מאגר הכתר בראשית פרק מב עם עין המסורה

פרק מב
[א] וַיַּ֣רְא יַֽעֲקֹ֔ב כִּ֥י יֶשׁ־שֶׁ֖בֶר בְּמִצְרָ֑יִם וַיֹּ֤אמֶר יַֽעֲקֹב֙ לְבָנָ֔יו לָ֖מָּה תִּתְרָאֽוּ:
[ב] וַיֹּ֕אמֶר הִנֵּ֣ה שָׁמַ֔עְתִּי כִּ֥י יֶשׁ־שֶׁ֖בֶר בְּמִצְרָ֑יִם רְדוּ־שָׁ֙מָּה֙ וְשִׁבְרוּ־לָ֣נוּ מִשָּׁ֔ם וְנִחְיֶ֖ה וְלֹ֥א נָמֽוּת:
[ג] וַיֵּרְד֥וּ אֲחֵֽי־יוֹסֵ֖ף עֲשָׂרָ֑ה לִשְׁבֹּ֥ר בָּ֖ר מִמִּצְרָֽיִם:
[ד] וְאֶת־בִּנְיָמִין֙ אֲחִ֣י יוֹסֵ֔ף לֹא־שָׁלַ֥ח יַעֲקֹ֖ב אֶת־אֶחָ֑יו כִּ֣י אָמַ֔ר פֶּן־יִקְרָאֶ֖נּוּ אָסֽוֹן:
[ה] וַיָּבֹ֙אוּ֙ בְּנֵ֣י יִשְׂרָאֵ֔ל לִשְׁבֹּ֖ר בְּת֣וֹךְ הַבָּאִ֑ים כִּֽי־הָיָ֥ה הָרָעָ֖ב בְּאֶ֥רֶץ כְּנָֽעַן:
[ו] וְיוֹסֵ֗ף ה֚וּא הַשַּׁלִּ֣יט עַל־הָאָ֔רֶץ ה֥וּא הַמַּשְׁבִּ֖יר לְכָל־עַ֣ם הָאָ֑רֶץ וַיָּבֹ֙אוּ֙ אֲחֵ֣י יוֹסֵ֔ף וַיִּשְׁתַּחֲווּ־ל֥וֹ אַפַּ֖יִם אָֽרְצָה:
[ז] וַיַּ֥רְא יוֹסֵ֛ף אֶת־אֶחָ֖יו וַיַּכִּרֵ֑ם וַיִּתְנַכֵּ֨ר אֲלֵיהֶ֜ם וַיְדַבֵּ֧ר אִתָּ֣ם קָשׁ֗וֹת וַיֹּ֤אמֶר אֲלֵהֶם֙ מֵאַ֣יִן בָּאתֶ֔ם וַיֹּ֣אמְר֔וּ מֵאֶ֥רֶץ כְּנַ֖עַן לִשְׁבָּר־אֹֽכֶל:
[ח] וַיַּכֵּ֥ר יוֹסֵ֖ף אֶת־אֶחָ֑יו וְהֵ֖ם לֹ֥א הִכִּרֻֽהוּ:
[ט] וַיִּזְכֹּ֣ר יוֹסֵ֔ף אֵ֚ת הַחֲלֹמ֔וֹת אֲשֶׁ֥ר חָלַ֖ם לָהֶ֑ם וַיֹּ֤אמֶר אֲלֵהֶם֙ מְרַגְּלִ֣ים אַתֶּ֔ם לִרְא֛וֹת אֶת־עֶרְוַ֥ת הָאָ֖רֶץ בָּאתֶֽם:
[י] וַיֹּאמְר֥וּ אֵלָ֖יו לֹ֣א אֲדֹנִ֑י וַעֲבָדֶ֥יךָ בָּ֖אוּ לִשְׁבָּר־אֹֽכֶל:
[יא] כֻּלָּ֕נוּ בְּנֵ֥י אִישׁ־אֶחָ֖ד נָ֑חְנוּ כֵּנִ֣ים אֲנַ֔חְנוּ לֹא־הָי֥וּ עֲבָדֶ֖יךָ מְרַגְּלִֽים:
[יב] וַיֹּ֖אמֶר אֲלֵהֶ֑ם לֹ֕א כִּֽי־עֶרְוַ֥ת הָאָ֖רֶץ בָּאתֶ֥ם לִרְאֽוֹת:
[יג] וַיֹּאמְר֗וּ שְׁנֵ֣ים עָשָׂר֩ עֲבָדֶ֨יךָ אַחִ֧ים ׀ אֲנַ֛חְנוּ בְּנֵ֥י אִישׁ־אֶחָ֖ד בְּאֶ֣רֶץ כְּנָ֑עַן וְהִנֵּ֨ה הַקָּטֹ֤ן אֶת־אָבִ֙ינוּ֙ הַיּ֔וֹם וְהָאֶחָ֖ד אֵינֶֽנּוּ:
[יד] וַיֹּ֥אמֶר אֲלֵהֶ֖ם יוֹסֵ֑ף ה֗וּא אֲשֶׁ֨ר דִּבַּ֧רְתִּי אֲלֵכֶ֛ם לֵאמֹ֖ר מְרַגְּלִ֥ים אַתֶּֽם:
[טו] בְּזֹ֖את תִּבָּחֵ֑נוּ חֵ֤י פַרְעֹה֙ אִם־תֵּצְא֣וּ מִזֶּ֔ה כִּ֧י אִם־בְּב֛וֹא אֲחִיכֶ֥ם הַקָּטֹ֖ן הֵֽנָּה:
[טז] שִׁלְח֨וּ מִכֶּ֣ם אֶחָד֘ וְיִקַּ֣ח אֶת־אֲחִיכֶם֒ וְאַתֶּם֙ הֵאָ֣סְר֔וּ וְיִבָּֽחֲנוּ֙ דִּבְרֵיכֶ֔ם הַאֱמֶ֖ת אִתְּכֶ֑ם וְאִם־לֹ֕א חֵ֣י פַרְעֹ֔ה כִּ֥י מְרַגְּלִ֖ים אַתֶּֽם:
[יז] וַיֶּאֱסֹ֥ף אֹתָ֛ם אֶל־מִשְׁמָ֖ר שְׁלֹ֥שֶׁת יָמִֽים:
[יח] וַיֹּ֨אמֶר אֲלֵהֶ֤ם יוֹסֵף֙ בַּיּ֣וֹם הַשְּׁלִישִׁ֔י זֹ֥את עֲשׂ֖וּ וִֽחְי֑וּ אֶת־הָאֱלֹהִ֖ים אֲנִ֥י יָרֵֽא:
[חמישי] [יט] אִם־כֵּנִ֣ים אַתֶּ֔ם אֲחִיכֶ֣ם אֶחָ֔ד יֵאָסֵ֖ר בְּבֵ֣ית מִשְׁמַרְכֶ֑ם וְאַתֶּם֙ לְכ֣וּ הָבִ֔יאוּ שֶׁ֖בֶר רַעֲב֥וֹן בָּתֵּיכֶֽם:
[כ] וְאֶת־אֲחִיכֶ֤ם הַקָּטֹן֙ תָּבִ֣יאוּ אֵלַ֔י וְיֵאָמְנ֥וּ דִבְרֵיכֶ֖ם וְלֹ֣א תָמ֑וּתוּ וַיַּעֲשׂוּ־כֵֽן:
[כא] וַיֹּאמְר֞וּ אִ֣ישׁ אֶל־אָחִ֗יו אֲבָל֘ אֲשֵׁמִ֣ים ׀ אֲנַחְנוּ֘ עַל־אָחִינוּ֒ אֲשֶׁ֨ר רָאִ֜ינוּ צָרַ֥ת נַפְשׁ֛וֹ בְּהִתְחַֽנֲנ֥וֹ אֵלֵ֖ינוּ וְלֹ֣א שָׁמָ֑עְנוּ עַל־כֵּן֙ בָּ֣אָה אֵלֵ֔ינוּ הַצָּרָ֖ה הַזֹּֽאת:
[כב] וַיַּעַן֩ רְאוּבֵ֨ן אֹתָ֜ם לֵאמֹ֗ר הֲלוֹא֩ אָמַ֨רְתִּי אֲלֵיכֶ֧ם ׀ לֵאמֹ֛ר אַל־תֶּחֶטְא֥וּ בַיֶּ֖לֶד וְלֹ֣א שְׁמַעְתֶּ֑ם וְגַם־דָּמ֖וֹ הִנֵּ֥ה נִדְרָֽשׁ:
[כג] וְהֵם֙ לֹ֣א יָֽדְע֔וּ כִּ֥י שֹׁמֵ֖עַ יוֹסֵ֑ף כִּ֥י הַמֵּלִ֖יץ בֵּינֹתָֽם:
[כד] וַיִּסֹּ֥ב מֵעֲלֵיהֶ֖ם וַיֵּ֑בְךְּ וַיָּ֤שָׁב אֲלֵהֶם֙ וַיְדַבֵּ֣ר אֲלֵהֶ֔ם וַיִּקַּ֤ח מֵֽאִתָּם֙ אֶת־שִׁמְע֔וֹן וַיֶּאֱסֹ֥ר אֹת֖וֹ לְעֵינֵיהֶֽם:
[כה] וַיְצַ֣ו יוֹסֵ֗ף וַיְמַלְא֣וּ אֶת־כְּלֵיהֶם֘ בָּר֒ וּלְהָשִׁ֤יב כַּסְפֵּיהֶם֙ אִ֣ישׁ אֶל־שַׂקּ֔וֹ וְלָתֵ֥ת לָהֶ֛ם צֵדָ֖ה לַדָּ֑רֶךְ וַיַּ֥עַשׂ לָהֶ֖ם כֵּֽן:
[כו] וַיִּשְׂא֥וּ אֶת־שִׁבְרָ֖ם עַל־חֲמֹרֵיהֶ֑ם וַיֵּלְכ֖וּ מִשָּֽׁם:
[כז] וַיִּפְתַּ֨ח הָאֶחָ֜ד אֶת־שַׂקּ֗וֹ לָתֵ֥ת מִסְפּ֛וֹא לַחֲמֹר֖וֹ בַּמָּל֑וֹן וַיַּרְא֙ אֶת־כַּסְפּ֔וֹ וְהִנֵּה־ה֖וּא בְּפִ֥י אַמְתַּחְתּֽוֹ:
[כח] וַיֹּ֤אמֶר אֶל־אֶחָיו֙ הוּשַׁ֣ב כַּסְפִּ֔י וְגַ֖ם הִנֵּ֣ה בְאַמְתַּחְתִּ֑י וַיֵּצֵ֣א לִבָּ֗ם וַיֶּחֶרְד֞וּ אִ֤ישׁ אֶל־אָחִיו֙ לֵאמֹ֔ר מַה־זֹּ֛את עָשָׂ֥ה אֱלֹהִ֖ים לָֽנוּ:
[כט] וַיָּבֹ֛אוּ אֶל־יַעֲקֹ֥ב אֲבִיהֶ֖ם אַ֣רְצָה כְּנָ֑עַן וַיַּגִּ֣ידוּ ל֔וֹ אֵ֛ת כָּל־הַקֹּרֹ֥ת אֹתָ֖ם לֵאמֹֽר:
[ל] דִּ֠בֶּר הָאִ֨ישׁ אֲדֹנֵ֥י הָאָ֛רֶץ אִתָּ֖נוּ קָשׁ֑וֹת וַיִּתֵּ֣ן אֹתָ֔נוּ כִּֽמְרַגְּלִ֖ים אֶת־הָאָֽרֶץ:
[לא] וַנֹּ֥אמֶר אֵלָ֖יו כֵּנִ֣ים אֲנָ֑חְנוּ לֹ֥א הָיִ֖ינוּ מְרַגְּלִֽים:
[לב] שְׁנֵים־עָשָׂ֥ר אֲנַ֛חְנוּ אַחִ֖ים בְּנֵ֣י אָבִ֑ינוּ הָאֶחָ֣ד אֵינֶ֔נּוּ וְהַקָּטֹ֥ן הַיּ֛וֹם אֶת־אָבִ֖ינוּ בְּאֶ֥רֶץ כְּנָֽעַן:
[לג] וַיֹּ֣אמֶר אֵלֵ֗ינוּ הָאִישׁ֙ אֲדֹנֵ֣י הָאָ֔רֶץ בְּזֹ֣את אֵדַ֔ע כִּ֥י כֵנִ֖ים אַתֶּ֑ם אֲחִיכֶ֤ם הָֽאֶחָד֙ הַנִּ֣יחוּ אִתִּ֔י וְאֶת־רַעֲב֥וֹן בָּתֵּיכֶ֖ם קְח֥וּ וָלֵֽכוּ:
[לד] וְ֠הָבִיאוּ אֶת־אֲחִיכֶ֣ם הַקָּטֹן֘ אֵלַי֒ וְאֵדְעָ֗ה כִּ֣י לֹ֤א מְרַגְּלִים֙ אַתֶּ֔ם כִּ֥י כֵנִ֖ים אַתֶּ֑ם אֶת־אֲחִיכֶם֙ אֶתֵּ֣ן לָכֶ֔ם וְאֶת־הָאָ֖רֶץ תִּסְחָֽרוּ:
[לה] וַיְהִ֗י הֵ֚ם מְרִיקִ֣ים שַׂקֵּיהֶ֔ם וְהִנֵּה־אִ֥ישׁ צְרוֹר־כַּסְפּ֖וֹ בְּשַׂקּ֑וֹ וַיִּרְא֞וּ אֶת־צְרֹר֧וֹת כַּסְפֵּיהֶ֛ם הֵ֥מָּה וַאֲבִיהֶ֖ם וַיִּירָֽאוּ:
[לו] וַיֹּ֤אמֶר אֲלֵהֶם֙ יַעֲקֹ֣ב אֲבִיהֶ֔ם אֹתִ֖י שִׁכַּלְתֶּ֑ם יוֹסֵ֤ף אֵינֶ֙נּוּ֙ וְשִׁמְע֣וֹן אֵינֶ֔נּוּ וְאֶת־בִּנְיָמִ֣ן תִּקָּ֔חוּ עָלַ֖י הָי֥וּ כֻלָּֽנָה:
[לז] וַיֹּ֤אמֶר רְאוּבֵן֙ אֶל־אָבִ֣יו לֵאמֹ֔ר אֶת־שְׁנֵ֤י בָנַי֙ תָּמִ֔ית אִם־לֹ֥א אֲבִיאֶ֖נּוּ אֵלֶ֑יךָ תְּנָ֤ה אֹתוֹ֙ עַל־יָדִ֔י וַאֲנִ֖י אֲשִׁיבֶ֥נּוּ אֵלֶֽיךָ:
[לח] וַיֹּ֕אמֶר לֹא־יֵרֵ֥ד בְּנִ֖י עִמָּכֶ֑ם כִּֽי־אָחִ֨יו מֵ֜ת וְה֧וּא לְבַדּ֣וֹ נִשְׁאָ֗ר וּקְרָאָ֤הוּ אָסוֹן֙ בַּדֶּ֙רֶךְ֙ אֲשֶׁ֣ר תֵּֽלְכוּ־בָ֔הּ וְהוֹרַדְתֶּ֧ם אֶת־שֵׂיבָתִ֛י בְּיָג֖וֹן שְׁאֽוֹלָה:

פרק מב
