מאגר הכתר שמות פרק טז עם עין המסורה

פרק טז
[א] וַיִּסְעוּ֙ מֵֽאֵילִ֔ם וַיָּבֹ֜אוּ כָּל־עֲדַ֤ת בְּנֵֽי־יִשְׂרָאֵל֙ אֶל־מִדְבַּר־סִ֔ין אֲשֶׁ֥ר בֵּין־אֵילִ֖ם וּבֵ֣ין סִינָ֑י בַּחֲמִשָּׁ֨ה עָשָׂ֥ר יוֹם֙ לַחֹ֣דֶשׁ הַשֵּׁנִ֔י לְצֵאתָ֖ם מֵאֶ֥רֶץ מִצְרָֽיִם:
[ב] וַיִּלֹּ֜ינוּ וַיִּלּ֜וֹנוּ כָּל־עֲדַ֧ת בְּנֵי־יִשְׂרָאֵ֛ל עַל־מֹשֶׁ֥ה וְעַֽל־אַהֲרֹ֖ן בַּמִּדְבָּֽר:
[ג] וַיֹּאמְר֨וּ אֲלֵהֶ֜ם בְּנֵ֣י יִשְׂרָאֵ֗ל מִֽי־יִתֵּ֨ן מוּתֵ֤נוּ בְיַד־יְהוָה֙ בְּאֶ֣רֶץ מִצְרַ֔יִם בְּשִׁבְתֵּ֙נוּ֙ עַל־סִ֣יר הַבָּשָׂ֔ר בְּאָכְלֵ֥נוּ לֶ֖חֶם לָשֹׂ֑בַע כִּֽי־הוֹצֵאתֶ֤ם אֹתָ֙נוּ֙ אֶל־הַמִּדְבָּ֣ר הַזֶּ֔ה לְהָמִ֛ית אֶת־כָּל־הַקָּהָ֥ל הַזֶּ֖ה בָּרָעָֽב: ס
[ד] וַיֹּ֤אמֶר יְהוָה֙ אֶל־מֹשֶׁ֔ה הִנְנִ֨י מַמְטִ֥יר לָכֶ֛ם לֶ֖חֶם מִן־הַשָּׁמָ֑יִם וְיָצָ֨א הָעָ֤ם וְלָֽקְטוּ֙ דְּבַר־י֣וֹם בְּיוֹמ֔וֹ לְמַ֧עַן אֲנַסֶּ֛נּוּ הֲיֵלֵ֥ךְ בְּתוֹרָתִ֖י אִם־לֹֽא:
[ה] וְהָיָה֙ בַּיּ֣וֹם הַשִּׁשִּׁ֔י וְהֵכִ֖ינוּ אֵ֣ת אֲשֶׁר־יָבִ֑יאוּ וְהָיָ֣ה מִשְׁנֶ֔ה עַ֥ל אֲשֶֽׁר־יִלְקְט֖וּ י֥וֹם ׀ יֽוֹם:
[ו] וַיֹּ֤אמֶר מֹשֶׁה֙ וְאַֽהֲרֹ֔ן אֶֽל־כָּל־בְּנֵ֖י יִשְׂרָאֵ֑ל עֶ֕רֶב וִידַעְתֶּ֕ם כִּ֧י יְהוָ֛ה הוֹצִ֥יא אֶתְכֶ֖ם מֵאֶ֥רֶץ מִצְרָֽיִם:
[ז] וּבֹ֗קֶר וּרְאִיתֶם֙ אֶת־כְּב֣וֹד יְהוָ֔ה בְּשָׁמְע֥וֹ אֶת־תְּלֻנֹּתֵיכֶ֖ם עַל־יְהוָ֑ה וְנַ֣חְנוּ מָ֔ה כִּ֥י תַלִּ֖ונוּ תַלִּ֖ינוּ עָלֵֽינוּ:
[ח] וַיֹּ֣אמֶר מֹשֶׁ֗ה בְּתֵ֣ת יְהוָה֩ לָכֶ֨ם בָּעֶ֜רֶב בָּשָׂ֣ר לֶאֱכֹ֗ל וְלֶ֤חֶם בַּבֹּ֙קֶר֙ לִשְׂבֹּ֔עַ בִּשְׁמֹ֤עַ יְהוָה֙ אֶת־תְּלֻנֹּ֣תֵיכֶ֔ם אֲשֶׁר־אַתֶּ֥ם מַלִּינִ֖ם עָלָ֑יו וְנַ֣חְנוּ מָ֔ה לֹא־עָלֵ֥ינוּ תְלֻנֹּתֵיכֶ֖ם כִּ֥י עַל־יְהוָֽה:
[ט] וַיֹּ֤אמֶר מֹשֶׁה֙ אֶֽל־אַהֲרֹ֔ן אֱמֹ֗ר אֶֽל־כָּל־עֲדַת֙ בְּנֵ֣י יִשְׂרָאֵ֔ל קִרְב֖וּ לִפְנֵ֣י יְהוָ֑ה כִּ֣י שָׁמַ֔ע אֵ֖ת תְּלֻנֹּתֵיכֶֽם:
[י] וַיְהִ֗י כְּדַבֵּ֤ר אַֽהֲרֹן֙ אֶל־כָּל־עֲדַ֣ת בְּנֵֽי־יִשְׂרָאֵ֔ל וַיִּפְנ֖וּ אֶל־הַמִּדְבָּ֑ר וְהִנֵּה֙ כְּב֣וֹד יְהוָ֔ה נִרְאָ֖ה בֶּעָנָֽן: פ
[ששי] [יא] וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר:
[יב] שָׁמַ֗עְתִּי אֶת־תְּלוּנֹּת֘ בְּנֵ֣י יִשְׂרָאֵל֒ דַּבֵּ֨ר אֲלֵהֶ֜ם לֵאמֹ֗ר בֵּ֤ין הָעַרְבַּ֙יִם֙ תֹּאכְל֣וּ בָשָׂ֔ר וּבַבֹּ֖קֶר תִּשְׂבְּעוּ־לָ֑חֶם וִידַעְתֶּ֕ם כִּ֛י אֲנִ֥י יְהוָ֖ה אֱלֹהֵיכֶֽם:
[יג] וַיְהִ֣י בָעֶ֔רֶב וַתַּ֣עַל הַשְּׂלָ֔ו וַתְּכַ֖ס אֶת־הַֽמַּחֲנֶ֑ה וּבַבֹּ֗קֶר הָֽיְתָה֙ שִׁכְבַ֣ת הַטַּ֔ל סָבִ֖יב לַֽמַּחֲנֶֽה:
[יד] וַתַּ֖עַל שִׁכְבַ֣ת הַטָּ֑ל וְהִנֵּ֞ה עַל־פְּנֵ֤י הַמִּדְבָּר֙ דַּ֣ק מְחֻסְפָּ֔ס דַּ֥ק כַּכְּפֹ֖ר עַל־הָאָֽרֶץ:
[טו] וַיִּרְא֣וּ בְנֵֽי־יִשְׂרָאֵ֗ל וַיֹּ֨אמְר֜וּ אִ֤ישׁ אֶל־אָחִיו֙ מָ֣ן ה֔וּא כִּ֛י לֹ֥א יָדְע֖וּ מַה־ה֑וּא וַיֹּ֤אמֶר מֹשֶׁה֙ אֲלֵהֶ֔ם ה֣וּא הַלֶּ֔חֶם אֲשֶׁ֨ר נָתַ֧ן יְהוָ֛ה לָכֶ֖ם לְאָכְלָֽה:
[טז] זֶ֤ה הַדָּבָר֙ אֲשֶׁ֣ר צִוָּ֣ה יְהוָ֔ה לִקְט֣וּ מִמֶּ֔נּוּ אִ֖ישׁ לְפִ֣י אָכְל֑וֹ עֹ֣מֶר לַגֻּלְגֹּ֗לֶת מִסְפַּר֙ נַפְשֹׁ֣תֵיכֶ֔ם אִ֛ישׁ לַאֲשֶׁ֥ר בְּאָהֳל֖וֹ תִּקָּֽחוּ:
[יז] וַיַּעֲשׂוּ־כֵ֖ן בְּנֵ֣י יִשְׂרָאֵ֑ל וַֽיִּלְקְט֔וּ הַמַּרְבֶּ֖ה וְהַמַּמְעִֽיט:
[יח] וַיָּמֹ֣דּוּ בָעֹ֔מֶר וְלֹ֤א הֶעְדִּיף֙ הַמַּרְבֶּ֔ה וְהַמַּמְעִ֖יט לֹ֣א הֶחְסִ֑יר אִ֥ישׁ לְפִֽי־אָכְל֖וֹ לָקָֽטוּ:
[יט] וַיֹּ֥אמֶר מֹשֶׁ֖ה אֲלֵהֶ֑ם אִ֕ישׁ אַל־יוֹתֵ֥ר מִמֶּ֖נּוּ עַד־בֹּֽקֶר:
[כ] וְלֹא־שָׁמְע֣וּ אֶל־מֹשֶׁ֗ה וַיּוֹתִ֨רוּ אֲנָשִׁ֤ים מִמֶּ֙נּוּ֙ עַד־בֹּ֔קֶר וַיָּ֥רֻם תּוֹלָעִ֖ים וַיִּבְאַ֑שׁ וַיִּקְצֹ֥ף עֲלֵהֶ֖ם מֹשֶֽׁה:
[כא] וַיִּלְקְט֤וּ אֹתוֹ֙ בַּבֹּ֣קֶר בַּבֹּ֔קֶר אִ֖ישׁ כְּפִ֣י אָכְל֑וֹ וְחַ֥ם הַשֶּׁ֖מֶשׁ וְנָמָֽס:
[כב] וַיְהִ֣י׀ בַּיּ֣וֹם הַשִּׁשִּׁ֗י לָקְט֥וּ לֶ֙חֶם֙ מִשְׁנֶ֔ה שְׁנֵ֥י הָעֹ֖מֶר לָאֶחָ֑ד וַיָּבֹ֙אוּ֙ כָּל־נְשִׂיאֵ֣י הָעֵדָ֔ה וַיַּגִּ֖ידוּ לְמֹשֶֽׁה:
[כג] וַיֹּ֣אמֶר אֲלֵהֶ֗ם ה֚וּא אֲשֶׁ֣ר דִּבֶּ֣ר יְהוָ֔ה שַׁבָּת֧וֹן שַׁבַּת־קֹ֛דֶשׁ לַיהוָ֖ה מָחָ֑ר אֵ֣ת אֲשֶׁר־תֹּאפ֞וּ אֵפ֗וּ וְאֵ֤ת אֲשֶֽׁר־תְּבַשְּׁלוּ֙ בַּשֵּׁ֔לוּ וְאֵת֙ כָּל־הָ֣עֹדֵ֔ף הַנִּ֧יחוּ לָכֶ֛ם לְמִשְׁמֶ֖רֶת עַד־הַבֹּֽקֶר:
[כד] וַיַּנִּ֤יחוּ אֹתוֹ֙ עַד־הַבֹּ֔קֶר כַּאֲשֶׁ֖ר צִוָּ֣ה מֹשֶׁ֑ה וְלֹ֣א הִבְאִ֔ישׁ וְרִמָּ֖ה לֹא־הָ֥יְתָה בּֽוֹ:
[כה] וַיֹּ֤אמֶר מֹשֶׁה֙ אִכְלֻ֣הוּ הַיּ֔וֹם כִּֽי־שַׁבָּ֥ת הַיּ֖וֹם לַיהוָ֑ה הַיּ֕וֹם לֹ֥א תִמְצָאֻ֖הוּ בַּשָּׂדֶֽה:
[כו] שֵׁ֥שֶׁת יָמִ֖ים תִּלְקְטֻ֑הוּ וּבַיּ֧וֹם הַשְּׁבִיעִ֛י שַׁבָּ֖ת לֹ֥א יִֽהְיֶה־בּֽוֹ:
[כז] וַֽיְהִי֙ בַּיּ֣וֹם הַשְּׁבִיעִ֔י יָצְא֥וּ מִן־הָעָ֖ם לִלְקֹ֑ט וְלֹ֖א מָצָֽאוּ: ס
[כח] וַיֹּ֥אמֶר יְהוָ֖ה אֶל־מֹשֶׁ֑ה עַד־אָ֙נָה֙ מֵֽאַנְתֶּ֔ם לִשְׁמֹ֥ר מִצְוֺתַ֖י וְתוֹרֹתָֽי:
[כט] רְא֗וּ כִּֽי־יְהוָה֘ נָתַ֣ן לָכֶ֣ם הַשַּׁבָּת֒ עַל־כֵּ֠ן ה֣וּא נֹתֵ֥ן לָכֶ֛ם בַּיּ֥וֹם הַשִּׁשִּׁ֖י לֶ֣חֶם יוֹמָ֑יִם שְׁב֣וּ׀ אִ֣ישׁ תַּחְתָּ֗יו אַל־יֵ֥צֵא אִ֛ישׁ מִמְּקֹמ֖וֹ בַּיּ֥וֹם הַשְּׁבִיעִֽי:
[ל] וַיִּשְׁבְּת֥וּ הָעָ֖ם בַּיּ֥וֹם הַשְּׁבִעִֽי:
[לא] וַיִּקְרְא֧וּ בֵֽית־יִשְׂרָאֵ֛ל אֶת־שְׁמ֖וֹ מָ֑ן וְה֗וּא כְּזֶ֤רַע גַּד֙ לָבָ֔ן וְטַעְמ֖וֹ כְּצַפִּיחִ֥ת בִּדְבָֽשׁ:
[לב] וַיֹּ֣אמֶר מֹשֶׁ֗ה זֶ֤ה הַדָּבָר֙ אֲשֶׁ֣ר צִוָּ֣ה יְהוָ֔ה מְלֹ֤א הָעֹ֙מֶר֙ מִמֶּ֔נּוּ לְמִשְׁמֶ֖רֶת לְדֹרֹתֵיכֶ֑ם לְמַ֣עַן׀ יִרְא֣וּ אֶת־הַלֶּ֗חֶם אֲשֶׁ֨ר הֶאֱכַ֤לְתִּי אֶתְכֶם֙ בַּמִּדְבָּ֔ר בְּהוֹצִיאִ֥י אֶתְכֶ֖ם מֵאֶ֥רֶץ מִצְרָֽיִם:
[לג] וַיֹּ֨אמֶר מֹשֶׁ֜ה אֶֽל־אַהֲרֹ֗ן קַ֚ח צִנְצֶ֣נֶת אַחַ֔ת וְתֶן־שָׁ֥מָּה מְלֹֽא־הָעֹ֖מֶר מָ֑ן וְהַנַּ֤ח אֹתוֹ֙ לִפְנֵ֣י יְהוָ֔ה לְמִשְׁמֶ֖רֶת לְדֹרֹתֵיכֶֽם:
[לד] כַּאֲשֶׁ֛ר צִוָּ֥ה יְהוָ֖ה אֶל־מֹשֶׁ֑ה וַיַּנִּיחֵ֧הוּ אַהֲרֹ֛ן לִפְנֵ֥י הָעֵדֻ֖ת לְמִשְׁמָֽרֶת:
[לה] וּבְנֵ֣י יִשְׂרָאֵ֗ל אָכְל֤וּ אֶת־הַמָּן֙ אַרְבָּעִ֣ים שָׁנָ֔ה עַד־בֹּאָ֖ם אֶל־אֶ֣רֶץ נוֹשָׁ֑בֶת אֶת־הַמָּן֙ אָֽכְל֔וּ עַד־בֹּאָ֕ם אֶל־קְצֵ֖ה אֶ֥רֶץ כְּנָֽעַן:
[לו] וְהָעֹ֕מֶר עֲשִׂרִ֥ית הָאֵיפָ֖ה הֽוּא: פ

פרק טז
(א) לצאתם מארץ מצרים - ג': שמ' טז , א; במ' א , א; ט , א. (ג) לשבע - ד': *שמ' טז , ג; וי' כה , יט; כו , ה; תה' עח , כה. ותריין לשבע (בשווא תחת השי"ן): שמ' טז , ח; איכה ה , ו. (ד) אם - לא - ז' סופי פסוקים: בר' כד , כא; כז , כא; לז , לב; שמ' טז , ד; במ' יא , כג; דב' ח , ב; שו' ב , כב. (ה) והכינו - ב' (בלישנא): *שמ' טז , ה; תה' נז , ז. וכל דברי הימים דכותהון בר מן ב' 'והכינו' (בקמץ): דה"ב לה , ד , ו. יביאו - ט' (מלא וחסר): *שמ' טז , ה; יח , כב; *וי' י , טו; יז , ה; במ' יח , יג; מ"א ה , ח; יש' סו , כ; אס' ו , ח; *נחמ' י , מ. על - ח' בטעמא בתורה (המלית לא מוקפת ומוטעמת במרכא , בלישנא): שמ' טז , ה; כד , ח; וי' ב , יג; י , ו; יד , לא; במ' טז , כב; לה , כד; דב' לא , יח. יום יום - ז': בר' לט , י; *שמ' טז , ה; יש' נח , ב; תה' סא , ט; סח , כ; מש' ח , ל , לד. (ו) משה ואהרן - כ"ח (בתורה): ראה שמ' ד , כט. (ז) בשמעו - ג': *שמ' טז , ז; דב' כט , יח; תה' קו , מד. על - יי' - ל"א: *שמ' טז , ז , ח; *במ' טז , יא; כו , ט; כז , ג; דב' יג , ו; ש"א א , י; מ"ב יז , ט; יש' י , כ; נו , ו; נח , יד; יר' כט , לב; מח , כו , מב; נח' א , יא; תה' ב , ב; יח , מב; לז , ד , ה; נה , כג; קמו , ה; מש' כח , כה; איוב א , ו; ב , א (פעמיים); דה"ב יג , יח; טו , ד; טז , ז , ח; ל , ט; לב , טז. ונחנו - ג': *שמ' טז , ז , ח; ש"ב יז , יב. (ח) לשְבע - ב': שמ' טז , ח; איכה ה , ו. מלינם - ב' חסר: שמ' טז , ח; במ' יז , כ. ונחנו - ג': *שמ' טז , ז , ח; ש"ב יז , יב. על - יי' - ל"א: ראה לעיל , ז. (ט) אמר