מאגר הכתר בראשית פרק לה עם עין המסורה

פרק לה
[א] וַיֹּ֤אמֶר אֱלֹהִים֙ אֶֽל־יַעֲקֹ֔ב ק֛וּם עֲלֵ֥ה בֵֽית־אֵ֖ל וְשֶׁב־שָׁ֑ם וַעֲשֵׂה־שָׁ֣ם מִזְבֵּ֔חַ לָאֵל֙ הַנִּרְאֶ֣ה אֵלֶ֔יךָ בְּבָ֨רְחֲךָ֔ מִפְּנֵ֖י עֵשָׂ֥ו אָחִֽיךָ:
[ב] וַיֹּ֤אמֶר יַֽעֲקֹב֙ אֶל־בֵּית֔וֹ וְאֶ֖ל כָּל־אֲשֶׁ֣ר עִמּ֑וֹ הָסִ֜רוּ אֶת־אֱלֹהֵ֤י הַנֵּכָר֙ אֲשֶׁ֣ר בְּתֹכֲכֶ֔ם וְהִֽטַּהֲר֔וּ וְהַחֲלִ֖יפוּ שִׂמְלֹתֵיכֶֽם:
[ג] וְנָק֥וּמָה וְנַעֲלֶ֖ה בֵּֽית־אֵ֑ל וְאֶעֱשֶׂה־שָּׁ֣ם מִזְבֵּ֗חַ לָאֵ֞ל הָעֹנֶ֤ה אֹתִי֙ בְּי֣וֹם צָרָתִ֔י וַֽיְהִי֙ עִמָּדִ֔י בַּדֶּ֖רֶךְ אֲשֶׁ֥ר הָלָֽכְתִּי:
[ד] וַיִּתְּנ֣וּ אֶֽל־יַעֲקֹ֗ב אֵ֣ת כָּל־אֱלֹהֵ֤י הַנֵּכָר֙ אֲשֶׁ֣ר בְּיָדָ֔ם וְאֶת־הַנְּזָמִ֖ים אֲשֶׁ֣ר בְּאָזְנֵיהֶ֑ם וַיִּטְמֹ֤ן אֹתָם֙ יַעֲקֹ֔ב תַּ֥חַת הָאֵלָ֖ה אֲשֶׁ֥ר עִם־שְׁכֶֽם:
[ה] וַיִּסָּ֑עוּ וַיְהִ֣י׀ חִתַּ֣ת אֱלֹהִ֗ים עַל־הֶֽעָרִים֙ אֲשֶׁר֙ סְבִיב֣וֹתֵיהֶ֔ם וְלֹ֣א רָֽדְפ֔וּ אַחֲרֵ֖י בְּנֵ֥י יַעֲקֹֽב:
[ו] וַיָּבֹ֨א יַעֲקֹ֜ב ל֗וּזָה אֲשֶׁר֙ בְּאֶ֣רֶץ כְּנַ֔עַן הִ֖וא בֵּֽית־אֵ֑ל ה֖וּא וְכָל־הָעָ֥ם אֲשֶׁר־עִמּֽוֹ:
[ז] וַיִּ֤בֶן שָׁם֙ מִזְבֵּ֔חַ וַיִּקְרָא֙ לַמָּק֔וֹם אֵ֖ל בֵּֽית־אֵ֑ל כִּ֣י שָׁ֗ם נִגְל֤וּ אֵלָיו֙ הָאֱלֹהִ֔ים בְּבָרְח֖וֹ מִפְּנֵ֥י אָחִֽיו:
[ח] וַתָּ֤מָת דְּבֹרָה֙ מֵינֶ֣קֶת רִבְקָ֔ה וַתִּקָּבֵ֛ר מִתַּ֥חַת לְבֵֽית־אֵ֖ל תַּ֣חַת הָאַלּ֑וֹן וַיִּקְרָ֥א שְׁמ֖וֹ אַלּ֥וֹן בָּכֽוּת: פ
[ט] וַיֵּרָ֨א אֱלֹהִ֤ים אֶֽל־יַעֲקֹב֙ ע֔וֹד בְּבֹא֖וֹ מִפַּדַּ֣ן אֲרָ֑ם וַיְבָ֖רֶךְ אֹתֽוֹ:
[י] וַיֹּֽאמֶר־ל֥וֹ אֱלֹהִ֖ים שִׁמְךָ֣ יַעֲקֹ֑ב לֹא־יִקָּרֵא֩ שִׁמְךָ֨ ע֜וֹד יַעֲקֹ֗ב כִּ֤י אִם־יִשְׂרָאֵל֙ יִהְיֶ֣ה שְׁמֶ֔ךָ וַיִּקְרָ֥א אֶת־שְׁמ֖וֹ יִשְׂרָאֵֽל:
[יא] וַיֹּאמֶר֩ ל֨וֹ אֱלֹהִ֜ים אֲנִ֨י אֵ֤ל שַׁדַּי֙ פְּרֵ֣ה וּרְבֵ֔ה גּ֛וֹי וּקְהַ֥ל גּוֹיִ֖ם יִהְיֶ֣ה מִמֶּ֑ךָּ וּמְלָכִ֖ים מֵחֲלָצֶ֥יךָ יֵצֵֽאוּ:
[ששי] [יב] וְאֶת־הָאָ֗רֶץ אֲשֶׁ֥ר נָתַ֛תִּי לְאַבְרָהָ֥ם וּלְיִצְחָ֖ק לְךָ֣ אֶתְּנֶ֑נָּה וּֽלְזַרְעֲךָ֥ אַחֲרֶ֖יךָ אֶתֵּ֥ן אֶת־הָאָֽרֶץ:
[יג] וַיַּ֥עַל מֵעָלָ֖יו אֱלֹהִ֑ים בַּמָּק֖וֹם אֲשֶׁר־דִּבֶּ֥ר אִתּֽוֹ:
[יד] וַיַּצֵּ֨ב יַעֲקֹ֜ב מַצֵּבָ֗ה בַּמָּק֛וֹם אֲשֶׁר־דִּבֶּ֥ר אִתּ֖וֹ מַצֶּ֣בֶת אָ֑בֶן וַיַּסֵּ֤ךְ עָלֶ֙יהָ֙ נֶ֔סֶךְ וַיִּצֹ֥ק עָלֶ֖יהָ שָֽׁמֶן:
[טו] וַיִּקְרָ֨א יַעֲקֹ֜ב אֶת־שֵׁ֣ם הַמָּק֗וֹם אֲשֶׁר֩ דִּבֶּ֨ר אִתּ֥וֹ שָׁ֛ם אֱלֹהִ֖ים בֵּֽית־אֵֽל:
[טז] וַיִּסְעוּ֙ מִבֵּ֣ית אֵ֔ל וַֽיְהִי־ע֥וֹד כִּבְרַת־הָאָ֖רֶץ לָב֣וֹא אֶפְרָ֑תָה וַתֵּ֥לֶד רָחֵ֖ל וַתְּקַ֥שׁ בְּלִדְתָּֽהּ:
[יז] וַיְהִ֥י בְהַקְשֹׁתָ֖הּ בְּלִדְתָּ֑הּ וַתֹּ֨אמֶר לָ֤הּ הַמְיַלֶּ֙דֶת֙ אַל־תִּ֣ירְאִ֔י כִּֽי־גַם־זֶ֥ה לָ֖ךְ בֵּֽן:
[יח] וַיְהִ֞י בְּצֵ֤את נַפְשָׁהּ֙ כִּ֣י מֵ֔תָה וַתִּקְרָ֥א שְׁמ֖וֹ בֶּן־אוֹנִ֑י וְאָבִ֖יו קָֽרָא־ל֥וֹ בִנְיָמִֽין:
[יט] וַתָּ֖מָת רָחֵ֑ל וַתִּקָּבֵר֙ בְּדֶ֣רֶךְ אֶפְרָ֔תָה הִ֖וא בֵּ֥ית לָֽחֶם:
[כ] וַיַּצֵּ֧ב יַעֲקֹ֛ב מַצֵּבָ֖ה עַל־קְבֻרָתָ֑הּ הִ֛וא מַצֶּ֥בֶת קְבֻֽרַת־רָחֵ֖ל עַד־הַיּֽוֹם:
[כא] וַיִּסַּ֖ע יִשְׂרָאֵ֑ל וַיֵּ֣ט אָֽהֳלֹ֔ה מֵהָ֖לְאָה לְמִגְדַּל־עֵֽדֶר:
[כב] וַיְהִ֗י בִּשְׁכֹּ֤ן יִשְׂרָאֵל֙ בָּאָ֣רֶץ הַהִ֔וא וַיֵּ֣לֶךְ רְאוּבֵ֗֔ן וַיִּשְׁכַּ֕ב֙ אֶת־בִּלְהָ֖ה֙ פִּילֶ֣גֶשׁ אָבִ֑֔יו וַיִּשְׁמַ֖ע יִשְׂרָאֵֽ֑ל פ
וַיִּהְי֥וּ בְנֵֽי־יַעֲקֹ֖ב שְׁנֵ֥ים עָשָֽׂר:

[כג] בְּנֵ֣י לֵאָ֔ה בְּכ֥וֹר יַעֲקֹ֖ב רְאוּבֵ֑ן וְשִׁמְעוֹן֙ וְלֵוִ֣י וִֽיהוּדָ֔ה וְיִשָּׂשכָ֖ר וּזְבֻלֽוּן:
[כד] בְּנֵ֣י רָחֵ֔ל יוֹסֵ֖ף וּבִנְיָמִֽן:
[כה] וּבְנֵ֤י בִלְהָה֙ שִׁפְחַ֣ת רָחֵ֔ל דָּ֖ן וְנַפְתָּלִֽי:
[כו] וּבְנֵ֥י זִלְפָּ֛ה שִׁפְחַ֥ת לֵאָ֖ה גָּ֣ד וְאָשֵׁ֑ר אֵ֚לֶּה בְּנֵ֣י יַעֲקֹ֔ב אֲשֶׁ֥ר יֻלַּד־ל֖וֹ בְּפַדַּ֥ן אֲרָֽם:
[כז] וַיָּבֹ֤א יַֽעֲקֹב֙ אֶל־יִצְחָ֣ק אָבִ֔יו מַמְרֵ֖א קִרְיַ֣ת הָאַרְבַּ֑ע הִ֣וא חֶבְר֔וֹן אֲשֶׁר־גָּֽר־שָׁ֥ם אַבְרָהָ֖ם וְיִצְחָֽק:
[כח] וַיִּהְי֖וּ יְמֵ֣י יִצְחָ֑ק מְאַ֥ת שָׁנָ֖ה וּשְׁמֹנִ֥ים שָׁנָֽה:
[כט] וַיִּגְוַ֨ע יִצְחָ֤ק וַיָּ֙מָת֙ וַיֵּאָ֣סֶף אֶל־עַמָּ֔יו זָקֵ֖ן וּשְׂבַ֣ע יָמִ֑ים וַיִּקְבְּר֣וּ אֹת֔וֹ עֵשָׂ֥ו וְיַעֲקֹ֖ב בָּנָֽיו: פ

פרק לה
(א) ויאמר אלהים - כ"ה: *בר' א , ג , ו , ט , יא , יד , כ , כד , כו , כט; ו , יג; ט , ח , יב , יז; יז , ט , טו , יט; כא , יב; לה , א; מו , ב; שמ' ג , יד; במ' כב , יב; מ"א ג , ה , יא; יונה ד , ט; דה"ב א , יא. לאל - י"א (בקמץ): בר' לה , א , ג; במ' ג , כד; תה' נז , ג; איוב יג , ח; כא , יד; כב , יז; לא , כח; לג , ו; לד , י , לז. הנראה - ב' בסגול: *בר' יב , ז; לה , א. (ב) ואל כל - ב' בסיפרא (בלישנא): *בר' כ , יג; לה , ב. אשר עמו - י"א: בר' כד , נד; לה , ב , ו; שו' ט , לד , מד , מח; ש"א ט , ה; יד , ב; כז , ב; ש"ב ב , ג; י , יג. וכל דברי הימים דכותהון. הסרו - ב' חסר (בלישנא): *בר' לה , ב; יר' ד , ד. בתככם - ב' חסר: בר' לה , ב; במ' לב , ל. בתככם - י"ב בתורה (חסר ומלא): בר' כג , ט; לה , ב; שמ' יב , מט; וי' טז , כט; יז , יב; יח , כו; כ , יד; כו , יא , יב , כה; במ' טו , יד; לב , ל. (ג) ונקומה - ג': בר' לה , ג; מג , ח; *עו' א , א. לאל - י"א (בקמץ): ראה לעיל , א. (ה) ויסעו - ב' , חד ראש פסוק וחד סוף פסוק: *בר' לה , ה; *במ' י , כח. סביבותיהם - ב' מלא: *בר' לה , ה; שו' ב , יב. (ו) לוזה - ד': *בר' לה , ו; יהו' טז , ב; יח , יג (פעמיים). וכל - העם - נ"א: בר' לה , ו; שמ' יא , ח; יח , יד; במ' יג , לב; יהו' א , ב; ה , ה; ח , ה; שו' ז , א , ז; ט , לד , מח; כ , כו; ש"א יג , ז; יד , כ; ש"ב ו , ב; יב , לא; טו , יז , כג (פעמיים) , ל; טז , ו , יד , טו; יז , כב; יח , ד , ה; כ , טו; מ"א יב , יב; כ , ח; מ"ב כג , ב; יר' כו , ז , ח , טז; כח , א; לד , י; לו , ט; מב , א; מג , ד; מד , טו; רות ד , ט; עז' ג , יא; דה"א כ , ג; כח , כא; דה"ב ז , ד , ה; י , יב; כג , ה , ו; כד , י; כט , לו; לד , ל. וכל ראשי פסוקים דכותהון (בו"ו החבור) בר מן ג' (בלי ו"ו החיבור): מ"א ט , כ; יח' מה , טז; דה"ב ח , ז. וכל - העם - נ' באמצעי הפסוקים: הפסוקים כמו בהערה הקודמת מלבד דה"ב ז , ה (שהוא סוף פסוק). וכל ראשי פסוקים דכותהון בר מן ג'. אשר עמו - י"א: ראה לעיל , ב. (ז) אל בית - אל - ב' (בלישנא): בר' לא , יג; לה , ז. (ח) דברה - ג' חסר: *בר' לה , ח; שו' ד , יד; ה , טו. ויקרא שמו - ו': ראה בר' כה , כו. אלון - ג': בר' לה , ח; הו' ד , יג; דה"א ד , לז. (ט) וירא - כ': ראה בר' כו , ב. (י) יקרא - כ"א (כולל 'יִקָּרֵה'): *בר' ב , כג; יז , ה; כא , יב; לה , י; במ' כג , ג; *דב' ג , יג; כב , ו; ש"א ט , ט; יש' א , כו; ד , א; יד , כ; לא , ד; לב , ה; לה , ח; נד , ה; נו , ז; סב , ד , יב; יר' יט , ו; מש' טז , כא; *אס' ד , יא. ויקרא את - שמו - י': בר' ד , כו; ה , ג , כט; לה , י; לח , ג; שמ' ב , כב; ש"ב יב , כה; מ"א ז , כא (פעמיים); דה"א ז , כג. (יא) יצאו - ד': *בר' יז , ו; לה , יא; יש' מט , יז; יח' מו , י. (יב) ואת - הארץ - ה': בר' לה , יב; מב , לד; מט , טו; דב' ג , יב; יר' כב , יב. וכל 'את - השמים ואת - הארץ' דכותהון. (יד) ויסך - ג': *בר' לה , יד; ש"ב כג , טז; מ"ב טז , יג. (טו) ויקרא יעקב את - שם המקום (קריאה את שם המקום) - ד': בר' כח , יט; לה , טו; במ' יא , לד; דה"ב כ , כו. (טז) מבית אל - כל 'בית - אל' בגעיה בר מן ג': בר' לה , טז; יהו' ח , יז; מ"א יב , לב. כברת - ג': בר' לה , טז; מח , ז; מ"ב ה , יט. אפרתה - ג' בסיפרא: בר' לה , טז , יט; מח , ז. (יז) כי - ה' מלין מן ב' אתין (אחד מחמשה פסוקים שיש בהם חמש מלים רצופות בנות שתי אותיות): בר' ה , לב; לה , יז; ש"א כ , כט; מ"א ג , כו; נחמ' ב , ב. (יח) ויהי - ה' בטעמא (גרשיים) בסיפרא: בר' י , יט; כ , יג; לה , יח; לט , ה; מג , כא. ותקרא שמו - ט': ראה בר' כט , לב. ואביו - ט': בר' לה , יח; לז , יא; מד , כ; וי' יט , ג; שו' יד , ד , ה; מ"א ז , יד; עמ' ב , ז; דה"ב ב , יג. בנימין - י"ז מלא (בלישנא): *בר' לה , יח; מב , ד; מג , יד , טז , כט; מה , יב; מט , כז; יהו' כא , יז; שו' ה , יד; י , ט; ש"א ט , א (קרי); יג , ב; ש"ב ג , יט; מ"א יב , כג; *יר' לב , ח; הו' ה , ח; *נחמ' יא , לו. (יט) אפרתה - ג' בסיפרא: בר' לה , טז , יט; מח , ז. (כ) על - קברתה - ב' (בלישנא): בר' לה , כ; מ"ב כג , ו. קברת - ג': בר' לה , כ; ש"א י , ב; יר' כב , יט. קברתה - ג' וחסר (בלישנא): בר' לה , כ; יח' לב , כג , כד. עד - היום - ט' מיחדין (הצירוף 'עד היום' מופיע ללא 'הזה' וללא 'ההוא'): בר' יט , לז , לח; לה , כ; ש"ב יט , כה; מ"ב י , כז; יח' כ , לא; דה"ב ח , טז; כ , כו; לה , כה. (כא) אהלה - ד' כתיב ה"א: *בר' ט , כא; יב , ח; יג , ג; לה , כא. (כג) ושמעון - ד': בר' לה , כג; מב , לו; מח , ה; דה"ב לד , ו. וזבלון - ט' כתיב כן (בלישנא): ראה בר' ל , כ. (כז) הארבע - ב': בר' לה , כז; נחמ' יא , כה. גר - שם - ד': בר' לה , כז; דב' יח , ו; שו' יז , ז; עז' א , ד. ויצחק - ה': ראה בר' כה , כו. (כח) ויהיו ימי - ג': *בר' ה , ד; יא , לב; לה , כח. (ושארא: 'ויהיו כל ימי'). (כט) ויאסף - ז' (הסמ"ך בסגול או בצירה): בר' כה , ח , יז; לה , כט; מט , לג; במ' יא , ל; דב' לב , נ; שו' כ , יא. ושבע - ג': בר' לה , כט; איוב יד , א; מב , יז. ויעקב - י"ד: ראה בר' כה , כז.