מאגר הכתר בראשית פרק לח עם עין המסורה

פרק לח
[רביעי] [א] וַֽיְהִי֙ בָּעֵ֣ת הַהִ֔וא וַיֵּ֥רֶד יְהוּדָ֖ה מֵאֵ֣ת אֶחָ֑יו וַיֵּ֛ט עַד־אִ֥ישׁ עֲדֻלָּמִ֖י וּשְׁמ֥וֹ חִירָֽה:
[ב] וַיַּרְא־שָׁ֧ם יְהוּדָ֛ה בַּת־אִ֥ישׁ כְּנַעֲנִ֖י וּשְׁמ֣וֹ שׁ֑וּעַ וַיִּקָּחֶ֖הָ וַיָּבֹ֥א אֵלֶֽיהָ:
[ג] וַתַּ֖הַר וַתֵּ֣לֶד בֵּ֑ן וַיִּקְרָ֥א אֶת־שְׁמ֖וֹ עֵֽר:
[ד] וַתַּ֥הַר ע֖וֹד וַתֵּ֣לֶד בֵּ֑ן וַתִּקְרָ֥א אֶת־שְׁמ֖וֹ אוֹנָֽן:
[ה] וַתֹּ֤סֶף עוֹד֙ וַתֵּ֣לֶד בֵּ֔ן וַתִּקְרָ֥א אֶת־שְׁמ֖וֹ שֵׁלָ֑ה וְהָיָ֥ה בִכְזִ֖יב בְּלִדְתָּ֥הּ אֹתֽוֹ:
[ו] וַיִּקַּ֧ח יְהוּדָ֛ה אִשָּׁ֖ה לְעֵ֣ר בְּכוֹר֑וֹ וּשְׁמָ֖הּ תָּמָֽר:
[ז] וַיְהִ֗י עֵ֚ר בְּכ֣וֹר יְהוּדָ֔ה רַ֖ע בְּעֵינֵ֣י יְהוָ֑ה וַיְמִתֵ֖הוּ יְהוָֽה:
[ח] וַיֹּ֤אמֶר יְהוּדָה֙ לְאוֹנָ֔ן בֹּ֛א אֶל־אֵ֥שֶׁת אָחִ֖יךָ וְיַבֵּ֣ם אֹתָ֑הּ וְהָקֵ֥ם זֶ֖רַע לְאָחִֽיךָ:
[ט] וַיֵּ֣דַע אוֹנָ֔ן כִּ֛י לֹּ֥א ל֖וֹ יִהְיֶ֣ה הַזָּ֑רַע וְהָיָ֞ה אִם־בָּ֨א אֶל־אֵ֤שֶׁת אָחִיו֙ וְשִׁחֵ֣ת אַ֔רְצָה לְבִלְתִּ֥י נְתָן־זֶ֖רַע לְאָחִֽיו:
[י] וַיֵּ֛רַע בְּעֵינֵ֥י יְהוָ֖ה אֲשֶׁ֣ר עָשָׂ֑ה וַיָּ֖מֶת גַּם־אֹתֽוֹ:
[יא] וַיֹּ֣אמֶר יְהוּדָה֩ לְתָמָ֨ר כַּלָּת֜וֹ שְׁבִ֧י אַלְמָנָ֣ה בֵית־אָבִ֗יךְ עַד־יִגְדַּל֙ שֵׁלָ֣ה בְנִ֔י כִּ֣י אָמַ֔ר פֶּן־יָמ֥וּת גַּם־ה֖וּא כְּאֶחָ֑יו וַתֵּ֣לֶךְ תָּמָ֔ר וַתֵּ֖שֶׁב בֵּ֥ית אָבִֽיהָ:
[יב] וַיִּרְבּוּ֙ הַיָּמִ֔ים וַתָּ֖מָת בַּת־שׁ֣וּעַ אֵֽשֶׁת־יְהוּדָ֑ה וַיִּנָּ֣חֶם יְהוּדָ֗ה וַיַּ֜עַל עַל־גֹּֽזֲזֵ֤י צֹאנוֹ֙ ה֗וּא וְחִירָ֛ה רֵעֵ֥הוּ הָעֲדֻלָּמִ֖י תִּמְנָֽתָה:
[יג] וַיֻּגַּ֥ד לְתָמָ֖ר לֵאמֹ֑ר הִנֵּ֥ה חָמִ֛יךְ עֹלֶ֥ה תִמְנָ֖תָה לָגֹ֥ז צֹאנֽוֹ:
[יד] וַתָּסַר֩ בִּגְדֵ֨י אַלְמְנוּתָ֜הּ מֵעָלֶ֗יהָ וַתְּכַ֤ס בַּצָּעִיף֙ וַתִּתְעַלָּ֔ף וַתֵּ֙שֶׁב֙ בְּפֶ֣תַח עֵינַ֔יִם אֲשֶׁ֖ר עַל־דֶּ֣רֶךְ תִּמְנָ֑תָה כִּ֤י רָֽאֲתָה֙ כִּֽי־גָדַ֣ל שֵׁלָ֔ה וְהִ֕וא לֹא־נִתְּנָ֥ה ל֖וֹ לְאִשָּֽׁה:
