מאגר הכתר בראשית פרק כד עם עין המסורה

פרק כד
[א] וְאַבְרָהָ֣ם זָקֵ֔ן בָּ֖א בַּיָּמִ֑ים וַיהוָ֛ה בֵּרַ֥ךְ אֶת־אַבְרָהָ֖ם בַּכֹּֽל:
[ב] וַיֹּ֣אמֶר אַבְרָהָ֗ם אֶל־עַבְדּוֹ֙ זְקַ֣ן בֵּית֔וֹ הַמֹּשֵׁ֖ל בְּכָל־אֲשֶׁר־ל֑וֹ שִֽׂים־נָ֥א יָדְךָ֖ תַּ֥חַת יְרֵכִֽי:
[ג] וְאַשְׁבִּ֣יעֲךָ֔ בַּֽיהוָה֙ אֱלֹהֵ֣י הַשָּׁמַ֔יִם וֵאלֹהֵ֖י הָאָ֑רֶץ אֲשֶׁ֨ר לֹֽא־תִקַּ֤ח אִשָּׁה֙ לִבְנִ֔י מִבְּנוֹת֙ הַֽכְּנַעֲנִ֔י אֲשֶׁ֥ר אָנֹכִ֖י יוֹשֵׁ֥ב בְּקִרְבּֽוֹ:
[ד] כִּ֧י אֶל־אַרְצִ֛י וְאֶל־מוֹלַדְתִּ֖י תֵּלֵ֑ךְ וְלָקַחְתָּ֥ אִשָּׁ֖ה לִבְנִ֥י לְיִצְחָֽק:
[ה] וַיֹּ֤אמֶר אֵלָיו֙ הָעֶ֔בֶד אוּלַי֙ לֹא־תֹאבֶ֣ה הָאִשָּׁ֔ה לָלֶ֥כֶת אַחֲרַ֖י אֶל־הָאָ֣רֶץ הַזֹּ֑את הֶהָשֵׁ֤ב אָשִׁיב֙ אֶת־בִּנְךָ֔ אֶל־הָאָ֖רֶץ אֲשֶׁר־יָצָ֥אתָ מִשָּֽׁם:
[ו] וַיֹּ֥אמֶר אֵלָ֖יו אַבְרָהָ֑ם הִשָּׁ֣מֶר לְךָ֔ פֶּן־תָּשִׁ֥יב אֶת־בְּנִ֖י שָֽׁמָּה:
[ז] יְהוָ֣ה׀ אֱלֹהֵ֣י הַשָּׁמַ֗יִם אֲשֶׁ֨ר לְקָחַ֜נִי מִבֵּ֣ית אָבִי֘ וּמֵאֶ֣רֶץ מֽוֹלַדְתִּי֒ וַאֲשֶׁ֨ר דִּבֶּר־לִ֜י וַאֲשֶׁ֤ר נִֽשְׁבַּֽע־לִי֙ לֵאמֹ֔ר לְזַ֨רְעֲךָ֔ אֶתֵּ֖ן אֶת־הָאָ֣רֶץ הַזֹּ֑את ה֗וּא יִשְׁלַ֤ח מַלְאָכוֹ֙ לְפָנֶ֔יךָ וְלָקַחְתָּ֥ אִשָּׁ֛ה לִבְנִ֖י מִשָּֽׁם:
[ח] וְאִם־לֹ֨א תֹאבֶ֤ה הָֽאִשָּׁה֙ לָלֶ֣כֶת אַחֲרֶ֔יךָ וְנִקִּ֕יתָ מִשְּׁבֻעָתִ֖י זֹ֑את רַ֣ק אֶת־בְּנִ֔י לֹ֥א תָשֵׁ֖ב שָֽׁמָּה:
[ט] וַיָּ֤שֶׂם הָעֶ֙בֶד֙ אֶת־יָד֔וֹ תַּ֛חַת יֶ֥רֶךְ אַבְרָהָ֖ם אֲדֹנָ֑יו וַיִּשָּׁ֣בַֽע ל֔וֹ עַל־הַדָּבָ֖ר הַזֶּֽה:
[שלישי] [י] וַיִּקַּ֣ח הָ֠עֶבֶד עֲשָׂרָ֨ה גְמַלִּ֜ים מִגְּמַלֵּ֤י אֲדֹנָיו֙ וַיֵּ֔לֶךְ וְכָל־ט֥וּב אֲדֹנָ֖יו בְּיָד֑וֹ וַיָּ֗קָם וַיֵּ֛לֶךְ אֶל־אֲרַ֥ם נַהֲרַ֖יִם אֶל־עִ֥יר נָחֽוֹר:
[יא] וַיַּבְרֵ֧ךְ הַגְּמַלִּ֛ים מִח֥וּץ לָעִ֖יר אֶל־בְּאֵ֣ר הַמָּ֑יִם לְעֵ֣ת עֶ֔רֶב לְעֵ֖ת צֵ֥את הַשֹּׁאֲבֹֽת:
[יב] וַיֹּאמַ֓ר׀ יְהוָ֗ה אֱלֹהֵי֙ אֲדֹנִ֣י אַבְרָהָ֔ם הַקְרֵה־נָ֥א לְפָנַ֖י הַיּ֑וֹם וַעֲשֵׂה־חֶ֕סֶד עִ֖ם אֲדֹנִ֥י אַבְרָהָֽם:
[יג] הִנֵּ֛ה אָנֹכִ֥י נִצָּ֖ב עַל־עֵ֣ין הַמָּ֑יִם וּבְנוֹת֙ אַנְשֵׁ֣י הָעִ֔יר יֹצְאֹ֖ת לִשְׁאֹ֥ב מָֽיִם:
[יד] וְהָיָ֣ה הַֽנַּעֲרָ֗ אֲשֶׁ֨ר אֹמַ֤ר אֵלֶ֙יהָ֙ הַטִּי־נָ֤א כַדֵּךְ֙ וְאֶשְׁתֶּ֔ה וְאָמְרָ֣ה שְׁתֵ֔ה וְגַם־גְּמַלֶּ֖יךָ אַשְׁקֶ֑ה אֹתָ֤הּ הֹכַ֙חְתָּ֙ לְעַבְדְּךָ֣ לְיִצְחָ֔ק וּבָ֣הּ אֵדַ֔ע כִּֽי־עָשִׂ֥יתָ חֶ֖סֶד עִם־אֲדֹנִֽי:
[טו] וַֽיְהִי־ה֗וּא טֶרֶם֘ כִּלָּ֣ה לְדַבֵּר֒ וְהִנֵּ֧ה רִבְקָ֣ה יֹצֵ֗את אֲשֶׁ֤ר יֻלְּדָה֙ לִבְתוּאֵ֣ל בֶּן־מִלְכָּ֔ה אֵ֥שֶׁת נָח֖וֹר אֲחִ֣י אַבְרָהָ֑ם וְכַדָּ֖הּ עַל־שִׁכְמָֽהּ:
[טז] וְהַֽנַּעֲרָ֗ טֹבַ֤ת מַרְאֶה֙ מְאֹ֔ד בְּתוּלָ֕ה וְאִ֖ישׁ לֹ֣א יְדָעָ֑הּ וַתֵּ֣רֶד הָעַ֔יְנָה וַתְּמַלֵּ֥א כַדָּ֖הּ וַתָּֽעַל:
[יז] וַיָּ֥רָץ הָעֶ֖בֶד לִקְרָאתָ֑הּ וַיֹּ֕אמֶר הַגְמִיאִ֥ינִי נָ֛א מְעַט־מַ֖יִם מִכַּדֵּֽךְ:
[יח] וַתֹּ֖אמֶר שְׁתֵ֣ה אֲדֹנִ֑י וַתְּמַהֵ֗ר וַתֹּ֧רֶד כַּדָּ֛הּ עַל־יָדָ֖הּ וַתַּשְׁקֵֽהוּ:
[יט] וַתְּכַ֖ל לְהַשְׁקֹת֑וֹ וַתֹּ֗אמֶר גַּ֤ם לִגְמַלֶּ֙יךָ֙ אֶשְׁאָ֔ב עַ֥ד אִם־כִּלּ֖וּ לִשְׁתֹּֽת:
[כ] וַתְּמַהֵ֗ר וַתְּעַ֤ר כַּדָּהּ֙ אֶל־הַשֹּׁ֔קֶת וַתָּ֥רָץ ע֛וֹד אֶֽל־הַבְּאֵ֖ר לִשְׁאֹ֑ב וַתִּשְׁאַ֖ב לְכָל־גְּמַלָּֽיו:
[כא] וְהָאִ֥ישׁ מִשְׁתָּאֵ֖ה לָ֑הּ מַחֲרִ֕ישׁ לָדַ֗עַת הַהִצְלִ֧יחַ יְהוָ֛ה דַּרְכּ֖וֹ אִם־לֹֽא:
[כב] וַיְהִ֗י כַּאֲשֶׁ֨ר כִּלּ֤וּ הַגְּמַלִּים֙ לִשְׁתּ֔וֹת וַיִּקַּ֤ח הָאִישׁ֙ נֶ֣זֶם זָהָ֔ב בֶּ֖קַע מִשְׁקָל֑וֹ וּשְׁנֵ֤י צְמִידִים֙ עַל־יָדֶ֔יהָ עֲשָׂרָ֥ה זָהָ֖ב מִשְׁקָלָֽם:
[כג] וַיֹּ֙אמֶר֙ בַּת־מִ֣י אַ֔תְּ הַגִּ֥ידִי נָ֖א לִ֑י הֲיֵ֧שׁ בֵּית־אָבִ֛יךְ מָק֥וֹם לָ֖נוּ לָלִֽין:
[כד] וַתֹּ֣אמֶר אֵלָ֔יו בַּת־בְּתוּאֵ֖ל אָנֹ֑כִי בֶּן־מִלְכָּ֕ה אֲשֶׁ֥ר יָלְדָ֖ה לְנָחֽוֹר:
[כה] וַתֹּ֣אמֶר אֵלָ֔יו גַּם־תֶּ֥בֶן גַּם־מִסְפּ֖וֹא רַ֣ב עִמָּ֑נוּ גַּם־מָק֖וֹם לָלֽוּן:
[כו] וַיִּקֹּ֣ד הָאִ֔ישׁ וַיִּשְׁתַּ֖חוּ לַיהוָֽה:
[רביעי] [כז] וַיֹּ֗אמֶר בָּר֤וּךְ יְהוָה֙ אֱלֹהֵי֙ אֲדֹנִ֣י אַבְרָהָ֔ם אֲ֠שֶׁר לֹא־עָזַ֥ב חַסְדּ֛וֹ וַאֲמִתּ֖וֹ מֵעִ֣ם אֲדֹנִ֑י אָנֹכִ֗י בַּדֶּ֙רֶךְ֙ נָחַ֣נִי יְהוָ֔ה בֵּ֖ית אֲחֵ֥י אֲדֹנִֽי:
[כח] וַתָּ֙רָץ֙ הַֽנַּעֲרָ֔ וַתַּגֵּ֖ד לְבֵ֣ית אִמָּ֑הּ כַּדְּבָרִ֖ים הָאֵֽלֶּה:
[כט] וּלְרִבְקָ֥ה אָ֖ח וּשְׁמ֣וֹ לָבָ֑ן וַיָּ֨רָץ לָבָ֧ן אֶל־הָאִ֛ישׁ הַח֖וּצָה אֶל־הָעָֽיִן:
[ל] וַיְהִ֣י׀ כִּרְאֹ֣ת אֶת־הַנֶּ֗זֶם וְֽאֶת־הַצְּמִדִים֘ עַל־יְדֵ֣י אֲחֹתוֹ֒ וּכְשָׁמְע֗וֹ אֶת־דִּבְרֵ֞י רִבְקָ֤ה אֲחֹתוֹ֙ לֵאמֹ֔ר כֹּֽה־דִבֶּ֥ר אֵלַ֖י הָאִ֑ישׁ וַיָּבֹא֙ אֶל־הָאִ֔ישׁ וְהִנֵּ֛ה עֹמֵ֥ד עַל־הַגְּמַלִּ֖ים עַל־הָעָֽיִן:
[לא] וַיֹּ֕אמֶר בּ֖וֹא בְּר֣וּךְ יְהוָ֑ה לָ֤מָּה תַֽעֲמֹד֙ בַּח֔וּץ וְאָנֹכִי֙ פִּנִּ֣יתִי הַבַּ֔יִת וּמָק֖וֹם לַגְּמַלִּֽים:
[לב] וַיָּבֹ֤א הָאִישׁ֙ הַבַּ֔יְתָה וַיְפַתַּ֖ח הַגְּמַלִּ֑ים וַיִּתֵּ֨ן תֶּ֤בֶן וּמִסְפּוֹא֙ לַגְּמַלִּ֔ים וּמַ֙יִם֙ לִרְחֹ֣ץ רַגְלָ֔יו וְרַגְלֵ֥י הָאֲנָשִׁ֖ים אֲשֶׁ֥ר אִתּֽוֹ:
[לג] וַיֻּישַׂ֤ם וַיּוּשַׂ֤ם לְפָנָיו֙ לֶאֱכֹ֔ל וַיֹּ֙אמֶר֙ לֹ֣א אֹכַ֔ל עַ֥ד אִם־דִּבַּ֖רְתִּי דְּבָרָ֑י וַיֹּ֖אמֶר דַּבֵּֽר:
[לד] וַיֹּאמַ֑ר עֶ֥בֶד אַבְרָהָ֖ם אָנֹֽכִי:
[לה] וַיהוָ֞ה בֵּרַ֧ךְ אֶת־אֲדֹנִ֛י מְאֹ֖ד וַיִּגְדָּ֑ל וַיִּתֶּן־ל֞וֹ צֹ֤אן וּבָקָר֙ וְכֶ֣סֶף וְזָהָ֔ב וַעֲבָדִם֙ וּשְׁפָחֹ֔ת וּגְמַלִּ֖ים וַחֲמֹרִֽים:
[לו] וַתֵּ֡לֶד שָׂרָה֩ אֵ֨שֶׁת אֲדֹנִ֥י בֵן֙ לַֽאדֹנִ֔י אַחֲרֵ֖י זִקְנָתָ֑הּ וַיִּתֶּן־ל֖וֹ אֶת־כָּל־אֲשֶׁר־לֽוֹ:
[לז] וַיַּשְׁבִּעֵ֥נִי אֲדֹנִ֖י לֵאמֹ֑ר לֹא־תִקַּ֤ח אִשָּׁה֙ לִבְנִ֔י מִבְּנוֹת֙ הַֽכְּנַעֲנִ֔י אֲשֶׁ֥ר אָנֹכִ֖י יֹשֵׁ֥ב בְּאַרְצֽוֹ:
[לח] אִם־לֹ֧א אֶל־בֵּית־אָבִ֛י תֵּלֵ֖ךְ וְאֶל־מִשְׁפַּחְתִּ֑י וְלָקַחְתָּ֥ אִשָּׁ֖ה לִבְנִֽי:
[לט] וָאֹמַ֖ר אֶל־אֲדֹנִ֑י אֻלַ֛י לֹא־תֵלֵ֥ךְ הָאִשָּׁ֖ה אַחֲרָֽי:
[מ] וַיֹּ֖אמֶר אֵלָ֑י יְהוָ֞ה אֲשֶׁר־הִתְהַלַּ֣כְתִּי לְפָנָ֗יו יִשְׁלַ֨ח מַלְאָכ֤וֹ אִתָּךְ֙ וְהִצְלִ֣יחַ דַּרְכֶּ֔ךָ וְלָקַחְתָּ֤ אִשָּׁה֙ לִבְנִ֔י מִמִּשְׁפַּחְתִּ֖י וּמִבֵּ֥ית אָבִֽי:
[מא] אָ֤ז תִּנָּקֶה֙ מֵאָ֣לָתִ֔י כִּ֥י תָב֖וֹא אֶל־מִשְׁפַּחְתִּ֑י וְאִם־לֹ֤א יִתְּנוּ֙ לָ֔ךְ וְהָיִ֥יתָ נָקִ֖י מֵאָלָתִֽי:
[מב] וָאָבֹ֥א הַיּ֖וֹם אֶל־הָעָ֑יִן וָאֹמַ֗ר יְהוָה֙ אֱלֹהֵי֙ אֲדֹנִ֣י אַבְרָהָ֔ם אִם־יֶשְׁךָ־נָּא֙ מַצְלִ֣יחַ דַּרְכִּ֔י אֲשֶׁ֥ר אָנֹכִ֖י הֹלֵ֥ךְ עָלֶֽיהָ:
[מג] הִנֵּ֛ה אָנֹכִ֥י נִצָּ֖ב עַל־עֵ֣ין הַמָּ֑יִם וְהָיָ֤ה הָֽעַלְמָה֙ הַיֹּצֵ֣את לִשְׁאֹ֔ב וְאָמַרְתִּ֣י אֵלֶ֔יהָ הַשְׁקִֽינִי־נָ֥א מְעַט־מַ֖יִם מִכַּדֵּֽךְ:
[מד] וְאָמְרָ֤ה אֵלַי֙ גַּם־אַתָּ֣ה שְׁתֵ֔ה וְגַ֥ם לִגְמַלֶּ֖יךָ אֶשְׁאָ֑ב הִ֣וא הָאִשָּׁ֔ה אֲשֶׁר־הֹכִ֥יחַ יְהוָ֖ה לְבֶן־אֲדֹנִֽי:
