מאגר הכתר שמות פרק כח עם עין המסורה

פרק כח
[א] וְאַתָּ֡ה הַקְרֵ֣ב אֵלֶיךָ֩ אֶת־אַהֲרֹ֨ן אָחִ֜יךָ וְאֶת־בָּנָ֣יו אִתּ֗וֹ מִתּ֛וֹךְ בְּנֵ֥י יִשְׂרָאֵ֖ל לְכַהֲנוֹ־לִ֑י אַהֲרֹ֕ן נָדָ֧ב וַאֲבִיה֛וּא אֶלְעָזָ֥ר וְאִיתָמָ֖ר בְּנֵ֥י אַהֲרֹֽן:
[ב] וְעָשִׂ֥יתָ בִגְדֵי־קֹ֖דֶשׁ לְאַהֲרֹ֣ן אָחִ֑יךָ לְכָב֖וֹד וּלְתִפְאָֽרֶת:
[ג] וְאַתָּ֗ה תְּדַבֵּר֙ אֶל־כָּל־חַכְמֵי־לֵ֔ב אֲשֶׁ֥ר מִלֵּאתִ֖יו ר֣וּחַ חָכְמָ֑ה וְעָשׂ֞וּ אֶת־בִּגְדֵ֧י אַהֲרֹ֛ן לְקַדְּשׁ֖וֹ לְכַהֲנוֹ־לִֽי:
[ד] וְאֵ֨לֶּה הַבְּגָדִ֜ים אֲשֶׁ֣ר יַעֲשׂ֗וּ חֹ֤שֶׁן וְאֵפוֹד֙ וּמְעִ֔יל וּכְתֹ֥נֶת תַּשְׁבֵּ֖ץ מִצְנֶ֣פֶת וְאַבְנֵ֑ט וְעָשׂ֨וּ בִגְדֵי־קֹ֜דֶשׁ לְאַהֲרֹ֥ן אָחִ֛יךָ וּלְבָנָ֖יו לְכַהֲנוֹ־לִֽי:
[ה] וְהֵם֙ יִקְח֣וּ אֶת־הַזָּהָ֔ב וְאֶת־הַתְּכֵ֖לֶת וְאֶת־הָֽאַרְגָּמָ֑ן וְאֶת־תּוֹלַ֥עַת הַשָּׁנִ֖י וְאֶת־הַשֵּֽׁשׁ: פ
[ו] וְעָשׂ֖וּ אֶת־הָאֵפֹ֑ד זָ֠הָב תְּכֵ֨לֶת וְאַרְגָּמָ֜ן תּוֹלַ֧עַת שָׁנִ֛י וְשֵׁ֥שׁ מָשְׁזָ֖ר מַעֲשֵׂ֥ה חֹשֵֽׁב:
[ז] שְׁתֵּ֧י כְתֵפֹ֣ת חֹבְרֹ֗ת יִֽהְיֶה־לּ֛וֹ אֶל־שְׁנֵ֥י קְצוֹתָ֖יו וְחֻבָּֽר:
[ח] וְחֵ֤שֶׁב אֲפֻדָּתוֹ֙ אֲשֶׁ֣ר עָלָ֔יו כְּמַעֲשֵׂ֖הוּ מִמֶּ֣נּוּ יִֽהְיֶ֑ה זָהָ֗ב תְּכֵ֧לֶת וְאַרְגָּמָ֛ן וְתוֹלַ֥עַת שָׁנִ֖י וְשֵׁ֥שׁ מָשְׁזָֽר:
[ט] וְלָ֣קַחְתָּ֔ אֶת־שְׁתֵּ֖י אַבְנֵי־שֹׁ֑הַם וּפִתַּחְתָּ֣ עֲלֵיהֶ֔ם שְׁמ֖וֹת בְּנֵ֥י יִשְׂרָאֵֽל:
[י] שִׁשָּׁה֙ מִשְּׁמֹתָ֔ם עַ֖ל הָאֶ֣בֶן הָאֶחָ֑ת וְאֶת־שְׁמ֞וֹת הַשִּׁשָּׁ֧ה הַנּוֹתָרִ֛ים עַל־הָאֶ֥בֶן הַשֵּׁנִ֖ית כְּתוֹלְדֹתָֽם:
[יא] מַעֲשֵׂ֣ה חָרַשׁ֘ אֶבֶן֒ פִּתּוּחֵ֣י חֹתָ֗ם תְּפַתַּח֙ אֶת־שְׁתֵּ֣י הָאֲבָנִ֔ים עַל־שְׁמֹ֖ת בְּנֵ֣י יִשְׂרָאֵ֑ל מֻסַבֹּ֛ת מִשְׁבְּצ֥וֹת זָהָ֖ב תַּעֲשֶׂ֥ה אֹתָֽם:
[יב] וְשַׂמְתָּ֞ אֶת־שְׁתֵּ֣י הָאֲבָנִ֗ים עַ֚ל כִּתְפֹ֣ת הָאֵפֹ֔ד אַבְנֵ֥י זִכָּרֹ֖ן לִבְנֵ֣י יִשְׂרָאֵ֑ל וְנָשָׂא֩ אַהֲרֹ֨ן אֶת־שְׁמוֹתָ֜ם לִפְנֵ֧י יְהוָ֛ה עַל־שְׁתֵּ֥י כְתֵפָ֖יו לְזִכָּרֹֽן: ס
[שני] [יג] וְעָשִׂ֥יתָ מִשְׁבְּצֹ֖ת זָהָֽב:
[יד] וּשְׁתֵּ֤י שַׁרְשְׁרֹת֙ זָהָ֣ב טָה֔וֹר מִגְבָּלֹ֛ת תַּעֲשֶׂ֥ה אֹתָ֖ם מַעֲשֵׂ֣ה עֲבֹ֑ת וְנָתַתָּ֛ה אֶת־שַׁרְשְׁרֹ֥ת הָעֲבֹתֹ֖ת עַל־הַֽמִּשְׁבְּצֹֽת: ס
[טו] וְעָשִׂ֜יתָ חֹ֤שֶׁן מִשְׁפָּט֙ מַעֲשֵׂ֣ה חֹשֵׁ֔ב כְּמַעֲשֵׂ֥ה אֵפֹ֖ד תַּעֲשֶׂ֑נּוּ זָ֠הָב תְּכֵ֨לֶת וְאַרְגָּמָ֜ן וְתוֹלַ֧עַת שָׁנִ֛י וְשֵׁ֥שׁ מָשְׁזָ֖ר תַּעֲשֶׂ֥ה אֹתֽוֹ:
[טז] רָב֥וּעַ יִֽהְיֶ֖ה כָּפ֑וּל זֶ֥רֶת אָרְכּ֖וֹ וְזֶ֥רֶת רָחְבּֽוֹ:
[יז] וּמִלֵּאתָ֥ בוֹ֙ מִלֻּ֣אַת אֶ֔בֶן אַרְבָּעָ֖ה טוּרִ֣ים אָ֑בֶן ט֗וּר אֹ֤דֶם פִּטְדָה֙ וּבָרֶ֔קֶת הַטּ֖וּר הָאֶחָֽד:
[יח] וְהַטּ֖וּר הַשֵּׁנִ֑י נֹ֥פֶךְ סַפִּ֖יר וְיָהֲלֹֽם:
[יט] וְהַטּ֖וּר הַשְּׁלִישִׁ֑י לֶ֥שֶׁם שְׁב֖וֹ וְאַחְלָֽמָה:
[כ] וְהַטּוּר֙ הָרְבִיעִ֔י תַּרְשִׁ֥ישׁ וְשֹׁ֖הַם וְיָשְׁפֵ֑ה מְשֻׁבָּצִ֥ים זָהָ֛ב יִהְי֖וּ בְּמִלּוּאֹתָֽם:
[כא] וְ֠הָאֲבָנִים תִּהְיֶ֜יןָ עַל־שְׁמֹ֧ת בְּנֵֽי־יִשְׂרָאֵ֛ל שְׁתֵּ֥ים עֶשְׂרֵ֖ה עַל־שְׁמֹתָ֑ם פִּתּוּחֵ֤י חוֹתָם֙ אִ֣ישׁ עַל־שְׁמ֔וֹ תִּהְיֶ֕יןָ לִשְׁנֵ֥י עָשָׂ֖ר שָֽׁבֶט:
[כב] וְעָשִׂ֧יתָ עַל־הַחֹ֛שֶׁן שַֽׁרְשֹׁ֥ת גַּבְלֻ֖ת מַעֲשֵׂ֣ה עֲבֹ֑ת זָהָ֖ב טָהֽוֹר:
[כג] וְעָשִׂ֙יתָ֙ עַל־הַחֹ֔שֶׁן שְׁתֵּ֖י טַבְּע֣וֹת זָהָ֑ב וְנָתַתָּ֗ אֶת־שְׁתֵּי֙ הַטַּבָּע֔וֹת עַל־שְׁנֵ֖י קְצ֥וֹת הַחֹֽשֶׁן:
[כד] וְנָתַתָּ֗ה אֶת־שְׁתֵּי֙ עֲבֹתֹ֣ת הַזָּהָ֔ב עַל־שְׁתֵּ֖י הַטַּבָּעֹ֑ת אֶל־קְצ֖וֹת הַחֹֽשֶׁן:
[כה] וְאֵ֨ת שְׁתֵּ֤י קְצוֹת֙ שְׁתֵּ֣י הָעֲבֹתֹ֔ת תִּתֵּ֖ן עַל־שְׁתֵּ֣י הַֽמִּשְׁבְּצ֑וֹת וְנָתַתָּ֛ה עַל־כִּתְפ֥וֹת הָאֵפֹ֖ד אֶל־מ֥וּל פָּנָֽיו:
[כו] וְעָשִׂ֗יתָ שְׁתֵּי֙ טַבְּע֣וֹת זָהָ֔ב וְשַׂמְתָּ֣ אֹתָ֔ם עַל־שְׁנֵ֖י קְצ֣וֹת הַחֹ֑שֶׁן עַל־שְׂפָת֕וֹ אֲשֶׁ֛ר אֶל־עֵ֥בֶר הָאֵפֹ֖ד בָּֽיְתָה:
[כז] וְעָשִׂיתָ֘ שְׁתֵּ֣י טַבְּע֣וֹת זָהָב֒ וְנָתַתָּ֣ה אֹתָ֡ם עַל־שְׁתֵּי֩ כִתְפ֨וֹת הָאֵפ֤וֹד מִלְּמַ֙טָּה֙ מִמּ֣וּל פָּנָ֔יו לְעֻמַּ֖ת מַחְבַּרְתּ֑וֹ מִמַּ֕עַל לְחֵ֖שֶׁב הָאֵפֽוֹד:
[כח] וְיִרְכְּס֣וּ אֶת־הַ֠חֹשֶׁן מִֽטַּבְּעֹתָ֞ו מִֽטַּבְּעֹתָ֞יו אֶל־טַבְּעֹ֤ת הָאֵפוֹד֙ בִּפְתִ֣יל תְּכֵ֔לֶת לִֽהְי֖וֹת עַל־חֵ֣שֶׁב הָאֵפ֑וֹד וְלֹא־יִזַּ֣ח הַחֹ֔שֶׁן מֵעַ֖ל הָאֵפֽוֹד:
[כט] וְנָשָׂ֣א אַ֠הֲרֹן אֶת־שְׁמ֨וֹת בְּנֵֽי־יִשְׂרָאֵ֜ל בְּחֹ֧שֶׁן הַמִּשְׁפָּ֛ט עַל־לִבּ֖וֹ בְּבֹא֣וֹ אֶל־הַקֹּ֑דֶשׁ לְזִכָּרֹ֥ן לִפְנֵֽי־יְהוָ֖ה תָּמִֽיד:
[ל] וְנָתַתָּ֞ אֶל־חֹ֣שֶׁן הַמִּשְׁפָּ֗ט אֶת־הָאוּרִים֙ וְאֶת־הַתֻּמִּ֔ים וְהָיוּ֙ עַל־לֵ֣ב אַהֲרֹ֔ן בְּבֹא֖וֹ לִפְנֵ֣י יְהוָ֑ה וְנָשָׂ֣א אַ֠הֲרֹן אֶת־מִשְׁפַּ֨ט בְּנֵי־יִשְׂרָאֵ֧ל עַל־לִבּ֛וֹ לִפְנֵ֥י יְהוָ֖ה תָּמִֽיד: ס
[שלישי] [לא] וְעָשִׂ֛יתָ אֶת־מְעִ֥יל הָאֵפ֖וֹד כְּלִ֥יל תְּכֵֽלֶת:
[לב] וְהָיָ֥ה פִֽי־רֹאשׁ֖וֹ בְּתוֹכ֑וֹ שָׂפָ֡ה יִהְיֶה֩ לְפִ֨יו סָבִ֜יב מַעֲשֵׂ֣ה אֹרֵ֗ג כְּפִ֥י תַחְרָ֛א יִֽהְיֶה־לּ֖וֹ לֹ֥א יִקָּרֵֽעַ:
[לג] וְעָשִׂ֣יתָ עַל־שׁוּלָ֗יו רִמֹּנֵי֙ תְּכֵ֤לֶת וְאַרְגָּמָן֙ וְתוֹלַ֣עַת שָׁנִ֔י עַל־שׁוּלָ֖יו סָבִ֑יב וּפַעֲמֹנֵ֥י זָהָ֛ב בְּתוֹכָ֖ם סָבִֽיב:
[לד] פַּעֲמֹ֤ן זָהָב֙ וְרִמּ֔וֹן פַּעֲמֹ֥ן זָהָ֖ב וְרִמּ֑וֹן עַל־שׁוּלֵ֥י הַמְּעִ֖יל סָבִֽיב:
[לה] וְהָיָ֥ה עַֽל־אַהֲרֹ֖ן לְשָׁרֵ֑ת וְנִשְׁמַ֣ע ק֠וֹלוֹ בְּבֹא֨וֹ אֶל־הַקֹּ֜דֶשׁ לִפְנֵ֧י יְהוָ֛ה וּבְצֵאת֖וֹ וְלֹ֥א יָמֽוּת: ס
[לו] וְעָשִׂ֥יתָ צִּ֖יץ זָהָ֣ב טָה֑וֹר וּפִתַּחְתָּ֤ עָלָיו֙ פִּתּוּחֵ֣י חֹתָ֔ם קֹ֖דֶשׁ לַיהוָֽה:
[לז] וְשַׂמְתָּ֤ אֹתוֹ֙ עַל־פְּתִ֣יל תְּכֵ֔לֶת וְהָיָ֖ה עַל־הַמִּצְנָ֑פֶת אֶל־מ֥וּל פְּנֵֽי־הַמִּצְנֶ֖פֶת יִהְיֶֽה:
[לח] וְהָיָה֘ עַל־מֵ֣צַח אַהֲרֹן֒ וְנָשָׂ֨א אַהֲרֹ֜ן אֶת־עֲוֺ֣ן הַקֳּדָשִׁ֗ים אֲשֶׁ֤ר יַקְדִּ֙ישׁוּ֙ בְּנֵ֣י יִשְׂרָאֵ֔ל לְכָֽל־מַתְּנֹ֖ת קָדְשֵׁיהֶ֑ם וְהָיָ֤ה עַל־מִצְחוֹ֙ תָּמִ֔יד לְרָצ֥וֹן לָהֶ֖ם לִפְנֵ֥י יְהוָֽה:
[לט] וְשִׁבַּצְתָּ֙ הַכְּתֹ֣נֶת שֵׁ֔שׁ וְעָשִׂ֖יתָ מִצְנֶ֣פֶת שֵׁ֑שׁ וְאַבְנֵ֥ט תַּעֲשֶׂ֖ה מַעֲשֵׂ֥ה רֹקֵֽם:
[מ] וְלִבְנֵ֤י אַֽהֲרֹן֙ תַּעֲשֶׂ֣ה כֻתֳּנֹ֔ת וְעָשִׂ֥יתָ לָהֶ֖ם אַבְנֵטִ֑ים וּמִגְבָּעוֹת֙ תַּעֲשֶׂ֣ה לָהֶ֔ם לְכָב֖וֹד וּלְתִפְאָֽרֶת:
[מא] וְהִלְבַּשְׁתָּ֤ אֹתָם֙ אֶת־אַהֲרֹ֣ן אָחִ֔יךָ וְאֶת־בָּנָ֖יו אִתּ֑וֹ וּמָשַׁחְתָּ֨ אֹתָ֜ם וּמִלֵּאתָ֧ אֶת־יָדָ֛ם וְקִדַּשְׁתָּ֥ אֹתָ֖ם וְכִהֲנ֥וּ לִֽי:
[מב] וַעֲשֵׂ֤ה לָהֶם֙ מִכְנְסֵי־בָ֔ד לְכַסּ֖וