מאגר הכתר שמות פרק כא עם עין המסורה

פרק כא
{פרשת משפטים} [א] וְאֵ֙לֶּה֙ הַמִּשְׁפָּטִ֔ים אֲשֶׁ֥ר תָּשִׂ֖ים לִפְנֵיהֶֽם:
[ב] כִּ֤י תִקְנֶה֙ עֶ֣בֶד עִבְרִ֔י שֵׁ֥שׁ שָׁנִ֖ים יַעֲבֹ֑ד וּבַ֨שְּׁבִעִ֔ת יֵצֵ֥א לַחָפְשִׁ֖י חִנָּֽם:
[ג] אִם־בְּגַפּ֥וֹ יָבֹ֖א בְּגַפּ֣וֹ יֵצֵ֑א אִם־בַּ֤עַל אִשָּׁה֙ ה֔וּא וְיָצְאָ֥ה אִשְׁתּ֖וֹ עִמּֽוֹ:
[ד] אִם־אֲדֹנָיו֙ יִתֶּן־ל֣וֹ אִשָּׁ֔ה וְיָלְדָה־ל֥וֹ בָנִ֖ים א֣וֹ בָנ֑וֹת הָאִשָּׁ֣ה וִילָדֶ֗יהָ תִּֽהְיֶה֙ לַֽאדֹנֶ֔יהָ וְה֖וּא יֵצֵ֥א בְגַפּֽוֹ:
[ה] וְאִם־אָמֹ֤ר יֹאמַר֙ הָעֶ֔בֶד אָהַ֙בְתִּי֙ אֶת־אֲדֹנִ֔י אֶת־אִשְׁתִּ֖י וְאֶת־בָּנָ֑י לֹ֥א אֵצֵ֖א חָפְשִֽׁי:
[ו] וְהִגִּישׁ֤וֹ אֲדֹנָיו֙ אֶל־הָ֣אֱלֹהִ֔ים וְהִגִּישׁוֹ֙ אֶל־הַדֶּ֔לֶת א֖וֹ אֶל־הַמְּזוּזָ֑ה וְרָצַ֨ע אֲדֹנָ֤יו אֶת־אָזְנוֹ֙ בַּמַּרְצֵ֔עַ וַעֲבָד֖וֹ לְעֹלָֽם: ס
[ז] וְכִֽי־יִמְכֹּ֥ר אִ֛ישׁ אֶת־בִּתּ֖וֹ לְאָמָ֑ה לֹ֥א תֵצֵ֖א כְּצֵ֥את הָעֲבָדִֽים:
[ח] אִם־רָעָ֞ה בְּעֵינֵ֧י אֲדֹנֶ֛יהָ אֲשֶׁר־לֹ֥א ל֥וֹ יְעָדָ֖הּ וְהֶפְדָּ֑הּ לְעַ֥ם נָכְרִ֛י לֹא־יִמְשֹׁ֥ל לְמָכְרָ֖הּ בְּבִגְדוֹ־בָֽהּ:
[ט] וְאִם־לִבְנ֖וֹ יִיעָדֶ֑נָּה כְּמִשְׁפַּ֥ט הַבָּנ֖וֹת יַעֲשֶׂה־לָּֽהּ:
[י] אִם־אַחֶ֖רֶת יִֽקַּֽח־ל֑וֹ שְׁאֵרָ֛הּ כְּסוּתָ֥הּ וְעֹנָתָ֖הּ לֹ֥א יִגְרָֽע:
[יא] וְאִ֨ם־שְׁלָשׁ־אֵ֔לֶּה לֹ֥א יַעֲשֶׂ֖ה לָ֑הּ וְיָצְאָ֥ה חִנָּ֖ם אֵ֥ין כָּֽסֶף: ס
[יב] מַכֵּ֥ה אִ֛ישׁ וָמֵ֖ת מ֥וֹת יוּמָֽת:
[יג] וַֽאֲשֶׁר֙ לֹ֣א צָדָ֔ה וְהָאֱלֹהִ֖ים אִנָּ֣ה לְיָד֑וֹ וְשַׂמְתִּ֤י לְךָ֙ מָק֔וֹם אֲשֶׁ֥ר יָנ֖וּס שָֽׁמָּה: ס
[יד] וְכִי־יָזִ֥ד אִ֛ישׁ עַל־רֵעֵ֖הוּ לְהָרְג֣וֹ בְעָרְמָ֑ה מֵעִ֣ם מִזְבְּחִ֔י תִּקָּחֶ֖נּוּ לָמֽוּת: ס
[טו] וּמַכֵּ֥ה אָבִ֛יו וְאִמּ֖וֹ מ֥וֹת יוּמָֽת: ס
[טז] וְגֹנֵ֨ב אִ֧ישׁ וּמְכָר֛וֹ וְנִמְצָ֥א בְיָד֖וֹ מ֥וֹת יוּמָֽת: ס
[יז] וּמְקַלֵּ֥ל אָבִ֛יו וְאִמּ֖וֹ מ֥וֹת יוּמָֽת: ס
[יח] וְכִֽי־יְרִיבֻ֣ן אֲנָשִׁ֔ים וְהִכָּה־אִישׁ֙ אֶת־רֵעֵ֔הוּ בְּאֶ֖בֶן א֣וֹ בְאֶגְרֹ֑ף וְלֹ֥א יָמ֖וּת וְנָפַ֥ל לְמִשְׁכָּֽב:
[יט] אִם־יָק֞וּם וְהִתְהַלֵּ֥ךְ בַּח֛וּץ עַל־מִשְׁעַנְתּ֖וֹ וְנִקָּ֣ה הַמַּכֶּ֑ה רַ֥ק שִׁבְתּ֛וֹ יִתֵּ֖ן וְרַפֹּ֥א יְרַפֵּֽא: ס
[שני] [כ] וְכִֽי־יַכֶּה֩ אִ֨ישׁ אֶת־עַבְדּ֜וֹ א֤וֹ אֶת־אֲמָתוֹ֙ בַּשֵּׁ֔בֶט וּמֵ֖ת תַּ֣חַת יָד֑וֹ נָקֹ֖ם יִנָּקֵֽם:
[כא] אַ֥ךְ אִם־י֛וֹם א֥וֹ יוֹמַ֖יִם יַעֲמֹ֑ד לֹ֣א יֻקַּ֔ם כִּ֥י כַסְפּ֖וֹ הֽוּא: ס
[כב] וְכִֽי־יִנָּצ֣וּ אֲנָשִׁ֗ים וְנָ֨גְפ֜וּ אִשָּׁ֤ה הָרָה֙ וְיָצְא֣וּ יְלָדֶ֔יהָ וְלֹ֥א יִהְיֶ֖ה אָס֑וֹן עָנ֣וֹשׁ יֵעָנֵ֗שׁ כַּאֲשֶׁ֨ר יָשִׁ֤ית עָלָיו֙ בַּ֣עַל הָאִשָּׁ֔ה וְנָתַ֖ן בִּפְלִלִֽים:
[כג] וְאִם־אָס֖וֹן יִֽהְיֶ֑ה וְנָתַתָּ֥ה נֶ֖פֶשׁ תַּ֥חַת נָֽפֶשׁ:
[כד] עַ֚יִן תַּ֣חַת עַ֔יִן שֵׁ֖ן תַּ֣חַת שֵׁ֑ן יָ֚ד תַּ֣חַת יָ֔ד רֶ֖גֶל תַּ֥חַת רָֽגֶל:
[כה] כְּוִיָּה֙ תַּ֣חַת כְּוִיָּ֔ה פֶּ֖צַע תַּ֣חַת פָּ֑צַע חַבּוּרָ֕ה תַּ֖חַת חַבּוּרָֽה: ס
[כו] וְכִֽי־יַכֶּ֨ה אִ֜ישׁ אֶת־עֵ֥ין עַבְדּ֛וֹ אֽוֹ־אֶת־עֵ֥ין אֲמָת֖וֹ וְשִׁחֲתָ֑הּ לַחָפְשִׁ֥י יְשַׁלְּחֶ֖נּוּ תַּ֥חַת עֵינֽוֹ:
[כז] וְאִם־שֵׁ֥ן עַבְדּ֛וֹ אֽוֹ־שֵׁ֥ן אֲמָת֖וֹ יַפִּ֑יל לַֽחָפְשִׁ֥י יְשַׁלְּחֶ֖נּוּ תַּ֥חַת שִׁנּֽוֹ: פ
[כח] וְכִֽי־יִגַּ֨ח שׁ֥וֹר אֶת־אִ֛ישׁ א֥וֹ אֶת־אִשָּׁ֖ה וָמֵ֑ת סָק֨וֹל יִסָּקֵ֜ל הַשּׁ֗וֹר וְלֹ֤א יֵֽאָכֵל֙ אֶת־בְּשָׂר֔וֹ וּבַ֥עַל הַשּׁ֖וֹר נָקִֽי:
[כט] וְאִ֡ם שׁוֹר֩ נַגָּ֨ח ה֜וּא מִתְּמֹ֣ל שִׁלְשֹׁ֗ם וְהוּעַ֤ד בִּבְעָלָיו֙ וְלֹ֣א יִשְׁמְרֶ֔נּוּ וְהֵמִ֥ית אִ֖ישׁ א֣וֹ אִשָּׁ֑ה הַשּׁוֹר֙ יִסָּקֵ֔ל וְגַם־בְּעָלָ֖יו יוּמָֽת:
[ל] אִם־כֹּ֖פֶר יוּשַׁ֣ת עָלָ֑יו וְנָתַן֙ פִּדְיֹ֣ן נַפְשׁ֔וֹ כְּכֹ֥ל אֲשֶׁר־יוּשַׁ֖ת עָלָֽיו:
[לא] אוֹ־בֵ֥ן יִגָּ֖ח אוֹ־בַ֣ת יִגָּ֑ח כַּמִּשְׁפָּ֥ט הַזֶּ֖ה יֵעָ֥שֶׂה לּֽוֹ:
[לב] אִם־עֶ֛בֶד יִגַּ֥ח הַשּׁ֖וֹר א֣וֹ אָמָ֑ה כֶּ֣סֶף׀ שְׁלֹשִׁ֣ים שְׁקָלִ֗ים יִתֵּן֙ לַֽאדֹנָ֔יו וְהַשּׁ֖וֹר יִסָּקֵֽל: ס
[לג] וְכִֽי־יִפְתַּ֨ח אִ֜ישׁ בּ֗וֹר א֠וֹ כִּֽי־יִכְרֶ֥ה אִ֛ישׁ בֹּ֖ר וְלֹ֣א יְכַסֶּ֑נּוּ וְנָֽפַל־שָׁ֥מָּה שּׁ֖וֹר א֥וֹ חֲמֽוֹר:
[לד] בַּ֤עַל הַבּוֹר֙ יְשַׁלֵּ֔ם כֶּ֖סֶף יָשִׁ֣יב לִבְעָלָ֑יו וְהַמֵּ֖ת יִֽהְיֶה־לּֽוֹ: ס
