מאגר הכתר הושע פרק א עם פירוש ראב"ע פירוש בע"פ שנמסר לתלמיד

פרק א
[א] דְּבַר־יְהוָ֣ה׀ אֲשֶׁ֣ר הָיָ֗ה אֶל־הוֹשֵׁעַ֙ בֶּן־בְּאֵרִ֔י בִּימֵ֨י עֻזִּיָּ֥ה יוֹתָ֛ם אָחָ֥ז יְחִזְקִיָּ֖ה מַלְכֵ֣י יְהוּדָ֑ה וּבִימֵ֛י יָרָבְעָ֥ם בֶּן־יוֹאָ֖שׁ מֶ֥לֶךְ יִשְׂרָאֵֽל:
[ב] תְּחִלַּ֥ת דִּבֶּר־יְהוָ֖ה בְּהוֹשֵׁ֑עַ פ
וַיֹּ֨אמֶר יְהוָ֜ה אֶל־הוֹשֵׁ֗עַ לֵ֣ךְ קַח־לְךָ֞ אֵ֤שֶׁת זְנוּנִים֙ וְיַלְדֵ֣י זְנוּנִ֔ים כִּֽי־זָנֹ֤ה תִזְנֶה֙ הָאָ֔רֶץ מֵאַחֲרֵ֖י יְהוָֽה:
[ג] וַיֵּ֙לֶךְ֙ וַיִּקַּ֔ח אֶת־גֹּ֖מֶר בַּת־דִּבְלָ֑יִם וַתַּ֥הַר וַתֵּלֶד־ל֖וֹ בֵּֽן:
[ד] וַיֹּ֤אמֶר יְהוָה֙ אֵלָ֔יו קְרָ֥א שְׁמ֖וֹ יִזְרְעֶ֑אל כִּי־ע֣וֹד מְעַ֗ט וּפָ֨קַדְתִּ֜י אֶת־דְּמֵ֤י יִזְרְעֶאל֙ עַל־בֵּ֣ית יֵה֔וּא וְהִ֨שְׁבַּתִּ֔י מַמְלְכ֖וּת בֵּ֥ית יִשְׂרָאֵֽל:
[ה] וְהָיָ֖ה בַּיּ֣וֹם הַה֑וּא וְשָֽׁבַרְתִּי֙ אֶת־קֶ֣שֶׁת יִשְׂרָאֵ֔ל בְּעֵ֖מֶק יִזְרְעֶֽאל:
[ו] וַתַּ֤הַר עוֹד֙ וַתֵּ֣לֶד בַּ֔ת וַיֹּ֣אמֶר ל֔וֹ קְרָ֥א שְׁמָ֖הּ לֹ֣א רֻחָ֑מָה כִּי֩ לֹ֨א אוֹסִ֜יף ע֗וֹד אֲרַחֵם֙ אֶת־בֵּ֣ית יִשְׂרָאֵ֔ל כִּֽי־נָשֹׂ֥א אֶשָּׂ֖א לָהֶֽם:
[ז] וְאֶת־בֵּ֤ית יְהוּדָה֙ אֲרַחֵ֔ם וְהוֹשַׁעְתִּ֖ים בַּיהוָ֣ה אֱלֹהֵיהֶ֑ם וְלֹ֣א אוֹשִׁיעֵ֗ם בְּקֶ֤שֶׁת וּבְחֶ֙רֶב֙ וּבְמִלְחָמָ֔ה בְּסוּסִ֖ים וּבְפָרָשִֽׁים:
[ח] וַתִּגְמֹ֖ל אֶת־לֹ֣א רֻחָ֑מָה וַתַּ֖הַר וַתֵּ֥לֶד בֵּֽן:
[ט] וַיֹּ֕אמֶר קְרָ֥א שְׁמ֖וֹ לֹ֣א עַמִּ֑י כִּ֤י אַתֶּם֙ לֹ֣א עַמִּ֔י וְאָנֹכִ֖י לֹא־אֶהְיֶ֥ה לָכֶֽם: פ

פרק א
(א-ב) דבר יי' אשר היה אל הושע. אומר , כי כל הנביאים לא היו שוים בנבואתם; כי היה נביא שדיבר לו הקדוש ברוך הוא פה אל פה , כמו שדיבר למשה , שנאמר "פה אל פה אדבר בו" (במ' יב , ח) , והיה נביא שדיבר לו הקדוש ברוך הוא במראה ובחלום , שנאמר "אם יהיה נביאכם" וגו' (שם , ו). ויתכן כי להושע - לא דיבר לו הקדוש ברוך הוא אלא בחלום , כי זה שנאמר תחילת דבר יי' בהושע ויאמר יי' אל הושע לך קח לך אשת זנונים - חס ושלום שיקח הנביא אשת זנונים! אלא כך נראָה לו בחלום , שילך ויקח אשת זנונים ויוליד ממנה ילדי זנונים. למה? - כי זנה תזנה הארץ מאחרי יי'. ובאמרו בימי ירבעם בן יואש מלך ישראל - על כן נזכר , כי תחילת הנבואה לא היה כי אם על בית יהוא , כמו שנאמר "כי עוד מעט ופקדתי את דמי יזרעאל על בית יהוא" (להלן , ד). (ג) וילך ויקח את גמר - פירוש: נראָה לו בחלום שהלך ולקח את גמר , זונה שהיתה ידועה באותו מקום , ותהר ותלד לו בן. (ד) ויאמר יי' אליו קרא שמו יזרעאל כי עוד מעט ופקדתי את הדמים אשר שפך יהוא ביזרעאל , כאשר נאמר "ויך יהוא את כל הנשארים לבית אחאב ביזרעאל וכל גדוליו ומיודעיו וכהניו עד בלתי השאיר לו שריד" (מ"ב י , יא). והשבתי ממלכות יהוא על בית ישראל - כי ארבעה מלכים מלכו אחר מותו מביתו: יהואחז ויואש וירבעם וזכריהו , ובימי זכריהו נפסק מלכות יהוא; ולא מלך כי אם ששה חדשים , כי קשר עליו שלום בן יבש והרגו , כאשר נאמר "ויקשר עליו שלום בן יבש ויכהו" (מ"ב טו , י).