מאגר הכתר בראשית פרק מא עם עין המסורה

פרק מא
{פרשת מקץ} [א] וַיְהִ֕י מִקֵּ֖ץ שְׁנָתַ֣יִם יָמִ֑ים וּפַרְעֹ֣ה חֹלֵ֔ם וְהִנֵּ֖ה עֹמֵ֥ד עַל־הַיְאֹֽר:
[ב] וְהִנֵּ֣ה מִן־הַיְאֹ֗ר עֹלֹת֙ שֶׁ֣בַע פָּר֔וֹת יְפ֥וֹת מַרְאֶ֖ה וּבְרִיאֹ֣ת בָּשָׂ֑ר וַתִּרְעֶ֖ינָה בָּאָֽחוּ:
[ג] וְהִנֵּ֞ה שֶׁ֧בַע פָּר֣וֹת אֲחֵר֗וֹת עֹל֤וֹת אַֽחֲרֵיהֶן֙ מִן־הַיְאֹ֔ר רָע֥וֹת מַרְאֶ֖ה וְדַקּ֣וֹת בָּשָׂ֑ר וַֽתַּעֲמֹ֛דְנָה אֵ֥צֶל הַפָּר֖וֹת עַל־שְׂפַ֥ת הַיְאֹֽר:
[ד] וַתֹּאכַ֣לְנָה הַפָּר֗וֹת רָע֤וֹת הַמַּרְאֶה֙ וְדַקֹּ֣ת הַבָּשָׂ֔ר אֵ֚ת שֶׁ֣בַע הַפָּר֔וֹת יְפֹ֥ת הַמַּרְאֶ֖ה וְהַבְּרִיאֹ֑ת וַיִּיקַ֖ץ פַּרְעֹֽה:
[ה] וַיִּישָׁ֕ן וַֽיַּחֲלֹ֖ם שֵׁנִ֑ית וְהִנֵּ֣ה׀ שֶׁ֣בַע שִׁבֳּלִ֗ים עֹל֛וֹת בְּקָנֶ֥ה אֶחָ֖ד בְּרִיא֥וֹת וְטֹבֽוֹת:
[ו] וְהִנֵּה֙ שֶׁ֣בַע שִׁבֳּלִ֔ים דַּקּ֖וֹת וּשְׁדוּפֹ֣ת קָדִ֑ים צֹמְח֖וֹת אַחֲרֵיהֶֽן:
[ז] וַתִּבְלַ֙עְנָה֙ הַשִּׁבֳּלִ֣ים הַדַּקּ֔וֹת אֵ֚ת שֶׁ֣בַע הַֽשִּׁבֳּלִ֔ים הַבְּרִיא֖וֹת וְהַמְּלֵא֑וֹת וַיִּיקַ֥ץ פַּרְעֹ֖ה וְהִנֵּ֥ה חֲלֽוֹם:
[ח] וַיְהִ֤י בַבֹּ֙קֶר֙ וַתִּפָּ֣עֶם רוּח֔וֹ וַיִּשְׁלַ֗ח וַיִּקְרָ֛א אֶת־כָּל־חַרְטֻמֵּ֥י מִצְרַ֖יִם וְאֶת־כָּל־חֲכָמֶ֑יהָ וַיְסַפֵּ֨ר פַּרְעֹ֤ה לָהֶם֙ אֶת־חֲלֹמ֔וֹ וְאֵין־פּוֹתֵ֥ר אוֹתָ֖ם לְפַרְעֹֽה:
[ט] וַיְדַבֵּר֙ שַׂ֣ר הַמַּשְׁקִ֔ים אֶת־פַּרְעֹ֖ה לֵאמֹ֑ר אֶת־חֲטָאַ֕י אֲנִ֖י מַזְכִּ֥יר הַיּֽוֹם:
[י] פַּרְעֹ֖ה קָצַ֣ף עַל־עֲבָדָ֑יו וַיִּתֵּ֨ן אֹתִ֜י בְּמִשְׁמַ֗ר בֵּ֚ית שַׂ֣ר הַטַּבָּחִ֔ים אֹתִ֕י וְאֵ֖ת שַׂ֥ר הָאֹפִֽים:
[יא] וַנַּחַלְמָ֥ה חֲל֛וֹם בְּלַ֥יְלָה אֶחָ֖ד אֲנִ֣י וָה֑וּא אִ֛ישׁ כְּפִתְר֥וֹן חֲלֹמ֖וֹ חָלָֽמְנוּ:
[יב] וְשָׁ֨ם אִתָּ֜נוּ נַ֣עַר עִבְרִ֗י עֶ֚בֶד לְשַׂ֣ר הַטַּבָּחִ֔ים וַ֨נְּסַפֶּר־ל֔וֹ וַיִּפְתָּר־לָ֖נוּ אֶת־חֲלֹמֹתֵ֑ינוּ אִ֥ישׁ כַּחֲלֹמ֖וֹ פָּתָֽר:
[יג] וַיְהִ֛י כַּאֲשֶׁ֥ר פָּתַר־לָ֖נוּ כֵּ֣ן הָיָ֑ה אֹתִ֛י הֵשִׁ֥יב עַל־כַּנִּ֖י וְאֹת֥וֹ תָלָֽה:
