מאגר הכתר בראשית פרק מג עם עין המסורה

פרק מג
[א] וְהָרָעָ֖ב כָּבֵ֥ד בָּאָֽרֶץ:
[ב] וַיְהִ֗י כַּאֲשֶׁ֤ר כִּלּוּ֙ לֶאֱכֹ֣ל אֶת־הַשֶּׁ֔בֶר אֲשֶׁ֥ר הֵבִ֖יאוּ מִמִּצְרָ֑יִם וַיֹּ֤אמֶר אֲלֵיהֶם֙ אֲבִיהֶ֔ם שֻׁ֖בוּ שִׁבְרוּ־לָ֥נוּ מְעַט־אֹֽכֶל:
[ג] וַיֹּ֧אמֶר אֵלָ֛יו יְהוּדָ֖ה לֵאמֹ֑ר הָעֵ֣ד הֵעִד֩ בָּ֨נוּ הָאִ֤ישׁ לֵאמֹר֙ לֹֽא־תִרְא֣וּ פָנַ֔י בִּלְתִּ֖י אֲחִיכֶ֥ם אִתְּכֶֽם:
[ד] אִם־יֶשְׁךָ֛ מְשַׁלֵּ֥חַ אֶת־אָחִ֖ינוּ אִתָּ֑נוּ נֵרְדָ֕ה וְנִשְׁבְּרָ֥ה לְךָ֖ אֹֽכֶל:
[ה] וְאִם־אֵינְךָ֥ מְשַׁלֵּ֖חַ לֹ֣א נֵרֵ֑ד כִּֽי־הָאִ֞ישׁ אָמַ֤ר אֵלֵ֙ינוּ֙ לֹא־תִרְא֣וּ פָנַ֔י בִּלְתִּ֖י אֲחִיכֶ֥ם אִתְּכֶֽם:
[ו] וַיֹּ֙אמֶר֙ יִשְׂרָאֵ֔ל לָמָ֥ה הֲרֵעֹתֶ֖ם לִ֑י לְהַגִּ֣יד לָאִ֔ישׁ הַע֥וֹד לָכֶ֖ם אָֽח:
[ז] וַיֹּאמְר֡וּ שָׁא֣וֹל שָֽׁאַל־הָ֠אִישׁ לָ֣נוּ וּלְמוֹלַדְתֵּ֜נוּ לֵאמֹ֗ר הַע֨וֹד אֲבִיכֶ֥ם חַי֙ הֲיֵ֣שׁ לָכֶ֣ם אָ֔ח וַנַּ֨גֶּד־ל֔וֹ עַל־פִּ֖י הַדְּבָרִ֣ים הָאֵ֑לֶּה הֲיָד֣וֹעַ נֵדַ֔ע כִּ֣י יֹאמַ֔ר הוֹרִ֖ידוּ אֶת־אֲחִיכֶֽם:
[ח] וַיֹּ֨אמֶר יְהוּדָ֜ה אֶל־יִשְׂרָאֵ֣ל אָבִ֗יו שִׁלְחָ֥ה הַנַּ֛עַר אִתִּ֖י וְנָק֣וּמָה וְנֵלֵ֑כָה וְנִֽחְיֶה֙ וְלֹ֣א נָמ֔וּת גַּם־אֲנַ֥חְנוּ גַם־אַתָּ֖ה גַּם־טַפֵּֽנוּ:
[ט] אָֽנֹכִי֙ אֶֽעֶרְבֶ֔נּוּ מִיָּדִ֖י תְּבַקְשֶׁ֑נּוּ אִם־לֹ֨א הֲבִיאֹתִ֤יו אֵלֶ֙יךָ֙ וְהִצַּגְתִּ֣יו לְפָנֶ֔יךָ וְחָטָ֥אתִֽי לְךָ֖ כָּל־הַיָּמִֽים:
[י] כִּ֖י לוּלֵ֣א הִתְמַהְמָ֑הְנוּ כִּֽי־עַתָּ֥ה שַׁ֖בְנוּ זֶ֥ה פַעֲמָֽיִם:
[יא] וַיֹּ֨אמֶר אֲלֵהֶ֜ם יִשְׂרָאֵ֣ל אֲבִיהֶ֗ם אִם־כֵּ֣ן ׀ אֵפוֹא֘ זֹ֣את עֲשׂוּ֒ קְח֞וּ מִזִּמְרַ֤ת הָאָ֙רֶץ֙ בִּכְלֵיכֶ֔ם וְהוֹרִ֥ידוּ לָאִ֖ישׁ מִנְחָ֑ה מְעַ֤ט צֳרִי֙ וּמְעַ֣ט דְּבַ֔שׁ נְכֹ֣את וָלֹ֔ט בָּטְנִ֖ים וּשְׁקֵדִֽים:
[יב] וְכֶ֥סֶף מִשְׁנֶ֖ה קְח֣וּ בְיֶדְכֶ֑ם וְאֶת־הַכֶּ֜סֶף הַמּוּשָׁ֨ב בְּפִ֤י אַמְתְּחֹֽתֵיכֶם֙ תָּשִׁ֣יבוּ בְיֶדְכֶ֔ם אוּלַ֥י מִשְׁגֶּ֖ה הֽוּא:
[יג] וְאֶת־אֲחִיכֶ֖ם קָ֑חוּ וְק֖וּמוּ שׁ֥וּבוּ אֶל־הָאִֽישׁ:
[יד] וְאֵ֣ל שַׁדַּ֗י יִתֵּ֨ן לָכֶ֤ם רַחֲמִים֙ לִפְנֵ֣י הָאִ֔ישׁ וְשִׁלַּ֥ח לָכֶ֛ם אֶת־אֲחִיכֶ֥ם אַחֵ֖ר וְאֶת־בִּנְיָמִ֑ין וַאֲנִ֕י כַּאֲשֶׁ֥ר שָׁכֹ֖לְתִּי שָׁכָֽלְתִּי:
[טו] וַיִּקְח֤וּ הָֽאֲנָשִׁים֙ אֶת־הַמִּנְחָ֣ה הַזֹּ֔את וּמִשְׁנֶה־כֶּ֛סֶף לָקְח֥וּ בְיָדָ֖ם וְאֶת־בִּנְיָמִ֑ן וַיָּקֻ֙מוּ֙ וַיֵּרְד֣וּ מִצְרַ֔יִם וַיַּעַמְד֖וּ לִפְנֵ֥י יוֹסֵֽף:
[ששי] [טז] וַיַּ֨רְא יוֹסֵ֣ף אִתָּם֘ אֶת־בִּנְיָמִין֒ וַיֹּ֙אמֶר֙ לַאֲשֶׁ֣ר עַל־בֵּית֔וֹ הָבֵ֥א אֶת־הָאֲנָשִׁ֖ים הַבָּ֑יְתָה וּטְבֹ֤חַ טֶ֙בַח֙ וְהָכֵ֔ן כִּ֥י אִתִּ֛י יֹאכְל֥וּ הָאֲנָשִׁ֖ים בַּֽצָּהֳרָֽיִם:
[יז] וַיַּ֣עַשׂ הָאִ֔ישׁ כַּאֲשֶׁ֖ר אָמַ֣ר יוֹסֵ֑ף וַיָּבֵ֥א הָאִ֛ישׁ אֶת־הָאֲנָשִׁ֖ים בֵּ֥יתָה יוֹסֵֽף:
[יח] וַיִּֽירְא֣וּ הָאֲנָשִׁ֗ים כִּ֣י הוּבְאוּ֘ בֵּ֣ית יוֹסֵף֒ וַיֹּאמְר֗וּ עַל־דְּבַ֤ר הַכֶּ֙סֶף֙ הַשָּׁ֤ב בְּאַמְתְּחֹתֵ֙ינוּ֙ בַּתְּחִלָּ֔ה אֲנַ֖חְנוּ מוּבָאִ֑ים לְהִתְגֹּלֵ֤ל עָלֵ֙ינוּ֙ וּלְהִתְנַפֵּ֣ל עָלֵ֔ינוּ וְלָקַ֧חַת אֹתָ֛נוּ לַעֲבָדִ֖ים וְאֶת־חֲמֹרֵֽינוּ:
[יט] וַֽיִּגְּשׁוּ֙ אֶל־הָאִ֔ישׁ אֲשֶׁ֖ר עַל־בֵּ֣ית יוֹסֵ֑ף וַיְדַבְּר֥וּ אֵלָ֖יו פֶּ֥תַח הַבָּֽיִת:
[כ] וַיֹּאמְר֖וּ בִּ֣י אֲדֹנִ֑י יָרֹ֥ד יָרַ֛דְנוּ בַּתְּחִלָּ֖ה לִשְׁבָּר־אֹֽכֶל:
[כא] וַיְהִ֞י כִּי־בָ֣אנוּ אֶל־הַמָּל֗וֹן וַֽנִּפְתְּחָה֙ אֶת־אַמְתְּחֹתֵ֔ינוּ וְהִנֵּ֤ה כֶֽסֶף־אִישׁ֙ בְּפִ֣י אַמְתַּחְתּ֔וֹ כַּסְפֵּ֖נוּ בְּמִשְׁקָל֑וֹ וַנָּ֥שֶׁב אֹת֖וֹ בְּיָדֵֽנוּ:
[כב] וְכֶ֧סֶף אַחֵ֛ר הוֹרַ֥דְנוּ בְיָדֵ֖נוּ לִשְׁבָּר־אֹ֑כֶל לֹ֣א יָדַ֔עְנוּ מִי־שָׂ֥ם כַּסְפֵּ֖נוּ בְּאַמְתְּחֹתֵֽינוּ:
[כג] וַיֹּאמֶר֩ שָׁל֨וֹם לָכֶ֜ם אַל־תִּירָ֗אוּ אֱלֹ֨הֵיכֶ֜ם וֵאלֹהֵ֤י אֲבִיכֶם֙ נָתַ֨ן לָכֶ֤ם מַטְמוֹן֙ בְּאַמְתְּחֹ֣תֵיכֶ֔ם כַּסְפְּכֶ֖ם בָּ֣א אֵלָ֑י וַיּוֹצֵ֥א אֲלֵהֶ֖ם אֶת־שִׁמְעֽוֹן:
[כד] וַיָּבֵ֥א הָאִ֛ישׁ אֶת־הָאֲנָשִׁ֖ים בֵּ֣יתָה יוֹסֵ֑ף וַיִּתֶּן־מַ֙יִם֙ וַיִּרְחֲצ֣וּ רַגְלֵיהֶ֔ם וַיִּתֵּ֥ן מִסְפּ֖וֹא לַחֲמֹרֵיהֶֽם:
[כה] וַיָּכִ֙ינוּ֙ אֶת־הַמִּנְחָ֔ה עַד־בּ֥וֹא יוֹסֵ֖ף בַּֽצָּהֳרָ֑יִם כִּ֣י שָֽׁמְע֔וּ כִּי־שָׁ֖ם יֹ֥אכְלוּ לָֽחֶם:
[כו] וַיָּבֹ֤א יוֹסֵף֙ הַבַּ֔יְתָה וַיָּבִ֥יאּוּ ל֛וֹ אֶת־הַמִּנְחָ֥ה אֲשֶׁר־בְּיָדָ֖ם הַבָּ֑יְתָה וַיִּשְׁתַּחֲווּ־ל֖וֹ אָֽרְצָה:
[כז] וַיִּשְׁאַ֤ל לָהֶם֙ לְשָׁל֔וֹם וַיֹּ֗אמֶר הֲשָׁל֛וֹם אֲבִיכֶ֥ם הַזָּקֵ֖ן אֲשֶׁ֣ר אֲמַרְתֶּ֑ם הַעוֹדֶ֖נּוּ חָֽי:
[כח] וַיֹּאמְר֗וּ שָׁל֛וֹם לְעַבְדְּךָ֥ לְאָבִ֖ינוּ עוֹדֶ֣נּוּ חָ֑י וַֽיִּקְּד֖וּ וַיִּֽשְׁתַּחֲוֻּֽ וַיִּֽשְׁתַּחֲוּֽוּ:
[כט] וַיִּשָּׂ֣א עֵינָ֗יו וַיַּ֞רְא אֶת־בִּנְיָמִ֣ין אָחִיו֘ בֶּן־אִמּוֹ֒ וַיֹּ֗אמֶר הֲזֶה֙ אֲחִיכֶ֣ם הַקָּטֹ֔ן אֲשֶׁ֥ר אֲמַרְתֶּ֖ם אֵלָ֑י וַיֹּאמַ֕ר אֱלֹהִ֥ים יָחְנְךָ֖ בְּנִֽי:
[שביעי] [ל] וַיְמַהֵ֣ר יוֹסֵ֗ף כִּֽי־נִכְמְר֤וּ רַחֲמָיו֙ אֶל־אָחִ֔יו וַיְבַקֵּ֖שׁ לִבְכּ֑וֹת וַיָּבֹ֥א הַחַ֖דְרָה וַיֵּ֥בְךְּ שָֽׁמָּה:
[לא] וַיִּרְחַ֥ץ פָּנָ֖יו וַיֵּצֵ֑א וַיִּ֨תְאַפַּ֔ק וַיֹּ֖אמֶר שִׂ֥ימוּ לָֽחֶם:
[לב] וַיָּשִׂ֥ימוּ ל֛וֹ לְבַדּ֖וֹ וְלָהֶ֣ם לְבַדָּ֑ם וְלַמִּצְרִ֞ים הָאֹכְלִ֤ים אִתּוֹ֙ לְבַדָּ֔ם כִּי֩ לֹ֨א יוּכְל֜וּן הַמִּצְרִ֗ים לֶאֱכֹ֤ל אֶת־הָֽעִבְרִים֙ לֶ֔חֶם כִּי־תוֹעֵבָ֥ה הִ֖וא לְמִצְרָֽיִם:
[לג] וַיֵּשְׁב֣וּ לְפָנָ֔יו הַבְּכֹר֙ כִּבְכֹ֣רָת֔וֹ וְהַצָּעִ֖יר כִּצְעִרָת֑וֹ וַיִּתְמְה֥וּ הָאֲנָשִׁ֖ים אִ֥ישׁ אֶל־רֵעֵֽהוּ:
[לד] וַיִּשָּׂ֨א מַשְׂאֹ֜ת מֵאֵ֣ת פָּנָיו֘ אֲלֵהֶם֒ וַתֵּ֜רֶב מַשְׂאַ֧ת בִּנְיָמִ֛ן מִמַּשְׂאֹ֥ת כֻּלָּ֖ם חָמֵ֣שׁ יָד֑וֹת וַיִּשְׁתּ֥וּ וַֽיִּשְׁכְּר֖וּ עִמּֽוֹ:

פרק מג
(א) והרעב - י"ד פסוקים (בתורה מן ג' מלין): ראה בר' כו , ו. (ב) אליהם - י"ז מלא בתורה: ראה בר' לד , יד. (ג) העד - ב' חסר (בלישנא): בר' מג , ג; מ"א ב , מב. (ד) משלח - ז': בר' מג , ד , ה; שמ' ח , יז; וי' יח , כד; כ , כג; יר' ח , יז; כט , יז. נרדה - ג': *בר' יא , ז; מג , ד; ש"א יד , לו. (ה) ואם - ג' ראשי פסוקים בסיפרא: *בר' כד , ח; לד , יז; מג , ה. משלח - ז': ראה לעיל , ד. (ו) לאיש - ל"ב: *בר' מג , ו , יא; מה , כב; וי' יז , ד; כה , כז; במ' ה , ח; דב' כב , טז; כה , ט; שו' טז , יט; ש"א ב , טו; ט , ז; יז , כו , כז; כו , כג; ש"ב יב , ד; יח , יא; מ"א ח , לט; מ"ב כב , טו; יר' כו , יא , טז; מל' ב , יב; מש' טו , כג; כ , ג , יז; כד , כט; איוב ב , ד; רות ג , ג; אס' ו , ט , יא; דנ' יב , ו; דה"ב ו , ל; לד , כג. (ז) שאול - ב': בר' מג , ז; ש"ב כ , יח. על - פי הדברים האלה - ב': בר' מג , ז; *שמ' לד , כז. הידוע - ג' (ב' חסר ואחד מלא): בר' מג , ז; יר' יג , יב; מ , יד. (ח) גם - י"ב פסוקים 'גם גם גם' (בדילוגים קצרים): ראה בר' לב , כ. אל - ישראל - ז': בר' מג , ח; מט , ב; *במ' לב , יד; ש"א ז , ז; יג , יג; יר' ל , ד; מל' א , א. וכל 'משחתיך למלך' דכותהון בר מן אחד 'על': ש"ב יב , ז. שלחה - ו': בר' מג , ח; ש"א טז , יא , יט; מ"ב ד , כב; יח' יז , ז; לא , ד. (ט) הביאתיו - ד' (בלישנא): בר' מג , ט; במ' יד , כד; ש"א א , כב; יש' מח , טו. וחטאתי - ד': בר' לט , ט; מג , ט; מד , לב; נחמ' ו , יג. (י) לולא - ד' כתיב אל"ף: בר' מג , י; שו' יד , יח; ש"ב ב , כז; תה' כז , יג. (יא) לאיש - ל"ב: ראה לעיל , ו. נכאת - ב': בר' לז , כה; מג , יא. ולט - ב': בר' לז , כה; מג , יא. (יב) ואת - הכסף - ד': *בר' מג , יב; *במ' לא , כב; יהו' ז , כד; דה"ב ה , א. המושב - ב': בר' מג , יב; *במ' ה , ח. (יג) שובו - ג' מלא בתורה (בלישנא): בר' מג , יג; שמ' לב , כז; *דב' ה , כז. (יד) ואל שדי - ב': בר' כח , ג; מג , יד. לפני האיש - ב': בר' מג , יד; נחמ' א , יא. ואת - בנימין - ד': *בר' מב , ד , לו; מג , יד , טו. בנימין - י"ז מלא (בלישנא): ראה בר' לה , יח. (טו) ומשנה - ב': בר' מג , טו; יר' יז , יח. ואת - בנימן - ד': ראה לעיל , יד. וירדו מצרים (ירידה מצרים) - ד': בר' מג , טו; יהו' כד , ד; יש' ל , ב; לא , א. (טז) אתם - ל"א: ראה בר' מ , ד. אתם - ל"ז: ראה בר' לד , ח. בנימין - י"ז מלא (בלישנא): ראה בר' לה , יח. על - ביתו - ח': ראה בר' לט , ד. הבא - ג' , ב' חסר וחד מלא: *בר' מג , טז; *שמ' ד , ו; ש"א כ , מ. הביתה - י"ט: ראה בר' לט , יא. (יז) ויבא - נ"א , י"ח מנהן בתורה: ראה בר' כז , יד. (יח) מובאים - ג' (ומלא): *בר' מג , יח; יח' כג , מב; ל , יא. ולקחת - ד': *בר' ל , טו; מג , יח; מ"ב ה , כו; מל' ב , יג. ואת - חמרינו - ב' (בלישנא): בר' מג , יח; שו' יט , יט. (יט) על - בית - י"ג (בלישנא): *בר' מג , יט; *במ' ב , לד; שו' ט , יח; ש"ב א , יב; ב , ד , יא; יד , ט; יח' יג , ה; לט , כט; אס' ח , ב; דה"א יז , יז; דה"ב כג , יח; כו , כא. וכל מלכים , ישעיהו , ירמיהו ותרי עשר דכותהון בר מן י"א 'אל בית' , 'ואל בית' (לא כולל 'אל - בית - אל'): מ"א יד , י; יש' ב , ג; כט , כב; יר' לג , יד; לה , ב; לז , טז , יח; מי' ד , ב; זכ' ה , ד (פעמיים); מל' ג , י. (כ) בי אדני - ז': *בר' מג , כ; מד , יח; במ' יב , יא; שו' ו , יג; ש"א א , כו; מ"א ג , יז , כו. (כא) ויהי - ה' בטעמא (גרשיים) בסיפרא): ראה בר' לה , יח. (כג) ויוצא - י"ב מלא: בר' טו , ה; כד , נג; מג , כג; מח , יב; שמ' יט , יז; שו' ו , יט; מ"ב כד , יג; יר' י , יג; נ , כה; נא , טז; תה' קלו , יא; דה"ב כג , יד. ויוצא אלהם - ב': בר' מג , כג; שו' יט , כה. (כד) ויבא - נ"א , י"ח מנהן בתורה: ראה בר' כז , יד. (כה) בוא - י"ג מלא: ראה בר' לט , טז. (כו) הביתה - י"ט: ראה בר' לט , יא. ויביאו - ב' דגשין: בר' מג , כו; *עז' ח , יח. ויביאו - ג' אל"פים דגושים בשורש 'בוא': בר' מג , כו; וי' כג , יז; עז' ח , יח. ויביאו - ל"ו (מלא וחסר): ראה בר' לז , כח. (כט) וישא עיניו - ה': בר' יח , ב; כד , סג; מג , כט; יהו' ה , יג; שו' יט , יז. בנימין - י"ז מלא (בלישנא): ראה בר' לה , יח. ויאמר - צ"א (בפתח): ראה בר' כז , לו. הזה - ד': *בר' מג , כט; ש"א כא , טז; יש' יד , טז; קה' יא , ו. יחנך - ב': בר' מג , כט; יש' ל , יט. (ל) נכמרו - ג': בר' מג , ל; מ"א ג , כו; הו' יא , ח. שמה - י"ח סופי פסוקים: ראה בר' לט , א. (לא) ויתאפק - ב': בר' מג , לא; *אס' ה , י. שימו - י"ו: בר' מג , לא; שמ' לב , כז; דב' לב , מו; יהו' י , כד; שו' יט , ל; מ"א כ , יב; כב , כז; מ"ב י , ח; חגי א , ה , ז; ב , טו , יח (פעמיים); תה' סו , ב; עז' ד , כא; דה"ב יח , כו. (לב) ולהם - ח': בר' ו , כא; מג , לב; *דב' א , לט; שו' ו , ה; *עז' ב , סה; ו , כ; נחמ' ז , סז; דה"ב כה , יד. יוכלון - ב': בר' מג , לב; מד , א. המצרים - ד' בתורה: בר' יב , יב , יד; מג , לב; דב' כו , ו. המצרים - ה': בר' יב , יב , יד; מג , לב; דב' כו , ו; יהו' כד , ז. (לג) והצעיר - ב': בר' מג , לג; יש' ס , כב. (לד) משאת - ו' (בפתח): *בר' מג , לד; שו' כ , לח; ש"ב יא , ח; תה' קמא , ב; דה"ב כד , ו , ט. וחד: ומשאת - עמ' ה , יא. משאת - ב' , חד מלא ואחד חסר: בר' מג , לד; איכה ב , יד. ותרב - ב': בר' מג , לד; מ"א ה , י.