[מה] אֲנִי֩ טֶ֨רֶם אֲכַלֶּ֜ה לְדַבֵּ֣ר אֶל־לִבִּ֗י וְהִנֵּ֨ה רִבְקָ֤ה יֹצֵאת֙ וְכַדָּ֣הּ עַל־שִׁכְמָ֔הּ וַתֵּ֥רֶד הָעַ֖יְנָה וַתִּשְׁאָ֑ב וָאֹמַ֥ר אֵלֶ֖יהָ הַשְׁקִ֥ינִי נָֽא:
[מו] וַתְּמַהֵ֗ר וַתּ֤וֹרֶד כַּדָּהּ֙ מֵעָלֶ֔יהָ וַתֹּ֣אמֶר שְׁתֵ֔ה וְגַם־גְּמַלֶּ֖יךָ אַשְׁקֶ֑ה וָאֵ֕שְׁתְּ וְגַ֥ם הַגְּמַלִּ֖ים הִשְׁקָֽתָה:
[מז] וָאֶשְׁאַ֣ל אֹתָ֗הּ וָאֹמַר֘ בַּת־מִ֣י אַתְּ֒ וַתֹּ֗אמֶר בַּת־בְּתוּאֵל֙ בֶּן־נָח֔וֹר אֲשֶׁ֥ר יָֽלְדָה־לּ֖וֹ מִלְכָּ֑ה וָאָשִׂ֤ם הַנֶּ֙זֶם֙ עַל־אַפָּ֔הּ וְהַצְּמִידִ֖ים עַל־יָדֶֽיהָ:
[מח] וָאֶקֹּ֥ד וָאֶשְׁתַּחֲוֶ֖ה לַיהוָ֑ה וָאֲבָרֵ֗ךְ אֶת־יְהוָה֙ אֱלֹהֵי֙ אֲדֹנִ֣י אַבְרָהָ֔ם אֲשֶׁ֤ר הִנְחַ֙נִי֙ בְּדֶ֣רֶךְ אֱמֶ֔ת לָקַ֛חַת אֶת־בַּת־אֲחִ֥י אֲדֹנִ֖י לִבְנֽוֹ:
[מט] וְ֠עַתָּה אִם־יֶשְׁכֶ֨ם עֹשִׂ֜ים חֶ֧סֶד וֶאֱמֶ֛ת אֶת־אֲדֹנִ֖י הַגִּ֣ידוּ לִ֑י וְאִם־לֹ֕א הַגִּ֣ידוּ לִ֔י וְאֶפְנֶ֥ה עַל־יָמִ֖ין א֥וֹ עַל־שְׂמֹֽאל:
[נ] וַיַּ֨עַן לָבָ֤ן וּבְתוּאֵל֙ וַיֹּ֣אמְר֔וּ מֵיְהוָ֖ה יָצָ֣א הַדָּבָ֑ר לֹ֥א נוּכַ֛ל דַּבֵּ֥ר אֵלֶ֖יךָ רַ֥ע אוֹ־טֽוֹב:
[נא] הִנֵּֽה־רִבְקָ֥ה לְפָנֶ֖יךָ קַ֣ח וָלֵ֑ךְ וּתְהִ֤י אִשָּׁה֙ לְבֶן־אֲדֹנֶ֔יךָ כַּאֲשֶׁ֖ר דִּבֶּ֥ר יְהוָֽה:
[נב] וַיְהִ֕י כַּאֲשֶׁ֥ר שָׁמַ֛ע עֶ֥בֶד אַבְרָהָ֖ם אֶת־דִּבְרֵיהֶ֑ם וַיִּשְׁתַּ֥חוּ אַ֖רְצָה לַיהוָֽה:
[חמישי] [נג] וַיּוֹצֵ֨א הָעֶ֜בֶד כְּלֵי־כֶ֨סֶף וּכְלֵ֤י זָהָב֙ וּבְגָדִ֔ים וַיִּתֵּ֖ן לְרִבְקָ֑ה וּמִ֨גְדָּנֹ֔ת נָתַ֥ן לְאָחִ֖יהָ וּלְאִמָּֽהּ:
[נד] וַיֹּאכְל֣וּ וַיִּשְׁתּ֗וּ ה֛וּא וְהָאֲנָשִׁ֥ים אֲשֶׁר־עִמּ֖וֹ וַיָּלִ֑ינוּ וַיָּק֣וּמוּ בַבֹּ֔קֶר וַיֹּ֖אמֶר שַׁלְּחֻ֥נִי לַֽאדֹנִֽי:
[נה] וַיֹּ֤אמֶר אָחִ֙יהָ֙ וְאִמָּ֔הּ תֵּשֵׁ֨ב הַנַּעֲרָ֥ אִתָּ֛נוּ יָמִ֖ים א֣וֹ עָשׂ֑וֹר אַחַ֖ר תֵּלֵֽךְ:
[נו] וַיֹּ֤אמֶר אֲלֵהֶם֙ אַל־תְּאַחֲר֣וּ אֹתִ֔י וַיהוָ֖ה הִצְלִ֣יחַ דַּרְכִּ֑י שַׁלְּח֕וּנִי וְאֵלְכָ֖ה לַֽאדֹנִֽי:
[נז] וַיֹּאמְר֖וּ נִקְרָ֣א לַֽנַּעֲרָ֑ וְנִשְׁאֲלָ֖ה אֶת־פִּֽיהָ:
[נח] וַיִּקְרְא֤וּ לְרִבְקָה֙ וַיֹּאמְר֣וּ אֵלֶ֔יהָ הֲתֵלְכִ֖י עִם־הָאִ֣ישׁ הַזֶּ֑ה וַתֹּ֖אמֶר אֵלֵֽךְ:
[נט] וַֽיְשַׁלְּח֛וּ אֶת־רִבְקָ֥ה אֲחֹתָ֖ם וְאֶת־מֵנִקְתָּ֑הּ וְאֶת־עֶ֥בֶד אַבְרָהָ֖ם וְאֶת־אֲנָשָֽׁיו:
