מאגר הכתר עמוס פרק א עם פירוש ראב"ע פירוש בע"פ שנמסר לתלמיד

פרק א
[א] דִּבְרֵ֣י עָמ֔וֹס אֲשֶׁר־הָיָ֥ה בַנֹּקְדִ֖ים מִתְּק֑וֹעַ אֲשֶׁר֩ חָזָ֨ה עַל־יִשְׂרָאֵ֜ל בִּימֵ֣י׀ עֻזִּיָּ֣ה מֶלֶךְ־יְהוּדָ֗ה וּבִימֵ֞י יָרָבְעָ֤ם בֶּן־יוֹאָשׁ֙ מֶ֣לֶךְ יִשְׂרָאֵ֔ל שְׁנָתַ֖יִם לִפְנֵ֥י הָרָֽעַשׁ:
[ב] וַיֹּאמַ֓ר׀ יְהוָה֙ מִצִּיּ֣וֹן יִשְׁאָ֔ג וּמִירוּשָׁלִַ֖ם יִתֵּ֣ן קוֹל֑וֹ וְאָֽבְלוּ֙ נְא֣וֹת הָרֹעִ֔ים וְיָבֵ֖שׁ רֹ֥אשׁ הַכַּרְמֶֽל: פ
[ג] כֹּ֚ה אָמַ֣ר יְהוָ֔ה עַל־שְׁלֹשָׁה֙ פִּשְׁעֵ֣י דַמֶּ֔שֶׂק וְעַל־אַרְבָּעָ֖ה לֹ֣א אֲשִׁיבֶ֑נּוּ עַל־דּוּשָׁ֛ם בַּחֲרֻצ֥וֹת הַבַּרְזֶ֖ל אֶת־הַגִּלְעָֽד:
[ד] וְשִׁלַּ֥חְתִּי אֵ֖שׁ בְּבֵ֣ית חֲזָאֵ֑ל וְאָכְלָ֖ה אַרְמְנ֥וֹת בֶּן־הֲדָֽד:
[ה] וְשָֽׁבַרְתִּי֙ בְּרִ֣יחַ דַּמֶּ֔שֶׂק וְהִכְרַתִּ֤י יוֹשֵׁב֙ מִבִּקְעַת־אָ֔וֶן וְתוֹמֵ֥ךְ שֵׁ֖בֶט מִבֵּ֣ית עֶ֑דֶן וְגָל֧וּ עַם־אֲרָ֛ם קִ֖ירָה אָמַ֥ר יְהוָֽה: פ
[ו] כֹּ֚ה אָמַ֣ר יְהוָ֔ה עַל־שְׁלֹשָׁה֙ פִּשְׁעֵ֣י עַזָּ֔ה וְעַל־אַרְבָּעָ֖ה לֹ֣א אֲשִׁיבֶ֑נּוּ עַל־הַגְלוֹתָ֛ם גָּל֥וּת שְׁלֵמָ֖ה לְהַסְגִּ֥יר לֶאֱדֽוֹם:
[ז] וְשִׁלַּ֥חְתִּי אֵ֖שׁ בְּחוֹמַ֣ת עַזָּ֑ה וְאָכְלָ֖ה אַרְמְנֹתֶֽיהָ:
[ח] וְהִכְרַתִּ֤י יוֹשֵׁב֙ מֵֽאַשְׁדּ֔וֹד וְתוֹמֵ֥ךְ שֵׁ֖בֶט מֵֽאַשְׁקְל֑וֹן וַהֲשִׁיב֨וֹתִי יָדִ֜י עַל־עֶקְר֗וֹן וְאָֽבְדוּ֙ שְׁאֵרִ֣ית פְּלִשְׁתִּ֔ים אָמַ֖ר אֲדנָ֥י יְהֹוִֽה: פ
[ט] כֹּ֚ה אָמַ֣ר יְהוָ֔ה עַל־שְׁלֹשָׁה֙ פִּשְׁעֵי־צֹ֔ר וְעַל־אַרְבָּעָ֖ה לֹ֣א אֲשִׁיבֶ֑נּוּ עַֽל־הַסְגִּירָ֞ם גָּל֤וּת שְׁלֵמָה֙ לֶאֱד֔וֹם וְלֹ֥א זָכְר֖וּ בְּרִ֥ית אַחִֽים:
[י] וְשִׁלַּ֥חְתִּי אֵ֖שׁ בְּח֣וֹמַת צֹ֑ר וְאָכְלָ֖ה אַרְמְנוֹתֶֽיהָ: פ
[יא] כֹּ֚ה אָמַ֣ר יְהוָ֔ה עַל־שְׁלֹשָׁה֙ פִּשְׁעֵ֣י אֱד֔וֹם וְעַל־אַרְבָּעָ֖ה לֹ֣א אֲשִׁיבֶ֑נּוּ עַל־רָדְפ֨וֹ בַחֶ֤רֶב אָחִיו֙ וְשִׁחֵ֣ת רַחֲמָ֔יו וַיִּטְרֹ֤ף לָעַד֙ אַפּ֔וֹ וְעֶבְרָת֖וֹ שְׁמָ֥רָה נֶֽצַח:
[יב] וְשִׁלַּ֥חְתִּי אֵ֖שׁ בְּתֵימָ֑ן וְאָכְלָ֖ה אַרְמְנ֥וֹת בָּצְרָֽה: פ