[טו] וַיִּרְאֶ֣הָ יְהוּדָ֔ה וַֽיַּחְשְׁבֶ֖הָ לְזוֹנָ֑ה כִּ֥י כִסְּתָ֖ה פָּנֶֽיהָ:
[טז] וַיֵּ֨ט אֵלֶ֜יהָ אֶל־הַדֶּ֗רֶךְ וַיֹּ֙אמֶר֙ הָֽבָה־נָּא֙ אָב֣וֹא אֵלַ֔יִךְ כִּ֚י לֹ֣א יָדַ֔ע כִּ֥י כַלָּת֖וֹ הִ֑וא וַתֹּ֙אמֶר֙ מַה־תִּתֶּן־לִ֔י כִּ֥י תָב֖וֹא אֵלָֽי:
[יז] וַיֹּ֕אמֶר אָנֹכִ֛י אֲשַׁלַּ֥ח גְּדִֽי־עִזִּ֖ים מִן־הַצֹּ֑אן וַתֹּ֕אמֶר אִם־תִּתֵּ֥ן עֵרָב֖וֹן עַ֥ד שָׁלְחֶֽךָ:
[יח] וַיֹּ֗אמֶר מָ֣ה הָעֵרָבוֹן֘ אֲשֶׁ֣ר אֶתֶּן־לָךְ֒ וַתֹּ֗אמֶר חֹתָֽמְךָ֙ וּפְתִילֶ֔ךָ וּמַטְּךָ֖ אֲשֶׁ֣ר בְּיָדֶ֑ךָ וַיִּתֶּן־לָ֛הּ וַיָּבֹ֥א אֵלֶ֖יהָ וַתַּ֥הַר לֽוֹ:
[יט] וַתָּ֣קָם וַתֵּ֔לֶךְ וַתָּ֥סַר צְעִיפָ֖הּ מֵעָלֶ֑יהָ וַתִּלְבַּ֖שׁ בִּגְדֵ֥י אַלְמְנוּתָֽהּ:
[כ] וַיִּשְׁלַ֨ח יְהוּדָ֜ה אֶת־גְּדִ֣י הָעִזִּ֗ים בְּיַד֙ רֵעֵ֣הוּ הָעֲדֻלָּמִ֔י לָקַ֥חַת הָעֵרָב֖וֹן מִיַּ֣ד הָאִשָּׁ֑ה וְלֹ֖א מְצָאָֽהּ:
[כא] וַיִּשְׁאַ֞ל אֶת־אַנְשֵׁ֤י מְקֹמָהּ֙ לֵאמֹ֔ר אַיֵּ֧ה הַקְּדֵשָׁ֛ה הִ֥וא בָעֵינַ֖יִם עַל־הַדָּ֑רֶךְ וַיֹּ֣אמְר֔וּ לֹא־הָיְתָ֥ה בָזֶ֖ה קְדֵשָֽׁה:
[כב] וַיָּ֙שָׁב֙ אֶל־יְהוּדָ֔ה וַיֹּ֖אמֶר לֹ֣א מְצָאתִ֑יהָ וְגַ֨ם אַנְשֵׁ֤י הַמָּקוֹם֙ אָֽמְר֔וּ לֹא־הָיְתָ֥ה בָזֶ֖ה קְדֵשָֽׁה:
[כג] וַיֹּ֤אמֶר יְהוּדָה֙ תִּֽקַּֽח־לָ֔הּ פֶּ֖ן נִהְיֶ֣ה לָב֑וּז הִנֵּ֤ה שָׁלַ֙חְתִּי֙ הַגְּדִ֣י הַזֶּ֔ה וְאַתָּ֖ה לֹ֥א מְצָאתָֽהּ:
[כד] וַיְהִ֣י׀ כְּמִשְׁלֹ֣שׁ חֳדָשִׁ֗ים וַיֻּגַּ֨ד לִיהוּדָ֤ה לֵֽאמֹר֙ זָֽנְתָה֙ תָּמָ֣ר כַּלָּתֶ֔ךָ וְגַ֛ם הִנֵּ֥ה הָרָ֖ה לִזְנוּנִ֑ים וַיֹּ֣אמֶר יְהוּדָ֔ה הוֹצִיא֖וּהָ וְתִשָּׂרֵֽף:
[כה] הִ֣וא מוּצֵ֗את וְהִ֨יא שָׁלְחָ֤ה אֶל־חָמִ֙יהָ֙ לֵאמֹ֔ר לְאִישׁ֙ אֲשֶׁר־אֵ֣לֶּה לּ֔וֹ אָנֹכִ֖י הָרָ֑ה וַתֹּ֙אמֶר֙ הַכֶּר־נָ֔א לְמִ֞י הַחֹתֶ֧מֶת וְהַפְּתִילִ֛ים וְהַמַּטֶּ֖ה הָאֵֽלֶּה:
[כו] וַיַּכֵּ֣ר יְהוּדָ֗ה וַיֹּ֙אמֶר֙ צָדְקָ֣ה מִמֶּ֔נִּי כִּֽי־עַל־כֵּ֥ן לֹא־נְתַתִּ֖יהָ לְשֵׁלָ֣ה בְנִ֑י וְלֹא־יָסַ֥ף ע֖וֹד לְדַעְתָּֽהּ:
[כז] וַיְהִ֖י בְּעֵ֣ת לִדְתָּ֑הּ וְהִנֵּ֥ה תְאוֹמִ֖ים בְּבִטְנָֽהּ:
[כח] וַיְהִ֥י בְלִדְתָּ֖הּ וַיִּתֶּן־יָ֑ד וַתִּקַּ֣ח הַמְיַלֶּ֗דֶת וַתִּקְשֹׁ֨ר עַל־יָד֤וֹ שָׁנִי֙ לֵאמֹ֔ר זֶ֖ה יָצָ֥א רִאשֹׁנָֽה:
[כט] וַיְהִ֣י׀ כְּמֵשִׁ֣יב יָד֗וֹ וְהִנֵּה֙ יָצָ֣א אָחִ֔יו וַתֹּ֕אמֶר מַה־פָּרַ֖צְתָּ עָלֶ֣יךָ פָּ֑רֶץ וַיִּקְרָ֥א שְׁמ֖וֹ פָּֽרֶץ:
[ל] וְאַחַר֙ יָצָ֣א אָחִ֔יו אֲשֶׁ֥ר עַל־יָד֖וֹ הַשָּׁנִ֑י וַיִּקְרָ֥א שְׁמ֖וֹ זָֽרַח: ס

פרק לח
(א) ויהי בעת ההוא - ג': בר' כא , כב; לח , א; מ"א יא , כט. (ג) ויקרא את - שמו - י': ראה בר' לה , י. ויקרא את - שמו - ג' (דמטעין , כלומר: שלושה פסוקים בהם אפשר לטעות ולסבור: ותקרא): *בר' לח , ג; שמ' ב , כב; דה"א ז , כג. (ד) ותהר עוד ותלד - ז': ראה לעיל בר' כט , לג. ותקרא את - שמו - י': ראה בר' ל , יא. (ה) ותקרא את - שמו - י': ראה בר' ל , יא. (ו) בכורו - ג' מלא: *בר' לח , ו; שו' ח , כ; ש"ב ג , ב. (ז) בעיני - ל"ג בתורה: ראה בר' כח , ח. וימתהו - כל חסר בר מן ח' מלא: מ"א יג , כד; טז , י; מ"ב טו , י , יד , ל; כג , כט; דה"א ב , ג; י , יד. (ט) לא לו - ה' (בלישנא): בר' לח , ט; חב' א , ו; מש' כו , יז; דנ' יא , יז. וחד: לו לא - דב' לב , ה. (י) בעיני - ל"ג בתורה: ראה בר' כח , ח. וימת - ה' בסגול: *בר' לח , י; ש"א כב , יח; ש"ב יד , ו; יר' מא , ב; תה' קה , כט. (יא) שבי אלמנה בית (ישיבה בית) - ו': בר' לח , יא (פעמיים); ש"ב ו , יא; יג , כ; יר' לו , כב; דה"ב כו , כא. (ושארא 'בבית'). ותשב - י"ב: ראה בר' לא , לד. (יג) ויגד - כ"ד: ראה בר' כז , מב. (יד) ותשב - י"ב: ראה בר' לא , לד. על - דרך - ה': בר' לח , יד; שו' ה , י; ש"א ו , יב; הו' יג , ז; תה' לו , ה. גדל - ג': בר' כו , יג; לח , יד; איוב ב , יג. (טו) ויחשבה - ג': בר' טו , ו; לח , טו; ש"א א , יג. לזונה - ב': בר' לח , טו; יש' א , כא. (טז) אל - הדרך - ב': בר' לח , טז; דה"ב ו , כז. (יז) אשלח - ט': בר' לח , יז; *שמ' ח , כד; י , י; כג , כז; דב' לב , כד; מ"א ט , ז; יח' ה , טז; יד , יט; דה"ב ז , יג. (ואחד: ואשלח - זכ' ח , י). עד - י"א בטעמא (מרכא הסמוכה לסוף פסוק , בלישנא): *בר' לח , יז; דב' כ , כ; כח , כב , לה; יהו' ה , ח; שו' ו , יח; איוב ב , ז; שה"ש ב , ז; ג , ה; ח , ד; *עז' ט , ו. (יח) ומטך - ב': בר' לח , יח; שמ' יז , ה. (כ) גדי העזים - ב': בר' לח , כ; שו' יג , יט. (כא) מקמה - ב' בתורה (חסר בלישנא): בר' כט , ג; לח , כא. (כב) אל - יהודה - ה': בר' לח , כב; יר' לה , יז; נחמ' ב , ה , ז; דה"ב כד , כג. אל - יהודה - ו' (בלישנא): *בר' לח , כב; יר' ל , ד; לה , יז; נחמ' ב , ה , ז; דה"ב כד , כג. (כג) לבוז - ב': בר' לח , כג; מש' יב , ח. (ושלושה: לבוז (בחולם) - *אס' ג , יג; ח , יא; דה"ב כ , כה). (כד) ויגד - כ"ד: ראה בר' כז , מב. הוציאוה - ג' ומלא: *בר' לח , כד; יש' מח , כ; דה"ב כג , יד. (כה) היא - ג' ראשי פסוקים (כולל קרי): בר' לח , כה; יח' י , כ; יא , יא. והיא - י"א כתיב יו"ד בתורה (בלישנא): בר' יד , ב; כ , ה; לח , כה; וי' יא , לט; יג , י , כא; טז , לא; כ , יז; כא , ט; במ' ה , יג , יד. הכר - נא - ב': בר' לז , לב; לח , כה. (כו) ולא יסף - ה' , (ד' בפתח ואחד בקמץ): בר' לח , כו; *דב' ה , יט; שו' יג , כא; ש"א טו , לה; כז , ד. יסף - ה' בפתח: בר' לח , כו; שו' יג , כא; ש"א טו , לה; כז , ד; יר' מה , ג. (כח) ראשנה - י' (בכתיבים שונים): ראה בר' לג , ב. (כט) ויקרא שמו - ו': ראה בר' כה , כו. (ל) ויקרא שמו - ו': ראה בר' כה , כו.