(ד) ואת - בנימין - ד': *בר' מב , ד , לו; מג , יד , טו. בנימין - י"ז מלא (בלישנא): ראה בר' לה , יח. (ו) ויוסף - י': ראה בר' לט , א. ויוסף - ג' ראשי פסוקים: *בר' לט , א; מא , מו; מב , ו. (ז) אליהם - י"ז מלא בתורה: ראה בר' לד , יד. אתם - ל"ז: ראה בר' לד , ח. (ח) הכרהו - ב' (חד חסר וחד מלא): בר' מב , ח; איוב ב , יב. (ט) החלמות - ב' חסר: בר' לז , יט; מב , ט. (יא) נחנו - ג' (אחד בקמץ וב' בפתח): בר' מב , יא; *במ' לב , לב; *איכה ג , מב. (יג) והאחד - ד': בר' מב , יג; *וי' יד , כב; טו , טו; ש"א יד , ה. (יד) אלכם - ו' חסר בתורה: בר' מב , יד; שמ' ז , ד , ט; דב' א , ט , כ , כט. (טו) בבוא - ט' מלא (בלישנא): בר' מב , טו; דב' לא , יא; מ"ב ה , יח; יב , י; יח' מו , ח , ט; תה' נא , ב; נב , ב; מש' יח , ג. (טז) ואם - לא - י"ז באמצע הפסוק: בר' ד , ז; יח , כא; כד , מא , מט; מב , טז; שמ' יג , יג; לד , כ; וי' כז , כז; במ' ה , יט; יט , יב; שו' ד , ח; ש"א ב , טז; ו , ט; זכ' יא , יב; מל' ב , ב; רות ג , יג; ד , ד. (יט) הביאו - ג' (בקמץ): *בר' מב , יט; יר' כז , יב; מל' ג , י. (כ) תביאו - ו': בר' מב , כ; וי' כג , יז; במ' כ , יב; דב' יב , יא; ש"א כא , טו; דה"ב כח , יג. תמותו - ג' מלא בתורה: *בר' מב , כ; וי' ח , לה; במ' יח , לב. תמותו - ז' מלא: בר' מב , כ; וי' ח , לה; במ' יח , לב; יר' כב , כו; כז , יג; מב , כב; יח' לג , יא. (כא) אל - י"ט פסוקים 'אל על על': בר' מב , כא; *שמ' י , יב , כא; כח , ל; לד , א; מ , כ; במ' טו , לח; דב' יא , כט; כב , כד; שו' יא , לז; ש"א טו , א; ש"ב ו , כא; מ"א ב , יט; טו , כ; כא , ד; יש' כב , טו; יח' ג , כג; מח , כא; נחמ' א , ו. ויאמרו - ו' בטעמא (גרשיים) בראשי פסוקים: *בר' יא , ג , ד; מב , כא; ש"א יא , ט; יר' מב , ב; יונה א , ז. (כב) הלוא - י"ב מלא בתורה: ראה בר' לא , טו. (כג) והם - ט' ראשי פסוקים: בר' מב , כג; *שמ' כח , ה; דב' ט , כט; מש' א , יח; נחמ' א , י; ט , טז , לה; דה"א ט , כג; דה"ב ט , כד. בינתם - ג': בר' מב , כג; ש"ב כא , ז; יר' כה , טז. (כד) ויסב - ב': בר' מב , כד; דה"א טז , מג. וכל שמואל בר מן אחד: ויסב (בפתח וצירה) - ש"ב כ , יב. ויאֱסר - לית , וכל כפתוי דשמשון דכותיה: שו' טו , י , יב , יג. (ניקוד חטף סגול בשורש 'אסר' באמצע המילה מצוי רק כאן ובסיפור