מאגר הכתר בראשית פרק כז עם עין המסורה

פרק כז
[א] וַֽיְהִי֙ כִּֽי־זָקֵ֣ן יִצְחָ֔ק וַתִּכְהֶ֥יןָ עֵינָ֖יו מֵרְאֹ֑ת וַיִּקְרָ֞א אֶת־עֵשָׂ֣ו׀ בְּנ֣וֹ הַגָּדֹ֗ל וַיֹּ֤אמֶר אֵלָיו֙ בְּנִ֔י וַיֹּ֥אמֶר אֵלָ֖יו הִנֵּֽנִי:
[ב] וַיֹּ֕אמֶר הִנֵּה־נָ֖א זָקַ֑נְתִּי לֹ֥א יָדַ֖עְתִּי י֥וֹם מוֹתִֽי:
[ג] וְעַתָּה֙ שָׂא־נָ֣א כֵלֶ֔יךָ תֶּלְיְךָ֖ וְקַשְׁתֶּ֑ךָ וְצֵא֙ הַשָּׂדֶ֔ה וְצ֥וּדָה לִּ֖י צָֽיִדה צָֽיִד:
[ד] וַעֲשֵׂה־לִ֨י מַטְעַמִּ֜ים כַּאֲשֶׁ֥ר אָהַ֛בְתִּי וְהָבִ֥יאָה לִּ֖י וְאֹכֵ֑לָה בַּעֲב֛וּר תְּבָרֶכְךָ֥ נַפְשִׁ֖י בְּטֶ֥רֶם אָמֽוּת:
[ה] וְרִבְקָ֣ה שֹׁמַ֔עַת בְּדַבֵּ֣ר יִצְחָ֔ק אֶל־עֵשָׂ֖ו בְּנ֑וֹ וַיֵּ֤לֶךְ עֵשָׂו֙ הַשָּׂדֶ֔ה לָצ֥וּד צַ֖יִד לְהָבִֽיא:
[ו] וְרִבְקָה֙ אָֽמְרָ֔ה אֶל־יַעֲקֹ֥ב בְּנָ֖הּ לֵאמֹ֑ר הִנֵּ֤ה שָׁמַ֙עְתִּי֙ אֶת־אָבִ֔יךָ מְדַבֵּ֛ר אֶל־עֵשָׂ֥ו אָחִ֖יךָ לֵאמֹֽר:
[ז] הָבִ֨יאָה לִּ֥י צַ֛יִד וַעֲשֵׂה־לִ֥י מַטְעַמִּ֖ים וְאֹכֵ֑לָה וַאֲבָרֶכְכָ֛ה לִפְנֵ֥י יְהוָ֖ה לִפְנֵ֥י מוֹתִֽי:
[ח] וְעַתָּ֥ה בְנִ֖י שְׁמַ֣ע בְּקֹלִ֑י לַאֲשֶׁ֥ר אֲנִ֖י מְצַוָּ֥ה אֹתָֽךְ:
[ט] לֶךְ־נָא֙ אֶל־הַצֹּ֔אן וְקַֽח־לִ֣י מִשָּׁ֗ם שְׁנֵ֛י גְּדָיֵ֥י עִזִּ֖ים טֹבִ֑ים וְאֶעֱשֶׂ֨ה אֹתָ֧ם מַטְעַמִּ֛ים לְאָבִ֖יךָ כַּאֲשֶׁ֥ר אָהֵֽב:
[י] וְהֵבֵאתָ֥ לְאָבִ֖יךָ וְאָכָ֑ל בַּעֲבֻ֛ר אֲשֶׁ֥ר יְבָרֶכְךָ֖ לִפְנֵ֥י מוֹתֽוֹ:
[יא] וַיֹּ֣אמֶר יַעֲקֹ֔ב אֶל־רִבְקָ֖ה אִמּ֑וֹ הֵ֣ן עֵשָׂ֤ו אָחִי֙ אִ֣ישׁ שָׂעִ֔ר וְאָנֹכִ֖י אִ֥ישׁ חָלָֽק:
[יב] אוּלַ֤י יְמֻשֵּׁ֙נִי֙ אָבִ֔י וְהָיִ֥יתִי בְעֵינָ֖יו כִּמְתַעְתֵּ֑עַ וְהֵבֵאתִ֥י עָלַ֛י קְלָלָ֖ה וְלֹ֥א בְרָכָֽה:
[יג] וַתֹּ֤אמֶר לוֹ֙ אִמּ֔וֹ עָלַ֥י קִלְלָתְךָ֖ בְּנִ֑י אַ֛ךְ שְׁמַ֥ע בְּקֹלִ֖י וְלֵ֥ךְ קַֽח־לִֽי:
[יד] וַיֵּ֙לֶךְ֙ וַיִּקַּ֔ח וַיָּבֵ֖א לְאִמּ֑וֹ וַתַּ֤עַשׂ אִמּוֹ֙ מַטְעַמִּ֔ים כַּאֲשֶׁ֖ר אָהֵ֥ב אָבִֽיו:
[טו] וַתִּקַּ֣ח רִ֠בְקָה אֶת־בִּגְדֵ֨י עֵשָׂ֜ו בְּנָ֤הּ הַגָּדֹל֙ הַחֲמֻדֹ֔ת אֲשֶׁ֥ר אִתָּ֖הּ בַּבָּ֑יִת וַתַּלְבֵּ֥שׁ אֶֽת־יַעֲקֹ֖ב בְּנָ֥הּ הַקָּטָֽן:
[טז] וְאֵ֗ת עֹרֹת֙ גְּדָיֵ֣י הָֽעִזִּ֔ים הִלְבִּ֖ישָׁה עַל־יָדָ֑יו וְעַ֖ל חֶלְקַ֥ת צַוָּארָֽיו:
[יז] וַתִּתֵּ֧ן אֶת־הַמַּטְעַמִּ֛ים וְאֶת־הַלֶּ֖חֶם אֲשֶׁ֣ר עָשָׂ֑תָה בְּיַ֖ד יַעֲקֹ֥ב בְּנָֽהּ:
[יח] וַיָּבֹ֥א אֶל־אָבִ֖יו וַיֹּ֣אמֶר אָבִ֑י וַיֹּ֣אמֶר הִנֶּ֔נִּי מִ֥י אַתָּ֖ה בְּנִֽי:
[יט] וַיֹּ֨אמֶר יַעֲקֹ֜ב אֶל־אָבִ֗יו אָֽנֹכִי֙ עֵשָׂ֣ו בְּכֹרֶ֔ךָ עָשִׂ֕יתִי כַּאֲשֶׁ֥ר דִּבַּ֖רְתָּ אֵלָ֑י קֽוּם־נָ֣א שְׁבָ֗ה וְאָכְלָה֙ מִצֵּידִ֔י בַּעֲב֖וּר תְּבָרֲכַ֥נִּי נַפְשֶֽׁךָ:
[כ] וַיֹּ֤אמֶר יִצְחָק֙ אֶל־בְּנ֔וֹ מַה־זֶּ֛ה מִהַ֥רְתָּ לִמְצֹ֖א בְּנִ֑י וַיֹּ֕אמֶר כִּ֥י הִקְרָ֛ה יְהוָ֥ה אֱלֹהֶ֖יךָ לְפָנָֽי:
[כא] וַיֹּ֤אמֶר יִצְחָק֙ אֶֽל־יַעֲקֹ֔ב גְּשָׁה־נָּ֥א וַאֲמֻֽשְׁךָ֖ בְּנִ֑י הַֽאַתָּ֥ה זֶ֛ה בְּנִ֥י עֵשָׂ֖ו אִם־לֹֽא:
[כב] וַיִּגַּ֧שׁ יַעֲקֹ֛ב אֶל־יִצְחָ֥ק אָבִ֖יו וַיְמֻשֵּׁ֑הוּ וַיֹּ֗אמֶר הַקֹּל֙ ק֣וֹל יַעֲקֹ֔ב וְהַיָּדַ֖יִם יְדֵ֥י עֵשָֽׂו:
[כג] וְלֹ֣א הִכִּיר֔וֹ כִּֽי־הָי֣וּ יָדָ֗יו כִּידֵ֛י עֵשָׂ֥ו אָחִ֖יו שְׂעִרֹ֑ת וַֽיְבָרֲכֵֽהוּ:
[כד] וַיֹּ֕אמֶר אַתָּ֥ה זֶ֖ה בְּנִ֣י עֵשָׂ֑ו וַיֹּ֖אמֶר אָֽנִי:
[כה] וַיֹּ֗אמֶר הַגִּ֤שָׁה לִּי֙ וְאֹֽכְלָה֙ מִצֵּ֣יד בְּנִ֔י לְמַ֥עַן תְּבָרֶכְךָ֖ נַפְשִׁ֑י וַיַּגֶּשׁ־לוֹ֙ וַיֹּאכַ֔ל וַיָּ֧בֵא ל֦וֹ יַ֖יִן וַיֵּֽשְׁתְּ:
[כו] וַיֹּ֥אמֶר אֵלָ֖יו יִצְחָ֣ק אָבִ֑יו גְּשָׁה־נָּ֥א וּשְׁקָה־לִּ֖י בְּנִֽי:
[כז] וַיִּגַּשׁ֙ וַיִּשַּׁק־ל֔וֹ וַיָּ֛רַח אֶת־רֵ֥יחַ בְּגָדָ֖יו וַֽיְבָרֲכֵ֑הוּ וַיֹּ֗אמֶר רְאֵה֙ רֵ֣יחַ בְּנִ֔י כְּרֵ֣יחַ שָׂדֶ֔ה אֲשֶׁ֥ר בֵּרֲכ֖וֹ יְהוָֽה:
[ששי] [כח] וְיִֽתֶּן־לְךָ֙ הָאֱלֹהִ֔ים מִטַּל֙ הַשָּׁמַ֔יִם וּמִשְׁמַנֵּ֖י הָאָ֑רֶץ וְרֹ֥ב דָּגָ֖ן וְתִירֹֽשׁ:
[כט] יַעַבְד֣וּךָ עַמִּ֗ים וְיִֽשְׁתַּחֲוֻ֤ וְיִֽשְׁתַּחֲוּ֤וּ לְךָ֙ לְאֻמִּ֔ים הֱוֵ֤ה גְבִיר֙ לְאַחֶ֔יךָ וְיִשְׁתַּחֲו֥וּ לְךָ֖ בְּנֵ֣י אִמֶּ֑ךָ אֹרֲרֶ֣יךָ אָר֔וּר וּֽמְבָרֲכֶ֖יךָ בָּרֽוּךְ:
[ל] וַיְהִ֗י כַּאֲשֶׁ֨ר כִּלָּ֣ה יִצְחָק֘ לְבָרֵ֣ךְ אֶֽת־יַעֲקֹב֒ וַיְהִ֗י אַ֣ךְ יָצֹ֤א יָצָא֙ יַעֲקֹ֔ב מֵאֵ֥ת פְּנֵ֖י יִצְחָ֣ק אָבִ֑יו וְעֵשָׂ֣ו אָחִ֔יו בָּ֖א מִצֵּידֽוֹ:
[לא] וַיַּ֤עַשׂ גַּם־הוּא֙ מַטְעַמִּ֔ים וַיָּבֵ֖א לְאָבִ֑יו וַיֹּ֣אמֶר לְאָבִ֗יו יָקֻ֤ם אָבִי֙ וְיֹאכַל֙ מִצֵּ֣יד בְּנ֔וֹ בַּעֲבֻ֖ר תְּבָרֲכַ֥נִּי נַפְשֶֽׁךָ:
[לב] וַיֹּ֥אמֶר ל֛וֹ יִצְחָ֥ק אָבִ֖יו מִי־אָ֑תָּה וַיֹּ֕אמֶר אֲנִ֛י בִּנְךָ֥ בְכֹרְךָ֖ עֵשָֽׂו:
[לג] וַיֶּחֱרַ֨ד יִצְחָ֣ק חֲרָדָה֘ גְּדֹלָ֣ה עַד־מְאֹד֒ וַיֹּ֡אמֶר מִֽי־אֵפ֡וֹא ה֣וּא הַצָּֽד־צַיִד֩ וַיָּ֨בֵא לִ֜י וָאֹכַ֥ל מִכֹּ֛ל בְּטֶ֥רֶם תָּב֖וֹא וָאֲבָרֲכֵ֑הוּ גַּם־בָּר֖וּךְ יִהְיֶֽה:
[לד] כִּשְׁמֹ֤עַ עֵשָׂו֙ אֶת־דִּבְרֵ֣י אָבִ֔יו וַיִּצְעַ֣ק צְעָקָ֔ה גְּדֹלָ֥ה וּמָרָ֖ה עַד־מְאֹ֑ד וַיֹּ֣אמֶר לְאָבִ֔יו בָּרֲכֵ֥נִי גַם־אָ֖נִי אָבִֽי:
[לה] וַיֹּ֕אמֶר בָּ֥א אָחִ֖יךָ בְּמִרְמָ֑ה וַיִּקַּ֖ח בִּרְכָתֶֽךָ:
[לו] וַיֹּ֡אמֶר הֲכִי֩ קָרָ֨א שְׁמ֜וֹ יַעֲקֹ֗ב וַֽיַּעְקְבֵ֙נִי֙ זֶ֣ה פַעֲמַ֔יִם אֶת־בְּכֹרָתִ֣י לָקָ֔ח וְהִנֵּ֥ה עַתָּ֖ה לָקַ֣ח בִּרְכָתִ֑י וַיֹּאמַ֕ר הֲלֹא־אָצַ֥לְתָּ לִּ֖י בְּרָכָֽה:
[לז] וַיַּ֨עַן יִצְחָ֜ק וַיֹּ֣אמֶר לְעֵשָׂ֗ו הֵ֣ן גְּבִ֞יר שַׂמְתִּ֥יו לָךְ֙ וְאֶת־כָּל־אֶחָ֗יו נָתַ֤תִּי לוֹ֙ לַעֲבָדִ֔ים וְדָגָ֥ן וְתִירֹ֖שׁ סְמַכְתִּ֑יו וּלְכָ֣ה אֵפ֔וֹא מָ֥ה אֶעֱשֶׂ֖ה בְּנִֽי:
[לח] וַיֹּ֨אמֶר עֵשָׂ֜ו אֶל־אָבִ֗יו הַֽבֲרָכָ֨ה אַחַ֤ת הִֽוא־לְךָ֙ אָבִ֔י בָּרֲכֵ֥נִי גַם־אָ֖נִי אָבִ֑י וַיִּשָּׂ֥א עֵשָׂ֛ו קֹל֖וֹ וַיֵּֽבְךְּ:
[לט] וַיַּ֛עַן יִצְחָ֥ק אָבִ֖יו וַיֹּ֣אמֶר אֵלָ֑יו הִנֵּ֞ה מִשְׁמַנֵּ֤י הָאָ֙רֶץ֙ יִהְיֶ֣ה מֽוֹשָׁבֶ֔ךָ וּמִטַּ֥ל הַשָּׁמַ֖יִם מֵעָֽל:
[מ] וְעַל־חַרְבְּךָ֣ תִֽחְיֶ֔ה וְאֶת־אָחִ֖יךָ תַּעֲבֹ֑ד וְהָיָה֙ כַּאֲשֶׁ֣ר תָּרִ֔יד וּפָרַקְתָּ֥ עֻלּ֖וֹ מֵעַ֥ל צַוָּארֶֽךָ:
[מא] וַיִּשְׂטֹ֤ם עֵשָׂו֙ אֶֽת־יַעֲקֹ֔ב עַ֨ל־הַבְּרָכָ֔ה אֲשֶׁ֥ר בֵּרֲכ֖וֹ אָבִ֑יו וַיֹּ֨אמֶר עֵשָׂ֜ו בְּלִבּ֗וֹ יִקְרְבוּ֙ יְמֵי֙ אֵ֣בֶל אָבִ֔י וְאַהַרְגָ֖ה אֶת־יַעֲקֹ֥ב אָחִֽי:
[מב] וַיֻּגַּ֣ד לְרִבְקָ֔ה אֶת־דִּבְרֵ֥י עֵשָׂ֖ו בְּנָ֣הּ הַגָּדֹ֑ל וַתִּשְׁלַ֞ח וַתִּקְרָ֤א לְיַֽעֲקֹב֙ בְּנָ֣הּ הַקָּטָ֔ן וַתֹּ֣אמֶר אֵלָ֔יו הִנֵּה֙ עֵשָׂ֣ו אָחִ֔יךָ מִתְנַחֵ֥ם לְךָ֖ לְהָרְגֶֽךָ:
[מג] וְעַתָּ֥ה בְנִ֖י שְׁמַ֣ע בְּקֹלִ֑י וְק֧וּם בְּרַח־לְךָ֛ אֶל־לָבָ֥ן אָחִ֖י חָרָֽנָה:
[מד] וְיָשַׁבְתָּ֥ עִמּ֖וֹ יָמִ֣ים אֲחָדִ֑ים עַ֥ד אֲשֶׁר־תָּשׁ֖וּב חֲמַ֥ת אָחִֽיךָ:
[מה] עַד־שׁ֨וּב אַף־אָחִ֜יךָ מִמְּךָ֗ וְשָׁכַח֙ אֵ֣ת אֲשֶׁר־עָשִׂ֣יתָ לּ֔וֹ וְשָׁלַחְתִּ֖י וּלְקַחְתִּ֣יךָ מִשָּׁ֑ם לָמָ֥ה אֶשְׁכַּ֛ל גַּם־שְׁנֵיכֶ֖ם י֥וֹם אֶחָֽד:
[מו] וַתֹּ֤אמֶר רִבְקָה֙ אֶל־יִצְחָ֔ק קַ֣צְתִּי בְחַיַּ֔י מִפְּנֵ֖י בְּנ֣וֹת חֵ֑ת אִם־לֹקֵ֣חַ יַ֠עֲקֹב אִשָּׁ֨ה מִבְּנֽוֹת־חֵ֤ת כָּאֵ֙לֶּה֙ מִבְּנ֣וֹת הָאָ֔רֶץ לָ֥מָּה לִּ֖י חַיִּֽים:

פרק כז
(א) הנני - ז' בתורה (בצירה): בר' כב , א , יא; כז , א; לא , יא; לז , יג; מו , ב; שמ' ג , ד. (ג) וצא - ב': בר' כז , ג; שמ' יז , ט. (ד) ועשה - ג' ראשי פסוקים: בר' כז , ד; שמ' כה , יט; כח , מב. (ה) ורבקה - ג': בר' כה , כח; כז , ה , ו. שמעת - ה' בפתח: *בר' יח , י; כז , ה; מ"א י , א; מש' טו , לא; כ , יב. בדבר - ב': בר' כז , ה; מש' כג , טז. ואחד: ובדבר - יש' לב , ז. (ו) ורבקה - ג': בר' כה , כח; כז , ה , ו. (ז) הביאה - ג' בקמץ: בר' כז , ז; עמ' ד , א; מש' כג , יב. וחד: והביאה - בר' כז , ד. ואברככה - ב' , חד מלא וחד חסר: בר' יב , ב; כז , ז. (ח) לאשר אני - ב': בר' כז , ח; יר' לח , כ. (ט) וקח - י"ג: בר' כז , ט; כח , ב; לא , לב; שמ' יז , ה; *במ' יז , יז; ש"א ב , טז; כ , לא; ש"ב ב , כא; מ"ב ד , כט; ט , א; יר' יג , ו; הו' יד , ג; מש' ד , י. טבים - ה' חסר (בלישנא): בר' כז , ט; דב' ח , יב; ש"א כה , טו; מ"א ב , לב; יואל ד , ה. כ , כ. אהב - ט': בר' כז , ט , יד; ש"א א , ה; הו' יב , ח; מל' ב , יא; תה' יא , ז; מז , ה; עח , סח; צט , ד. (י) בעבר - ב' חסר: בר' כז , י , לא. לפני מותו - ד': בר' כז , י; נ , טז; דב' לג , א; דה"א כב , ה. (יא) חלק - ג' (בקמץ): בר' כז , יא; יח' יב , כד; מש' כו , כח. וחד: וחלק - מש' ה , ג. (יג) ולך - י"א: בר' כב , ב; כז , יג; שו' יח , יט; ש"א טז , א; כט , ז; ש"ב יד , כא; מ"ב ו , ג; ח , ח; ט , א; יח' ג , א , יא. (יד) ויבא - נ"א , י"ח מנהן בתורה: בר' ב , יט; ד , ג; ח , ט; כז , יד , כה , לא , לג; כט , כג; ל , יד; לז , ב; מג , יז , כד; מז , ז , יד; *שמ' ד , ו; לז , ה; לח , ז; מ , כא; יהו' כד , ז; ש"א יח , כז; יט , ז; ש"ב יד , כג; מ"א ב , מ; ז , נא; טו , טו; כ , לט; מ"ב ד , מב; ה , ו; יא , ד; יז , כד; כ , כ; כג , ח; יש' לא , ב; יר' מ , ג; יח' ח , ז , יד , טז; יז , יב , יג; מ , א , ג (מלא יו"ד); תה' קה , מ; אס' ה , י; נחמ' יג , יח; דה"א ד , י; דה"ב ה , א; טו , יח; כה , יד; כט , ד; לג , יא; לד , טז. אהב - ט': ראה לעיל , ט. (יז) ואת - הלחם - ג': בר' כז , יז; שמ' כט , לב; וי' ח , לא. עשתה - ה' בקמץ: בר' כז , יז; ש"ב יג , י; יש' סו , ב; אס' ב , א; ה , יב. (יח) הנני - ב' דגשים: בר' כב , ז; כז , יח. (יט) בכרך - ב' וחסר: בר' כז , יט; שמ' ד , כג. (כא) האתה זה - ד': בר' כז , כא; ש"ב ב , כ; מ"א יח , ז , יז. אם - לא - ז' סופי פסוקים: בר' כד , כא; כז , כא; לז , לב; שמ' טז , ד; במ' יא , כג; דב' ח , ב; שו' ב , כב. (כה) ויגש - ה' (בסגול או בצירה): *בר' כז , כה; מח , י , יג; וי' ח , יד; ש"א ל , ז. ויבא - נ"א , י"ח מנהן בתורה: ראה לעיל , יד. לו - י"ד בטעמא (מרכא כפולה): בר' כז , כה; שמ' ה , טו; וי' י , א; במ' יד , ג; לב , מב; מ"א י , ג; כ , כט; יח' יד , ד; חב' א , ג; זכ' ג , ב; עז' ז , כה; *נחמ' ג , לח; דה"ב ט , ב; כ , ל. (כז) וירח - ב': בר' ח , כא; כז , כז. כריח - ב': בר' כז , כז; שה"ש ד , יא. ברכו - ד': בר' כז , כז , מא; יש' יט , כה; דה"א כו , ה. (כח) ויתן - לך האלהים - ז' (נתינה האלהים): בר' כז , כח; שו' ז , יד; דנ' א , ט , יז; דה"א כה , ה; דה"ב ט , כג; יח , ה. (ניסוח אחר של ההערה ראה דה"ב ט , כג). ויתן - י"ג (רפין): *בר' כג , ט; כז , כח; כח , ד; ש"א ב , י; יב , יז; כח , יט; מ"א