מאגר הכתר בראשית פרק לז עם עין המסורה

פרק לז
{פרשת וישב} [א] וַיֵּ֣שֶׁב יַֽעֲקֹ֔ב בְּאֶ֖רֶץ מְגוּרֵ֣י אָבִ֑יו בְּאֶ֖רֶץ כְּנָֽעַן:
[ב] אֵ֣לֶּה׀ תֹּלְד֣וֹת יַעֲקֹ֗ב יוֹסֵ֞ף בֶּן־שְׁבַֽע־עֶשְׂרֵ֤ה שָׁנָה֙ הָיָ֨ה רֹעֶ֤ה אֶת־אֶחָיו֙ בַּצֹּ֔אן וְה֣וּא נַ֗עַר אֶת־בְּנֵ֥י בִלְהָ֛ה וְאֶת־בְּנֵ֥י זִלְפָּ֖ה נְשֵׁ֣י אָבִ֑יו וַיָּבֵ֥א יוֹסֵ֛ף אֶת־דִּבָּתָ֥ם רָעָ֖ה אֶל־אֲבִיהֶֽם:
[ג] וְיִשְׂרָאֵ֗ל אָהַ֤ב אֶת־יוֹסֵף֙ מִכָּל־בָּנָ֔יו כִּֽי־בֶן־זְקֻנִ֥ים ה֖וּא ל֑וֹ וְעָ֥שָׂה ל֖וֹ כְּתֹ֥נֶת פַּסִּֽים:
[ד] וַיִּרְא֣וּ אֶחָ֗יו כִּֽי־אֹת֞וֹ אָהַ֤ב אֲבִיהֶם֙ מִכָּל־אֶחָ֔יו וַֽיִּשְׂנְא֖וּ אֹת֑וֹ וְלֹ֥א יָכְל֖וּ דַּבְּר֥וֹ לְשָׁלֹֽם:
[ה] וַיַּחֲלֹ֤ם יוֹסֵף֙ חֲל֔וֹם וַיַּגֵּ֖ד לְאֶחָ֑יו וַיּוֹסִ֥פוּ ע֖וֹד שְׂנֹ֥א אֹתֽוֹ:
[ו] וַיֹּ֖אמֶר אֲלֵיהֶ֑ם שִׁמְעוּ־נָ֕א הַחֲל֥וֹם הַזֶּ֖ה אֲשֶׁ֥ר חָלָֽמְתִּי:
[ז] וְ֠הִנֵּה אֲנַ֜חְנוּ מְאַלְּמִ֤ים אֲלֻמִּים֙ בְּת֣וֹךְ הַשָּׂדֶ֔ה וְהִנֵּ֛ה קָ֥מָה אֲלֻמָּתִ֖י וְגַם־נִצָּ֑בָה וְהִנֵּ֤ה תְסֻבֶּ֙ינָה֙ אֲלֻמֹּ֣תֵיכֶ֔ם וַתִּֽשְׁתַּחֲוֶ֖יןָ לַאֲלֻמָּתִֽי:
[ח] וַיֹּ֤אמְרוּ לוֹ֙ אֶחָ֔יו הֲמָלֹ֤ךְ תִּמְלֹךְ֙ עָלֵ֔ינוּ אִם־מָשׁ֥וֹל תִּמְשֹׁ֖ל בָּ֑נוּ וַיּוֹסִ֤פוּ עוֹד֙ שְׂנֹ֣א אֹת֔וֹ עַל־חֲלֹמֹתָ֖יו וְעַל־דְּבָרָֽיו:
[ט] וַיַּחֲלֹ֥ם עוֹד֙ חֲל֣וֹם אַחֵ֔ר וַיְסַפֵּ֥ר אֹת֖וֹ לְאֶחָ֑יו וַיֹּ֗אמֶר הִנֵּ֨ה חָלַ֤מְתִּֽי חֲלוֹם֙ ע֔וֹד וְהִנֵּ֧ה הַשֶּׁ֣מֶשׁ וְהַיָּרֵ֗חַ וְאַחַ֤ד עָשָׂר֙ כּֽוֹכָבִ֔ים מִֽשְׁתַּחֲוִ֖ים לִֽי:
[י] וַיְסַפֵּ֣ר אֶל־אָבִיו֘ וְאֶל־אֶחָיו֒ וַיִּגְעַר־בּ֣וֹ אָבִ֔יו וַיֹּ֣אמֶר ל֔וֹ מָ֛ה הַחֲל֥וֹם הַזֶּ֖ה אֲשֶׁ֣ר חָלָ֑מְתָּ הֲב֣וֹא נָב֗וֹא אֲנִי֙ וְאִמְּךָ֣ וְאַחֶ֔יךָ לְהִשְׁתַּחֲוֺ֥ת לְךָ֖ אָֽרְצָה:
[יא] וַיְקַנְאוּ־ב֖וֹ אֶחָ֑יו וְאָבִ֖יו שָׁמַ֥ר אֶת־הַדָּבָֽר:
[שני] [יב] וַיֵּלְכ֖וּ אֶחָ֑יו לִרְע֛וֹת אֶת־צֹ֥אן אֲבִיהֶ֖ם בִּשְׁכֶֽם:
[יג] וַיֹּ֨אמֶר יִשְׂרָאֵ֜ל אֶל־יוֹסֵ֗ף הֲל֤וֹא אַחֶ֙יךָ֙ רֹעִ֣ים בִּשְׁכֶ֔ם לְכָ֖ה וְאֶשְׁלָחֲךָ֣ אֲלֵיהֶ֑ם וַיֹּ֥אמֶר ל֖וֹ הִנֵּֽנִי:
[יד] וַיֹּ֣אמֶר ל֗וֹ לֶךְ־נָ֨א רְאֵ֜ה אֶת־שְׁל֤וֹם אַחֶ֙יךָ֙ וְאֶת־שְׁל֣וֹם הַצֹּ֔אן וַהֲשִׁבֵ֖נִי דָּבָ֑ר וַיִּשְׁלָחֵ֙הוּ֙ מֵעֵ֣מֶק חֶבְר֔וֹן וַיָּבֹ֖א שְׁכֶֽמָה:
[טו] וַיִּמְצָאֵ֣הוּ אִ֔ישׁ וְהִנֵּ֥ה תֹעֶ֖ה בַּשָּׂדֶ֑ה וַיִּשְׁאָלֵ֧הוּ הָאִ֛ישׁ לֵאמֹ֖ר מַה־תְּבַקֵּֽשׁ:
[טז] וַיֹּ֕אמֶר אֶת־אַחַ֖י אָנֹכִ֣י מְבַקֵּ֑שׁ הַגִּֽידָה־נָּ֣א לִ֔י אֵיפֹ֖ה הֵ֥ם רֹעִֽים:
[יז] וַיֹּ֤אמֶר הָאִישׁ֙ נָסְע֣וּ מִזֶּ֔ה כִּ֤י שָׁמַ֙עְתִּי֙ אֹֽמְרִ֔ים נֵלְכָ֖ה דֹּתָ֑יְנָה וַיֵּ֤לֶךְ יוֹסֵף֙ אַחַ֣ר אֶחָ֔יו וַיִּמְצָאֵ֖ם בְּדֹתָֽן:
[יח] וַיִּרְא֥וּ אֹת֖וֹ מֵרָחֹ֑ק וּבְטֶ֙רֶם֙ יִקְרַ֣ב אֲלֵיהֶ֔ם וַיִּֽתְנַכְּל֥וּ אֹת֖וֹ לַהֲמִיתֽוֹ:
[יט] וַיֹּאמְר֖וּ אִ֣ישׁ אֶל־אָחִ֑יו הִנֵּ֗ה בַּ֛עַל הַחֲלֹמ֥וֹת הַלָּזֶ֖ה בָּֽא:
[כ] וְעַתָּ֣ה׀ לְכ֣וּ וְנַהַרְגֵ֗הוּ וְנַשְׁלִכֵ֙הוּ֙ בְּאַחַ֣ד הַבֹּר֔וֹת וְאָמַ֕רְנוּ חַיָּ֥ה רָעָ֖ה אֲכָלָ֑תְהוּ וְנִרְאֶ֕ה מַה־יִּהְי֖וּ חֲלֹמֹתָֽיו:
[כא] וַיִּשְׁמַ֣ע רְאוּבֵ֔ן וַיַּצִּלֵ֖הוּ מִיָּדָ֑ם וַיֹּ֕אמֶר לֹ֥א נַכֶּ֖נּוּ נָֽפֶשׁ:
[כב] וַיֹּ֨אמֶר אֲלֵהֶ֣ם ׀ רְאוּבֵן֘ אַל־תִּשְׁפְּכוּ־דָם֒ הַשְׁלִ֣יכוּ אֹת֗וֹ אֶל־הַבּ֤וֹר הַזֶּה֙ אֲשֶׁ֣ר בַּמִּדְבָּ֔ר וְיָ֖ד אַל־תִּשְׁלְחוּ־ב֑וֹ לְמַ֗עַן הַצִּ֤יל אֹתוֹ֙ מִיָּדָ֔ם לַהֲשִׁיב֖וֹ אֶל־אָבִֽיו:
[שלישי] [כג] וַיְהִ֕י כַּאֲשֶׁר־בָּ֥א יוֹסֵ֖ף אֶל־אֶחָ֑יו וַיַּפְשִׁ֤יטוּ אֶת־יוֹסֵף֙ אֶת־כֻּתָּנְתּ֔וֹ אֶת־כְּתֹ֥נֶת הַפַּסִּ֖ים אֲשֶׁ֥ר עָלָֽיו:
[כד] וַיִּ֨קָּחֻ֔הוּ וַיַּשְׁלִ֥כוּ אֹת֖וֹ הַבֹּ֑רָה וְהַבּ֣וֹר רֵ֔ק אֵ֥ין בּ֖וֹ מָֽיִם:
[כה] וַיֵּשְׁבוּ֘ לֶאֱכָל־לֶחֶם֒ וַיִּשְׂא֤וּ עֵֽינֵיהֶם֙ וַיִּרְא֔וּ וְהִנֵּה֙ אֹרְחַ֣ת יִשְׁמְעֵאלִ֔ים בָּאָ֖ה מִגִּלְעָ֑ד וּגְמַלֵּיהֶ֣ם נֹשְׂאִ֗ים נְכֹאת֙ וּצְרִ֣י וָלֹ֔ט הוֹלְכִ֖ים לְהוֹרִ֥יד מִצְרָֽיְמָה:
[כו] וַיֹּ֥אמֶר יְהוּדָ֖ה אֶל־אֶחָ֑יו מַה־בֶּ֗צַע כִּ֤י נַֽהֲרֹג֙ אֶת־אָחִ֔ינוּ וְכִסִּ֖ינוּ אֶת־דָּמֽוֹ:
[כז] לְכ֞וּ וְנִמְכְּרֶ֣נּוּ לַיִּשְׁמְעֵאלִ֗ים וְיָדֵ֙נוּ֙ אַל־תְּהִי־ב֔וֹ כִּֽי־אָחִ֥ינוּ בְשָׂרֵ֖נוּ ה֑וּא וַֽיִּשְׁמְע֖וּ אֶחָֽיו:
[כח] וַיַּעַבְרוּ֩ אֲנָשִׁ֨ים מִדְיָנִ֜ים סֹחֲרִ֗ים וַֽיִּמְשְׁכוּ֙ וַיַּעֲל֤וּ אֶת־יוֹסֵף֙ מִן־הַבּ֔וֹר וַיִּמְכְּר֧וּ אֶת־יוֹסֵ֛ף לַיִּשְׁמְעֵאלִ֖ים בְּעֶשְׂרִ֣ים כָּ֑סֶף וַיָּבִ֥יאוּ אֶת־יוֹסֵ֖ף מִצְרָֽיְמָה:
[כט] וַיָּ֤שָׁב רְאוּבֵן֙ אֶל־הַבּ֔וֹר וְהִנֵּ֥ה אֵין־יוֹסֵ֖ף בַּבּ֑וֹר וַיִּקְרַ֖ע אֶת־בְּגָדָֽיו:
[ל] וַיָּ֥שָׁב אֶל־אֶחָ֖יו וַיֹּאמַ֑ר הַיֶּ֣לֶד אֵינֶ֔נּוּ וַאֲנִ֖י אָ֥נָה אֲנִי־בָֽא:
[לא] וַיִּקְח֖וּ אֶת־כְּתֹ֣נֶת יוֹסֵ֑ף וַיִּשְׁחֲטוּ֙ שְׂעִ֣יר עִזִּ֔ים וַיִּטְבְּל֥וּ אֶת־הַכֻּתֹּ֖נֶת בַּדָּֽם:
[לב] וַֽיְשַׁלְּח֞וּ אֶת־כְּתֹ֣נֶת הַפַּסִּ֗ים וַיָּבִ֙יאוּ֙ אֶל־אֲבִיהֶ֔ם וַיֹּאמְר֖וּ זֹ֣את מָצָ֑אנוּ הַכֶּר־נָ֗א הַכְּתֹ֧נֶת בִּנְךָ֛ הִ֖וא אִם־לֹֽא:
[לג] וַיַּכִּירָ֤הּ וַיֹּ֙אמֶר֙ כְּתֹ֣נֶת בְּנִ֔י חַיָּ֥ה רָעָ֖ה אֲכָלָ֑תְהוּ טָרֹ֥ף טֹרַ֖ף יוֹסֵֽף:
[לד] וַיִּקְרַ֤ע יַֽעֲקֹב֙ שִׂמְלֹתָ֔יו וַיָּ֥שֶׂם שַׂ֖ק בְּמָתְנָ֑יו וַיִּתְאַבֵּ֥ל עַל־בְּנ֖וֹ יָמִ֥ים רַבִּֽים:
[לה] וַיָּקֻמוּ֩ כָל־בָּנָ֨יו וְכָל־בְּנֹתָ֜יו לְנַחֲמ֗וֹ וַיְמָאֵן֙ לְהִתְנַחֵ֔ם וַיֹּ֕אמֶר כִּֽי־אֵרֵ֧ד אֶל־בְּנִ֛י אָבֵ֖ל שְׁאֹ֑לָה וַיֵּ֥בְךְּ אֹת֖וֹ אָבִֽיו:
[לו] וְהַ֨מְּדָנִ֔ים מָכְר֥וּ אֹת֖וֹ אֶל־מִצְרָ֑יִם לְפֽוֹטִיפַר֙ סְרִ֣יס פַּרְעֹ֔ה שַׂ֖ר הַטַּבָּחִֽים: פ

פרק לז
(א) מגורי - ב' (בשני לשונות): בר' לז , א; יח' כא , יז. (ב) אלה תלדות - ד' (בכתיבים שונים): *בר' ב , ד; ו , ט; יא , י; לז , ב. תלדות - ג' כתיב כן: בר' לו , א , ט; לז , ב. ואת - בני - י': *בר' לז , ב; יהו' י , ד; מ"ב יד , ו , יד; כה , ז; יר' ב , ט; כה , כא; יח' כה , ה; איוב מב , טז; דה"ב כה , כד. ויבא - נ"א , י"ח מנהן בתורה: ראה בר' כז , יד. (ג) וישראל - ל"ג: בר' לז , ג; במ' כד , יח; יהו' כב , כב; ש"א יז , ג; כט , א; ש"ב יא , יא; יט , ט; מ"א ד , כ; ה , ה; יח , לו; יש' מב , כד; מג , כח; מד , א , כא; מה , ד; מח , יב; מט , ה; סג , טז; יר' י , טז; כג , ו; הו' ה , ג , ה; עמ' ז , יא , יז; תה' פא , יב; דה"א א , לד; כט , יח; דה"ב טז , יא; כה , כו; כח , כו; ל , ו; לב , לב; לה , יח. אהב - ד': בר' לז , ג , ד; דב' ד , לז; מ"א יא , א. זקנים - ב' וחסר: בר' לז , ג; מד , כ. כתנת פסים - ב': בר' לז , ג; ש"ב יג , יח. (ד) אהב - ד': ראה לעיל , ג. לשלם - ח' חסר (בלישנא): בר' לז , ד; ש"א טז , ד; מ"א ב , ה , ו; ה , כו; יר' טו , ה; יח' יג , טז (פעמיים). (ה) ויוספו - ב' כתיב כן: בר' לז , ה , ח. (ו) אליהם - י"ז מלא בתורה: ראה בר' לד , יד. (ז) והנה אנחנו - ג': בר' לז , ז; *במ' כ , טז; *נחמ' ה , ה. נצבה - ב': בר' לז , ז; מש' ח , ב. ותשתחוין - ב': בר' לג , ו; לז , ז. (ח) משול - ד' מלא (בלישנא): *בר' לז , ח; יח' יט , יד; מש' יב , כד; כב , ז. ויוספו - ב' כתיב כן: בר' לז , ה , ח. חלמתיו - ג': בר' לז , ח , כ; דנ' ב , ב. (ט) ואחד - כ"ה (בפתח , בלישנא): ראה בר' כו , י. (יא) ואביו - ט': ראה בר' לה , יח. (יב) את - י' (תיבות) נקודות (בתורה): ראה בר' לג , ד. (יג) הלוא - י"ב מלא בתורה: ראה בר' לא , טו. אליהם - י"ז מלא בתורה: ראה בר' לד , יד. הנני - ז' בתורה (בצירה): ראה בר' כז , א. (יד) שלום - י': *בר' לז , יד (פעמיים); מא , טז; יש' נד , יג; יר' יד , יג; כט , ז; תה' לה , כז; עג , ג; קכב , ו; אס' ב , יא. והשבני - ב' , חד מלא וחד חסר: *בר' לז , יד; איוב יג , כב. קדמיה חסר. והשבני - ב' חסר (בלישנא): בר' לז , יד; יר' לא , יז. שכמה - ו': *בר' לז , יד; יהו' כד , א; שו' ט , א , לא; כא , יט; דה"ב י , א. (טו) תעה - ג' , ב' חסר וחד מלא: בר' לז , טו; שמ' כג , ד; מש' כא , טז. וישאלהו - ג': בר' לז , טו; שו' ח , יד; יר' לז , יז. (טז) איפה - י' כתיב ה"א (בלישנא): בר' לז , טז; שו' ח , יח; ש"א יט , כב; ש"ב ט , ד; יש' מט , כא; יר' ג , ב; לו , יט; איוב ד , ז; לח , ד; רות ב , יט. (יז) וימצאם - ג': *בר' לז , יז; דנ' א , כ; דה"ב כה , ה. בדתן - ב': בר' לז , יז; מ"ב ו , יג. (יח) מרחק - ו' חסר: כל אוריתא (בר' כב , ד; לז , יח; שמ' ב , ד; כ , טו , יח; כד , א; דב' כח , מט - נמנים כאחד); ש"א כו , יג; יש' כה , א; נז , ט; יר' כג , כג; תה' לח , יב. (ניסוח אחר של ההערה ראה ש"א כו , יג). ובטרם - ג': בר' לז , יח; יר' א , ה; יג , טז. אליהם - י"ז מלא בתורה: ראה בר' לד , יד. (יט) החלמות - ב' חסר: בר' לז , יט; מב , ט. הלזה - ב': בר' כד , סה; לז , יט. (כ) הברות - ה' , ד' כתיב כן (בלישנא): בר' לז , כ; דב' ו , יא; ש"א יג , ו; נחמ' ט , כה; דה"ב כו , י. אכלתהו - ד': בר' לז , כ , לג; יח' טו , ה; יט , יב. ונראה - ד': *בר' לז , כ; מ"ב ז , יג; יש' מא , כג; סו , ה. וחד: ונראה (בפתח) - ש"א י , יד. חלמתיו - ג': בר' לז , ח , כ; דנ' ב , ב. (כב) ויד - ג' (בקמץ): בר' לז , כב; דב' כג , יג; יח' כא , כד. (כג) ויפשיטו - ב' , חד חסר: בר' לז , כג; ש"א לא , ט. כתנתו - ב': בר' לז , כג; ש"ב טו , לב. (כד) ויקחהו - ב' וחסר: *בר' לז , כד; ש"א י , כג. והבור - ב': בר' לז , כד; יר' מא , ט. רק - ב': *בר' לז , כד; דב' לב , מז. (כה) באה - י"א בטעמא מלרע (בלישנא): ראה בר' כט , ו. נכאת - ב': בר' לז , כה; מג , יא. וצרי - ב' (בשני לשונות): בר' לז , כה; דה"א כה , ג. ולט - ב': בר' לז , כה; מג , יא. מצרימה - כ"ח: ראה בר' כו , ב. (כו) מה - בצע - ב': בר' לז , כו; תה' ל , י. (כח) וימשכו - ב': בר' לז , כח; יר' לח , יג. ויביאו - ל"ו (מלא וחסר): בר' יט , י; לז , כח , לב; מג , כו; מז , יז; שמ' לב , ג; לה , כה; לט , לג; וי' כד , יא; במ' ז , ג; לא , יב , נד; שו' כא , יב; ש"א א , כה; ה , ב; ז , א; ש"ב ד , ח; ו , יז; כג , טז; מ"א א , ג; ג , כד; ח , ו; ט , כח; עז' ח , יח; נחמ' ח , טז; דה"א יא , יח; טז , א; דה"ב ה , ז; ח , יח; כד , י; כח , ה , ח; כט , כא , לא; ל , טו; לא , יב. מצרימה - כ"ח: ראה בר' כו , ב. (ל) ויאמר - צ"א (בפתח): ראה בר' כז , לו. ואני אנה - ב': בר' לז , ל; ש"ב יג , יג. ואני - ו' פסוקים 'ואני אני' (באמצע הפסוק): בר' לד , ל; לז , ל; וי' כ , כד; ש"ב טו , כ; יש' מט , כא; יר' כג , כד. (לב) ויביאו - ל"ו (מלא וחסר): ראה לעיל , כח. הכר - נא - ב': בר' לז , לב; לח , כה. הכתנת - ב': בר' לז , לב; שמ' כח , לט. אם - לא - ז' סופי פסוקים: ראה בר' כז , כא. (לג) אכלתהו - ד': בר' לז , כ , לג; יח' טו , ה; יט , יב. טרף - ג': בר' לז , לג; מד , כח; שמ' כב , יב. (לד) וישם - ל"ג בתורה: ראה בר' כח , יא. (לו) והמדנים - ג' (בלישנא): בר' לז , לו; מש' ו , יט; י , יב. אל - מצרים - ב': בר' לז , לו; יר' כו , כב.