מאגר הכתר בראשית פרק מז עם עין המסורה

פרק מז
[א] וַיָּבֹ֣א יוֹסֵף֘ וַיַּגֵּ֣ד לְפַרְעֹה֒ וַיֹּ֗אמֶר אָבִ֨י וְאַחַ֜י וְצֹאנָ֤ם וּבְקָרָם֙ וְכָל־אֲשֶׁ֣ר לָהֶ֔ם בָּ֖אוּ מֵאֶ֣רֶץ כְּנָ֑עַן וְהִנָּ֖ם בְּאֶ֥רֶץ גֹּֽשֶׁן:
[ב] וּמִקְצֵ֣ה אֶחָ֔יו לָקַ֖ח חֲמִשָּׁ֣ה אֲנָשִׁ֑ים וַיַּצִּגֵ֖ם לִפְנֵ֥י פַרְעֹֽה:
[ג] וַיֹּ֧אמֶר פַּרְעֹ֛ה אֶל־אֶחָ֖יו מַה־מַּעֲשֵׂיכֶ֑ם וַיֹּאמְר֣וּ אֶל־פַּרְעֹ֗ה רֹעֵ֥ה צֹאן֙ עֲבָדֶ֔יךָ גַּם־אֲנַ֖חְנוּ גַּם־אֲבוֹתֵֽינוּ:
[ד] וַיֹּאמְר֣וּ אֶל־פַּרְעֹ֗ה לָג֣וּר בָּאָרֶץ֘ בָּאנוּ֒ כִּי־אֵ֣ין מִרְעֶ֗ה לַצֹּאן֙ אֲשֶׁ֣ר לַעֲבָדֶ֔יךָ כִּֽי־כָבֵ֥ד הָרָעָ֖ב בְּאֶ֣רֶץ כְּנָ֑עַן וְעַתָּ֛ה יֵֽשְׁבוּ־נָ֥א עֲבָדֶ֖יךָ בְּאֶ֥רֶץ גֹּֽשֶׁן:
[ה] וַיֹּ֣אמֶר פַּרְעֹ֔ה אֶל־יוֹסֵ֖ף לֵאמֹ֑ר אָבִ֥יךָ וְאַחֶ֖יךָ בָּ֥אוּ אֵלֶֽיךָ:
[ו] אֶ֤רֶץ מִצְרַ֙יִם֙ לְפָנֶ֣יךָ הִ֔וא בְּמֵיטַ֣ב הָאָ֔רֶץ הוֹשֵׁ֥ב אֶת־אָבִ֖יךָ וְאֶת־אַחֶ֑יךָ יֵֽשְׁבוּ֙ בְּאֶ֣רֶץ גֹּ֔שֶׁן וְאִם־יָדַ֗עְתָּ וְיֶשׁ־בָּם֙ אַנְשֵׁי־חַ֔יִל וְשַׂמְתָּ֛ם שָׂרֵ֥י מִקְנֶ֖ה עַל־אֲשֶׁר־לִֽי:
[ז] וַיָּבֵ֤א יוֹסֵף֙ אֶת־יַעֲקֹ֣ב אָבִ֔יו וַיַּעֲמִדֵ֖הוּ לִפְנֵ֣י פַרְעֹ֑ה וַיְבָ֥רֶךְ יַעֲקֹ֖ב אֶת־פַּרְעֹֽה:
[ח] וַיֹּ֥אמֶר פַּרְעֹ֖ה אֶֽל־יַעֲקֹ֑ב כַּמָּ֕ה יְמֵ֖י שְׁנֵ֥י חַיֶּֽיךָ:
[ט] וַיֹּ֤אמֶר יַֽעֲקֹב֙ אֶל־פַּרְעֹ֔ה יְמֵי֙ שְׁנֵ֣י מְגוּרַ֔י שְׁלֹשִׁ֥ים וּמְאַ֖ת שָׁנָ֑ה מְעַ֣ט וְרָעִ֗ים הָיוּ֙ יְמֵי֙ שְׁנֵ֣י חַיַּ֔י וְלֹ֣א הִשִּׂ֗יגוּ אֶת־יְמֵי֙ שְׁנֵי֙ חַיֵּ֣י אֲבֹתַ֔י בִּימֵ֖י מְגוּרֵיהֶֽם:
[י] וַיְבָ֥רֶךְ יַעֲקֹ֖ב אֶת־פַּרְעֹ֑ה וַיֵּצֵ֖א מִלִּפְנֵ֥י פַרְעֹֽה:
[שביעי] [יא] וַיּוֹשֵׁ֣ב יוֹסֵף֘ אֶת־אָבִ֣יו וְאֶת־אֶחָיו֒ וַיִּתֵּ֨ן לָהֶ֤ם אֲחֻזָּה֙ בְּאֶ֣רֶץ מִצְרַ֔יִם בְּמֵיטַ֥ב הָאָ֖רֶץ בְּאֶ֣רֶץ רַעְמְסֵ֑ס כַּאֲשֶׁ֖ר צִוָּ֥ה פַרְעֹֽה:
[יב] וַיְכַלְכֵּ֤ל יוֹסֵף֙ אֶת־אָבִ֣יו וְאֶת־אֶחָ֔יו וְאֵ֖ת כָּל־בֵּ֣ית אָבִ֑יו לֶ֖חֶם לְפִ֥י הַטָּֽף:
[יג] וְלֶ֤חֶם אֵין֙ בְּכָל־הָאָ֔רֶץ כִּֽי־כָבֵ֥ד הָרָעָ֖ב מְאֹ֑ד וַתֵּ֜לַהּ אֶ֤רֶץ מִצְרַ֙יִם֙ וְאֶ֣רֶץ כְּנַ֔עַן מִפְּנֵ֖י הָרָעָֽב:
[יד] וַיְלַקֵּ֣ט יוֹסֵ֗ף אֶת־כָּל־הַכֶּ֙סֶף֙ הַנִּמְצָ֤א בְאֶֽרֶץ־מִצְרַ֙יִם֙ וּבְאֶ֣רֶץ כְּנַ֔עַן בַּשֶּׁ֖בֶר אֲשֶׁר־הֵ֣ם שֹׁבְרִ֑ים וַיָּבֵ֥א יוֹסֵ֛ף אֶת־הַכֶּ֖סֶף בֵּ֥יתָה פַרְעֹֽה:
[טו] וַיִּתֹּ֣ם הַכֶּ֗סֶף מֵאֶ֣רֶץ מִצְרַיִם֘ וּמֵאֶ֣רֶץ כְּנַעַן֒ וַיָּבֹאוּ֩ כָל־מִצְרַ֨יִם אֶל־יוֹסֵ֤ף לֵאמֹר֙ הָֽבָה־לָּ֣נוּ לֶ֔חֶם וְלָ֥מָּה נָמ֖וּת נֶגְדֶּ֑ךָ כִּ֥י אָפֵ֖ס כָּֽסֶף:
[טז] וַיֹּ֤אמֶר יוֹסֵף֙ הָב֣וּ מִקְנֵיכֶ֔ם וְאֶתְּנָ֥ה לָכֶ֖ם בְּמִקְנֵיכֶ֑ם אִם־אָפֵ֖ס כָּֽסֶף:
[יז] וַיָּבִ֣יאוּ אֶת־מִקְנֵיהֶם֘ אֶל־יוֹסֵף֒ וַיִּתֵּ֣ן לָהֶם֩ יוֹסֵ֨ף לֶ֜חֶם בַּסּוּסִ֗ים וּבְמִקְנֵ֥ה הַצֹּ֛אן וּבְמִקְנֵ֥ה הַבָּקָ֖ר וּבַחֲמֹרִ֑ים וַיְנַהֲלֵ֤ם בַּלֶּ֙חֶם֙ בְּכָל־מִקְנֵהֶ֔ם בַּשָּׁנָ֖ה הַהִֽוא:
[יח] וַתִּתֹּם֘ הַשָּׁנָ֣ה הַהִוא֒ וַיָּבֹ֨אוּ אֵלָ֜יו בַּשָּׁנָ֣ה הַשֵּׁנִ֗ית וַיֹּ֤אמְרוּ לוֹ֙ לֹא־נְכַחֵ֣ד מֵֽאֲדֹנִ֔י כִּ֚י אִם־תַּ֣ם הַכֶּ֔סֶף וּמִקְנֵ֥ה הַבְּהֵמָ֖ה אֶל־אֲדֹנִ֑י לֹ֤א נִשְׁאַר֙ לִפְנֵ֣י אֲדֹנִ֔י בִּלְתִּ֥י אִם־גְּוִיָּתֵ֖נוּ וְאַדְמָתֵֽנוּ:
[יט] לָ֧מָּה נָמ֣וּת לְעֵינֶ֗יךָ גַּם־אֲנַ֙חְנוּ֙ גַּ֣ם אַדְמָתֵ֔נוּ קְנֵֽה־אֹתָ֥נוּ וְאֶת־אַדְמָתֵ֖נוּ בַּלָּ֑חֶם וְנִֽהְיֶ֞ה אֲנַ֤חְנוּ וְאַדְמָתֵ֙נוּ֙ עֲבָדִ֣ים לְפַרְעֹ֔ה וְתֶן־זֶ֗רַע וְנִֽחְיֶה֙ וְלֹ֣א נָמ֔וּת וְהָאֲדָמָ֖ה לֹ֥א תֵשָֽׁם:
[כ] וַיִּ֨קֶן יוֹסֵ֜ף אֶת־כָּל־אַדְמַ֤ת מִצְרַ֙יִם֙ לְפַרְעֹ֔ה כִּֽי־מָכְר֤וּ מִצְרַ֙יִם֙ אִ֣ישׁ שָׂדֵ֔הוּ כִּֽי־חָזַ֥ק עֲלֵהֶ֖ם הָרָעָ֑ב וַתְּהִ֥י הָאָ֖רֶץ לְפַרְעֹֽה:
[כא] וְאֶ֨ת־הָעָ֔ם הֶעֱבִ֥יר אֹת֖וֹ לֶעָרִ֑ים מִקְצֵ֥ה גְבוּל־מִצְרַ֖יִם וְעַד־קָצֵֽהוּ:
[כב] רַ֛ק אַדְמַ֥ת הַכֹּהֲנִ֖ים לֹ֣א קָנָ֑ה כִּי֩ חֹ֨ק לַכֹּהֲנִ֜ים מֵאֵ֣ת פַּרְעֹ֗ה וְאָֽכְל֤וּ אֶת־חֻקָּם֙ אֲשֶׁ֨ר נָתַ֤ן לָהֶם֙ פַּרְעֹ֔ה עַל־כֵּ֕ן לֹ֥א מָכְר֖וּ אֶת־אַדְמָתָֽם:
[כג] וַיֹּ֤אמֶר יוֹסֵף֙ אֶל־הָעָ֔ם הֵן֩ קָנִ֨יתִי אֶתְכֶ֥ם הַיּ֛וֹם וְאֶת־אַדְמַתְכֶ֖ם לְפַרְעֹ֑ה הֵֽא־לָכֶ֣ם זֶ֔רַע וּזְרַעְתֶּ֖ם אֶת־הָאֲדָמָֽה:
[כד] וְהָיָה֙ בַּתְּבוּאֹ֔ת וּנְתַתֶּ֥ם חֲמִישִׁ֖ית לְפַרְעֹ֑ה וְאַרְבַּ֣ע הַיָּדֹ֡ת יִהְיֶ֣ה לָכֶם֩ לְזֶ֨רַע הַשָּׂדֶ֧ה וּֽלְאָכְלְכֶ֛ם וְלַאֲשֶׁ֥ר בְּבָתֵּיכֶ֖ם וְלֶאֱכֹ֥ל לְטַפְּכֶֽם:
[מפטיר] [כה] וַיֹּאמְר֖וּ הֶחֱיִתָ֑נוּ נִמְצָא־חֵן֙ בְּעֵינֵ֣י אֲדֹנִ֔י וְהָיִ֥ינוּ עֲבָדִ֖ים לְפַרְעֹֽה:
[כו] וַיָּ֣שֶׂם אֹתָ֣הּ יוֹסֵ֡ף לְחֹק֩ עַד־הַיּ֨וֹם הַזֶּ֜ה עַל־אַדְמַ֥ת מִצְרַ֛יִם לְפַרְעֹ֖ה לַחֹ֑מֶשׁ רַ֞ק אַדְמַ֤ת הַכֹּֽהֲנִים֙ לְבַדָּ֔ם לֹ֥א הָיְתָ֖ה לְפַרְעֹֽה:
[כז] וַיֵּ֧שֶׁב יִשְׂרָאֵ֛ל בְּאֶ֥רֶץ מִצְרַ֖יִם בְּאֶ֣רֶץ גֹּ֑שֶׁן וַיֵּאָחֲז֣וּ בָ֔הּ וַיִּפְר֥וּ וַיִּרְבּ֖וּ מְאֹֽד:
{פרשת ויחי} [כח] וַיְחִ֤י יַֽעֲקֹב֙ בְּאֶ֣רֶץ מִצְרַ֔יִם שְׁבַ֥ע עֶשְׂרֵ֖ה שָׁנָ֑ה וַיְהִ֤י יְמֵֽי־יַֽעֲקֹב֙ שְׁנֵ֣י חַיָּ֔יו שֶׁ֣בַע שָׁנִ֔ים וְאַרְבָּעִ֥ים וּמְאַ֖ת שָׁנָֽה:
[כט] וַיִּקְרְב֣וּ יְמֵֽי־יִשְׂרָאֵל֘ לָמוּת֒ וַיִּקְרָ֣א׀ לִבְנ֣וֹ לְיוֹסֵ֗ף וַיֹּ֤אמֶר לוֹ֙ אִם־נָ֨א מָצָ֤אתִי חֵן֙ בְּעֵינֶ֔יךָ שִֽׂים־נָ֥א יָדְךָ֖ תַּ֣חַת יְרֵכִ֑י וְעָשִׂ֤יתָ עִמָּדִי֙ חֶ֣סֶד וֶאֱמֶ֔ת אַל־נָ֥א תִקְבְּרֵ֖נִי בְּמִצְרָֽיִם:
[ל] וְשָֽׁכַבְתִּי֙ עִם־אֲבֹתַ֔י וּנְשָׂאתַ֙נִי֙ מִמִּצְרַ֔יִם וּקְבַרְתַּ֖נִי בִּקְבֻרָתָ֑ם וַיֹּאמַ֕ר אָנֹכִ֖י אֶעֱשֶׂ֥ה כִדְבָרֶֽךָ:
[לא] וַיֹּ֗אמֶר הִשָּֽׁבְעָה֙ לִ֔י וַיִּשָּׁבַ֖ע ל֑וֹ וַיִּשְׁתַּ֥חוּ יִשְׂרָאֵ֖ל עַל־רֹ֥אשׁ הַמִּטָּֽה: פ

פרק מז