ב , יז; יד , טז; כב , ו; תה' לז , ד; עב , טו; מש' כט , יז; דה"ב יח , ה. מטל - ג': בר' כז , כח; דב' לג , יג; חגי א , י. ותירש - ג' חסר (בלישנא): בר' כז , כח , לז; *יר' לא , יא. (כט) וישתחוו - ז' רפין: בר' כז , כט (פעמיים , אחת קרי); יש' מט , ז; צפ' ב , יא; תה' כב , כח; עב , יא; פו , ט. הוה - ב' , חד כתיב ה"א וחד כתיב אל"ף: בר' כז , כט; איוב לז , ו. (ל) לברך - ט': בר' כז , ל; *במ' כד , א; דב' כז , יב; יהו' ח , לג; ש"א כה , יד; ש"ב ו , כ; מ"א א , מז; דה"א טז , מג; יז , כז. יצא - ז' (ד' חסר וג' מלא): בר' ח , ז; כז , ל; *במ' לה , כו; ש"ב טז , ה; יח , ב; מ"ב ה , יא; יר' לח , יז. מאת פני - ה': בר' כז , ל; שמ' י , יא; *וי' י , ד; מ"ב טז , יד; איוב ב , ז. (לא) ויבא - נ"א , י"ח מנהן בתורה: ראה לעיל , יד. ויאכל - ה' (רפין): בר' כז , לא; שמ' ב , כ; י , יב; מ"א יג , יח; שה"ש ד , טז. (לג) ויבא - נ"א , י"ח מנהן בתורה: ראה לעיל , יד. ואברכהו - ב' , חד פתח וחד קמץ: בר' כז , לג; יש' נא , ב. (לד) צעקה - ה': כל התורה (בר' כז , לד; שמ' יא , ו; יב , ל - כל אלה נמנים כאחד); יש' ה , ז; יר' מח , ג; מט , כא; צפ' א , י. (ניסוח אחר של מסורה זאת ראה יש' ה , ז). (לה) ברכתך - ב': בר' כז , לה; תה' ג , ט. (לו) הכי - ה': *בר' כז , לו; כט , טו; ש"ב ט , א; כג , יט; איוב ו , כב. ויאמר - צ"א (בפתח): בר' יד , יט; טו , ח; טז , ח; יח , ג , כג , כז , כט; יט , ז; כ , ד; כד , יב , לד; כז , לו; כח , יג , יז; ל , כח; לג , ה; לז , ל; מג , כט; מז , ל; מח , ט , טו; שמ' ב , יד; ה , כב; לב , ה , לא; לג , יד , יח; במ' יא , כז , כח; כא , ב; כג , ז , יב , יח; כד , ג , טו , כ , כא , כג; דב' לג , ב , ז; יהו' ז , כ; שו' ו , יח; ח , יט; יא , ל; יג , ח; טו , יח; טז , כח; כ , ד; ש"א ג , יח; ז , יב; כב , ט , יד; ש"ב ג , לג; טו , כא; יט , כז; כ , כ; כב , ב; כג , טו; מ"א א , כט; ח , כג; יז , י , יא , כ , כא; יח , לו; מ"ב א , ח; ב , יד; ו , יז , יח; ז , ב , יט; יג , יד; יט , טו; יש' לח , ג; עמ' א , ב; יונה ג , ד; ד , ב; זכ' א , י , יב; תה' יח , ב; איוב א , יד , טז , יז , יח; רות ב , ו; דנ' ח , טז; ט , כב; דה"א יא , יז; דה"ב ו , יד; יד , י; כ , ו. וכל 'ויען' 'ויסף' דאיוב דכותהון (כל המקרים בספר איוב , שבהם הצרוף 'ויען... ויאמר' , או 'ויסף... ויאמר' מנוקדים בפתח). לקח - ב' זקף קמץ: בר' כז , לו; יח' יח , יז. ברכתי - ג': *בר' כז , לו; לג , יא; *וי' כה , כא. (וחד: וברכתי - יש' מד , ג). (לז) ותירש - ג' חסר (בלישנא): בר' כז , כח , לז; *יר' לא , יא. ולכה - ד' מלא (בלישנא): בר' כז , לז; ש"ב יח , כב; יש' ג , ו; תה' פ , ג. (וכל לשון הליכה דכותהון בר מן ג' (לך): במ' כג , יג; שו' יט , יג; דה"ב כה , יז). (לח) וישא... קלו - ג': בר' כז , לח; שו' ט , ז; ש"א כד , טז. (לט) מושבך - ג': בר' כז , לט; במ' כד , כא; ש"א כ , יח. מעל - ג' (קמץ): *בר' כז , לט; מט , כה; תה' נ , ד. (מא) ברכו - ד': בר' כז , כז , מא; יש' יט , כה; דה"א כו , ה. ויאמר עשו בלבו (אמירה (פלוני) בליבו) - ו': בר' יז , יז; כז , מא; מ"א יב , כו; תה' יד , א; נג , ב; אס' ו , ו. (מב) ויגד - כ"ד: בר' כב , כ; כז , מב; לא , כב; לח , יג , כד; שמ' יד , ה; יהו' י , יז; שו' ט , כה , מז; ש"א טו , יב; יט , יט; כג , ז; כז , ד; ש"ב ו , יב; י , יז; יט , ב; כא , יא; מ"א א , נא; ב , כט , מא; מ"ב ו , יג; ח , ז; יש' ז , ב; דה"א יט , יז. הקטן - ה' (בקמץ , בלישנא): בר' כז , מב; ש"א טז , יא; ש"ב ט , יב; *אס' א , ה; דה"א יב , טו. וכל אתנחתא וסוף פסוק דכותהון. להרגך - ג': *בר' כז , מב; *נחמ' ו , י (פעמיים). (מג) חרנה - ב': בר' כז , מג; כח , י. (מד) אחדים - ד': *בר' יא , א; כז , מד; כט , כ; *דנ' יא , כ. (וחד 'לאחדים': יח' לז , יז). (מה) יום אחד - ב' סופי פסוקים בסיפרא: *בר' א , ה; כז , מה. יום אחד - י': בר' א , ה; כז , מה; לג , יג; במ' יא , יט; ש"א ט , טו; כז , א; יש' ט , יג; יונה ג , ד; זכ' יד , ז; עז' י , יז. (מו) לקח - ח': *בר' כז , מו; דב' כז , כה; מ"ב ב , ג , ה; יח' כד , טז; לז , יט , כא; מש' ט , ז.