מאגר הכתר שמות פרק כג עם עין המסורה

פרק כג
[א] לֹ֥א תִשָּׂ֖א שֵׁ֣מַע שָׁ֑וְא אַל־תָּ֤שֶׁת יָֽדְךָ֙ עִם־רָשָׁ֔ע לִהְיֹ֖ת עֵ֥ד חָמָֽס:
[ב] לֹא־תִהְיֶ֥ה אַחֲרֵֽי־רַבִּ֖ים לְרָעֹ֑ת וְלֹא־תַעֲנֶ֣ה עַל־רִ֗ב לִנְטֹ֛ת אַחֲרֵ֥י רַבִּ֖ים לְהַטֹּֽת:
[ג] וְדָ֕ל לֹ֥א תֶהְדַּ֖ר בְּרִיבֽוֹ: ס
[ד] כִּ֣י תִפְגַּ֞ע שׁ֧וֹר אֹיִבְךָ֛ א֥וֹ חֲמֹר֖וֹ תֹּעֶ֑ה הָשֵׁ֥ב תְּשִׁיבֶ֖נּוּ לֽוֹ: ס
[ה] כִּֽי־תִרְאֶ֞ה חֲמ֣וֹר שֹׂנַאֲךָ֗ רֹבֵץ֙ תַּ֣חַת מַשָּׂא֔וֹ וְחָדַלְתָּ֖ מֵעֲזֹ֣ב ל֑וֹ עָזֹ֥ב תַּעֲזֹ֖ב עִמּֽוֹ: ס
[חמישי] [ו] לֹ֥א תַטֶּ֛ה מִשְׁפַּ֥ט אֶבְיֹנְךָ֖ בְּרִיבֽוֹ:
[ז] מִדְּבַר־שֶׁ֖קֶר תִּרְחָ֑ק וְנָקִ֤י וְצַדִּיק֙ אַֽל־תַּהֲרֹ֔ג כִּ֥י לֹא־אַצְדִּ֖יק רָשָֽׁע:
[ח] וְשֹׁ֖חַד לֹ֣א תִקָּ֑ח כִּ֤י הַשֹּׁ֙חַד֙ יְעַוֵּ֣ר פִּקְחִ֔ים וִיסַלֵּ֖ף דִּבְרֵ֥י צַדִּיקִֽים:
[ט] וְגֵ֖ר לֹ֣א תִלְחָ֑ץ וְאַתֶּ֗ם יְדַעְתֶּם֙ אֶת־נֶ֣פֶשׁ הַגֵּ֔ר כִּֽי־גֵרִ֥ים הֱיִיתֶ֖ם בְּאֶ֥רֶץ מִצְרָֽיִם:
[י] וְשֵׁ֥שׁ שָׁנִ֖ים תִּזְרַ֣ע אֶת־אַרְצֶ֑ךָ וְאָסַפְתָּ֖ אֶת־תְּבוּאָתָֽהּ:
[יא] וְהַשְּׁבִיעִ֞ת תִּשְׁמְטֶ֣נָּה וּנְטַשְׁתָּ֗הּ וְאָֽכְלוּ֙ אֶבְיֹנֵ֣י עַמֶּ֔ךָ וְיִתְרָ֕ם תֹּאכַ֖ל חַיַּ֣ת הַשָּׂדֶ֑ה כֵּֽן־תַּעֲשֶׂ֥ה לְכַרְמְךָ֖ לְזֵיתֶֽךָ:
[יב] שֵׁ֤שֶׁת יָמִים֙ תַּעֲשֶׂ֣ה מַעֲשֶׂ֔יךָ וּבַיּ֥וֹם הַשְּׁבִיעִ֖י תִּשְׁבֹּ֑ת לְמַ֣עַן יָנ֗וּחַ שֽׁוֹרְךָ֙ וַחֲמֹרֶ֔ךָ וְיִנָּפֵ֥שׁ בֶּן־אֲמָתְךָ֖ וְהַגֵּֽר:
[יג] וּבְכֹ֛ל אֲשֶׁר־אָמַ֥רְתִּי אֲלֵיכֶ֖ם תִּשָּׁמֵ֑רוּ וְשֵׁ֨ם אֱלֹהִ֤ים אֲחֵרִים֙ לֹ֣א תַזְכִּ֔ירוּ לֹ֥א יִשָּׁמַ֖ע עַל־פִּֽיךָ:
[יד] שָׁלֹ֣שׁ רְגָלִ֔ים תָּחֹ֥ג לִ֖י בַּשָּׁנָֽה:
[טו] אֶת־חַ֣ג הַמַּצּוֹת֘ תִּשְׁמֹר֒ שִׁבְעַ֣ת יָמִים֩ תֹּאכַ֨ל מַצּ֜וֹת כַּאֲשֶׁ֣ר צִוִּיתִ֗ךָ לְמוֹעֵד֙ חֹ֣דֶשׁ הָאָבִ֔יב כִּי־ב֖וֹ יָצָ֣אתָ מִמִּצְרָ֑יִם וְלֹא־יֵרָא֥וּ פָנַ֖י רֵיקָֽם:
[טז] וְחַ֤ג הַקָּצִיר֙ בִּכּוּרֵ֣י מַעֲשֶׂ֔יךָ אֲשֶׁ֥ר תִּזְרַ֖ע בַּשָּׂדֶ֑ה וְחַ֤ג הָֽאָסִף֙ בְּצֵ֣את הַשָּׁנָ֔ה בְּאָסְפְּךָ֥ אֶֽת־מַעֲשֶׂ֖יךָ מִן־הַשָּׂדֶֽה:
[יז] שָׁלֹ֥שׁ פְּעָמִ֖ים בַּשָּׁנָ֑ה יֵֽרָאֶה֙ כָּל־זְכ֣וּרְךָ֔ אֶל־פְּנֵ֖י הָאָדֹ֥ן ׀ יְהוָֽה:
[יח] לֹא־תִזְבַּ֥ח עַל־חָמֵ֖ץ דַּם־זִבְחִ֑י וְלֹא־יָלִ֥ין חֵֽלֶב־חַגִּ֖י עַד־בֹּֽקֶר:
[יט] רֵאשִׁ֗ית בִּכּוּרֵי֙ אַדְמָ֣תְךָ֔ תָּבִ֕יא בֵּ֖ית יְהוָ֣ה אֱלֹהֶ֑יךָ לֹא־תְבַשֵּׁ֥ל גְּדִ֖י בַּחֲלֵ֥ב אִמּֽוֹ: פ
[ששי] [כ] הִנֵּ֨ה אָנֹכִ֜י שֹׁלֵ֤חַ מַלְאָךְ֙ לְפָנֶ֔יךָ לִשְׁמָרְךָ֖ בַּדָּ֑רֶךְ וְלַהֲבִ֣יאֲךָ֔ אֶל־הַמָּק֖וֹם אֲשֶׁ֥ר הֲכִנֹֽתִי:
[כא] הִשָּׁ֧מֶר מִפָּנָ֛יו וּשְׁמַ֥ע בְּקֹל֖וֹ אַל־תַּמֵּ֣ר בּ֑וֹ כִּ֣י לֹ֤א יִשָּׂא֙ לְפִשְׁעֲכֶ֔ם כִּ֥י שְׁמִ֖י בְּקִרְבּֽוֹ:
[כב] כִּ֣י אִם־שָׁמ֤וֹעַ תִּשְׁמַע֙ בְּקֹל֔וֹ וְעָשִׂ֕יתָ כֹּ֖ל אֲשֶׁ֣ר אֲדַבֵּ֑ר וְאָֽיַבְתִּי֙ אֶת־אֹ֣יְבֶ֔יךָ וְצַרְתִּ֖י אֶת־צֹרֲרֶֽיךָ:
[כג] כִּֽי־יֵלֵ֣ךְ מַלְאָכִי֘ לְפָנֶיךָ֒ וֶהֱבִיאֲךָ֗ אֶל־הָאֱמֹרִי֙ וְהַ֣חִתִּ֔י וְהַפְּרִזִּי֙ וְהַֽכְּנַעֲנִ֔י הַחִוִּ֖י וְהַיְבוּסִ֑י וְהִכְחַדְתִּֽיו:
[כד] לֹֽא־תִשְׁתַּחֲוֶ֤ה לֵאלֹֽהֵיהֶם֙ וְלֹ֣א תָֽעָבְדֵ֔ם וְלֹ֥א תַעֲשֶׂ֖ה כְּמַעֲשֵׂיהֶ֑ם כִּ֤י הָרֵס֙ תְּהָ֣רְסֵ֔ם וְשַׁבֵּ֥ר תְּשַׁבֵּ֖ר מַצֵּבֹתֵיהֶֽם:
[כה] וַעֲבַדְתֶּ֗ם אֵ֚ת יְהוָ֣ה אֱלֹהֵיכֶ֔ם וּבֵרַ֥ךְ אֶֽת־לַחְמְךָ֖ וְאֶת־מֵימֶ֑יךָ וַהֲסִרֹתִ֥י מַחֲלָ֖ה מִקִּרְבֶּֽךָ: ס
[שביעי] [כו] לֹ֥א תִהְיֶ֛ה מְשַׁכֵּלָ֥ה וַעֲקָרָ֖ה בְּאַרְצֶ֑ךָ אֶת־מִסְפַּ֥ר יָמֶ֖יךָ אֲמַלֵּֽא:
[כז] אֶת־אֵֽימָתִי֙ אֲשַׁלַּ֣ח לְפָנֶ֔יךָ וְהַמֹּתִי֙ אֶת־כָּל־הָעָ֔ם אֲשֶׁ֥ר תָּבֹ֖א בָּהֶ֑ם וְנָתַתִּ֧י אֶת־כָּל־אֹיְבֶ֛יךָ אֵלֶ֖יךָ עֹֽרֶף:
[כח] וְשָׁלַחְתִּ֥י אֶת־הַצִּרְעָ֖ה לְפָנֶ֑יךָ וְגֵרְשָׁ֗ה אֶת־הַחִוִּ֧י אֶת־הַֽכְּנַעֲנִ֛י וְאֶת־הַחִתִּ֖י מִלְּפָנֶֽיךָ:
[כט] לֹ֧א אֲגָרֲשֶׁ֛נּוּ מִפָּנֶ֖יךָ בְּשָׁנָ֣ה אֶחָ֑ת פֶּן־תִּהְיֶ֤ה הָאָ֙רֶץ֙ שְׁמָמָ֔ה וְרַבָּ֥ה עָלֶ֖יךָ חַיַּ֥ת הַשָּׂדֶֽה:
[ל] מְעַ֥ט מְעַ֛ט אֲגָרֲשֶׁ֖נּוּ מִפָּנֶ֑יךָ עַ֚ד אֲשֶׁ֣ר תִּפְרֶ֔ה וְנָחַלְתָּ֖ אֶת־הָאָֽרֶץ:
[לא] וְשַׁתִּ֣י אֶת־גְּבֻלְךָ֗ מִיַּם־סוּף֙ וְעַד־יָ֣ם פְּלִשְׁתִּ֔ים וּמִמִּדְבָּ֖ר עַד־הַנָּהָ֑ר כִּ֣י׀ אֶתֵּ֣ן בְּיֶדְכֶ֗ם אֵ֚ת יֹשְׁבֵ֣י הָאָ֔רֶץ וְגֵרַשְׁתָּ֖מוֹ מִפָּנֶֽיךָ:
[לב] לֹא־תִכְרֹ֥ת לָהֶ֛ם וְלֵאלֹהֵיהֶ֖ם בְּרִֽית:
[לג] לֹ֤א יֵֽשְׁבוּ֙ בְּאַרְצְךָ֔ פֶּן־יַחֲטִ֥יאוּ אֹתְךָ֖ לִ֑י כִּ֤י תַֽעֲבֹד֙ אֶת־אֱלֹ֣הֵיהֶ֔ם כִּֽי־יִהְיֶ֥ה לְךָ֖ לְמוֹקֵֽשׁ: פ

