מאגר הכתר בראשית פרק ל עם עין המסורה

פרק ל
[א] וַתֵּ֣רֶא רָחֵ֗ל כִּ֣י לֹ֤א יָֽלְדָה֙ לְיַֽעֲקֹ֔ב וַתְּקַנֵּ֥א רָחֵ֖ל בַּאֲחֹתָ֑הּ וַתֹּ֤אמֶר אֶֽל־יַעֲקֹב֙ הָֽבָה־לִּ֣י בָנִ֔ים וְאִם־אַ֖יִן מֵתָ֥ה אָנֹֽכִי:
[ב] וַיִּֽחַר־אַ֥ף יַעֲקֹ֖ב בְּרָחֵ֑ל וַיֹּ֗אמֶר הֲתַ֤חַת אֱלֹהִים֙ אָנֹ֔כִי אֲשֶׁר־מָנַ֥ע מִמֵּ֖ךְ פְּרִי־בָֽטֶן:
[ג] וַתֹּ֕אמֶר הִנֵּ֛ה אֲמָתִ֥י בִלְהָ֖ה בֹּ֣א אֵלֶ֑יהָ וְתֵלֵד֙ עַל־בִּרְכַּ֔י וְאִבָּנֶ֥ה גַם־אָנֹכִ֖י מִמֶּֽנָּה:
[ד] וַתִּתֶּן־ל֛וֹ אֶת־בִּלְהָ֥ה שִׁפְחָתָ֖הּ לְאִשָּׁ֑ה וַיָּבֹ֥א אֵלֶ֖יהָ יַעֲקֹֽב:
[ה] וַתַּ֣הַר בִּלְהָ֔ה וַתֵּ֥לֶד לְיַעֲקֹ֖ב בֵּֽן:
[ו] וַתֹּ֤אמֶר רָחֵל֙ דָּנַ֣נִּי אֱלֹהִ֔ים וְגַם֙ שָׁמַ֣ע בְּקֹלִ֔י וַיִּתֶּן־לִ֖י בֵּ֑ן עַל־כֵּ֛ן קָרְאָ֥ה שְׁמ֖וֹ דָּֽן:
[ז] וַתַּ֣הַר ע֔וֹד וַתֵּ֕לֶד בִּלְהָ֖ה שִׁפְחַ֣ת רָחֵ֑ל בֵּ֥ן שֵׁנִ֖י לְיַעֲקֹֽב:
[ח] וַתֹּ֣אמֶר רָחֵ֗ל נַפְתּוּלֵ֨י אֱלֹהִ֧ים ׀ נִפְתַּ֛לְתִּי עִם־אֲחֹתִ֖י גַּם־יָכֹ֑לְתִּי וַתִּקְרָ֥א שְׁמ֖וֹ נַפְתָּלִֽי:
[ט] וַתֵּ֣רֶא לֵאָ֔ה כִּ֥י עָמְדָ֖ה מִלֶּ֑דֶת וַתִּקַּח֙ אֶת־זִלְפָּ֣ה שִׁפְחָתָ֔הּ וַתִּתֵּ֥ן אֹתָ֛הּ לְיַעֲקֹ֖ב לְאִשָּֽׁה:
[י] וַתֵּ֗לֶד זִלְפָּ֛ה שִׁפְחַ֥ת לֵאָ֖ה לְיַעֲקֹ֥ב בֵּֽן:
[יא] וַתֹּ֥אמֶר לֵאָ֖ה בָּ֣גָ֑ד בָּ֣א גָ֑ד וַתִּקְרָ֥א אֶת־שְׁמ֖וֹ גָּֽד:
[יב] וַתֵּ֗לֶד זִלְפָּה֙ שִׁפְחַ֣ת לֵאָ֔ה בֵּ֥ן שֵׁנִ֖י לְיַעֲקֹֽב:
[יג] וַתֹּ֣אמֶר לֵאָ֔ה בְּאָשְׁרִ֕י כִּ֥י אִשְּׁר֖וּנִי בָּנ֑וֹת וַתִּקְרָ֥א אֶת־שְׁמ֖וֹ אָשֵֽׁר:
[רביעי] [יד] וַיֵּ֨לֶךְ רְאוּבֵ֜ן בִּימֵ֣י קְצִיר־חִטִּ֗ים וַיִּמְצָ֤א דֽוּדָאִים֙ בַּשָּׂדֶ֔ה וַיָּבֵ֣א אֹתָ֔ם אֶל־לֵאָ֖ה אִמּ֑וֹ וַתֹּ֤אמֶר רָחֵל֙ אֶל־לֵאָ֔ה תְּנִי־נָ֣א לִ֔י מִדּוּדָאֵ֖י בְּנֵֽךְ:
[טו] וַתֹּ֣אמֶר לָ֗הּ הַמְעַט֙ קַחְתֵּ֣ךְ אֶת־אִישִׁ֔י וְלָקַ֕חַת גַּ֥ם אֶת־דּוּדָאֵ֖י בְּנִ֑י וַתֹּ֣אמֶר רָחֵ֗ל לָכֵן֙ יִשְׁכַּ֤ב עִמָּךְ֙ הַלַּ֔יְלָה תַּ֖חַת דּוּדָאֵ֥י בְנֵֽךְ:
[טז] וַיָּבֹ֨א יַעֲקֹ֣ב מִן־הַשָּׂדֶה֘ בָּעֶרֶב֒ וַתֵּצֵ֨א לֵאָ֜ה לִקְרָאת֗וֹ וַתֹּ֙אמֶר֙ אֵלַ֣י תָּב֔וֹא כִּ֚י שָׂכֹ֣ר שְׂכַרְתִּ֔יךָ בְּדוּדָאֵ֖י בְּנִ֑י וַיִּשְׁכַּ֥ב עִמָּ֖הּ בַּלַּ֥יְלָה הֽוּא:
[יז] וַיִּשְׁמַ֥ע אֱלֹהִ֖ים אֶל־לֵאָ֑ה וַתַּ֛הַר וַתֵּ֥לֶד לְיַעֲקֹ֖ב בֵּ֥ן חֲמִישִֽׁי:
[יח] וַתֹּ֣אמֶר לֵאָ֗ה נָתַ֤ן אֱלֹהִים֙ שְׂכָרִ֔י אֲשֶׁר־נָתַ֥תִּי שִׁפְחָתִ֖י לְאִישִׁ֑י וַתִּקְרָ֥א שְׁמ֖וֹ יִשָּׂשכָֽר:
[יט] וַתַּ֤הַר עוֹד֙ לֵאָ֔ה וַתֵּ֥לֶד בֵּן־שִׁשִּׁ֖י לְיַעֲקֹֽב:
[כ] וַתֹּ֣אמֶר לֵאָ֗ה זְבָדַ֨נִי אֱלֹהִ֥ים ׀ אֹתִי֘ זֵ֣בֶד טוֹב֒ הַפַּ֙עַם֙ יִזְבְּלֵ֣נִי אִישִׁ֔י כִּֽי־יָלַ֥דְתִּי ל֖וֹ שִׁשָּׁ֣ה בָנִ֑ים וַתִּקְרָ֥א אֶת־שְׁמ֖וֹ זְבֻלֽוּן:
[כא] וְאַחַ֖ר יָ֣לְדָה בַּ֑ת וַתִּקְרָ֥א אֶת־שְׁמָ֖הּ דִּינָֽה:
[כב] וַיִּזְכֹּ֥ר אֱלֹהִ֖ים אֶת־רָחֵ֑ל וַיִּשְׁמַ֤ע אֵלֶ֙יהָ֙ אֱלֹהִ֔ים וַיִּפְתַּ֖ח אֶת־רַחְמָֽהּ:
[כג] וַתַּ֖הַר וַתֵּ֣לֶד בֵּ֑ן וַתֹּ֕אמֶר אָסַ֥ף אֱלֹהִ֖ים אֶת־חֶרְפָּתִֽי:
[כד] וַתִּקְרָ֧א אֶת־שְׁמ֛וֹ יוֹסֵ֖ף לֵאמֹ֑ר יֹסֵ֧ף יְהוָ֛ה לִ֖י בֵּ֥ן אַחֵֽר:
[כה] וַיְהִ֕י כַּאֲשֶׁ֛ר יָלְדָ֥ה רָחֵ֖ל אֶת־יוֹסֵ֑ף וַיֹּ֤אמֶר יַֽעֲקֹב֙ אֶל־לָבָ֔ן שַׁלְּחֵ֙נִי֙ וְאֵ֣לְכָ֔ה אֶל־מְקוֹמִ֖י וּלְאַרְצִֽי:
[כו] תְּנָ֞ה אֶת־נָשַׁ֣י וְאֶת־יְלָדַ֗י אֲשֶׁ֨ר עָבַ֧דְתִּי אֹתְךָ֛ בָּהֵ֖ן וְאֵלֵ֑כָה כִּ֚י אַתָּ֣ה יָדַ֔עְתָּ אֶת־עֲבֹדָתִ֖י אֲשֶׁ֥ר עֲבַדְתִּֽיךָ:
[כז] וַיֹּ֤אמֶר אֵלָיו֙ לָבָ֔ן אִם־נָ֛א מָצָ֥אתִי חֵ֖ן בְּעֵינֶ֑יךָ נִחַ֕שְׁתִּי וַיְבָרֲכֵ֥נִי יְהוָ֖ה בִּגְלָלֶֽךָ:
[חמישי] [כח] וַיֹּאמַ֑ר נָקְבָ֧ה שְׂכָרְךָ֛ עָלַ֖י וְאֶתֵּֽנָה:
[כט] וַיֹּ֣אמֶר אֵלָ֔יו אַתָּ֣ה יָדַ֔עְתָּ אֵ֖ת אֲשֶׁ֣ר עֲבַדְתִּ֑יךָ וְאֵ֛ת אֲשֶׁר־הָיָ֥ה מִקְנְךָ֖ אִתִּֽי:
[ל] כִּ֡י מְעַט֩ אֲשֶׁר־הָיָ֨ה לְךָ֤ לְפָנַי֙ וַיִּפְרֹ֣ץ לָרֹ֔ב וַיְבָ֧רֶךְ יְהוָ֛ה אֹתְךָ֖ לְרַגְלִ֑י וְעַתָּ֗ה מָתַ֛י אֶעֱשֶׂ֥ה גַם־אָנֹכִ֖י לְבֵיתִֽי:
[לא] וַיֹּ֖אמֶר מָ֣ה אֶתֶּן־לָ֑ךְ וַיֹּ֤אמֶר יַֽעֲקֹב֙ לֹא־תִתֶּן־לִ֣י מְא֔וּמָה אִם־תַּֽעֲשֶׂה־לִּי֙ הַדָּבָ֣ר הַזֶּ֔ה אָשׁ֛וּבָה אֶרְעֶ֥ה צֹאנְךָ֖ אֶשְׁמֹֽר:
[לב] אֶעֱבֹ֨ר בְּכָל־צֹאנְךָ֜ הַיּ֗וֹם הָסֵ֨ר מִשָּׁ֜ם כָּל־שֶׂ֣ה׀ נָקֹ֣ד וְטָל֗וּא וְכָל־שֶׂה־חוּם֙ בַּכְּשָׂבִ֔ים וְטָל֥וּא וְנָקֹ֖ד בָּעִזִּ֑ים וְהָיָ֖ה שְׂכָרִֽי:
[לג] וְעָֽנְתָה־בִּ֤י צִדְקָתִי֙ בְּי֣וֹם מָחָ֔ר כִּֽי־תָב֥וֹא עַל־שְׂכָרִ֖י לְפָנֶ֑יךָ כֹּ֣ל אֲשֶׁר־אֵינֶנּוּ֩ נָקֹ֨ד וְטָל֜וּא בָּעִזִּ֗ים וְחוּם֙ בַּכְּשָׂבִ֔ים גָּנ֥וּב ה֖וּא אִתִּֽי:
[לד] וַיֹּ֥אמֶר לָבָ֖ן הֵ֑ן ל֖וּ יְהִ֥י כִדְבָרֶֽךָ:
[לה] וַיָּ֣סַר בַּיּוֹם֩ הַה֨וּא אֶת־הַתְּיָשִׁ֜ים הָעֲקֻדִּ֣ים וְהַטְּלֻאִ֗ים וְאֵ֤ת כָּל־הָֽעִזִּים֙ הַנְּקֻדּ֣וֹת וְהַטְּלֻאֹ֔ת כֹּ֤ל אֲשֶׁר־לָבָן֙ בּ֔וֹ וְכָל־ח֖וּם בַּכְּשָׂבִ֑ים וַיִּתֵּ֖ן בְּיַד־בָּנָֽיו:
[לו] וַיָּ֗שֶׂם דֶּ֚רֶךְ שְׁלֹ֣שֶׁת יָמִ֔ים בֵּינ֖וֹ וּבֵ֣ין יַעֲקֹ֑ב וְיַעֲקֹ֗ב רֹעֶ֛ה אֶת־צֹ֥אן לָבָ֖ן הַנּוֹתָרֹֽת:
[לז] וַיִּֽקַּֽח־ל֣וֹ יַעֲקֹ֗ב מַקַּ֥ל לִבְנֶ֛ה לַ֖ח וְל֣וּז וְעַרְמ֑וֹן וַיְפַצֵּ֤ל בָּהֵן֙ פְּצָל֣וֹת לְבָנ֔וֹת מַחְשֹׂף֙ הַלָּבָ֔ן אֲשֶׁ֖ר עַל־הַמַּקְלֽוֹת:
[לח] וַיַּצֵּ֗ג אֶת־הַמַּקְלוֹת֙ אֲשֶׁ֣ר פִּצֵּ֔ל בָּרֳהָטִ֖ים בְּשִֽׁקֲת֣וֹת הַמָּ֑יִם אֲשֶׁר֩ תָּבֹ֨אןָ הַצֹּ֤אן לִשְׁתּוֹת֙ לְנֹ֣כַח הַצֹּ֔אן וַיֵּחַ֖מְנָה בְּבֹאָ֥ן לִשְׁתּֽוֹת:
[לט] וַיֶּחֱמ֥וּ הַצֹּ֖אן אֶל־הַמַּקְל֑וֹת וַתֵּלַ֣דְןָ הַצֹּ֔אן עֲקֻדִּ֥ים נְקֻדִּ֖ים וּטְלֻאִֽים:
[מ] וְהַכְּשָׂבִים֘ הִפְרִ֣יד יַעֲקֹב֒ וַ֠יִּתֵּן פְּנֵ֨י הַצֹּ֧אן אֶל־עָקֹ֛ד וְכָל־ח֖וּם בְּצֹ֣אן לָבָ֑ן וַיָּֽשֶׁת־ל֤וֹ עֲדָרִים֙ לְבַדּ֔וֹ וְלֹ֥א שָׁתָ֖ם עַל־צֹ֥אן לָבָֽן:
[מא] וְהָיָ֗ה בְּכָל־יַחֵם֘ הַצֹּ֣אן הַמְקֻשָּׁרוֹת֒ וְשָׂ֨ם יַעֲקֹ֧ב אֶת־הַמַּקְל֛וֹת לְעֵינֵ֥י הַצֹּ֖אן בָּרֳהָטִ֑ים לְיַחְמֵ֖נָּה בַּמַּקְלֽוֹת:
[מב] וּבְהַעֲטִ֥יף הַצֹּ֖אן לֹ֣א יָשִׂ֑ים וְהָיָ֤ה הָֽעֲטֻפִים֙ לְלָבָ֔ן וְהַקְּשֻׁרִ֖ים לְיַעֲקֹֽב:
[מג] וַיִּפְרֹ֥ץ הָאִ֖ישׁ מְאֹ֣ד מְאֹ֑ד וַֽיְהִי־לוֹ֙ צֹ֣אן רַבּ֔וֹת וּשְׁפָחוֹת֙ וַעֲבָדִ֔ים וּגְמַלִּ֖ים וַחֲמֹרִֽים:

פרק ל
(א) מתה - ב' מלרע (בלישנא): בר' ל , א; זכ' יא , ט. (ב) התחת - ג': *בר' ל , ב; נ , יט; ש"ב יט , כב. (ו) קראה - ג': בר' כט , לה; ל , ו; דה"א ד , ט. (ז) ותהר עוד ותלד - ז': ראה לעיל כט , לג. (ח) יכלתי - ג': *בר' ל , ח; שו' ח , ג; תה' מ , יג. ותקרא שמו - ט': ראה בר' כט , לב. (ט) עמדה - ד': בר' ל , ט; מ"ב יג , ו; תה' כו , יב; *קה' ב , ט. (יא) ותקרא את - שמו - י': *בר' ד , כה; ל , יא , יג , כ , כד; לח , ד , ה; שו' יג , כד; ש"א א , כ; ש"ב יב , כד. (וכל 'ויקרא' דכותהון בר מן ו' ('ויקרא שמו'): *בר' כה , כו; לה , ח; לח , כט , ל; *שמ' יז , טו; יש' ט , ה). בגד (בא גד קרי) - ה"י כתב מלה חדה (אחת) וקרי תרתין מלין (שתי מלים): *בר' ל , יא; שמ' ד , ב; דב' לג , ב; יש' ג , טו; יר' ו , כט; יח , ג; יח' ח , ו; תה' י , י; נה , טז; קכג , ד; איוב לח , א; מ , ו; נחמ' ב , יג; דה"א ט , ד; כז , יב. וחלופיהון ח' כתיב תרתין וקרי חדה: שו' טז , כה; ש"א ט , א; כד , ח; יש' ט , ו; מד , כד; *איכה א , ו; ד , ג; דה"ב לד , ו. (יג) ותקרא את - שמו - י': ראה לעיל , יא. (יד) ויבא - נ"א , י"ח מנהן בתורה: ראה בר' כז , יד. (טו) אישי - ח': ראה בר' כט , לב. ולקחת - ד' רפין: *בר' ל , טו; מג , יח; מ"ב ה , כו; מל' ב , יג. (טז) בלילה הוא - ד': *בר' יט , לג; ל , טז; לב , כג; ש"א יט , י. ושאר 'בלילה ההוא'. (יח) לאישי - ב': בר' ל , יח; ש"ב יד , ז. ותקרא שמו - ט': ראה בר' כט , לב. (יט) ותהר עוד ותלד - ז': ראה לעיל כט , לג. בן (בצירה) - ד' מקפין בתרתין נקוטין