מאגר הכתר עמוס פרק א עם פירוש ר' יוסף קרא

פרק א
[א] דִּבְרֵ֣י עָמ֔וֹס אֲשֶׁר־הָיָ֥ה בַנֹּקְדִ֖ים מִתְּק֑וֹעַ אֲשֶׁר֩ חָזָ֨ה עַל־יִשְׂרָאֵ֜ל בִּימֵ֣י׀ עֻזִּיָּ֣ה מֶלֶךְ־יְהוּדָ֗ה וּבִימֵ֞י יָרָבְעָ֤ם בֶּן־יוֹאָשׁ֙ מֶ֣לֶךְ יִשְׂרָאֵ֔ל שְׁנָתַ֖יִם לִפְנֵ֥י הָרָֽעַשׁ:
[ב] וַיֹּאמַ֓ר׀ יְהוָה֙ מִצִּיּ֣וֹן יִשְׁאָ֔ג וּמִירוּשָׁלִַ֖ם יִתֵּ֣ן קוֹל֑וֹ וְאָֽבְלוּ֙ נְא֣וֹת הָרֹעִ֔ים וְיָבֵ֖שׁ רֹ֥אשׁ הַכַּרְמֶֽל: פ
[ג] כֹּ֚ה אָמַ֣ר יְהוָ֔ה עַל־שְׁלֹשָׁה֙ פִּשְׁעֵ֣י דַמֶּ֔שֶׂק וְעַל־אַרְבָּעָ֖ה לֹ֣א אֲשִׁיבֶ֑נּוּ עַל־דּוּשָׁ֛ם בַּחֲרֻצ֥וֹת הַבַּרְזֶ֖ל אֶת־הַגִּלְעָֽד:
[ד] וְשִׁלַּ֥חְתִּי אֵ֖שׁ בְּבֵ֣ית חֲזָאֵ֑ל וְאָכְלָ֖ה אַרְמְנ֥וֹת בֶּן־הֲדָֽד:
[ה] וְשָֽׁבַרְתִּי֙ בְּרִ֣יחַ דַּמֶּ֔שֶׂק וְהִכְרַתִּ֤י יוֹשֵׁב֙ מִבִּקְעַת־אָ֔וֶן וְתוֹמֵ֥ךְ שֵׁ֖בֶט מִבֵּ֣ית עֶ֑דֶן וְגָל֧וּ עַם־אֲרָ֛ם קִ֖ירָה אָמַ֥ר יְהוָֽה: פ
[ו] כֹּ֚ה אָמַ֣ר יְהוָ֔ה עַל־שְׁלֹשָׁה֙ פִּשְׁעֵ֣י עַזָּ֔ה וְעַל־אַרְבָּעָ֖ה לֹ֣א אֲשִׁיבֶ֑נּוּ עַל־הַגְלוֹתָ֛ם גָּל֥וּת שְׁלֵמָ֖ה לְהַסְגִּ֥יר לֶאֱדֽוֹם:
[ז] וְשִׁלַּ֥חְתִּי אֵ֖שׁ בְּחוֹמַ֣ת עַזָּ֑ה וְאָכְלָ֖ה אַרְמְנֹתֶֽיהָ:
[ח] וְהִכְרַתִּ֤י יוֹשֵׁב֙ מֵֽאַשְׁדּ֔וֹד וְתוֹמֵ֥ךְ שֵׁ֖בֶט מֵֽאַשְׁקְל֑וֹן וַהֲשִׁיב֨וֹתִי יָדִ֜י עַל־עֶקְר֗וֹן וְאָֽבְדוּ֙ שְׁאֵרִ֣ית פְּלִשְׁתִּ֔ים אָמַ֖ר אֲדנָ֥י יְהֹוִֽה: פ
[ט] כֹּ֚ה אָמַ֣ר יְהוָ֔ה עַל־שְׁלֹשָׁה֙ פִּשְׁעֵי־צֹ֔ר וְעַל־אַרְבָּעָ֖ה לֹ֣א אֲשִׁיבֶ֑נּוּ עַֽל־הַסְגִּירָ֞ם גָּל֤וּת שְׁלֵמָה֙ לֶאֱד֔וֹם וְלֹ֥א זָכְר֖וּ בְּרִ֥ית אַחִֽים:
[י] וְשִׁלַּ֥חְתִּי אֵ֖שׁ בְּח֣וֹמַת צֹ֑ר וְאָכְלָ֖ה אַרְמְנוֹתֶֽיהָ: פ
[יא] כֹּ֚ה אָמַ֣ר יְהוָ֔ה עַל־שְׁלֹשָׁה֙ פִּשְׁעֵ֣י אֱד֔וֹם וְעַל־אַרְבָּעָ֖ה לֹ֣א אֲשִׁיבֶ֑נּוּ עַל־רָדְפ֨וֹ בַחֶ֤רֶב אָחִיו֙ וְשִׁחֵ֣ת רַחֲמָ֔יו וַיִּטְרֹ֤ף לָעַד֙ אַפּ֔וֹ וְעֶבְרָת֖וֹ שְׁמָ֥רָה נֶֽצַח:
[יב] וְשִׁלַּ֥חְתִּי אֵ֖שׁ בְּתֵימָ֑ן וְאָכְלָ֖ה אַרְמְנ֥וֹת בָּצְרָֽה: פ
[יג] כֹּ֚ה אָמַ֣ר יְהוָ֔ה עַל־שְׁלֹשָׁה֙ פִּשְׁעֵ֣י בְנֵֽי־עַמּ֔וֹן וְעַל־אַרְבָּעָ֖ה לֹ֣א אֲשִׁיבֶ֑נּוּ עַל־בִּקְעָם֙ הָר֣וֹת הַגִּלְעָ֔ד לְמַ֖עַן הַרְחִ֥יב אֶת־גְּבוּלָֽם:
[יד] וְהִצַּ֤תִּי אֵשׁ֙ בְּחוֹמַ֣ת רַבָּ֔ה וְאָכְלָ֖ה אַרְמְנוֹתֶ֑יהָ בִּתְרוּעָה֙ בְּי֣וֹם מִלְחָמָ֔ה בְּסַ֖עַר בְּי֥וֹם סוּפָֽה:
[טו] וְהָלַ֥ךְ מַלְכָּ֖ם בַּגּוֹלָ֑ה ה֧וּא וְשָׂרָ֛יו יַחְדָּ֖ו אָמַ֥ר יְהוָֽה: פ

פרק א
(א) בנוקדים מתקוע. בנוקדים - ברועים; שהיה עמוס רועה צאן. 'נוקד' - רועה: "ומישע מלך מואב היה נוקד" (מ"ב ג , ד). שנתיים לפני הרעש - עמוס נתנבא לפני ישעיה; שישעיה נתנבא ביום הרעש , כמו שמפרש: "וינועו אמות הסיפים" (ו , ד). (ג) כה אמר יי' על שלשה פשעי דמשק - דמשק היו יושבין לארץ ישראל במזרח , וגבול ארץ ישראל - פתרון: שבעים אומות , צור וצידון וכל גלילות פלשת במערב (ע"פ יואל ד , ד) , מואב ועמון ואדום בדרום. על שלשה פשעי דמשק ועל ארבעה לא אשיבנו - הדא הוא דכתיב "הן כל אלה יפעל אל פעמים שלש עם גבר" (איוב לג , כט): כשאדם חוטא פעם ראשונה , שנייה , שלישית - כך מידתו של הקדוש ברוך הוא , סולח לו; אבל כשהוא מוסיף רביעית אינו סולח לו (ראה יומא פו , ב). בחרוצות הברזל - במסרק של ברזל , ובהן היו מדוששין את ישראל; וכן הוא אומר "כי איבדם מלך ארם וישימם כעפר לדוש" (מ"ב יג , ז). (ה) ותומך שבט - אוחז ממשלה , (וכן) שמו של 'שבט'; כמו "לא יסור שבט מיהודה" (בר' מט , י) , שהוא לשון ממשלה. (ט) על שלשה פשעי צור. ולא זכרו בה ברית אחים - לא זכרו אותו ברית שהיה בין חירם ובין שלמה , כמו שנאמר "ויכרתו ברית שניהם" (מ"א ה , כו); וחירם היה קורא לשלמה 'אחיו' , כמה דאת אמר "מה הערים... אשר נתתה לי אחי" (מ"א ט , יג). (יא) על רדפו בחרב אחיו - על יעקב הוא אומר. (יג) על בקעם הרות הגלעד - שהיו מבֻקעות הנשים ההרות כדי שלא יהיה להם זָכָר ויורש אחריהם , כדי שהם ירשו את ארץ ישראל; וכן ירמיה אומר "לבני עמון כה אמר יי' הבנים אין לישראל אם יורש אין לו מדוע ירש מלכם את גד ועמו בעריו ישב" (מט , א). (יד) ואכלה ארמנותיה בתרועה ביום מלחמה בסער ביום סופה - וכן ירמיה אומר "לכן הנה ימים באים נאם יי' והשמעתי את (בנוסחנו: אל) רבת בני עמון תרועת מלחמה והיתה תל שממה ובנותיה באש תצתנה וירש ישראל את יורשיו אמר יי'" (ראה יר' מט , ב).