מאגר הכתר שמות פרק כב עם עין המסורה

פרק כב
[א] אִם־בַּמַּחְתֶּ֛רֶת יִמָּצֵ֥א הַגַּנָּ֖ב וְהֻכָּ֣ה וָמֵ֑ת אֵ֥ין ל֖וֹ דָּמִֽים:
[ב] אִם־זָרְחָ֥ה הַשֶּׁ֛מֶשׁ עָלָ֖יו דָּמִ֣ים ל֑וֹ שַׁלֵּ֣ם יְשַׁלֵּ֔ם אִם־אֵ֣ין ל֔וֹ וְנִמְכַּ֖ר בִּגְנֵבָתֽוֹ:
[ג] אִֽם־הִמָּצֵא֩ תִמָּצֵ֨א בְיָד֜וֹ הַגְּנֵבָ֗ה מִשּׁ֧וֹר עַד־חֲמ֛וֹר עַד־שֶׂ֖ה חַיִּ֑ים שְׁנַ֖יִם יְשַׁלֵּֽם: ס
[ד] כִּ֤י יַבְעֶר־אִישׁ֙ שָׂדֶ֣ה אוֹ־כֶ֔רֶם וְשִׁלַּח֙ אֶת־בְּעִירֹ֔ה בְּעִיר֔וֹ וּבִעֵ֖ר בִּשְׂדֵ֣ה אַחֵ֑ר מֵיטַ֥ב שָׂדֵ֛הוּ וּמֵיטַ֥ב כַּרְמ֖וֹ יְשַׁלֵּֽם: ס
[שלישי] [ה] כִּֽי־תֵצֵ֨א אֵ֜שׁ וּמָצְאָ֤ה קֹצִים֙ וְנֶאֱכַ֣ל גָּדִ֔ישׁ א֥וֹ הַקָּמָ֖ה א֣וֹ הַשָּׂדֶ֑ה שַׁלֵּ֣ם יְשַׁלֵּ֔ם הַמַּבְעִ֖ר אֶת־הַבְּעֵרָֽה: ס
[ו] כִּֽי־יִתֵּן֩ אִ֨ישׁ אֶל־רֵעֵ֜הוּ כֶּ֤סֶף אֽוֹ־כֵלִים֙ לִשְׁמֹ֔ר וְגֻנַּ֖ב מִבֵּ֣ית הָאִ֑ישׁ אִם־יִמָּצֵ֥א הַגַּנָּ֖ב יְשַׁלֵּ֥ם שְׁנָֽיִם:
[ז] אִם־לֹ֤א יִמָּצֵא֙ הַגַּנָּ֔ב וְנִקְרַ֥ב בַּֽעַל־הַבַּ֖יִת אֶל־הָאֱלֹהִ֑ים אִם־לֹ֥א שָׁלַ֛ח יָד֖וֹ בִּמְלֶ֥אכֶת רֵעֵֽהוּ:
[ח] עַֽל־כָּל־דְּבַר־פֶּ֡שַׁע עַל־שׁ֡וֹר עַל־חֲ֠מוֹר עַל־שֶׂ֨ה עַל־שַׂלְמָ֜ה עַל־כָּל־אֲבֵדָ֗ה אֲשֶׁ֤ר יֹאמַר֙ כִּי־ה֣וּא זֶ֔ה עַ֚ד הָאֱלֹהִ֔ים יָבֹ֖א דְּבַר־שְׁנֵיהֶ֑ם אֲשֶׁ֤ר יַרְשִׁיעֻן֙ אֱלֹהִ֔ים יְשַׁלֵּ֥ם שְׁנַ֖יִם לְרֵעֵֽהוּ: ס
[ט] כִּֽי־יִתֵּן֩ אִ֨ישׁ אֶל־רֵעֵ֜הוּ חֲמ֨וֹר אוֹ־שׁ֥וֹר אוֹ־שֶׂ֛ה וְכָל־בְּהֵמָ֖ה לִשְׁמֹ֑ר וּמֵ֛ת אוֹ־נִשְׁבַּ֥ר אוֹ־נִשְׁבָּ֖ה אֵ֥ין רֹאֶֽה:
[י] שְׁבֻעַ֣ת יְהוָ֗ה תִּֽהְיֶה֙ בֵּ֣ין שְׁנֵיהֶ֔ם אִם־לֹ֥א שָׁלַ֛ח יָד֖וֹ בִּמְלֶ֣אכֶת רֵעֵ֑הוּ וְלָקַ֥ח בְּעָלָ֖יו וְלֹ֥א יְשַׁלֵּֽם:
[יא] וְאִם־גָּנֹ֥ב יִגָּנֵ֖ב מֵעִמּ֑וֹ יְשַׁלֵּ֖ם לִבְעָלָֽיו:
[יב] אִם־טָרֹ֥ף יִטָּרֵ֖ף יְבִאֵ֣הוּ עֵ֑ד הַטְּרֵפָ֖ה לֹ֥א יְשַׁלֵּֽם: פ
[יג] וְכִֽי־יִשְׁאַ֥ל אִ֛ישׁ מֵעִ֥ם רֵעֵ֖הוּ וְנִשְׁבַּ֣ר אוֹ־מֵ֑ת בְּעָלָ֥יו אֵין־עִמּ֖וֹ שַׁלֵּ֥ם יְשַׁלֵּֽם:
[יד] אִם־בְּעָלָ֥יו עִמּ֖וֹ לֹ֣א יְשַׁלֵּ֑ם אִם־שָׂכִ֣יר ה֔וּא בָּ֖א בִּשְׂכָרֽוֹ: ס
[טו] וְכִֽי־יְפַתֶּ֣ה אִ֗ישׁ בְּתוּלָ֛ה אֲשֶׁ֥ר לֹא־אֹרָ֖שָׂה וְשָׁכַ֣ב עִמָּ֑הּ מָהֹ֛ר יִמְהָרֶ֥נָּה לּ֖וֹ לְאִשָּֽׁה:
[טז] אִם־מָאֵ֧ן יְמָאֵ֛ן אָבִ֖יהָ לְתִתָּ֣הּ ל֑וֹ כֶּ֣סֶף יִשְׁקֹ֔ל כְּמֹ֖הַר הַבְּתוּלֹֽת: ס
[יז] מְכַשֵּׁפָ֖ה לֹ֥א תְחַיֶּֽה:
[יח] כָּל־שֹׁכֵ֥ב עִם־בְּהֵמָ֖ה מ֥וֹת יוּמָֽת: ס
[יט] זֹבֵ֥חַ לָאֱלֹהִ֖ים יָחֳרָ֑ם בִּלְתִּ֥י לַיהוָ֖ה לְבַדּֽוֹ:
[כ] וְגֵ֥ר לֹא־תוֹנֶ֖ה וְלֹ֣א תִלְחָצֶ֑נּוּ כִּֽי־גֵרִ֥ים הֱיִיתֶ֖ם בְּאֶ֥רֶץ מִצְרָֽיִם:
[כא] כָּל־אַלְמָנָ֥ה וְיָת֖וֹם לֹ֥א תְעַנּֽוּן:
[כב] אִם־עַנֵּ֥ה תְעַנֶּ֖ה אֹת֑וֹ כִּ֣י אִם־צָעֹ֤ק יִצְעַק֙ אֵלַ֔י שָׁמֹ֥עַ אֶשְׁמַ֖ע צַעֲקָתֽוֹ:
[כג] וְחָרָ֣ה אַפִּ֔י וְהָרַגְתִּ֥י אֶתְכֶ֖ם בֶּחָ֑רֶב וְהָי֤וּ נְשֵׁיכֶם֙ אַלְמָנ֔וֹת וּבְנֵיכֶ֖ם יְתֹמִֽים: פ
[כד] אִם־כֶּ֣סֶף׀ תַּלְוֶ֣ה אֶת־עַמִּ֗י אֶת־הֶֽעָנִי֙ עִמָּ֔ךְ לֹא־תִהְיֶ֥ה ל֖וֹ כְּנֹשֶׁ֑ה לֹא־תְשִׂימ֥וּן עָלָ֖יו נֶֽשֶׁךְ:
[כה] אִם־חָבֹ֥ל תַּחְבֹּ֖ל שַׂלְמַ֣ת רֵעֶ֑ךָ עַד־בֹּ֥א הַשֶּׁ֖מֶשׁ תְּשִׁיבֶ֥נּוּ לֽוֹ:
[כו] כִּ֣י הִ֤וא כְסוּתֹה֙ כְסוּתוֹ֙ לְבַדָּ֔הּ הִ֥וא שִׂמְלָת֖וֹ לְעֹר֑וֹ בַּמֶּ֣ה יִשְׁכָּ֔ב וְהָיָה֙ כִּֽי־יִצְעַ֣ק אֵלַ֔י וְשָׁמַעְתִּ֖י כִּֽי־חַנּ֥וּן אָֽנִי: ס
[רביעי] [כז] אֱלֹהִ֖ים לֹ֣א תְקַלֵּ֑ל וְנָשִׂ֥יא בְעַמְּךָ֖ לֹ֥א תָאֹֽר:
[כח] מְלֵאָתְךָ֥ וְדִמְעֲךָ֖ לֹ֣א תְאַחֵ֑ר בְּכ֥וֹר בָּנֶ֖יךָ תִּתֶּן־לִֽי:
[כט] כֵּֽן־תַּעֲשֶׂ֥ה לְשֹׁרְךָ֖ לְצֹאנֶ֑ךָ שִׁבְעַ֤ת יָמִים֙ יִהְיֶ֣ה עִם־אִמּ֔וֹ בַּיּ֥וֹם הַשְּׁמִינִ֖י תִּתְּנוֹ־לִֽי:
[ל] וְאַנְשֵׁי־קֹ֖דֶשׁ תִּהְי֣וּן לִ֑י וּבָשָׂ֨ר בַּשָּׂדֶ֤ה טְרֵפָה֙ לֹ֣א תֹאכֵ֔לוּ לַכֶּ֖לֶב תַּשְׁלִכ֥וּן אֹתֽוֹ: ס

פרק כב
(א) במחתרת - ב': שמ' כב , א; יר' ב , לד. (ב) אם - י"ב פסוקים ראשה ומצעה (בראשי פסוקים ובאמצעם) 'אם אם': ראה שמ' כא , ג. זרחה - ד': *שמ' כב , ב; מ"ב ג , כב; נח' ג , יז; דה"ב כו , יט. וחד: וזרחה - מל' ג , כ. (ד) ובער - ב': שמ' כב , ד; וי' ו , ה. (ז) אם - י"ב פסוקים 'אם אם' בראשי פסוקים ובאמצעם: ראה שמ' כא , ג. אם - לא - ח' ראשי פסוקים: בר' כד , לח; שמ' כב , ז; דב' כח , נח; מ"ב ט , כו; מל' ב , ב; תה' ז , יג; קלא , ב; שה"ש א , ח. וכל איוב דכותהון בר מן ב' ('ואם