[ס] וַיְבָרֲכ֤וּ אֶת־רִבְקָה֙ וַיֹּ֣אמְרוּ לָ֔הּ אֲחֹתֵ֕נוּ אַ֥תְּ הֲיִ֖י לְאַלְפֵ֣י רְבָבָ֑ה וְיִירַ֣שׁ זַרְעֵ֔ךְ אֵ֖ת שַׁ֥עַר שֹׂנְאָֽיו:
[סא] וַתָּ֨קָם רִבְקָ֜ה וְנַעֲרֹתֶ֗יהָ וַתִּרְכַּ֙בְנָה֙ עַל־הַגְּמַלִּ֔ים וַתֵּלַ֖כְנָה אַחֲרֵ֣י הָאִ֑ישׁ וַיִּקַּ֥ח הָעֶ֛בֶד אֶת־רִבְקָ֖ה וַיֵּלַֽךְ:
[סב] וְיִצְחָק֙ בָּ֣א מִבּ֔וֹא בְּאֵ֥ר לַחַ֖י רֹאִ֑י וְה֥וּא יוֹשֵׁ֖ב בְּאֶ֥רֶץ הַנֶּֽגֶב:
[סג] וַיֵּצֵ֥א יִצְחָ֛ק לָשׂ֥וּחַ בַּשָּׂדֶ֖ה לִפְנ֣וֹת עָ֑רֶב וַיִּשָּׂ֤א עֵינָיו֙ וַיַּ֔רְא וְהִנֵּ֥ה גְמַלִּ֖ים בָּאִֽים:
[סד] וַתִּשָּׂ֤א רִבְקָה֙ אֶת־עֵינֶ֔יהָ וַתֵּ֖רֶא אֶת־יִצְחָ֑ק וַתִּפֹּ֖ל מֵעַ֥ל הַגָּמָֽל:
[סה] וַתֹּ֣אמֶר אֶל־הָעֶ֗בֶד מִֽי־הָאִ֤ישׁ הַלָּזֶה֙ הַהֹלֵ֤ךְ בַּשָּׂדֶה֙ לִקְרָאתֵ֔נוּ וַיֹּ֥אמֶר הָעֶ֖בֶד ה֣וּא אֲדֹנִ֑י וַתִּקַּ֥ח הַצָּעִ֖יף וַתִּתְכָּֽס:
[סו] וַיְסַפֵּ֥ר הָעֶ֖בֶד לְיִצְחָ֑ק אֵ֥ת כָּל־הַדְּבָרִ֖ים אֲשֶׁ֥ר עָשָֽׂה:
[סז] וַיְבִאֶ֣הָ יִצְחָ֗ק הָאֹ֙הֱלָה֙ שָׂרָ֣ה אִמּ֔וֹ וַיִּקַּ֧ח אֶת־רִבְקָ֛ה וַתְּהִי־ל֥וֹ לְאִשָּׁ֖ה וַיֶּאֱהָבֶ֑הָ וַיִּנָּחֵ֥ם יִצְחָ֖ק אַחֲרֵ֥י אִמּֽוֹ: פ

פרק כד
(א) בא בימים - ד': *בר' כד , א; יהו' יג , א; כג , א; מ"א א , א. ויי' - כ"ב בתורה: ראה בר' יג , יד. בכל - ז' דגשין: ראה בר' טז , יב. (ב) זקן - ב' (בשני לשונות): בר' כד , ב; תה' קלג , ב. (ג) ביי' אלהי השמים - ו' (בלישנא): בר' כד , ג , ז; יונה א , ט; *עז' א , ב; *נחמ' א , ה; דה"ב לו , כג. אנכי יושב - ה': בר' כד , ג , לז; ש"ב ז , ב; יש' ו , ה; דה"א יז , א. יושב - ג' מלא בסיפרא: *בר' כד , ג , סב; נ , יא. יושב - י"ז מלא בתורה (בלישנא): בר' כד , ג , סב; נ , יא; שמ' יח , יד; לד , יב , טו; במ' יג , יט , כט (שלוש פעמים); יד , יד , כה; כא , לד; דב' א , ד (פעמיים); ג , ב; ד , מו. (ה) אל - הארץ - ד' בסיפרא: *בר' יב , א; כד , ה (פעמיים); נ , כד. (ו) תשיב - י': *בר' כד , ו; *דב' כד , יג; שו' ה , כט; מ"ב יח , כד; יש' לו , ט; נח , יג; תה' עד , יא; פט , מד; איוב טו , יג; *איכה ג , סד. שמה - י"ח סופי פסוקים: ראה בר' כג , יג. (ז) יי' אלהי השמים - ו' (בלישנא): ראה לעיל , ג. ואשר דבר - ב': בר' כד , ז; יר' ט , יא. (ח) ואם - ג' ראשי פסוקים בסיפרא: *בר' כד , ח; לד , יז; מג , ה. תשב - ד': *בר' כד , ח; תה' צ , ג; קלב , י; דה"ב ו , מב. שמה - י"ח סופי פסוקים: ראה בר' כג , יג. (ט) וישם - ל"ג בתורה: ראה בר' ב , ח. (י) וכל - טוב - ב': *בר' כד , י; מ"ב ח , ט. טוב - י"ט (בלישנא): *בר' כד , י; מה , יח , כ , כג; דב' ו , יא; כח , מז; מ"ב ח , ט; יש' א , יט; סג , ז; סה , יד; יר' לא , יא; הו' י , יא; תה' כז , יג; סה , ה; קיט , סו; קכח , ה; מש' יא , י; עז' ט , יב; נחמ' ט , כה. (יב) ויאמר - י' ראשי פסוקים בתורה: ראה בר' טו , ח. ויאמר - צ"א (בפתח): ראה בר' יד , יט. ויאמר - ז' בטעמא (שלשלת ופסק): ראה בר' יט , טז. (יג) הנה - ז' ראשי פסוקים בסיפרא: ראה בר' יט , ח. (יד) אשקה - ב': בר' כד , יד , מו. ובה - ג': *בר' כד , יד; יש' יד , לב; דה"א כ , ב. (טו) והנה רבקה - ב': בר' כד , טו , מה. (טז) ידעה - ב': בר' כד , טז; מ"א א , ד. העינה - ב': בר' כד , טז , מה. (יח) ותרד - ג' , ב' חסר וחד מלא: בר' כד , יח , מו; ש"א יט , יב. (יט) ותכל - ב' (בשני לשונות): בר' כד , יט; ש"ב יג , לט. עד אם - כלו - ב': בר' כד , יט; רות ב , כא. לשתת - ד' חסר: בר' כד , יט; שמ' ז , כד (השני בפסוק); טו , כג; יז , א. (כא) אם - לא - ז' סופי פסוקים: בר' כד , כא; כז , כא; לז , לב; שמ' טז , ד; במ' יא , כג; דב' ח , ב; שו' ב , כב. (כב) בקע - ב': בר' כד , כב; שמ' לח , כו. (כה) גם - י"ב פסוקים 'גם גם גם' (בדילוגים קצרים): בר' כד , כה; לב , כ; מג , ח; שמ' ד , י; יב , לב; שו' ח , כב; ש"א כח , ו; יש' מח , ח; יר' יב , ו; כג , יא; קה' ט , ו; דה"א יא , ב. (כח) לבית אמה - ב': בר' כד , כח; רות א , ח. (כט) ולרבקה - ב' , חד ראש פסוק וחד סוף פסוק: *בר' כד , כט; כו , לה. החוצה - י"ו: ראה בר' טו , ה. אל - העין - ב': בר' כד , כט , מב. (ל) כראת - ב' חסר: *בר' כד , ל; לג , י. על - העין - ב': בר' טז , ז; כד , ל. (לא) בוא - י"ג מלא: *בר' כד , לא; לט , טז; מג , כה; וי' כה , כב; יהו' י , כז; מ"ב טז , יא; יש' ב , י; ל , ח; יח' לג , כב (פעמיים); לח , יח; יואל ג , ד; מל' ג , כג. וכל שמואל וכתיבייא דכותהון בר מן ה' (חסר): ש"ב יד , לב; תה' קה , יט; קכו , ו; אס' ה , יד; דה"ב כה , ח. ברוך - ב': בר' כד , לא; כו , כט. ומקום - ב': בר' כד , לא; איוב כח , א. (לב) הביתה - י"ט: ראה בר' יט , י. ויפתח - ב' בתרי לשנין: *בר' כד , לב; מ"א ז , לו. (לד) ויאמר - י' ראשי פסוקים בתורה: ראה בר' טו , ח. ויאמר - צ"א (בפתח): ראה בר' יד , יט. (לה) ויי' - כ"ב בתורה: ראה בר' יג , יד. וכסף וזהב - ג': *בר' כד , לה; דב' ח , יג; יז , יז. (לז) אנכי ישב - ה': ראה לעיל , ג. (לח) אם - לא - ח' ראשי פסוקים: בר' כד , לח; שמ' כב , ז; דב' כח , נח; מ"ב ט , כו; מל' ב , ב; תה' ז , יג; קלא , ב; שה"ש א , ח. וכל איוב דכותהון בר מן ב' ('ואם לא'): איוב כד , כה; לו , יב. (מ) אתך - ה' בקמץ: *בר' כד , מ; וי' י , ט; שו' ז , ד; מ"א יג , טז; יר' לח , כה. וכל אתנחתא וסוף פסוק (וזקף קטן) ולשון נקבה דכותהון. (מא) ואם - לא - י"ז באמצע הפסוק: ראה בר' ד , ז. (מב) ואבא - ה' חסר (בלישנא): בר' כד , מב; לג , יד; מ"א יג , ח; תה' קיח , יט; קלב , ג. אל - העין - ב': בר' כד , כט , מב. (מג) הנה - ז' ראשי פסוקים בסיפרא: ראה בר' יט , ח. העלמה - ב' (בתורה): בר' כד , מג; שמ' ב , ח. (מד) גם - ט' פסוקים 'גם וגם': בר' כד , מד; מח , יט; ש"א ב , כו; יב , יד; כא , ט; כו , כה; ש"ב טו , יט; יח' טז , נב; רות א , יב. (מה) אכלה - ג': בר' כד , מה; דב' לב , כג; איוב לא , טז. והנה רבקה - ב': בר' כד , טו , מה. העינה - ב': בר' כד , טז , מה. (מו) ותורד - ב' מלא (בלישנא): בר' כד , מו; מ"א ב , ו. ותורד - ג' , ב' חסר ואחד מלא: בר' כד , יח , מו; ש"א יט , יב. אשקה - ב': בר' כד , יד , מו. (מז) ואשם - ה' חסר: בר' כד , מז; דב' י , ה; מ"א ח , כא; יש' נא , טז; יר' יג , ב. (מט) אם - ז' פסוקים בתורה 'אם ואם' (באמצע פסוק): ראה בר' ד , ז. ואם - לא - י"ז באמצע הפסוק: ראה בר' ד , ז. שמאל - ד' חסר (בלישנא): כל בראשית (בר' יג , ט; יד , טו; כד , מט; מח , יג - נמנים כאחד); דב' ה , כט; יז , יא; יהו' יט , כז. (נ) רע - ט' (בפתח , מלים מוטעמות , כולל 'הרע'): בר' כד , נ; מא , כא; *וי' כז , י; במ' יא , א; יר' ב , יט; מי' ז , ג; תה' ז , י; נד , ז; נחמ' ב , א. (וכל 'אמירה' ו'יצר' לשון ועשייה (אולי: ולשון 'עשייה') ו'עין' דכותהון בר מן ז' (בקמץ): במ' יא , י; ש"א כט , ז; מ"ב כא , ט; מל' ב , יז; קה' ד , ג; ח , יב; דה"ב לג , ט , וכל אתנח וסוף