מטעיין (ארבע פעמים מנוקדת התיבה 'בן' בצירה , למרות שיש אחריה מקף , ועשויים לטעות בניקודה): בר' ל , יט; ש"א כב , כ; ש"ב ט , יב; יח' יח , י. (כ) אישי - ח': ראה בר' כט , לב. ותקרא את - שמו - י': ראה לעיל , יא. זבלון - ט' כתיב כן (בלישנא): *בר' ל , כ; לה , כג; מו , יד; יהו' יט , כז , לד; שו' ד , ו; ה , יח; ו , לה; יש' ח , כג. וכל כתיבייא דכותהון בר מן חד: דה"א כז , יט. (כב) ויזכר אלהים - ד': בר' ח , א; יט , כט; ל , כב; שמ' ב , כד. (כד) ותקרא את - שמו - י': ראה לעיל , יא. (כו) בהן - ה"י (בצירה): בר' יט , כט; ל , כו , לז; *שמ' כה , כט; לז , טז; וי' י , א; יא , כא; יד , מ; *במ' י , ג; טז , ז; דב' כח , נב; יר' ד , כט; מח , ט; נא , מג (פעמיים). ואלכה - ב': *בר' ל , כו; ש"ב ג , כא. כי אתה - ז' בתורה: בר' ל , כו; שמ' יט , כג; במ' יד , יד; כב , לד; דב' יח , ט; לא , ז , כג. (כח) ויאמר - י' ראשי פסוקים בתורה: בר' טו , ח; טז , ח; יח , ג; יט , ז; כד , יב , לד; ל , כח; שמ' לג , יד , יח; דב' לג , ב. ויאמר - צ"א (בפתח): ראה בר' כז , לו. שכרך - ב': בר' טו , א; ל , כח. ואתנה - ב': בר' ל , כח; תה' נא , יח. (ל) לרגלי - ח' (בלישנא) וכל לשון מנין דכותהון: בר' ל , ל; תה' כו , יב; לח , יז; צד , ח; קטז , ח; קיט , קה; איוב כג , יא; לא , ה. לרגלי - ב': בר' ל , ל; תה' קיט , קה. (לא) תעשה לי הדבר (עשייה הדבר) - י"א חסר 'את': בר' יט , כב; ל , לא; לד , יד , יט; שמ' א , יח; ט , ה; שו' ו , כט (פעמיים); יא , לז; ש"ב ב , ו; מ"ב ח , יג. (לב) בכשבים - ז' (בלישנא): *בר' ל , לב , לג , לה , מ; וי' א , י; כב , יט; דב' יד , ד. בכשבים - ו' (בלישנא , צורות מיודעות): בר' ל , לב , לג , לה , מ; וי' א , י; כב , יט. בכשבים - ד': בר' ל , לב , לג , לה; וי' כב , יט. (לג) וענתה - ד': בר' ל , לג; דב' כה , ט; לא , כא; הו' ב , יז. ביום מחר - ב': בר' ל , לג; מש' כז , א. בכשבים - ז' (בלישנא): ראה