[לה] וְכִֽי־יִגֹּ֧ף שֽׁוֹר־אִ֛ישׁ אֶת־שׁ֥וֹר רֵעֵ֖הוּ וָמֵ֑ת וּמָ֨כְר֜וּ אֶת־הַשּׁ֤וֹר הַחַי֙ וְחָצ֣וּ אֶת־כַּסְפּ֔וֹ וְגַ֥ם אֶת־הַמֵּ֖ת יֶחֱצֽוּן:
[לו] א֣וֹ נוֹדַ֗ע כִּ֠י שׁ֣וֹר נַגָּ֥ח הוּא֙ מִתְּמ֣וֹל שִׁלְשֹׁ֔ם וְלֹ֥א יִשְׁמְרֶ֖נּוּ בְּעָלָ֑יו שַׁלֵּ֨ם יְשַׁלֵּ֥ם שׁוֹר֙ תַּ֣חַת הַשּׁ֔וֹר וְהַמֵּ֖ת יִֽהְיֶה־לּֽוֹ: ס
[לז] כִּ֤י יִגְנֹֽב־אִישׁ֙ שׁ֣וֹר אוֹ־שֶׂ֔ה וּטְבָח֖וֹ א֣וֹ מְכָר֑וֹ חֲמִשָּׁ֣ה בָקָ֗ר יְשַׁלֵּם֙ תַּ֣חַת הַשּׁ֔וֹר וְאַרְבַּע־צֹ֖אן תַּ֥חַת הַשֶּֽׂה:

פרק כא
(א) ואלה - י"ז ראשי פסוקים בתורה: *בר' כה , ז , יז; לו , יג , יד , יז , יח , כג , כד , כה , כו , לא; שמ' כא , א; כח , ד; במ' יג , ד; כו , לו , נז; דב' כז , יג. וכל 'תלדות' דכותהון בר מן ד' 'אלה': *בר' ב , ד; ו , ט; יא , י; לז , ב. (תשע היקרויות של 'ואלה שמות' בראש פסוק אינן נמנות). (ג) אם - י"ב פסוקים 'אם אם' (בראשי פסוקים ובאמצעם): *שמ' כא , ג; כב , ב , ז , יד , כב; *במ' יד , ל; יר' מט , ט; עמ' ג , ו; תה' כז , ג; קלב , ג; איוב ו , יב; כז , ד. (ה) אמר - ג' חסר: שמ' כא , ה; שו' טו , ב; ש"א כ , כא. את - י"ב פסוקים 'את את ואת' ומלה אחת ביניהם: *בר' ה , לב; ו , י; יא , כו; שמ' כא , ה; וי' א , ח; דב' ג , כד; כו , טו; כח , כ; יש' כט , י; יר' כד , י; כז , ה; כט , יז. (ו) והגישו - ב' בפסוק: שמ' כא , ו (פעמיים). לעלם - י' חסר בתורה: בר' ג , כב; ו , ג; שמ' ג , טו; טו , יח; כא , ו; לא , יז; לב , יג; וי' כה , מו; דב' ה , כו; לב , מ. לעלם - י"ח חסר: *בר' ג , כב; ו , ג; שמ' ג , טו; טו , יח; כא , ו; לא , יז; לב , יג; וי' כה , מו; דב' ה , כו; לב , מ; מ"א א , לא; ב , לג; ט , ה; י , ט; תה' מה , יח; עה , י; צב , ט; איוב ז , טז. (ז) וכי - י"א בפרשה (כא , א - כב , כג): שמ' כא , ז , יד , יח , כ , כב , כו , כח , לג , לה; כב , יג , טו. כצאת - ג': שמ' כא , ז; לג , ח; שו' ה , לא. (ח) בעיני - ל"ג בתורה: בר' ו , ח; יט , יד; כא , יא; כח , ח; לא , לה; לג , ח , טו; לד , יח; לח , ז , י; לט , כא; מא , לז; מה , טז; מז , כה; שמ' ג , כא; ה , כא; יא , ג (פעמיים); יב , לו; כא , ח; וי' י , יט; במ' כג , כז; כד , א; לב , יג; דב' ד , כה; ו , יח; ט , יח; יב , כה , כח; יג , יט; יז , ב; כא , ט; לא , כט. לא - י"ז כתיב לא וקרי לו (בלישנא): שמ' כא , ח; וי' יא , כא; כה , ל; ש"א ב , ג; ש"ב טז , יח; מ"ב ח , י; יש' ט , ב; מט , ה; סג , ט; תה' ק , ג; קלט , טז; מש' יט , ז; כו , ב; איוב יג , טו; מא , ד; *עז' ד , ב; דה"א יא , כ. יעדה - ג': *שמ' כא , ח; יר' מז , ז; מי' ו , ט. בבגדו - ב' (בשני לשונות): בר' לט , יב; שמ' כא , ח. (ט) כמשפט - ה' בפתח: *שמ' כא , ט; שו' יח , ז; מ"ב יז , לג; *עז' ג , ד; דה"ב ח , יד. (יג) ואשר - י"ב ראשי פסוקים: שמ' ט , כא; כא , יג; וי' כה , לג; דב' יא , ד , ה , ו; יט , ה; מי' ג , ג; נחמ' ה , יח; ז , עא; ח , טו; י , לא. ואשר לא - ח': שמ' ט , כא; כא , יג; דב' יא , ב; יש' נב , טו; יח' יח , יח; מי' ג , ה; צפ' א , ו; *נחמ' י , לא. והאלהים - ז': *בר' כב , א; שמ' יט , יט; כא , יג; *קה' ג , יד , טו; דה"א כח , ג; דה"ב יג , טו. (יד) וכי - י"א בפרשה: ראה לעיל , ז. יזד - ב' , חד מלא וחד חסר: שמ' כא , יד; דב' יח , כ. על - רעהו - ה': *שמ' כא , יד; *דב' כב , כו; יש' לד , יד; יר' כג , לה; מש' כט , ה. בערמה - ב': שמ' כא , יד; יהו' ט , ד. מזבחי - ח': שמ' כ , כג; כא , יד; ש"א ב , כח , לג; יש' נו , ז; ס , ז; מל' א , ז , י. (טו) ומכה - ד': שמ' כא , טו; וי' כד , יח , כא (פעמיים). (יז) ומקלל - ב' , חד ראש פסוק וחד סוף פסוק: שמ' כא , יז; ש"ב טז , ה. (יח) וכי - י"א בפרשה: ראה לעיל , ז. באבן - ג': שמ' כא , יח; במ' לה , יז; ש"ב יד , כו. באגרף - ב': שמ' כא , יח; יש' נח , ד. (יט) ונקה - ג': *שמ' כא , יט; במ' ה , לא; ש"א כו , ט. (כ) וכי - י"א בפרשה: ראה לעיל , ז. (כא) יומים - ה' , ג' מלא וב' חסר (בלישנא): *שמ' טז , כט; כא , כא; *במ' ט , כב; יא , יט; הו' ו , ב. יקם - ג' , ב' בפתח וא' בקמץ: *בר' ד , טו , כד; *שמ' כא , כא. (כב) וכי - י"א בפרשה: ראה לעיל , ז. ינצו - ב': שמ' כא , כב; דב' כה , יא. וְיצאו - ז' (רפין): שמ' יז , ו; כא , כב; דב' כא , ב; יהו' ח , ו; יש' סו , כד; יח' ט , ז; לט , ט. ישית - ז': בר' מו , ד; מח , יז; שמ' כא , כב; יש' כו , א; יר' נ , ג; מש' כו , כד; איוב לח , יא. בפללים - ג' (חסר ומלא , בלישנא): שמ' כא , כב; דב' לב , לא; איוב לא , יא. (כג) ונתתה - י"ה מלא בסיפרא: שמ' כא , כג; כה , יב; כו , לב , לג; כז , ה; כח , יד , כד , כה , כז; כט , יב , כ; ל , ו , לו; מ , ה , ו. (כה) כויה - ב' בפסוק: שמ' כא , כה (פעמיים). חבורה - ב': בפסוק זה. (כו) וכי - י"א בפרשה: ראה לעיל , ז. עינו - ח': שמ' כא , כו; וי' יג , נה; דב' כח , נד; לב , י; לד , ז; *זכ' ב , יב; מש' כג , לא; איוב כח , י. (כח) וכי - י"א בפרשה: ראה לעיל , ז. סקול - ב': שמ' יט , יג; כא , כח. ולא יאכל - ב': שמ' יג , ג; כא , כח. (כט) מתמל - ד' חסר (בלישנא): בר' לא , ה; *שמ' כא , כט; *דב' ד , מב; יט , ד. (ל) יושת - ב': בפסוק זה. פדין - ב' , חד חסר וחד מלא: שמ' כא , ל; תה' מט , ט. (לא) יגח - ב' בקמץ: בפסוק זה. יעשה - ל"ו: *בר' כט , כו; לד , ז; שמ' ב , ד; יב , טז (פעמיים); כא , לא; לא , טו; וי' ב , ח; ז , כד; יא , לב; יג , נא; כד , יט; במ' ד , כו; ו , ד; טו , יא , לד; כח , טו , כד; דב' כה , ט; שו' יא , לז; ש"א יא , ז; יז , כו , כז; ש"ב יג , יב; מ"ב יב , יד; יש' ג , יא; יר' ג , טז; ה , יג; יח' יב , יא; טו , ה; מד , יד; עו' א , טו; אס' ב , יא; ו , ט , יא; עז' י , ג. יעשה לו - ה': שמ' ב , ד; כא , לא; וי' כד , יט; במ' טו , לד; יש' ג , יא. (לג) וכי - י"א בפרשה: ראה לעיל , ז. (לד) ישיב - כ"ד (בלישנא): בר' נ , טו; שמ' כא , לד; וי' כה , נא , נב; דב' יז , טז; לב , מג; ש"א כו , כג; ש"ב כב , כא; מ"א ב , יז; יש' מד , יט; יח' יח , ז , ח , יב; לג , טו; הו' יב , ג , טו; תה' יח , כא; נד , ז; מש' יב , יד; טו , א; כה , יג; איוב ט , יג; לט , יב; דנ' יא , יח. (לה) וכי - י"א בפרשה: ראה לעיל , ז. את - י"ו פסוקים דאית בהון 'את את את את': בר' ד , יח; יט , כט; נ , ב; שמ' י , ה; כא , לה; מ , ד; וי' ה , כג; יג , נב; כ , יח; דב' יא , ב; יהו' כד , ג; מ"א יד , טו; יר' נא , לו; זכ' יא , י; דה"א כ , א; דה"ב יח , ל. (לז) יגנב - ב' (חד חסר וחד מלא): שמ' כא , לז; מש' ו , ל.