(ב) ויצגם - ב' חסר בלישנא: בר' מז , ב; ש"ב ו , יז. (ג) גם - י' פסוקים בתורה 'גם גם' ומלה חדה ביניהון: ראה בר' מד , טז. רעה - ד' כתיב ה"א: בר' ד , ב; מו , לד; מז , ג; תה' פ , ב. אבותינו - ח' מלא (בלישנא): *בר' מז , ג; יר' ג , כד , כה; יד , כ; טז , יט; דה"א יב , יח; דה"ב כט , ט; לד , כא. וכל יהושע , שופטים ותהלים דכותהון בר מן אחד: תה' כב , ה. (ד) ישבו - כ': בר' מז , ד , ו; *שמ' כג , לג; וי' כג , מב; *דב' ג , יט; כה , ה; יהו' א , יד; מ"ב י , ל; טו , יב; יר' נ , לט; יח' לא , ו; הו' ג , ד; ט , ג; *זכ' ח , ד; תה' קלב , יב; קמ , יד; איוב טו , כח; לח , מ; איכה ב , י; נחמ' ח , יד. ועתה - כ"ז בטעמא (תביר , ללא מקף וללא טעמים מחברים לפניו , כולל: 'עתה' , 'אתה' , 'ואתה'): בר' טו , טו; יז , ט; מז , ד; במ' יא , ו; כב , לד; ש"א כד , יא; כז , א; ש"ב ה , ב; ז , כ; יט , י; מ"א א , יח; יב , כו; יח , לז; כא , ז; מ"ב ה , טו; יש' ה , ג; יר' מה , ה; הו' ב , יב; ה , ז; מי' ד , יא; ז , י; מל' א , ט; עז' ט , י; י , ב; דה"א יא , ב; דה"ב ב , טו; כא , טו. (ה) ויאמר פרעה - ג' בטעמא (מונח וזקף קטן): בר' מז , ה; שמ' ה , ב , ה. (ו) ואת - אחיך - ב': בר' מז , ו; ש"א יז , יח. ישבו - כ': ראה לעיל , ד. ושמתם - ב': בר' מז , ו; דב' י , ב. (ז) ויבא - נ"א , י"ח מנהן בתורה: ראה בר' כז , יד. ויעמדהו - ב' וחסר: בר' מז , ז; במ' כז , כב. (ט) ורעים - ג': *בר' מז , ט; דב' ו , כב; יר' ו , כט. מגוריהם - ד' , חד חסר וג' מלא: בר' לו , ז; מז , ט; שמ' ו , ד; יח' כ , לח. (יא) ואת - אחיו - ה': *בר' מז , יא , יב; דב' לג , ט; שו' ט , מא; יר' לה , ג. (יב) ואת - אחיו - ה': ראה לעיל , יא. ואת כל - בית - ט': ראה בר' מא , נא. (יג) ולחם - ד' ראשי פסוקים: *בר' מז , יג; *שמ' כט , ב; וי' כג , יד; *נחמ' ט , טו. (יד) ובארץ - ה': בר' מז , יד; יר' יב , ה; לג , יג; מד , א; *נחמ' ט , לה. ויבא - נ"א , י"ח מנהן בתורה: ראה בר' כז , יד. ביתה פרעה - ב': *בר' מז , יד; שמ' ח , כ. (טו) ומארץ - ו': בר' מז , טו; ש"א ל , טז; יר' יז , כו; מח , לג; נ , ח; זכ' ח , ז. (יש עוד מקרה , בר' כד , ז , שאינו נמנה כאן). אפס - ד': בר' מז , טו , טז; יש' טז , ד; כט , כ. (טז) אפס - ד': ראה לעיל , טו. (יז) ויביאו - ל"ו (מלא וחסר): ראה בר' לז , כח. ובמקנה - ב' בפסוק: בר' מז , יז (פעמיים). וינהלם - ב': בר' מז , יז; *דה"ב לב , כב. בלחם - ז' דגשים (בלישנא): *בר' מז , יז , יט; וי' ח , לב; במ' כא , ה; *דב' כג , ה; ש"א ב , ה; *נחמ' יג , ב. מקנהם - ד' חסר (בלישנא): בר' לד , כג; מז , יז; במ' לא , ט; דב' ג , יט. (יח) ותתם - ב': בר' מז , יח; מ"א ז , כב. ומקנה - ג': *בר' כו , יד; מז , יח; דה"ב לב , כט. (יט) גם - י' פסוקים בתורה 'גם וגם' ומלה חדה ביניהון: ראה בר' מד , טז. בלחם - ז' (דגושים , בלישנא): ראה לעיל , יז. והאדמה - ג': *בר' מז , יט; *דב' יא , יז; יש' ו , יא. תשם - ב' , אחד בקמץ ואחד בפתח: בר' מז , יט; יח' יב , יט. תשם - ג' (בלישנא , ב' בפתח ואחד בקמץ): בר' מז , יט; יח' יב , יט; יט , ז. (כ) ויקן - ג' ראשי פסוקים: בר' לג , יט; מז , כ; מ"א טז , כד. חזק - ה' פתח: ראה בר' מא , נז. עלהם - י"ג חסר: ראה בר' מה , טו. (כא) ואת - העם - י"ב: בר' יד , טז; מז , כא; במ' יג , יח; *דב' ב , ד; יהו' ו , י; שו' ט , מה; ש"א לא , ט; ש"ב יב , לא; יר' כא , ז; נחמ' ז , ה; דה"א י , ט; כ , ג. (כב) מאת פרעה - ב': בר' מז , כב; שמ' ה , כ. (כג) קניתי - ה': בר' ד , א; מז , כג; רות ד , ט , י; קה' ב , ז. הא - ג': בר' מז , כג; יח' טז , מג; *דנ' ב , מג. (כד) בתבואת - ז' (חסר ומלא): בר' מז , כד; וי' כה , טו , טז; דב' לג , יד; מ"ב ח , ו; מש' יד , ד; טז , ח. חמישית - ג' מלא: בר' מז , כד; *וי' כז , טו; נחמ' ו , ה. הידת - ג' חסר (בלישנא): בר' מז , כד; שמ' לו , כב; מ"א י , יט. (כה) בעיני - ל"ג בתורה: ראה בר' כח , ח. (כו) וישם - ל"ג בתורה: ראה בר' כח , יא. (כט) ויקרבו ימי - ב': *בר' מז , כט; מ"א ב , א. (ל) ויאמר - צ"א (בפתח): ראה בר' כז , לו. כדברך - י"ג חסר (בלישנא): ראה בר' ל , לד.