פרק כג
(א) שמע - ה' (בצירה): *בר' כט , יג; שמ' כג , א; מ"א י , א; יש' כג , ה; דה"ב ט , א. ופעמיים: כשמע - יש' כג , ה; הו' ז , יב. להית - ח' חסר (בלישנא): שמ' ט , כח; יט , טז; כג , א; לו , יח; לט , כא; מ , טו; *וי' יא , מה; כו , יג. (ב) לרעת - ד' חסר (בלישנא): בר' מא , כז; שמ' כג , ב; יר' מד , ט (פעמיים). רב - ה' חסר (צורת יחיד , בלישנא): שמ' כג , ב; עמ' ז , ד; מש' כה , ח; איוב כט , טז; לא , יג. (ג) בריבו - ד': שמ' כג , ג , ו; מש' יח , יז; איכה ג , לו. (ד) כי - ד' (ראשי פסוקים) בטעמא בתורה (מונח לפני גרשיים במלה לא מוקפת): שמ' כג , ד; ל , יב; במ' לד , יד; דב' כו , יב. כי - י' ראשי פסוקים בטעמא בתורה (מונח לפני גרשיים או תלישא קטנה): שמ' טו , יט; כג , ד; ל , יב; במ' לד , יב; *דב' ג , יא; ד , לב; יב , יד; יז , ח; כד , יט; כו , יב. תעה - ג' , ב' חסר וחד מלא: בר' לז , טו; שמ' כג , ד; מש' כא , טז. (ה) שנאך - ב': שמ' כג , ה; מש' כה , כא. רבץ - ג': *בר' ד , ז; מט , יד; שמ' כג , ה. (ו) אבינך - ג' (חסר , בלישנא): שמ' כג , ו , יא; דב' טו , יא. בריבו - ד': שמ' כג , ג , ו; מש' יח , יז; איכה ג , לו. (ז) מדבר - ג': שמ' כג , ז; ש"ב יט , מד; מ"ב י , י. ונקי - ג': שמ' כג , ז; איוב יז , ח; כב , יט. וצדיק - י': *שמ' כג , ז; יח' לג , יב; חב' ב , ד; תה' לז , כא; קיב , ד; קטז , ה; מש' י , כה; כא , כו; כט , ו; איוב כז , יז. (ח) ויסלף - ב': שמ' כג , ח; דב' טז , יט. (י) ושש - ג' ראשי פסוקים: שמ' כג , י; שו' יח , טז; דה"ב ט , יח. (יא) אביני - ב' , חד חסר וחד מלא (בלישנא): *שמ' כג , יא; יש' כט , יט. אביני - ג' (חסר , בלישנא): שמ' כג , ו , יא; דב' טו , יא. ויתרם - ב': שמ' כג , יא; איוב כב , כ. (יג) ובכל אשר - ה': שמ' כג , יג; *וי' כ , כה; *דב' יד , כו; ש"א יד , מז; יח' כג , ז. תזכירו - ב': *שמ' כג , יג; יהו' כג , ז. ישמע - י': שמ' כג , יג; יש' ס , יח; סה , יט; יר' ו , ז; לג , י; יח' יט , ט; כו , יג; נח' ב , יד; איוב לז , ד; נחמ' ו , ז. (טו) למועד - ו' רפין: *שמ' כג , טו; לד , יח; ש"א יג , יא; כ , לה; *דנ' ח , יט; יב , ז. יראו - ה': שמ' כג , טו; לג , כג; לד , כ; מ"א ח , ח; דה"ב ה , ט. (טז) האסף - ב' , חד חסר ואחד מלא: שמ' כג , טז; לד , כב. (יז) יראה - י"ג: *בר' כב , יד; שמ' יג , ז (פעמיים); כג , יז; לד , כג; דב' טז , ד , טז (פעמיים); שו' ה , ח; יש' ס , ב; *זכ' ט , יד; תה' פד , ח; צ , טז. אל - פני - ט' (בלישנא): שמ' כג , יז; וי' ו , ז; ט , ה; יד , נג; טז , ב; במ' יז , ח; כ , י; יח' טז , ה; *נחמ' ב , יג. (וכל צורת הבית דכותהון בר מן ד' 'על פני , ועל פני': יח' מ , טו; מב , ח; מח , טו , כא). האדן - ב' חסר: שמ' כג , יז; לד , כג. (יח) תזבח - ג' זוגין מן ב' בחד ענין קדמיה ז' ותינינא ש' (הראשון עם האות ז' והשני באות ש' , כמו כאן: תזבח , תשחט): בר' כח , יט; שו' יח , כט. - *שמ' כ , ח; דב' ה , יב. - שמ' כג , יח; לד , כה. (יט) ראשית - כ"ח: בר' י , י; שמ' כג , יט; לד , כו; וי' ב , יב; כג , י; במ' טו , כ; כד , כ; דב' יח , ד; כא , יז; כו , י; לג , כא; ש"א טו , כא; יר' ב , ג; מט , לה; יח' כ , מ; מח , יד; עמ' ו , א; מי' א , יג; תה' עח , נא; קה , לו; קיא , י; מש' א , ז; ד , ז; ח , כב; יז , יד; איוב מ , יט; נחמ' י , לח; דה"ב לא , ה. תביא - י"ג: בר' ו , יט; שמ' כג , יט; לד , כו; וי' יב , ו; דב' ז , כו; כג , יט; כו , ב; לא , כג; ש"א יז , יח; יש' נח , ז; יר' יח , כב; מש' לא , יד; איוב יד , ג. בחלב - ג': שמ' כג , יט; לד , כו; דב' יד , כא. (כא) ישא - ל"ז: בר' לב , כא; מ , יג , יט; שמ' כ , ז; כג , כא; וי' יט , ח; כ , יז; במ' ו , כו; ט , יג; יא , יב; דב' א , לא; ה , יא; י , יז; כח , מט , נ; לג , ג; יהו' כד , יט; ש"ב יד , יד; יש' ב , ד; ג , ז; ח , ד; י , כד; מ , יא; מב , ב; נז , יג; יח' יב , יב; יח , כ (פעמיים); מי' ב , ד; חב' א , ג; חגי ב , יב; זכ' ו , יג; תה' כד , ה; מש' ו , לה; איוב ז , יג; איכה ג , כז; קה' ה , יד. (כב) וצרתי - ב': שמ' כג , כב; יש' כט , ג. (כד) לא - ט' ראשי פסוקים 'לא ולא ולא' מיחדין: שמ' כג , כד; וי' יט , יא; במ' כג , יט; דב' כו , יד; יש' מב , ב; מט , י; יר' מד , י; איוב ג , כו; טו , כט. לא - ל"ד פסוקים 'לא ולא ולא': שמ' כג , כד; *וי' יט , יא; כה , יא; במ' כג , יט; דב' א , מב; ד , לא; כו , יד; כט , כב; יהו' ו , י; ש"א יב , ד; מ"א