אל - כל - עדת (אמירה אל כל עדת) - ג': שמ' טז , ט; לה , ד; במ' יד , ז. (יב) ובבקר - ו': שמ' טז , יב , יג; יש' יז , יא; תה' פח , יד; אס' ב , יד; ה , יד. כי אני יי' אלהיכם - י': ראה שמ' ו , ז. (יג) ובבקר - ו': ראה לעיל , יב. (יד) ככפר - ב' חסר (בלישנא): שמ' טז , יד; איוב לח , כט. (טז) זה - כ"ו פסוקים שיש בהם כל אותיות אל"ף בי"ת: שמ' טז , טז; דב' ד , לד; יהו' כג , יג; מ"ב ד , לט; ו , לב; ז , ח; יש' ה , כה; סו , יז; יר' כב , ג; לב , כט; יח' יז , ט; לח , יב; הו' י , ח; יג , ב; עמ' ט , יג; צפ' ג , ח; זכ' ו , יא; קה' ד , ח; אס' ג , יג; דנ' ב , מה; ג , כב; ד , כ; ז , יט; עז' ז , כח; נחמ' ג , ז; דה"ב כו , יא. לגלגלת - ג': שמ' טז , טז; לח , כו; במ' ג , מז. (יט) יותר - ז' מלא (בלישנא): שמ' טז , יט; ש"א טו , טו; ש"ב ח , ד; קה' ו , ח; ז , טז; *אס' ו , ו; דה"א יח , ד. (כ) ולא - ז' ראשי פסוקים בסיפרא: ראה שמ' ב , ג. ויותרו - ב' וחסר: שמ' טז , כ; מ"ב ד , מד. עלהם - י"ג חסר: ראה שמ' ה , יד. (כא) בבקר בבקר - י"ג: שמ' טז , כא; ל , ז; לו , ג; *וי' ו , ה; ש"ב יג , ד; יש' כח , יט; נ , ד; יח' מו , יג , יד , טו; צפ' ג , ה; דה"א כג , ל; דה"ב יג , יא. וחם - ג' (בפתח): שמ' טז , כא; מ"א א , ב; קה' ד , יא. ונמס - ב': שמ' טז , כא; תה' קיב , י. (כב) לאחד - ב' (בקמץ): שמ' טז , כב; במ' טו , יב. (כג) עד - הבקר - ד' בתורה: שמ' טז , כג , כד; כט , לד; וי' ו , ב. (כד) עד - הבקר - ד' בתורה: שמ' טז , כג , כד; כט , לד; וי' ו , ב. כאשר צוה משה - ג' יחידין (לא כולל: 'כאשר צוה משה עבד יי''): שמ' טז , כד; וי' ט , כא; דה"א טו , טו. (והשאר צוה יי' למשה). ורמה - ב': שמ' טז , כד; איוב כא , כו. (כז) ללקט - ב': *שמ' טז , כז; רות ב , ח. וחד: וללקט - שה"ש ו , ב. ללקט - ג' (בלישנא): שמ' טז , כז; *שה"ש ו , ב; רות ב , ח. (כח) ותורתי - ב': בר' כו , ה; שמ' טז , כח. (כט) על - כן - ב' בטעמא (תלישא גדולה): שמ' טז , כט; יהו' ז , כו. יומים - ה' (ג' מלא וב' חסר , בלישנא): *שמ' טז , כט; כא , כא; *במ' ט , כב; יא , יט; הו' ו , ב. שבו - ה' בתורה: בר' כב , ה; לד , י; שמ' טז , כט; כד , יד; במ' כב , יט. אל - יצא - ג': שמ' טז , כט; מ"ב ט , טו; י , כה. ממקמו - ז' חסר (בלישנא , אינו כולל 'למקמו'): כל אורייתא (שמ' טז , כט; יח , כג; דב' כא , יט - כל אלה נמנים כאחד); שו' כ , לג; מ"א כ , כד; יר' ד , ז; עז' א , ד; דה"א טז , כז; דה"ב כד , יא. וכל איוב דכותהון בר מן ב' מלא: איוב כ , ט; לז , א. (ראה ניסוח אחר של ההערה בשו' כ , לג). (ל) וישבתו - ב': שמ' טז , ל; איוב לב , א. השבעי - ג' חסר בתורה: *שמ' יב , טו; טז , ל; וי' כה , ט. השבעי - ח' חסר: ראה שמ' יב , טו. (לא) בית - ישראל - כ': שמ' טז , לא; מ , לח; וי' י , ו; *במ' כ , כט; יהו' כא , מג; ש"א ז , ב , ג; ש"ב א , יב; ו , ה , טו; יב , ח; טז , ג; מ"א יב , כא; כ , לא; יש' ה , ז; יד , ב; מו , ג; תה' קטו , יב; קלה , יט; רות ד , יא. (וכל ירמיה ויחזקאל דכותיה בר מן י"ח 'בני ישראל'. ומן ראש דתרי עשר עד 'צר וסביב הארץ' (עמ' ג , יא) דכותהון בר מן ד' 'בית ישראל': הו' א , ד , ו; ה , א; יב , א. ומן 'צר וסביב הארץ' עד סוף הספר דכותהון בר מן ד' 'בני ישראל': עמ' ג , יב; ד , ה; ט , ז; מי' ה , ב). בית - ישראל - ד' בתורה: שמ' טז , לא; מ , לח; וי' י , ו; במ' כ , כט. גד - ב' (בפתח): *שמ' טז , לא; במ' יא , ז. וחד: לגד - יש' סה , יא. (לג) אחת - ו' זקף בפתח (בלישנא): *שמ' טז , לג; יהו' ו , יד; ש"א כו , ח; ש"ב ו , יט; מ"א ג , כה; *זכ' ה , ז. וכל 'חקה' , 'מדה' , 'שנה' , 'תורה' דכותהון בר מן חד (בקמץ): דב' כד , ה. וכל אתנחתא וסופי פסוקים דכותיה (בקמץ). והנח - ב': שמ' טז , לג; שו' ו , כ. (לה) אל - קצה - ו': שמ' טז , לה; יהו' יח , טז , יט; שו' ז , יא; יש' ז , ג; סב , יא.