שמשון.) (כה) בָר - י"ט קמץ סמוך לזרקא (בטעם סגול): בר' ג , ג; מב , כה; שמ' כו , ה; לו , יב; וי' ב , יג; דב' לא , ז , כג; שו' ז , ד; ש"א ג , ט; ה , ד; י , ח; מ"א א , כד; יש' מד , יג; נג , יב; דנ' ט , יח; דה"א כב , ה; דה"ב ח , יח; כד , כג; כח , ה. ולתת - ח': בר' מב , כה; *שמ' לב , כט; *דב' כג , טו; יר' יז , י; יט , יב; דנ' יב , יא; עז' ט , ח , ט. צדה - ג' חסר: כל אוריתא (בר' מב , כה; מה , כא; שמ' יב , לט - נמנים כמקרה אחד); שו' ז , ח; כ , י. (כז) והנה - הוא - ה': *בר' מב , כז; דב' כב , יז; שו' ט , לג; יר' יח , ג (קרי); דה"ב כו , כ. (כח) עשה אלהים - ב': בר' מב , כח; שמ' יח , א. (כט) ארצה כנען - ח': ראה בר' לא , יח. הקרת - ב' , חד מלא וחד חסר (בשני לשונות): *בר' מב , כט; דה"ב ג , ז. (ל) דבר - ב' ראשי פסוקים: *בר' מב , ל; יר' מב , יט. אדני - ד': *בר' לט , כ; מב , ל , לג; מ"א טז , כד. (ואחד: ואדני האדנים - דב' י , יז). (לג) אדני - ד': *בר' לט , כ; מב , ל , לג; מ"א טז , כד. ולכו - ג': בר' מב , לג; שמ' יב , לב; ש"א כט , י. (לד) והביאו - ו': בר' מב , לד; *שמ' לב , ב; עמ' ד , ד; נחמ' ח , טו; דה"א כא , ב; דה"ב כט , לא. ואדעה - ו': בר' מב , לד; שמ' לג , ה; *במ' כב , יט; תה' קיט , קכה; רות ד , ד (קרי); דה"א כא , ב. ואת - הארץ - ה': בר' לה , יב; מב , לד; מט , טו; דב' ג , יב; יר' כב , יב. (וכל 'את - השמים ואת - הארץ' דכותהון). (לו) ושמעון - ד': בר' לה , כג; מב , לו; מח , ה; דה"ב לד , ו. ואת - בנימן - ד' (ב' חסר וב' מלא): *בר' מב , ד , לו; מג , יד , טו. כלנה - ב': בר' מב , לו; מש' לא , כט. (לז) תמית - ב': בר' מב , לז; איוב ה , ב. (לח) וקראהו - ד' זוגות מחליפין (המלה הראשונה באל"ף והשניה ללא אל"ף): *בר' מב , לח; מד , כט. - יהו' כא , ל; דה"א ו , נט. - ש"ב כג , לז; דה"א יא , לט. - יר' ו , יד; ח , יא. (וחילופיהם (הראשונה ללא אל"ף והשניה באל"ף): בר' כה , כד; לח , כז. - בר' מו , יג; דה"א ז , א. - ש"ב כב , מ; תה' יח , מ. - מ"ב יט , כה; יש' לז , כו.)