[יד] וַיִּשְׁלַ֤ח פַּרְעֹה֙ וַיִּקְרָ֣א אֶת־יוֹסֵ֔ף וַיְרִיצֻ֖הוּ מִן־הַבּ֑וֹר וַיְגַלַּח֙ וַיְחַלֵּ֣ף שִׂמְלֹתָ֔יו וַיָּבֹ֖א אֶל־פַּרְעֹֽה:
[שני] [טו] וַיֹּ֤אמֶר פַּרְעֹה֙ אֶל־יוֹסֵ֔ף חֲל֣וֹם חָלַ֔מְתִּי וּפֹתֵ֖ר אֵ֣ין אֹת֑וֹ וַאֲנִ֗י שָׁמַ֤עְתִּי עָלֶ֙יךָ֙ לֵאמֹ֔ר תִּשְׁמַ֥ע חֲל֖וֹם לִפְתֹּ֥ר אֹתֽוֹ:
[טז] וַיַּ֨עַן יוֹסֵ֧ף אֶת־פַּרְעֹ֛ה לֵאמֹ֖ר בִּלְעָדָ֑י אֱלֹהִ֕ים יַעֲנֶ֖ה אֶת־שְׁל֥וֹם פַּרְעֹֽה:
[יז] וַיְדַבֵּ֥ר פַּרְעֹ֖ה אֶל־יוֹסֵ֑ף בַּחֲלֹמִ֕י הִנְנִ֥י עֹמֵ֖ד עַל־שְׂפַ֥ת הַיְאֹֽר:
[יח] וְהִנֵּ֣ה מִן־הַיְאֹ֗ר עֹלֹת֙ שֶׁ֣בַע פָּר֔וֹת בְּרִיא֥וֹת בָּשָׂ֖ר וִיפֹ֣ת תֹּ֑אַר וַתִּרְעֶ֖ינָה בָּאָֽחוּ:
[יט] וְהִנֵּ֞ה שֶׁבַע־פָּר֤וֹת אֲחֵרוֹת֙ עֹל֣וֹת אַחֲרֵיהֶ֔ן דַּלּ֨וֹת וְרָע֥וֹת תֹּ֛אַר מְאֹ֖ד וְרַקּ֣וֹת בָּשָׂ֑ר לֹֽא־רָאִ֧יתִי כָהֵ֛נָּה בְּכָל־אֶ֥רֶץ מִצְרַ֖יִם לָרֹֽעַ:
[כ] וַתֹּאכַ֙לְנָה֙ הַפָּר֔וֹת הָרַקּ֖וֹת וְהָרָע֑וֹת אֵ֣ת שֶׁ֧בַע הַפָּר֛וֹת הָרִאשֹׁנ֖וֹת הַבְּרִיאֹֽת:
[כא] וַתָּבֹ֣אנָה אֶל־קִרְבֶּ֗נָה וְלֹ֤א נוֹדַע֙ כִּי־בָ֣אוּ אֶל־קִרְבֶּ֔נָה וּמַרְאֵיהֶ֣ן רַ֔ע כַּאֲשֶׁ֖ר בַּתְּחִלָּ֑ה וָאִיקָֽץ:
[כב] וָאֵ֖רֶא בַּחֲלֹמִ֑י וְהִנֵּ֣ה׀ שֶׁ֣בַע שִׁבֳּלִ֗ים עֹלֹ֛ת בְּקָנֶ֥ה אֶחָ֖ד מְלֵאֹ֥ת וְטֹבֽוֹת:
[כג] וְהִנֵּה֙ שֶׁ֣בַע שִׁבֳּלִ֔ים צְנֻמ֥וֹת דַּקּ֖וֹת שְׁדֻפ֣וֹת קָדִ֑ים צֹמְח֖וֹת אַחֲרֵיהֶֽם:
[כד] וַתִּבְלַ֙עְןָ֙ הַשִּׁבֳּלִ֣ים הַדַּקֹּ֔ת אֵ֛ת שֶׁ֥בַע הַֽשִּׁבֳּלִ֖ים הַטֹּב֑וֹת וָֽאֹמַר֙ אֶל־הַֽחַרְטֻמִּ֔ים וְאֵ֥ין מַגִּ֖יד לִֽי:
[כה] וַיֹּ֤אמֶר יוֹסֵף֙ אֶל־פַּרְעֹ֔ה חֲל֥וֹם פַּרְעֹ֖ה אֶחָ֣ד ה֑וּא אֵ֣ת אֲשֶׁ֧ר הָאֱלֹהִ֛ים עֹשֶׂ֖ה הִגִּ֥יד לְפַרְעֹֽה:
[כו] שֶׁ֧בַע פָּרֹ֣ת הַטֹּבֹ֗ת שֶׁ֤בַע שָׁנִים֙ הֵ֔נָּה וְשֶׁ֤בַע הַֽשִּׁבֳּלִים֙ הַטֹּבֹ֔ת שֶׁ֥בַע שָׁנִ֖ים הֵ֑נָּה חֲל֖וֹם אֶחָ֥ד הֽוּא:
[כז] וְשֶׁ֣בַע הַ֠פָּרוֹת הָרַקּ֨וֹת וְהָרָעֹ֜ת הָעֹלֹ֣ת אַחֲרֵיהֶ֗ן שֶׁ֤בַע שָׁנִים֙ הֵ֔נָּה וְשֶׁ֤בַע הַֽשִּׁבֳּלִים֙ הָרֵק֔וֹת שְׁדֻפ֖וֹת הַקָּדִ֑ים יִהְי֕וּ שֶׁ֖בַע שְׁנֵ֥י רָעָֽב:
[כח] ה֣וּא הַדָּבָ֔ר אֲשֶׁ֥ר דִּבַּ֖רְתִּי אֶל־פַּרְעֹ֑ה אֲשֶׁ֧ר הָאֱלֹהִ֛ים עֹשֶׂ֖ה הֶרְאָ֥ה אֶת־פַּרְעֹֽה:
[כט] הִנֵּ֛ה שֶׁ֥בַע שָׁנִ֖ים בָּא֑וֹת שָׂבָ֥ע גָּד֖וֹל בְּכָל־אֶ֥רֶץ מִצְרָֽיִם:
[ל] וְ֠קָמוּ שֶׁ֜בַע שְׁנֵ֤י רָעָב֙ אַחֲרֵיהֶ֔ן וְנִשְׁכַּ֥ח כָּל־הַשָּׂבָ֖ע בְּאֶ֣רֶץ מִצְרָ֑יִם וְכִלָּ֥ה הָרָעָ֖ב אֶת־הָאָֽרֶץ:
[לא] וְלֹֽא־יִוָּדַ֤ע הַשָּׂבָע֙ בָּאָ֔רֶץ מִפְּנֵ֛י הָרָעָ֥ב הַה֖וּא אַחֲרֵי־כֵ֑ן כִּֽי־כָבֵ֥ד ה֖וּא מְאֹֽד:
[לב] וְעַ֨ל הִשָּׁנ֧וֹת הַחֲל֛וֹם אֶל־פַּרְעֹ֖ה פַּעֲמָ֑יִם כִּֽי־נָכ֤וֹן הַדָּבָר֙ מֵעִ֣ם הָאֱלֹהִ֔ים וּמְמַהֵ֥ר הָאֱלֹהִ֖ים לַעֲשֹׂתֽוֹ:
[לג] וְעַתָּה֙ יֵרֶ֣א פַרְעֹ֔ה אִ֖ישׁ נָב֣וֹן וְחָכָ֑ם וִישִׁיתֵ֖הוּ עַל־אֶ֥רֶץ מִצְרָֽיִם:
[לד] יַעֲשֶׂ֣ה פַרְעֹ֔ה וְיַפְקֵ֥ד פְּקִדִ֖ים עַל־הָאָ֑רֶץ וְחִמֵּשׁ֙ אֶת־אֶ֣רֶץ מִצְרַ֔יִם בְּשֶׁ֖בַע שְׁנֵ֥י הַשָּׂבָֽע:
[לה] וְיִקְבְּצ֗וּ אֶת־כָּל־אֹ֙כֶל֙ הַשָּׁנִ֣ים הַטֹּב֔וֹת הַבָּאֹ֖ת הָאֵ֑לֶּה וְיִצְבְּרוּ־בָ֞ר תַּ֧חַת יַד־פַּרְעֹ֛ה אֹ֥כֶל בֶּעָרִ֖ים וְשָׁמָֽרוּ:
[לו] וְהָיָ֨ה הָאֹ֤כֶל לְפִקָּדוֹן֙ לָאָ֔רֶץ לְשֶׁ֙בַע֙ שְׁנֵ֣י הָרָעָ֔ב אֲשֶׁ֥ר תִּהְיֶ֖יןָ בְּאֶ֣רֶץ מִצְרָ֑יִם וְלֹא־תִכָּרֵ֥ת הָאָ֖רֶץ בָּרָעָֽב:
[לז] וַיִּיטַ֥ב הַדָּבָ֖ר בְּעֵינֵ֣י פַרְעֹ֑ה וּבְעֵינֵ֖י כָּל־עֲבָדָֽיו:
[לח] וַיֹּ֥אמֶר פַּרְעֹ֖ה אֶל־עֲבָדָ֑יו הֲנִמְצָ֣א כָזֶ֔ה אִ֕ישׁ אֲשֶׁ֛ר ר֥וּחַ אֱלֹהִ֖ים בּֽוֹ:
[שלישי] [לט] וַיֹּ֤אמֶר פַּרְעֹה֙ אֶל־יוֹסֵ֔ף אַחֲרֵ֨י הוֹדִ֧יעַ אֱלֹהִ֛ים אוֹתְךָ֖ אֶת־כָּל־זֹ֑את אֵין־נָב֥וֹן וְחָכָ֖ם כָּמֽוֹךָ:
[מ] אַתָּה֙ תִּהְיֶ֣ה עַל־בֵּיתִ֔י וְעַל־פִּ֖יךָ יִשַּׁ֣ק כָּל־עַמִּ֑י רַ֥ק הַכִּסֵּ֖א אֶגְדַּ֥ל מִמֶּֽךָּ:
[מא] וַיֹּ֥אמֶר פַּרְעֹ֖ה אֶל־יוֹסֵ֑ף רְאֵה֙ נָתַ֣תִּי אֹֽתְךָ֔ עַ֖ל כָּל־אֶ֥רֶץ מִצְרָֽיִם:
[מב] וַיָּ֨סַר פַּרְעֹ֤ה אֶת־טַבַּעְתּוֹ֙ מֵעַ֣ל יָד֔וֹ וַיִּתֵּ֥ן אֹתָ֖הּ עַל־יַ֣ד יוֹסֵ֑ף וַיַּלְבֵּ֤שׁ אֹתוֹ֙ בִּגְדֵי־שֵׁ֔שׁ וַיָּ֛שֶׂם רְבִ֥ד הַזָּהָ֖ב עַל־צַוָּארֽוֹ:
[מג] וַיַּרְכֵּ֣ב אֹת֗וֹ בְּמִרְכֶּ֤בֶת הַמִּשְׁנֶה֙ אֲשֶׁר־ל֔וֹ וַיִּקְרְא֥וּ לְפָנָ֖יו אַבְרֵ֑ךְ וְנָת֣וֹן אֹת֔וֹ עַ֖ל כָּל־אֶ֥רֶץ מִצְרָֽיִם:
[מד] וַיֹּ֧אמֶר פַּרְעֹ֛ה אֶל־יוֹסֵ֖ף אֲנִ֣י פַרְעֹ֑ה וּבִלְעָדֶ֗יךָ לֹא־יָרִ֨ים אִ֧ישׁ אֶת־יָד֛וֹ וְאֶת־רַגְל֖וֹ בְּכָל־אֶ֥רֶץ מִצְרָֽיִם:
[מה] וַיִּקְרָ֨א פַרְעֹ֣ה שֵׁם־יוֹסֵף֘ צָֽפְנַ֣ת פַּעְנֵחַ֒ וַיִּתֶּן־ל֣וֹ אֶת־אָֽסְנַ֗ת בַּת־פּ֥וֹטִי פֶ֛רַע כֹּהֵ֥ן אֹ֖ן לְאִשָּׁ֑ה וַיֵּצֵ֥א יוֹסֵ֖ף עַל־אֶ֥רֶץ מִצְרָֽיִם:
[מו] וְיוֹסֵף֙ בֶּן־שְׁלֹשִׁ֣ים שָׁנָ֔ה בְּעָמְד֕וֹ לִפְנֵ֖י פַּרְעֹ֣ה מֶלֶךְ־מִצְרָ֑יִם וַיֵּצֵ֤א יוֹסֵף֙ מִלִּפְנֵ֣י פַרְעֹ֔ה וַֽיַּעֲבֹ֖ר בְּכָל־אֶ֥רֶץ מִצְרָֽיִם:
[מז] וַתַּ֣עַשׂ הָאָ֔רֶץ בְּשֶׁ֖בַע שְׁנֵ֣י הַשָּׂבָ֑ע לִקְמָצִֽים:
[מח] וַיִּקְבֹּ֞ץ אֶת־כָּל־אֹ֣כֶל׀ שֶׁ֣בַע שָׁנִ֗ים אֲשֶׁ֤ר הָיוּ֙ בְּאֶ֣רֶץ מִצְרַ֔יִם וַיִּתֶּן־אֹ֖כֶל בֶּעָרִ֑ים אֹ֧כֶל שְׂדֵה־הָעִ֛יר אֲשֶׁ֥ר סְבִיבֹתֶ֖יהָ נָתַ֥ן בְּתוֹכָֽהּ:
[מט] וַיִּצְבֹּ֨ר יוֹסֵ֥ף בָּ֛ר כְּח֥וֹל הַיָּ֖ם הַרְבֵּ֣ה מְאֹ֑ד עַ֛ד כִּי־חָדַ֥ל לִסְפֹּ֖ר כִּי־אֵ֥ין מִסְפָּֽר:
[נ] וּלְיוֹסֵ֤ף יֻלַּד֙ שְׁנֵ֣י בָנִ֔ים בְּטֶ֥רֶם תָּב֖וֹא שְׁנַ֣ת הָרָעָ֑ב אֲשֶׁ֤ר יָֽלְדָה־לּוֹ֙ אָֽסְנַ֔ת בַּת־פּ֥וֹטִי פֶ֖רַע כֹּהֵ֥ן אֽוֹן:
[נא] וַיִּקְרָ֥א יוֹסֵ֛ף אֶת־שֵׁ֥ם הַבְּכ֖וֹר מְנַשֶּׁ֑ה כִּֽי־נַשַּׁ֤נִי אֱלֹהִים֙ אֶת־כָּל־עֲמָלִ֔י וְאֵ֖ת כָּל־בֵּ֥ית אָבִֽי:
[נב] וְאֵ֛ת שֵׁ֥ם הַשֵּׁנִ֖י קָרָ֣א אֶפְרָ֑יִם כִּֽי־הִפְרַ֥נִי אֱלֹהִ֖ים בְּאֶ֥רֶץ עָנְיִֽי:
[רביעי] [נג] וַתִּכְלֶ֕ינָה שֶׁ֖בַע שְׁנֵ֣י הַשָּׂבָ֑ע אֲשֶׁ֥ר הָיָ֖ה בְּאֶ֥רֶץ מִצְרָֽיִם:
[נד] וַתְּחִלֶּ֜ינָה שֶׁ֣בַע שְׁנֵ֤י הָרָעָב֙ לָב֔וֹא כַּאֲשֶׁ֖ר אָמַ֣ר יוֹסֵ֑ף וַיְהִ֤י רָעָב֙ בְּכָל־הָ֣אֲרָצ֔וֹת וּבְכָל־אֶ֥רֶץ מִצְרַ֖יִם הָ֥יָה לָֽחֶם:
[נה] וַתִּרְעַב֙ כָּל־אֶ֣רֶץ מִצְרַ֔יִם וַיִּצְעַ֥ק הָעָ֛ם אֶל־פַּרְעֹ֖ה לַלָּ֑חֶם וַיֹּ֨אמֶר פַּרְעֹ֤ה לְכָל־מִצְרַ֙יִם֙ לְכ֣וּ אֶל־יוֹסֵ֔ף אֲשֶׁר־יֹאמַ֥ר לָכֶ֖ם תַּעֲשֽׂוּ:
[נו] וְהָרָעָ֣ב הָיָ֔ה עַ֖ל כָּל־פְּנֵ֣י הָאָ֑רֶץ וַיִּפְתַּ֨ח יוֹסֵ֜ף אֶֽת־כָּל־אֲשֶׁ֤ר בָּהֶם֙ וַיִּשְׁבֹּ֣ר לְמִצְרַ֔יִם וַיֶּחֱזַ֥ק הָרָעָ֖ב בְּאֶ֥רֶץ מִצְרָֽיִם:
[נז] וְכָל־הָאָ֙רֶץ֙ בָּ֣אוּ מִצְרַ֔יְמָה לִשְׁבֹּ֖ר אֶל־יוֹסֵ֑ף כִּֽי־חָזַ֥ק הָרָעָ֖ב בְּכָל־הָאָֽרֶץ:

פרק מא
(א) ופרעה - ג': בר' מא , ה; שמ' יד , י; ש"א ו , ו. (ב) שבע פרות - י"ד זוגין , חד לית בה ה"א ותינינא כתיב ה"א: בר' מא , ב , ד. - *שמ' ט , ח , י. - כח , כד; לט , יז. - ש"א כג , יט; כו , א. - ש"ב יח , כט , לב. - כ , יד , טו. - יש' ב , יא , יז. - יר' ל , יח; לא , לז. - לב , יא , יב. - יח' לד , ז , ט. - מ , כג , כז. - תה' נ , ו; צז , ו. - *עז' ב , סג; נחמ' ז , סה. - דה"א ח , כח; כג , ט. ותרעינה - ב': בר' מא , ב , יח. באחו - ב': בר' מא , ב , יח. (ג) עלות - ג' כתיב כן בתורה: *בר' מא , ג , ה , יט. ושאר אוריתא 'עלת'. בר מן א' כתיב 'עולת' - דב' כז , ו. (ד) שבע הפרות - י"ד זוגין , חד לית בה ה"א ותינינא כתיב ה"א: ראה לעיל , ב. (ה) ויישן - ד' זוגין מן ב' ב' זקפא , חד קמץ וחד פתח (ארבעה זוגות מלים מוטעמות בזקף , המלה מנוקדת פעם בקמץ ופעם בפתח): בר' לב , יב; ש"א יז , ט. - בר' מא , ה; מ"א יט , ה. - במ' יח , כ; דב' יט , יד. - מ"א יא , לז; יש' מז , ג. עלות - ג' כתיב כן (בתורה): *בר' מא , ג , ה , יט. (ושאר אוריתא 'עלת'. בר מן א' כתיב 'עולת' - דב' כז , ו). בקנה אחד - ג' (רפין): *בר' מא , ה , כב; *שמ' לז , יט. בריאות - ג' מלא (בלישנא): בר' מא , ה , ז , יח. (ז) הבריאות - ג' מלא (בלישנא): בר' מא , ה , ז , יח. והמלאות - ב' מלא (בלישנא): בר' מא , ז; יח' לו , לח. (ח) ותפעם - ב': בר' מא , ח; דנ' ב , ג. אותם - ל"ט מלא בתורה: בר' מא , ח; מט , כח , כט; נ , כא; שמ' יד , ט; כט , ג; וי' י , ב; יד , ו; טו , י , כט; יז , ה; כב , טז; כג , מג; כד , ו; כה , נה; במ' ד , יב , יט , כג , מט; ה , ד; ו , כ; ז , ג , ה , ו; כה , ד , יז; דב' א , טו; ג , ו , כח; ט , כח; י , טו; יב , כט; יח , יב , יד; כו , טז; כז , ד , כו; לא , ז , י. (י) במשמר - ג' בפתח: *בר' מ , ג , ז; מא , י. (יא) בלילה - ג': בר' מ , ה; מא , יא; *נחמ' ט , יט. והוא - ב' (בקמץ): בר' מא , יא; מ"א יז , טו. (יב) ושם - ה' ראשי פסוקים: *בר' מא , יב; במ' יג , לג; ש"א כא , ח; ש"ב כ , א; דה"ב כח , ט. פתר - ד' (ב' בקמץ וב' בפתח): בר' מ , טז , כב; מא , יב , יג. (יג) ויהי - כ' בטעמא (בתביר) בראשי פסוקים: בר' מא , יג; *במ' י , לה; לא , לז; יהו' ד , יא; ה , ח; טז , ה; ש"ב יב , יח; יט , כו; מ"א יב , ל; יד , כה , כח; יז , ז; יח , יז; כא , טז; יר' מא , ד; יח' כו , א; זכ' ז , ד; ח , א , יח; דה"ב יב , יא. פתר - ב' בפתח: בר' מ , כב; מא , יג. פתר - ד' , ב' בפתח וב' בקמץ: בר' מ , טז , כב; מא , יב , יג. (טז) שלום - י': ראה בר' לז , יד. (יח) בריאות - ג' מלא (בלישנא): בר' מא , ה , ז , יח. ותרעינה - ב': בר' מא , ב , יח. באחו - ב': בר' מא , ב , יח. (יט) עלות - ג' חסר (בתורה): *בר' מא , ג , ה , יט. (ושאר אוריתא 'עלת'. בר מן א' כתיב 'עולה' - דב' כז , ו). ורעות - ג': בר' מא , יט; הו' ז , א; תה' עא , כ. בכל ארץ מצרים - י"ח בתורה: בר' מא , יט , כט , מד , מו; מה , ח , כו; שמ' ה , יב; ז , יט , כא; ח , יב , יג; ט , ט , כב , כד , כה; י , טו , כב; יא , ו. (כ) והרעות - ג' , ב' מלא וחד חסר: *בר' מא , כ , כז; יר' כד , ג. תינינה חסר. (כא) ותבאנה - ה' , ד' חסר וחד מלא: *בר' מא , כא; שמ' ב , טז , יח; יש' מח , ג; אס' ד , ד (קרי). אל - קרבנה - ב': בר' מא , כא (פעמיים). ומראיהן - ד' (בלישנא): *בר' מא , כא; *וי' יד , לז; יח' א , ה; נח' ב , ה. רע - ט' בפתח (מלים מוטעמות , כולל 'הרע'): בר' כד , נ; מא , כא; *וי' כז , י; במ' יא , א; יר' ב , יט; מי' ז , ג; תה' ז , י; נד , ז; נחמ' ב , א. וכל 'אמירה' ו'יצר' לשון ועשייה (אולי: ולשון 'עשייה') ו'עין' דכותהון בר מן ז' (בקמץ): במ' יא , י; ש"א כט , ז; מ"ב כא , ט; מל' ב , יז; קה' ד , ג; ח , יב; דה"ב לג , ט (וכל אתנח וסוף פסוק דכותהון). (כב) בקנה אחד - ג' (רפין): *בר' מא , ה , כב; *שמ' לז , יט. (כו) הטבת - ד' חסר (דחסר , בלישנא): בר' ו , ב; מא , כו (פעמיים); דב' ו , י. (כז) והרעת - ד' חסר (בלישנא): בר' מא , כז; שמ' כג , ב; יר' מד , ט (פעמיים). והרעת - ג' (אחד חסר וב' מלא): *בר' מא , כ , כז; יר' כד , ג. (כט) הנה - ז' ראשי פסוקים בסיפרא: *בר' יט , ח , יט , כ; כד , יג , מג , נא; מא , כט. שבע - ב': בר' מא , כט; מש' ג , י. בכל - ארץ מצרים - י"ח בתורה: ראה לעיל , יט. (ל) וכלה - ו': בר' מא , ל; וי' טז , כ; במ' ד , טו; יהו' כד , כ; יש' כז , י; יח' מב , טו. וכלה - ג' בתורה: *בר' מא , ל; וי' טז , כ; *במ' ד , טו. (לב) מעם האלהים - ב': בר' מא , לב; דה"ב י , טו. לעשתו - ה' וחסר: *בר' מא , לב; שמ' יב , מח; דב' ל , יד; יר' א , יב; דה"ב ל , ג. (לג) ירא - ה': בר' מא , לג; *שמ' ה , כא; איוב כ , יז; דה"א יב , יח; דה"ב כד , כב. וחכם - ד': בר' מא , לג , לט; מש' כט , יא; קה' ד , יג. (לד) ויפקד - ב': בר' מא , לד; אס' ב , ג. פקדים - ד' , ב' חסר וב' מלא: *בר' מא , לד; יר' כט , כו; אס' ב , ג; דה"ב לא , יג. (לה) ויקבצו - ב': בר' מא , לה; אס' ב , ג. ושמרו - ו' בקמץ (בלישנא): בר' מא , לה; במ' ט , כג; יר' טז , יא; עמ' ב , ד; תה' עח , נו; קיט , קנח. (לז) בעיני - ל"ג בתורה: ראה בר' כח , ח. (לח) כזה - ה': בר' מא , לח; יש' נו , יב; יר' ה , ט , כט; ט , ח. רוח אלהים - ח' (בלישנא): בר' א , ב; מא , לח; שמ' לא , ג; לה , לא; במ' כד , ב; יח' יא , כד; דה"ב טו , א; כד , כ. וכל שמואל דכותהון בר מן ה' ('רוח יי''): ש"א י , ו; טז , יג , יד; יט , ט; ש"ב כג , ב. (לט) אותך - י"ז מלא בלשון זכר (בלישנא): ראה בר' מ , יט. וחכם - ד': בר' מא , לג , לט; מש' כט , יא; קה' ד , יג. (מ) אתה - י"א ראשי פסוקים בתורה ובנביאים: בר' מא , מ; שמ' ז , ב; דב' ב , יח; ד , לה; מ"א ה , יז; ח , מג; יר' טו , טו; מו , כח; יח' מג , י; מי' ו , יד , טו. אתה - ד' ראשי פסוקים בתורה: בר' מא , מ; שמ' ז , ב; דב' ב , יח; ד , לה. ישק - ב' , חד קמץ וחד פתח: בר' מא , מ; מש' כד , כו. (מב) וישם - ל"ג בתורה: ראה בר' כח , יא. צוארו - ה' (בלישנא): ראה בר' לג , ד. (מג) ונתון - ה' מלא (בלישנא): בר' מא , מג; דב' טו , י; שו' ח , כה; יא , ל; וכל כתובים (קה' ח , ט; אס' ב , ג; ו , ט - נחשבים במניין זה כאחד). ונתון - ז' (מלא וחסר): *בר' מא , מג; יש' לז , יט; יר' לז , כא; יח' כג , מו; קה' ח , ט; *אס' ב , ג; ו , ט. (מד) בכל - ארץ מצרים - י"ח בתורה: ראה לעיל , יט. (מה) אן - ב' חסר: בר' מא , מה; מו , כ. (מו) ויוסף - ג' ראשי פסוקים: *בר' לט , א; מא , מו; מב , ו. ויוסף - י': ראה בר' לט , א. בכל - ארץ מצרים - י"ח בתורה: ראה לעיל , יט. (נ) וליוסף - ב': בר' מא , נ; דב' לג , יג. און - ג' מלא (בלישנא): בר' מא , נ; במ' טז , א; הו' יב , ט. (נא) הבכור - ה' מלא: בר' מא , נא; מח , יד; *דב' טו , יט; כה , ו; ונביאים וכתובים דכותהון (ש"א ח , ב; יז , יג; מ"ב ג , כז; זכ' יב , י; איוב א , יג , יח; דה"א ב , כה; ג , א , טו; ה , א; ח , ל; ט , ה , לא , לו; כו , ב , ד; דה"ב כא , ג - נמנים כמנין אחד). (בר מן א': הבכר - דה"א ו , יג). ואת כל - בית - ט': בר' מא , נא; מז , יב; יהו' ב , יח; ש"א כב , יא; מ"ב כה , ט; יש' לט , ב; יר' יג , יא; לה , ג; נב , יג. (נב) ואת שם - ד': *בר' מא , נב; במ' יז , יח; יח' כ , לט; לט , ז. (נד) ובכל - ארץ - ה': בר' מא , נד; שמ' ח , כ; וי' כה , כד; מ"א ט , יט; דה"ב ח , ו. (נה) ללחם - ד' דגושים: בר' מא , נה; וי' כד , ז; עמ' ח , יא; איוב טו , כג. (וחד: וללחם - יר' מב , יד). (נו) על כל - פני - ב': בר' מא , נו; דה"א ה , י. על כל - פני - ד' (בלישנא): בר' יט , כח; מא , נו; יח' לד , ו; דה"א ה , י. ויחזק - ה"י: בר' מא , נו; *שמ' ז , יג , כב; ח , טו; ט , לה; ש"א יז , נ; ש"ב יג , יד; יח , ט; כד , ד; מ"א טז , כב; מ"ב כה , ג; יש' לט , א; יר' נב , ו; דה"ב ח , ג; כז , ה. (נז) וכל - ה' ראשי פסוקים בסיפרא: ראה בר' כו , טו. וכל - הארץ - ה': *בר' מא , נז; שמ' לב , יג; ש"א יד , כה; ש"ב טו , כג; מ"א י , כד. מצרימה - כ"ח: ראה בר' כו , ב. חזק - ה' פתח: *בר' מא , נז; מז , כ; שו' א , כח; מ"ב ג , כו; דה"א כא , ד.