מאגר הכתר יואל פרק ד עם עין המסורה

פרק ד
[א] כִּ֗י הִנֵּ֛ה בַּיָּמִ֥ים הָהֵ֖מָּה וּבָעֵ֣ת הַהִ֑יא אֲשֶׁ֥ר אָשִׁ֛וב אָשִׁ֛יב אֶת־שְׁב֥וּת יְהוּדָ֖ה וִירוּשָׁלִָֽם:
[ב] וְקִבַּצְתִּי֙ אֶת־כָּל־הַגּוֹיִ֔ם וְה֣וֹרַדְתִּ֔ים אֶל־עֵ֖מֶק יְהוֹשָׁפָ֑ט וְנִשְׁפַּטְתִּ֨י עִמָּ֜ם שָׁ֗ם עַל־עַמִּ֨י וְנַחֲלָתִ֤י יִשְׂרָאֵל֙ אֲשֶׁ֣ר פִּזְּר֣וּ בַגּוֹיִ֔ם וְאֶת־אַרְצִ֖י חִלֵּֽקוּ:
[ג] וְאֶל־עַמִּ֖י יַדּ֣וּ גוֹרָ֑ל וַֽיִּתְּנ֤וּ הַיֶּ֙לֶד֙ בַּזּוֹנָ֔ה וְהַיַּלְדָּ֛ה מָכְר֥וּ בַיַּ֖יִן וַיִּשְׁתּֽוּ:
[ד] וְ֠גַם מָה־אַתֶּ֥ם לִי֙ צֹ֣ר וְצִיד֔וֹן וְכֹ֖ל גְּלִיל֣וֹת פְּלָ֑שֶׁת הַגְּמ֗וּל אַתֶּם֙ מְשַׁלְּמִ֣ים עָלָ֔י וְאִם־גֹּמְלִ֤ים אַתֶּם֙ עָלַ֔י קַ֣ל מְהֵרָ֔ה אָשִׁ֥יב גְּמֻֽלְכֶ֖ם בְּרֹאשְׁכֶֽם:
[ה] אֲשֶׁר־כַּסְפִּ֥י וּזְהָבִ֖י לְקַחְתֶּ֑ם וּמַֽחֲמַדַּי֙ הַטֹּבִ֔ים הֲבֵאתֶ֖ם לְהֵיכְלֵיכֶֽם:
[ו] וּבְנֵ֤י יְהוּדָה֙ וּבְנֵ֣י יְרוּשָׁלִַ֔ם מְכַרְתֶּ֖ם לִבְנֵ֣י הַיְּוָנִ֑ים לְמַ֥עַן הַרְחִיקָ֖ם מֵעַ֥ל גְּבוּלָֽם:
[ז] הִנְנִ֣י מְעִירָ֔ם מִ֨ן־הַמָּק֔וֹם אֲשֶׁר־מְכַרְתֶּ֥ם אֹתָ֖ם שָׁ֑מָּה וַהֲשִׁבֹתִ֥י גְמֻֽלְכֶ֖ם בְּרֹאשְׁכֶֽם:
[ח] וּמָכַרְתִּ֞י אֶת־בְּנֵיכֶ֣ם וְאֶת־בְּנֽוֹתֵיכֶ֗ם בְּיַד֙ בְּנֵ֣י יְהוּדָ֔ה וּמְכָר֥וּם לִשְׁבָאיִ֖ם אֶל־גּ֣וֹי רָח֑וֹק כִּ֥י יְהוָ֖ה דִּבֵּֽר: פ
[ט] קִרְאוּ־זֹאת֙ בַּגּוֹיִ֔ם קַדְּשׁ֖וּ מִלְחָמָ֑ה הָעִ֙ירוּ֙ הַגִּבּוֹרִ֔ים יִגְּשׁ֣וּ יַֽעֲל֔וּ כֹּ֖ל אַנְשֵׁ֥י הַמִּלְחָמָֽה:
[י] כֹּ֤תּוּ אִתֵּיכֶם֙ לַחֲרָב֔וֹת וּמַזְמְרֹֽתֵיכֶ֖ם לִרְמָחִ֑ים הַֽחַלָּ֔שׁ יֹאמַ֖ר גִּבּ֥וֹר אָֽנִי:
[יא] ע֣וּשׁוּ וָבֹ֧אוּ כָֽל־הַגּוֹיִ֛ם מִסָּבִ֖יב וְנִקְבָּ֑צוּ שָׁ֕מָּה הַֽנְחַ֥ת יְהוָ֖ה גִּבּוֹרֶֽיךָ:
[יב] יֵע֙וֹרוּ֙ וְיַעֲל֣וּ הַגּוֹיִ֔ם אֶל־עֵ֖מֶק יְהוֹשָׁפָ֑ט כִּ֣י שָׁ֗ם אֵשֵׁ֛ב לִשְׁפֹּ֥ט אֶת־כָּל־הַגּוֹיִ֖ם מִסָּבִֽיב:
[יג] שִׁלְח֣וּ מַגָּ֔ל כִּ֥י בָשַׁ֖ל קָצִ֑יר בֹּ֤אֽוּ רְדוּ֙ כִּֽי־מָ֣לְאָה גַּ֔ת הֵשִׁ֙יקוּ֙ הַיְקָבִ֔ים כִּ֥י רַבָּ֖ה רָעָתָֽם:
[יד] הֲמוֹנִ֣ים הֲמוֹנִ֔ים בְּעֵ֖מֶק הֶחָר֑וּץ כִּ֤י קָרוֹב֙ י֣וֹם יְהוָ֔ה בְּעֵ֖מֶק הֶחָרֽוּץ:
[טו] שֶׁ֥מֶשׁ וְיָרֵ֖חַ קָדָ֑רוּ וְכוֹכָבִ֖ים אָסְפ֥וּ נָגְהָֽם:
[טז] וַיהוָ֞ה מִצִּיּ֣וֹן יִשְׁאָ֗ג וּמִירוּשָׁלִַם֙ יִתֵּ֣ן קוֹל֔וֹ וְרָעֲשׁ֖וּ שָׁמַ֣יִם וָאָ֑רֶץ וַֽיהוָה֙ מַחֲסֶ֣ה לְעַמּ֔וֹ וּמָע֖וֹז לִבְנֵ֥י יִשְׂרָאֵֽל:
[יז] וִידַעְתֶּ֗ם כִּ֣י אֲנִ֤י יְהוָה֙ אֱלֹ֣הֵיכֶ֔ם שֹׁכֵ֖ן בְּצִיּ֣וֹן הַר־קָדְשִׁ֑י וְהָיְתָ֤ה יְרוּשָׁלִַם֙ קֹ֔דֶשׁ וְזָרִ֥ים לֹא־יַֽעַבְרוּ־בָ֖הּ עֽוֹד: ס
[יח] וְהָיָה֩ בַיּ֨וֹם הַה֜וּא יִטְּפ֧וּ הֶהָרִ֣ים עָסִ֗יס וְהַגְּבָעוֹת֙ תֵּלַ֣כְנָה חָלָ֔ב וְכָל־אֲפִיקֵ֥י יְהוּדָ֖ה יֵ֣לְכוּ מָ֑יִם וּמַעְיָ֗ן מִבֵּ֤ית יְהוָה֙ יֵצֵ֔א וְהִשְׁקָ֖ה אֶת־נַ֥חַל הַשִּׁטִּֽים:
[יט] מִצְרַ֙יִם֙ לִשְׁמָמָ֣ה תִֽהְיֶ֔ה וֶאֱד֕וֹם לְמִדְבַּ֥ר שְׁמָמָ֖ה תִּֽהְיֶ֑ה מֵֽחֲמַס֙ בְּנֵ֣י יְהוּדָ֔ה אֲשֶׁר־שָׁפְכ֥וּ דָם־נָקִ֖יא בְּאַרְצָֽם:
[כ] וִיהוּדָ֖ה לְעוֹלָ֣ם תֵּשֵׁ֑ב וִירוּשָׁלִַ֖ם לְד֥וֹר וָדֽוֹר:
[כא] וְנִקֵּ֖יתִי דָּמָ֣ם לֹֽא־נִקֵּ֑יתִי וַיהוָ֖ה שֹׁכֵ֥ן בְּצִיּֽוֹן:

פרק ד
(א) בימים ההמה - ח': ראה יואל ג , ב. ההמה - י"ב: ראה יואל ג , ב. ובעת ההיא - ח': שו' יד , ד; יר' לג , טו; נ , ד , כ; יואל ד , א; דנ' יב , א (פעמיים); דה"ב טז , ז. אשיב דכתיב אשוב - ג': יר' לג , כו; מט , לט; יואל ד , א. (ג) ידו - ג': יואל ד , ג; עו' א , יא; נח' ג , י. (ואחד: וידו - איכה ג , נג). (ד) וגם - ה' ראשי פסוקים בסיפרא: ראה יואל ב , יב. גמלים - ב': יואל ד , ד; דה"ב כ , יא. גמלכם - ב' (וחסר): יואל ד , ד , ז. (ה) הטבים - ה' חסר (בלישנא): בר' כז , ט; דב' ח , יב; ש"א כה , טו; מ"א ב , לב; יואל ד , ה. הבאתם - ג': במ' כ , ד; ש"א כא , טז; יואל ד , ה. (ז) גמלכם - ב' וחסר: יואל ד , ד , ז. (ח) בנותיכם - ב' מלא: כל נביאים (ש"א ח , יג; יר' ט , יט; כט , ו; הו' ד , יג , יד; יואל ד , ח - כל אלה נמנים כאחד); עז' ט , יב. (ט) הגבורים - ז' מלא (בלישנא): מ"א א , ח , י; יר' מו , ט; יואל ד , ט; דה"א יא , יט; יט , ח; כח , א. (יא) ובאו - ג' (בקמץ): יש' מה , כ; יח' לט , יז; יואל ד , יא. (יב) יעורו - ג' (ב' חסר ואחד מלא): יר' נ , מא; יואל ד , יב; איוב יד , יב. ויעלו - ג' רפין: יהו' ד , טז; יח' כז , ל; יואל ד , יב. (יג) מגל - ב': יר' נ , טז; יואל ד , יג. (יד) המונים - ב': בפסוק זה. החרוץ - ב': בפסוק זה. (טו) וכוכבים - ו': ראה יואל ב , י. (טז) ויי' - ה' ראשי פסוקים בסיפרא: ראה הו' יב , ו. מחסה - ג' רפין: יואל ד , טז; תה' מו , ב; סב , ט. מחסה - ח' (בלישנא , בפתח וחטף פתח): יר' יז , יז; יואל ד , טז; תה' מו , ב; סב , ט; עא , ז; קיח , ח , ט; רות ב , יב. וכל 'אחסה' דכותהון (בתנועה חטופה) בר מן חד: אחסה (בשווא) - תה' נז , ב. ומעוז - ב': יואל ד , טז; תה' כח , ח. (יז) כי אני יי' אלהיכם - י': שמ' ו , ז; טז , יב; וי' יא , מד; כ , ז; כד , כב; כה , יז; כו , א; דב' כט , ה; יח' כ , כ; יואל ד , יז. (יח) והשקה - ג': בר' ב , ו; במ' ה , כד; יואל ד , י. (ואחד: והשקהּ - במ' ה , כז). (יט) מצרים - ג' ראשי פסוקים: יר' מו , ח; יואל ד , יט; איכה ה , ו. נקיא - ב' מלא: יואל ד , יט; יונה א , יד. נקיא - י"ב יתיר אל"ף בסופי תיבות: *במ' יג , ט; יהו' י , כד; ש"א יז , יז; יש' כח , יב; יח' א , יד; מא , טו; יואל ד , יט; יונה א , יד; דנ' ב , לט; ג , כט; *עז' ג , ז; ו , טו. (כ) ויהודה - ב' ראשי פסוקים: יואל ד , כ; דה"ב כ , כד.