לעיל , לב. בכשבים - ו' (בלישנא): ראה לעיל , לב. בכשבים - ד': בר' ל , לב , לג , לה; וי' כב , יט. (לד) לו - כ"ב (בלישנא): בר' יז , יח; כג , יג; ל , לד; נ , טו; במ' יד , ב (פעמיים); כ , ג; כב , כט; דב' לב , כט; יהו' ז , ז; שו' ח , יט; יג , כג; ש"א יד , ל; ש"ב יח , יב; יט , ז; יש' מח , יח; סג , יט; יח' יד , טו; מי' ב , יא; תה' פא , יד; איוב ו , ב; טז , ד. כדברך - י"ג חסר (בלישנא): בר' ל , לד; מז , ל; במ' יד , כ; תה' קיט , ט , טז , יז , כה , כח , מב , סה , קא , קה , קז. (לה) הנקדות - ב' (בלישנא): בר' ל , לה; שה"ש א , יא. בכשבים - ז' (בלישנא): ראה לעיל , לב. בכשבים - ו' (בלישנא): ראה לעיל , לב. בכשבים - ד': בר' ל , לב , לג , לה; וי' כב , יט. (לו) וישם - ל"ג בתורה: ראה בר' כח , יא. ויעקב - י"ד: ראה בר' כה , כז. הנותרת - ג' , ב' חסר וחד מלא: בר' ל , לו; וי' כז , יח; יר' לד , ז. (לז) לח - ג' , ב' פתח וחד קמץ: *בר' ל , לז; יח' יז , כד; כא , ג. בהן - ה"י (בצירה): ראה בר' ל , כו. לבנות - ד' , ב' מלא וב' חסר (בשני לשונות): *בר' ל , לז; *וי' יג , לח , לט; יח' טז , סא. (לח) ויצג - ב': בר' ל , לח; שו' ח , כז. בבאן - ב' , חד חסר וחד מלא: *בר' ל , לח; יח' מב , יב. (מ) והכשבים - ז' (בלישנא): ראה לעיל , לב. והכשבים - ו' (בלישנא): ראה לעיל , לב. בצאן - ב': בר' ל , מ; תה' עד , א. וישת - ז' (בלישנא): בר' ל , מ; מח , יד; במ' כד , א; ש"א ב , ח; ש"ב כב , יב; תה' יח , יב; רות ג , טו. וישת - ו': בר' ל , מ; מח , יד; במ' כד , א; ש"א ב , ח; ש"ב כב , יב; רות ג , טו. (מא) ושם - ח': *בר' ל , מא; דב' כב , יד; כז , טו; ש"א ח , יא; יש' כח , כה; יר' יז , ה; זכ' י , ג; תה' נ , כג. במקלות - ב': בר' ל , מא; ש"א יז , מג. (מב) העטפים - ב' , חד חסר וחד מלא: *בר' ל , מב; איכה ב , יט. (מג) מאד מאד - ו': בר' ז , יט; ל , מג; במ' יד , ז; מ"א ז , מז; מ"ב י , ד; יח' לז , י.