פסוק דכותהון). (נא) הנה - ז' ראשי פסוקים בסיפרא: ראה בר' יט , ח. ולך - ה' (בקמץ): ראה בר' יב , יט. ותהי - י"ד רפין: *בר' כד , נא; וי' טו , כד; במ' כג , י; ש"א יח , יז , כא (פעמיים); מ"א א , ב; מ"ב יט , כה; יש' ל , ח; לז , כו; איוב ו , י; יג , ה; כא , ב; רות ב , יב. (נג) ויוצא - י"ב מלא: ראה בר' טו , ה. ומגדנת - ב' , חד חסר וחד מלא: בר' כד , נג; דה"ב לב , כג. (נד) אשר - עמו - י"א: בר' כד , נד; לה , ב , ו; שו' ט , לד , מד , מח; ש"א ט , ה; יד , ב; כז , ב; ש"ב ב , ג; י , יג. וכל דברי הימים דכותהון. ויקומו - ט' מלא: בר' כד , נד; במ' כב , יד; שו' כ , יט; ש"א כג , כד; לא , יב; מ"ב ז , ז; *עז' א , ה; נחמ' ט , ג; דה"א י , יב. שלחני - ב' , חד חסר וחד מלא: בר' כד , נד , נו. (נו) ויי' - כ"ב בתורה: ראה בר' יג , יד. שלחוני - ב' , חד מלא וחד חסר: בר' כד , נד , נו. (נח) ויאמרו אליה - ב': בר' כד , נח; יהו' ב , יז. (נט) ואת - אנשיו - ב': בר' כד , נט; ש"ב יז , ח. (ס) אחתנו - ד' (ג' חסר ואחד מלא , בלישנא): *בר' כד , ס; לד , יד , לא; *שה"ש ח , ח. אחתנו - ג' (חסר ומלא): בר' כד , ס; לד , יד , לא. רבבה - ד': בר' כד , ס; וי' כו , ח; דב' לב , ל; יח' טז , ז. (סא) וילַך - ז' בפתח: *בר' כד , סא; כה , לד; במ' יב , ט; ש"א כא , א; מ"ב ה , יא; תה' לד , א; איוב ז , ט. וחד: וילך (בחולם) - איכה ג , ב. (סב) ויצחק - ה': בר' כד , סב; כה , כו; לה , כז; מח , טו , טז. מבוא - ו': בר' כד , סב; ש"א כה , כו , לג; מ"ב כג , יא; יש' כג , א; כד , י. ראי - ו': ראה בר' טז , יג. יושב - ג' מלא בסיפרא: *בר' כד , ג , סב; נ , יא. יושב - י"ז מלא בתורה (בלישנא): ראה לעיל , ג. (סג) לפנות ערב - ב': בר' כד , סג; דב' כג , יב. וישא עיניו - ה': ראה בר' יח , ב. (סה) הלזה - ב': בר' כד , סה; לז , יט. (סו) את כל - הדברים - י"ג (חסר 'האלה'): בר' כד , סו; שמ' ד , ל; *וי' ח , לו; *דב' א , יח; ש"א ג , יח; יר' כו , ב , יב; ל , ב; לו , ב , יג , טז , כ , כח. (סז) ויבאה - ב' חסר: בר' ב , כב; כד , סז. ויבאה - ד' , ב' חסר וב' מלא: בר' ב , כב; כד , סז; מ"א ג , א; *דנ' ט , יד. האהלה - ח': ראה בר' יח , ו. ויאהבה - ב': בר' כד , סז; ש"ב יג , א. וינחם - ב': בר' כד , סז; תה' קו , מה.