[יג] כֹּ֚ה אָמַ֣ר יְהוָ֔ה עַל־שְׁלֹשָׁה֙ פִּשְׁעֵ֣י בְנֵֽי־עַמּ֔וֹן וְעַל־אַרְבָּעָ֖ה לֹ֣א אֲשִׁיבֶ֑נּוּ עַל־בִּקְעָם֙ הָר֣וֹת הַגִּלְעָ֔ד לְמַ֖עַן הַרְחִ֥יב אֶת־גְּבוּלָֽם:
[יד] וְהִצַּ֤תִּי אֵשׁ֙ בְּחוֹמַ֣ת רַבָּ֔ה וְאָכְלָ֖ה אַרְמְנוֹתֶ֑יהָ בִּתְרוּעָה֙ בְּי֣וֹם מִלְחָמָ֔ה בְּסַ֖עַר בְּי֥וֹם סוּפָֽה:
[טו] וְהָלַ֥ךְ מַלְכָּ֖ם בַּגּוֹלָ֑ה ה֧וּא וְשָׂרָ֛יו יַחְדָּ֖ו אָמַ֥ר יְהוָֽה: פ

פרק א
(א) דברי עמוס אשר היה בנוקדים מתקוע. בנוקדים - רועים; ודומה לו "ומישע מלך מואב היה נוקד" (מ"ב ג , ד). שנתים לפני הרעש - פירוש: נתנבא על הרעש שתי שנים קודם שבא. (ב) וכך אמר: יי' מציון ישאג ומירושלם יתן קולו; והוא "הרעש" (לעיל , א). ויתכן כי זה שנאמר "הכיתי בית החרף על בית הקיץ" (עמ' ג , טו) - בימי הרעש היה; כי הרעש היה גדול , כמו שנאמר "ונסתם גיא הרי... כאשר נסתם מפני הרעש בימי עזיה" (זכ' יד , ה). (ג) כה אמר יי' על שלשה פשעי דמשק ועל ארבעה לא אשיבנו - פירוש: על שלשה פשעים שעשה דמשק , אילו היו חוזרין בתשובה - הייתי מקבל אותם בלא דין. ועל ארבעה לא אשיבנו - כלומר: לא אקבל אותו עד שאעשה ממנו דין. על שדשו בחרוצות הברזל את הגלעד - דמיונו: "כי לא בחרוץ יודש קצח" (יש' כח , כז). (ו-י) כה אמר יי' על שלשה פשעי עזה - פירוש: עזה היתה מפלשתים , ונתחבר עזה עם צר , והגלו גלות שלמה לאדום והסגירו אותו ביד אויב. ועל כן יאמר הנביא , כי לא יקבל אותם עד שיעשה מהן דין. ולא זכרו ברית אחים - פירוש: אחוה שהיה ביניהם. (יא) על רדפו בחרב אחיו - פירוש: ישראל; כי ישראל - אחיו שלאדום היה , כמו שנאמר "כה אמר אחיך ישראל" (במ' כ , יד). ושחת רחמיו - כלומר: לא ריחם להם , וטרף לעד אפו על ישראל , ועברתו על ישראל - שמרה נצח. (יג) על בקעם הרות הגלעד - יש מפרשים (ראה מחברת: 'הר') הרות - מן 'הרים'; וכן יאמר: על שהרסו הרי גלעד , שהיה מישראל , כדי שירחיבו את גבולם. ויש מפרשים (ראה רש"י) הרות - מן "האשה (בנוסחנו: אשה) הרה" (שמ' כא , כב) , כמו שנאמר "והריותיו בקעו" (ראה הו' יד , א) - בשביל שלא ילדו וירבו ישראל.