יג , ח , ט , טז; מ"ב יח , יב; יש' א , ו; כג , ד; מב , ב; מט , י; נג , ב; יר' יג , יד; יד , יד; יט , ה; כ , ט; כא , ז; כה , לג; מד , י; יח' ח , יח; כד , יד; לא , יד; צפ' ג , יג; תה' כב , כה; קלא , א; איוב ג , כו; טו , כט. ולא תעשה - ג': *שמ' כג , כד; ש"א כ , יד; כט , ז. (כה) וברך - ג': שמ' כג , כה; דב' ז , יג; ש"א ב , כ. מימיך - ג': *שמ' כג , כה; במ' כ , יט; דב' כט , י. וחד: ומימיך - יח' יב , יח. (כו) לא תהיה - ו' זוגין מן ב' דמיין מתחלפין בטעמים (פעם מרכא ופעם דרגא): בר' יח , יח; יש' לט , ח. - שמ' כג , כו; וי' ז , לג. - וי' יא , יב; דב' יד , י. - ש"ב יז , יז; דה"ב ל , ג. - ש"ב כד , יז; קה' ט , י. - מ"א כב , לד; דה"ב יח , לג. ועקרה - ב': שמ' כג , כו; דב' ז , יד. אמלא - ג': שמ' כג , כו; מש' ח , כא; איוב כג , ד. (ואחד: ואמלא - שמ' לא , ג). (כז) אשלח - ט': בר' לח , יז; *שמ' ח , כד; י , י; כג , כז; דב' לב , כד; מ"א ט , ז; יח' ה , טז; יד , יט; דה"ב ז , יג. ואחד: ואשלח - זכ' ח , י. תבא - י"ז חסר: בר' מט , ו; שמ' כג , כז; וי' יב , ד; דב' א , לז; יז , יד; כג , כה , כו; כד , י; כז , ג; ש"ב יג , ה; מ"א כב , כה; יר' ב , ג; איוב א , ז; ב , ב; ג , כד; כט , יג; איכה א , כב. (וכל משלי דכותהון בר מן ד' מלא: מש' ב , י; כב , כד; כד , כה; כז , י). (כח) את - ז' פסוקים 'את את את ואת': בר' יג , י; יד , טז; שמ' כג , כח; וי' טז , כד; במ' כ , ח; דב' לא , כח; שו' ג , ז. הצרעה - ג': שמ' כג , כח; דב' ז , כ; יהו' כד , יב. מלפניך - י': שמ' כג , כח; דב' ט , ד; כח , לא; לא , ג; ש"ב ז , טו; יר' יח , כג; תה' יז , ב; נא , יג; נחמ' ג , לז; דה"א כט , יב. (כט) ורבה - ד': *שמ' כג , כט; יש' ו , יב; הו' ט , ז; *קה' ו , א. (לא) ועד - ג' פסוקים 'ועד עד': בר' יג , ג; שמ' כג , לא; *נחמ' ג , א. ועד - ים - ד': שמ' כג , לא; *דב' ג , יז; ד , מט; יהו' יב , ג. וממדבר - ב': שמ' כג , לא; במ' כא , יח. (לג) ישבו - כ': בר' מז , ד , ו; *שמ' כג , לג; וי' כג , מב; *דב' ג , יט; כה , ה; יהו' א , יד; מ"ב י , ל; טו , יב; יר' נ , לט; יח' לא , ו; הו' ג , ד; ט , ג; *זכ' ח , ד; תה' קלב , יב; קמ , יד; איוב טו , כח; לח , מ; איכה ב , י; נחמ' ח , יד.