶם֙ מִשְׁתֶּ֔ה וּמַצּ֥וֹת אָפָ֖ה וַיֹּאכֵֽלוּ:
[ד] טֶרֶם֘ יִשְׁכָּבוּ֒ וְאַנְשֵׁ֨י הָעִ֜יר אַנְשֵׁ֤י סְדֹם֙ נָסַ֣בּוּ עַל־הַבַּ֔יִת מִנַּ֖עַר וְעַד־זָקֵ֑ן כָּל־הָעָ֖ם מִקָּצֶֽה:
[ה] וַיִּקְרְא֤וּ אֶל־לוֹט֙ וַיֹּ֣אמְרוּ ל֔וֹ אַיֵּ֧ה הָאֲנָשִׁ֛ים אֲשֶׁר־בָּ֥אוּ אֵלֶ֖יךָ הַלָּ֑יְלָה הוֹצִיאֵ֣ם אֵלֵ֔ינוּ וְנֵדְעָ֖ה אֹתָֽם:
[ו] וַיֵּצֵ֧א אֲלֵהֶ֛ם ל֖וֹט הַפֶּ֑תְחָה וְהַדֶּ֖לֶת סָגַ֥ר אַחֲרָֽיו:
[ז] וַיֹּאמַ֑ר אַל־נָ֥א אַחַ֖י תָּרֵֽעוּ:
[ח] הִנֵּה־נָ֨א לִ֜י שְׁתֵּ֣י בָנ֗וֹת אֲשֶׁ֤ר לֹֽא־יָדְעוּ֙ אִ֔ישׁ אֽוֹצִיאָה־נָּ֤א אֶתְהֶן֙ אֲלֵיכֶ֔ם וַעֲשׂ֣וּ לָהֶ֔ן כַּטּ֖וֹב בְּעֵינֵיכֶ֑ם רַ֠ק לָאֲנָשִׁ֤ים הָאֵל֙ אַל־תַּעֲשׂ֣וּ דָבָ֔ר כִּֽי־עַל־כֵּ֥ן בָּ֖אוּ בְּצֵ֥ל קֹרָתִֽי:
[ט] וַיֹּאמְר֣וּ ׀ גֶּשׁ־הָ֗לְאָה וַיֹּֽאמְרוּ֙ הָאֶחָ֤ד בָּֽא־לָגוּר֙ וַיִּשְׁפֹּ֣ט שָׁפ֔וֹט עַתָּ֕ה נָרַ֥ע לְךָ֖ מֵהֶ֑ם וַיִּפְצְר֨וּ בָאִ֤ישׁ בְּלוֹט֙ מְאֹ֔ד וַֽיִּגְּשׁ֖וּ לִשְׁבֹּ֥ר הַדָּֽלֶת:
[י] וַיִּשְׁלְח֤וּ הָֽאֲנָשִׁים֙ אֶת־יָדָ֔ם וַיָּבִ֧יאוּ אֶת־ל֛וֹט אֲלֵיהֶ֖ם הַבָּ֑יְתָה וְאֶת־הַדֶּ֖לֶת סָגָֽרוּ:
[יא] וְֽאֶת־הָאֲנָשִׁ֞ים אֲשֶׁר־פֶּ֣תַח הַבַּ֗יִת הִכּוּ֙ בַּסַּנְוֵרִ֔ים מִקָּטֹ֖ן וְעַד־גָּד֑וֹל וַיִּלְא֖וּ לִמְצֹ֥א הַפָּֽתַח:
[יב] וַיֹּאמְר֨וּ הָאֲנָשִׁ֜ים אֶל־ל֗וֹט עֹ֚ד מִֽי־לְךָ֣ פֹ֔ה חָתָן֙ וּבָנֶ֣יךָ וּבְנֹתֶ֔יךָ וְכֹ֥ל אֲשֶׁר־לְךָ֖ בָּעִ֑יר הוֹצֵ֖א מִן־הַמָּקֽוֹם:
[יג] כִּֽי־מַשְׁחִתִ֣ים אֲנַ֔חְנוּ אֶת־הַמָּק֖וֹם הַזֶּ֑ה כִּֽי־גָדְלָ֤ה צַעֲקָתָם֙ אֶת־פְּנֵ֣י יְהוָ֔ה וַיְשַׁלְּחֵ֥נוּ יְהוָ֖ה לְשַׁחֲתָֽהּ:
[יד] וַיֵּצֵ֨א ל֜וֹט וַיְדַבֵּ֣ר׀ אֶל־חֲתָנָ֣יו׀ לֹקְחֵ֣י בְנֹתָ֗יו וַיֹּ֙אמֶר֙ ק֤וּמוּ צְּאוּ֙ מִן־הַמָּק֣וֹם הַזֶּ֔ה כִּֽי־מַשְׁחִ֥ית יְהוָ֖ה אֶת־הָעִ֑יר וַיְהִ֥י כִמְצַחֵ֖ק בְּעֵינֵ֥י חֲתָנָֽיו:
[טו] וּכְמוֹ֙ הַשַּׁ֣חַר עָלָ֔ה וַיָּאִ֥יצוּ הַמַּלְאָכִ֖ים בְּל֣וֹט לֵאמֹ֑ר קוּם֩ קַ֨ח אֶֽת־אִשְׁתְּךָ֜ וְאֶת־שְׁתֵּ֤י בְנֹתֶ֙יךָ֙ הַנִּמְצָאֹ֔ת פֶּן־תִּסָּפֶ֖ה בַּעֲוֺ֥ן הָעִֽיר:
[טז] וַֽיִּתְמַהְמָ֓הּ׀ וַיַּחֲזִ֨יקוּ הָאֲנָשִׁ֜ים בְּיָד֣וֹ וּבְיַד־אִשְׁתּ֗וֹ וּבְיַד֙ שְׁתֵּ֣י בְנֹתָ֔יו בְּחֶמְלַ֥ת יְהוָ֖ה עָלָ֑יו וַיֹּצִאֻ֥הוּ וַיַּנִּחֻ֖הוּ מִח֥וּץ לָעִֽיר:
[יז] וַיְהִי֩ כְהוֹצִיאָ֨ם אֹתָ֜ם הַח֗וּצָה וַיֹּ֙אמֶר֙ הִמָּלֵ֣ט עַל־נַפְשֶׁ֔ךָ אַל־תַּבִּ֣יט אַחֲרֶ֔יךָ וְאַֽל־תַּעֲמֹ֖ד בְּכָל־הַכִּכָּ֑ר הָהָ֥רָה הִמָּלֵ֖ט פֶּן־תִּסָּפֶֽה:
[יח] וַיֹּ֥אמֶר ל֖וֹט אֲלֵהֶ֑ם אַל־נָ֖א אֲדֹנָֽי:
[יט] הִנֵּה־נָ֠א מָצָ֨א עַבְדְּךָ֣ חֵן֘ בְּעֵינֶיךָ֒ וַתַּגְדֵּ֣ל חַסְדְּךָ֗ אֲשֶׁ֤ר עָשִׂ֙יתָ֙ עִמָּדִ֔י לְהַחֲי֖וֹת אֶת־נַפְשִׁ֑י וְאָנֹכִ֗י לֹ֤א אוּכַל֙ לְהִמָּלֵ֣ט הָהָ֔רָה פֶּן־תִּדְבָּקַ֥נִי הָרָעָ֖ה וָמַֽתִּי:
[כ] הִנֵּה־נָ֠א הָעִ֨יר הַזֹּ֧את קְרֹבָ֛ה לָנ֥וּס שָׁ֖מָּה וְהִ֣וא מִצְעָ֑ר אִמָּלְטָ֨ה נָּ֜א שָׁ֗מָּה הֲלֹ֥א מִצְעָ֛ר הִ֖וא וּתְחִ֥י נַפְשִֽׁי:
[רביעי] [כא] וַיֹּ֣אמֶר אֵלָ֔יו הִנֵּה֙ נָשָׂ֣אתִי פָנֶ֔יךָ גַּ֖ם לַדָּבָ֣ר הַזֶּ֑ה לְבִלְתִּ֛י הָפְכִּ֥י אֶת־הָעִ֖יר אֲשֶׁ֥ר דִּבַּֽרְתָּ:
[כב] מַהֵר֙ הִמָּלֵ֣ט שָׁ֔מָּה כִּ֣י לֹ֤א אוּכַל֙ לַעֲשׂ֣וֹת דָּבָ֔ר עַד־בֹּאֲךָ֖ שָׁ֑מָּה עַל־כֵּ֛ן קָרָ֥א שֵׁם־הָעִ֖יר צֽוֹעַר:
[כג] הַשֶּׁ֖מֶשׁ יָצָ֣א עַל־הָאָ֑רֶץ וְל֖וֹט בָּ֥א צֹֽעֲרָה:
[כד] וַיהוָ֗ה הִמְטִ֧יר עַל־סְדֹ֛ם וְעַל־עֲמֹרָ֖ה גָּפְרִ֣ית וָאֵ֑שׁ מֵאֵ֥ת יְהוָ֖ה מִן־הַשָּׁמָֽיִם:
[כה] וַֽיַּהֲפֹךְ֙ אֶת־הֶעָרִ֣ים הָאֵ֔ל וְאֵ֖ת כָּל־הַכִּכָּ֑ר וְאֵת֙ כָּל־יֹשְׁבֵ֣י הֶעָרִ֔ים וְצֶ֖מַח הָאֲדָמָֽה:
[כו] וַתַּבֵּ֥ט אִשְׁתּ֖וֹ מֵאַחֲרָ֑יו וַתְּהִ֖י נְצִ֥יב מֶֽלַח:
[כז] וַיַּשְׁכֵּ֥ם אַבְרָהָ֖ם בַּבֹּ֑קֶר אֶ֨ל־הַמָּק֔וֹם אֲשֶׁר־עָ֥מַד שָׁ֖ם אֶת־פְּנֵ֥י יְהוָֽה:
[כח] וַיַּשְׁקֵ֗ף עַל־פְּנֵ֤י סְדֹם֙ וַעֲמֹרָ֔ה וְעַֽל־כָּל־פְּנֵ֖י אֶ֣רֶץ הַכִּכָּ֑ר וַיַּ֗רְא וְהִנֵּ֤ה עָלָה֙ קִיטֹ֣ר הָאָ֔רֶץ כְּקִיטֹ֖ר הַכִּבְשָֽׁן:
[כט] וַיְהִ֗י בְּשַׁחֵ֤ת אֱלֹהִים֙ אֶת־עָרֵ֣י הַכִּכָּ֔ר וַיִּזְכֹּ֥ר אֱלֹהִ֖ים אֶת־אַבְרָהָ֑ם וַיְשַׁלַּ֤ח אֶת־לוֹט֙ מִתּ֣וֹךְ הַהֲפֵכָ֔ה בַּֽהֲפֹךְ֙ אֶת־הֶ֣עָרִ֔ים אֲשֶׁר־יָשַׁ֥ב בָּהֵ֖ן לֽוֹט:
[ל] וַיַּעַל֩ ל֨וֹט מִצּ֜וֹעַר וַיֵּ֣שֶׁב בָּהָ֗ר וּשְׁתֵּ֤י בְנֹתָיו֙ עִמּ֔וֹ כִּ֥י יָרֵ֖א לָשֶׁ֣בֶת בְּצ֑וֹעַר וַיֵּ֙שֶׁב֙ בַּמְּעָרָ֔ה ה֖וּא וּשְׁתֵּ֥י בְנֹתָֽיו:
[לא] וַתֹּ֧אמֶר הַבְּכִירָ֛ה אֶל־הַצְּעִירָ֖ה אָבִ֣ינוּ זָקֵ֑ן וְאִ֨ישׁ אֵ֤ין בָּאָ֙רֶץ֙ לָב֣וֹא עָלֵ֔ינוּ כְּדֶ֖רֶךְ כָּל־הָאָֽרֶץ:
[לב] לְכָ֨ה נַשְׁקֶ֧ה אֶת־אָבִ֛ינוּ יַ֖יִן וְנִשְׁכְּבָ֣ה עִמּ֑וֹ וּנְחַיֶּ֥ה מֵאָבִ֖ינוּ זָֽרַע:
[לג] וַתַּשְׁקֶ֧יןָ אֶת־אֲבִיהֶ֛ן יַ֖יִן בַּלַּ֣יְלָה ה֑וּא וַתָּבֹ֤א הַבְּכִירָה֙ וַתִּשְׁכַּ֣ב אֶת־אָבִ֔יהָ וְלֹא־יָדַ֥ע בְּשִׁכְבָ֖הּ וּבְקוּמָֽהּ:
[לד] וַֽיְהִי֙ מִֽמָּחֳרָ֔ת וַתֹּ֤אמֶר הַבְּכִירָה֙ אֶל־הַצְּעִירָ֔ה הֵן־שָׁכַ֥בְתִּי אֶ֖מֶשׁ אֶת־אָבִ֑י נַשְׁקֶ֨נּוּ יַ֜יִן גַּם־הַלַּ֗יְלָה וּבֹ֙אִי֙ שִׁכְבִ֣י עִמּ֔וֹ וּנְחַיֶּ֥ה מֵאָבִ֖ינוּ זָֽרַע:
[לה] וַתַּשְׁקֶ֜יןָ גַּ֣ם בַּלַּ֧יְלָה הַה֛וּא אֶת־אֲבִיהֶ֖ן יָ֑יִן וַתָּ֤קָם הַצְּעִירָה֙ וַתִּשְׁכַּ֣ב עִמּ֔וֹ וְלֹא־יָדַ֥ע בְּשִׁכְבָ֖הּ וּבְקֻמָֽהּ:
[לו] וַֽתַּהֲרֶ֛יןָ שְׁתֵּ֥י בְנֽוֹת־ל֖וֹט מֵאֲבִיהֶֽן:
[לז] וַתֵּ֤לֶד הַבְּכִירָה֙ בֵּ֔ן וַתִּקְרָ֥א שְׁמ֖וֹ מוֹאָ֑ב ה֥וּא אֲבִֽי־מוֹאָ֖ב עַד־הַיּֽוֹם:
[לח] וְהַצְּעִירָ֤ה גַם־הִוא֙ יָ֣לְדָה בֵּ֔ן וַתִּקְרָ֥א שְׁמ֖וֹ בֶּן־עַמִּ֑י ה֛וּא אֲבִ֥י בְנֵֽי־עַמּ֖וֹן עַד־הַיּֽוֹם: ס

פרק יט
(א) סדמה - ג': בר' י , יט; יח , כב; יט , א. ולוט - ד': בר' יג , א , יב; יט , א , כג. (ב) ורחצו - ב' בפתח: בר' יח , ד; יט , ב. והשכמתם - ג': *בר' יט , ב; שו' יט , ט; ש"א כט , י. ויאמרו לא - ב' (בטעמא , מונח וזקף): בר' יט , ב; ש"א ח , יט. לא - ב' דגשין: בר' יט , ב; ש"א ח , יט. ברחוב - ד': בר' יט , ב; שו' יט , כ; יש' נט , יד; איוב כט , ז. (ג) ויפצר - ד' בפתח: בר' יט , ג; לג , יא; שו' יט , ז; מ"ב ה , טז. ומצות - ב': בר' יט , ג; שמ' יב , ח. (ד) ישכבו - ג' (בקמץ): בר' יט , ד; יח' לב , כט; איוב כא , כו. על - הבית - ד': בר' יט , יד; וי' יד , נג; דה"ב ו , לג; ז , ג וכל מלכים וישעיהו דכותהון בר מן ד' ('אל הבית'): מ"א ו , יח; ח , כט , לח , מב. מקצה - ב': בר' יט , ד; יר' נא , לא. (ז) ויאמר - י' ראשי פסוקים בתורה: ראה בר' טו , ח. ויאמר - צ"א (בפתח): ראה בר' יד , יט. (ח) הנה - ז' ראשי פסוקים (בסיפרא): *בר' יט , ח , יט , כ; כד , יג , מג , נא; מא , כט. אוציאה - ב': בר' יט , ח; שו' יט , כד. להן - י"ד: *בר' יט , ח; כו , יח (פעמיים); לא , ה; שמ' א , יח; *במ' כז , ז; ש"א ט , יא; יש' לד , יז; יח' כג , לו; לד , כג; מב , ו; איוב ל , כד; רות א , ט; דה"ב יח , טז. בעיניכם - י"ח: בר' יט , ח; לד , יא; מה , ה; נ , ד; במ' לג , נה; יהו' כג , יג; כד , טו; שו' יט , כד; ש"א יא , י; יח , כג; ש"ב יח , ד; יר' ז , יא; כו , יד; חגי ב , ג; זכ' יא , יב; איוב יח , ג; אס' ח , ח; דה"ב כט , ח. האל - ח' (לשון חול): *בר' יט , ח , כה; כו , ג , ד; וי' יח , כז; דב' ד , מב; ז , כב; יט , יא. אל - תעשו - ג': בר' יט , ח; שו' יט , כג; יר' ה , י. (ט) ויפצרו - ב': *בר' יט , ט; מ"ב ב , יז. בָאיש - ה' (בתורה): בר' יט , ט; כו , יא; וי' כ , ג , ה; דב' כט , יט. (י) ויביאו - ל"ו (מלא וחסר): בר' יט , י; לז , כח , לב; מג , כו; מז , יז; שמ' לב , ג; לה , כה; לט , לג; וי' כד , יא; במ' ז , ג; לא , יב , נד; שו' כא , יב; ש"א א , כה; ה , ב; ז , א; ש"ב ד , ח; ו , יז; כג , טז; מ"א א , ג; ג , כד; ח , ו; ט , כח; עז' ח , יח; נחמ' ח , טז; דה"א יא , יח; טז , א; דה"ב ה , ז; ח , יח; כד , י; כח , ה , ח; כט , כא , לא; ל , טו; לא , יב. אליהם - י"ז מלא בתורה: *בר' יט , י; לד , יד; לז , ו , יג , יח; מ , ו; מב , ז; מג , ב; וי' י , יא; יז , ב; במ' כ , ו; כב , ח; לא , טו; לב , כ; דב' יח , יח; כא , יח; כח , לב. הביתה - י"ט: בר' יט , י; כד , לב; לט , יא; מג , טז , כו (פעמיים); שמ' ט , יט; יהו' ב , יח; שו' יט , טו , יח; ש"א ו , ז; ש"ב יג , ז; יד , לא; יז , כ; מ"א יג , ז , טו; יז , כג; מ"ב ד , לב; ט , ו. סגרו - ב' בקמץ: בר' יט , י; יהו' ב , ז. (יא) בסנורים - ג': *בר' יט , יא; מ"ב ו , יח (פעמיים). (יב) עד - י"ד חסר (בלישנא): ראה בר' ח , כב. עד - י"ב חסר: ראה בר' ח , כב. מי - לך - ג' (בלישנא): בר' יט , יב; לג , ח; יש' כב , טז. ובניך ובנתיך - ג': *בר' יט , יב; *וי' י , יד; עמ' ז , יז. הוצא - ה': בר' יט , יב; *וי' כד , יד; שו' ו , ל; יט , כב; מ"ב י , כב. (ואחד: והוצא - שמ' ג , י). (יג) משחתים - ב' כתיב כן: בר' יט , יג; יר' כב , ז. גדלה - ג': *בר' יט , יג; ש"א כו , כד; *עז' ט , ו. (יד) קומו צאו - ב': בר' יט , יד; שמ' יב , לא. בעיני - ל"ג בתורה: ראה בר' ו , ח. (טו) וכמו - ב': בר' יט , טו; יש' מא , כה. אשתך - ז': ראה בר' יב , יח. ואת - שתי - ו': *בר' יט , טו; לב , כג; שמ' כח , כה; לט , יח; ש"א ל , יח; יח' לה , י. וכל כליות דכותהון. הנמצאת - ב' , אחד חסר ואחד מלא: בר' יט , טו; שו' כ , מח. (טז) ויתמהמה - ז' בטעמא (שלשלת ופסק): בר' יט , טז; כד , יב; לט , ח; *וי' ח , כג; יש' יג , ח; עמ' א , ב; *עז' ה , טו. ויחזיקו - ו' (מלא וחסר): בר' יט , טז; שו' ז , כ; ש"ב ב , טז; מ"א ט , ט; דה"ב ז , כב; כח , טו. ויצאהו - ג' (חסר ומלא): בר' יט , טז; מ"א כא , יג; מ"ב יב , יב. וינחהו - ג' חסר (ו"ו): בר' יט , טז; וי' כד , יב; יש' מו , ז. וינחהו - ב' , אחד חסר ואחד מלא (יו"ד): בר' יט , טז; וי' כד , יב. (יז) כהוציאם - ב': בר' יט , יז; יהו' י , כד. החוצה - י"ו: ראה בר' טו , ה. תביט - ה': *בר' יט , יז; חב' א , ג , יג; תה' י , יד; צא , ח. ואל - תעמד - ב': בר' יט , יז; *עו' א , יד. ההרה - י"ג: ראה בר' יב , ח. (יח) אדני - קל"ד (בלישנא): ראה בר' יח , ג. (יט) הנה - ז' ראשי פסוקים בסיפרא: ראה לעיל , ח. ההרה - י"ג: ראה בר' יב , ח. (כ) הנה - ז' ראשי פסוקים בסיפרא: ראה לעיל , ח. קרבה - ב' חסר: בר' יט , כ; מש' י , יד. מצער - ד': *בר' יט , כ (פעמיים) תה' מב , ז; איוב ח , ז. ותחי - ג': בר' יט , כ; יש' נה , ג; יר' לח , כ. (ואחד: ותחי (בפתח) - בר' מה , כז). (כא) נשאתי - י"ט: בר' יט , כא; שמ' ו , ח; במ' יד , ל; טז , טו; יר' לא , יח; יח' יב , ז; כ , ו , טו , כג , כח , מב; לו , ז; מד , יב; מז , יד; תה' סט , ח; פח , טז; קכג , א; קמג , ח; איוב לד , לא. (כב) לעשות דבר (עשייה הדבר) - י"א חסר 'את': בר' יט , כב; ל , לא; לד , יד , יט; שמ' א , יח; ט , ה; שו' ו , כט (פעמיים); יא , לז; ש"ב ב , ו; מ"ב ח , יג. צוער - ג' מלא (בלישנא): בר' יט , כב , ל (פעמיים). (כג) יצא - ג' סבירין יצאה: *בר' יט , כג; יר' מח , מה; *דנ' ח , ט. ולוט - ד': בר' יג , א , יב; יט , א , כג. (כד) ויי' - ו' בטעמא (רביע) ראש פסוק: בר' יט , כד; מ"א ה , כו; יואל ב , יא; יונה א , ד; איוב מב , י , יב. ויי' - כ"ב בתורה: ראה בר' יג , יד. ואש - ב' (בקמץ): בר' יט , כד; יואל ג , ג. (כה) האל - ח' לשון חול: ראה לעיל , ח. ואת כל - ישבי - ב': בר' יט , כה; יר' יג , יג. (כח) וישקף - ד': *בר' יט , כח; כו , ח; שמ' יד , כד; ש"ב כד , כ. ועל - כל - פני - ד' (בלישנא): בר' יט , כח; מא , נו; יח' לד , ו; דה"א ה , י. ועל - כל - פני - ב': בר' יט , כח; יח' לד , ו. (כט) את - י"ו פסוקים דאית בהון 'את את את את': ראה בר' ד , יח. ויזכר אלהים - ד': בר' ח , א; יט , כט; ל , כב; שמ' ב , כד. וישלח - כ"ב: ראה בר' ח , ז. ישב - ה"י בפתח: ראה בר' יג , יב. בהן - ה"י (בצירה): בר' יט , כט; ל , כו , לז; *שמ' כה , כט; לז , טז; וי' י , א; יא , כא; יד , מ; *במ' י , ג; טז , ז; דב' כח , נב; יר' ד , כט; מח , ט; נא , מג (פעמיים). (ל) בצוער - ג' מלא (בלישנא): בר' יט , כב , ל (פעמיים). (לא) כדרך - ב': *בר' יט , לא; במ' יא , לא. (לב) ונחיה - ג': *בר' יט , לב , לד; מ"א יח , ה. (לג) אביהן - ז': בר' יט , לג , לה; שמ' ב , טז , יח; *במ' כז , ז; לו , יב; יהו' יז , ד. בלילה הוא - ד': *בר' יט , לג; ל , טז; לב , כג; ש"א יט , י. (והשאר 'בלילה ההוא'). ותבא - ב' חסר בתורה: בר' ח , יא; יט , לג. ולא - ידע - ו' בתורה: בר' יט , לג , לה; לא , לב; לט , ו; וי' ה , יז; דב' לד , ו. ולא - ידע - י"א: *בר' יט , לג , לה; לא , לב; לט , ו; וי' ה , יז; דב' לד , ו; יש' מב , כה; מש' ז , כג; ט , יח; איוב לה , טו; קה' ו , ה. ובקומה - י' (תיבות) נקודות בתורה: ראה בר' טז , ה. (לד) ובאי - ג': בר' יט , לד; מ"א א , יג; יש' מז , ה. ובאי - ד' , ג' חסר ואחד מלא: בר' יט , לד; מ"א א , יג; יש' מז , ה; שה"ש ד , טז. ונחיה - ג': *בר' יט , לב , לד; מ"א יח , ה. (לה) אביהן - ז': ראה לעיל , לג. ולא - ידע - י"א: ראה לעיל , לג. ולא - ידע - ו' בתורה: ראה לעיל , לג. (לז) ותקרא שמו - ט': בר' יט , לז , לח; כט , לב , לג; ל , ח , יח; לה , יח; שמ' ב , י; דה"א ז , טז. עד - היום - ט' מיחדין (הצירוף 'עד היום' מופיע ללא 'הזה' וללא 'ההוא'): בר' יט , לז , לח; לה , כ; ש"ב יט , כה; מ"ב י , כז; יח' כ , לא; דה"ב ח , טז; כ , כו; לה , כה. (לח) ותקרא שמו - ט': ראה לעיל , לז. עד - היום - ט' מיחדין (הצירוף 'עד היום' מופיע ללא 'הזה' וללא 'ההוא'): ראה לעיל , לז.