לא'): איוב כד , כה; לו , יב. (ח) על - חמור - ב': שמ' כב , ח; *זכ' ט , ט. שלמה - ד' בתורה (בלישנא): שמ' כב , ח , כה; דב' כד , יג; כט , ד. (ט) וכל - בהמה - ג': שמ' כב , ט; *דב' יד , ו; תה' קמח , י. נשבה - ג': *בר' יד , יד; *שמ' כב , ט; יר' יג , יז. (י) שבעת - ה' (ד' חסר ואחד מלא): שמ' כב , י; במ' ל , יד; ש"ב כא , ז; מ"א ב , מג; *קה' ח , ב. (ואחד: ושבעת - זכ' ח , יז). ולא ישלם - ב': *שמ' כב , י; תה' לז , כא. (יב) טרף - ג': בר' לז , לג; מד , כח; שמ' כב , יב. (יג) וכי - י"א בפרשה: ראה שמ' כא , ז. (יד) אם - י"ב פסוקים 'אם אם' (בראשי פסוקים ובאמצעם): ראה שמ' כא , ג. (טו) וכי - י"א בפרשה: ראה שמ' כא , ז. יפתה - ד': *שמ' כב , טו; מ"א כב , כ; מש' טז , כט; דה"ב יח , יט. (טז) לתתה - ב': שמ' כב , טז; יח' מז , יד. (יז) מכשפה - י"ד פסוקים בתורה מן ג' מלין (בני שלש מלים): בר' כה , יד; כו , ו; מג , א; מו , כג; מט , יח; שמ' א , ג; כב , יז; כח , יג; *וי' יד , נה , נו; במ' ו , כד; כו , ח; דב' כח , ה , יז. תחיה - ג': שמ' כב , יז; דב' כ , טז; קה' ז , יב. (יט) יחרם - ג' , ב' בפתח וחד בקמץ: *שמ' כב , יט; וי' כז , כט; עז' י , ח. (כא) ויתום - ה': *שמ' כב , כא; *זכ' ז , י; מל' ג , ה; תה' פב , ג; איוב כט , יב. (כב) אם - י"ב פסוקים 'אם אם' בראשי פסוקים ובאמצעם: ראה שמ' כא , ג. תענה - ב': בר' לא , נ; שמ' כב , כב. שמע - ה' חסר: שמ' כב , כב; *דב' א , טז; יא , יג; ש"א כג , י; יר' יז , כד. צעקתו - ב': שמ' כב , כב; ש"א ט , טז. (כג) יתמים - ב' חסר: שמ' כב , כג; איוב כב , ט. (כד) תשימון - ג' (מלא וחסר): שמ' כב , כד; יר' מב , טו; איוב יח , ב. ואחד: ותשימון - יח' מד , ח. (כה) שלמת - ד' בתורה (בלישנא): שמ' כב , ח , כה; דב' כד , יג; כט , ד. (כז) תאר - ג': *שמ' כב , כז; במ' כב , ו , יב. (כח) תאחר - ד': *שמ' כב , כח; דב' כג , כב; יש' מו , יג; *קה' ה , ג. (וג': תאַחַר - תה' מ , יח; ע , ו; דנ' ט , יט). (ל) ואנשי - ד' ראשי פסוקים: *בר' יג , יג; שמ' כב , ל; מ"ב יז , ל; יח' לט , יד. ובשר - ח': בר' ב , כג; *שמ' כב , ל; *וי' יג , יח; מ"א יז , ו (פעמיים); יח' לז , ח; איוב י , יא; דנ' י , ג.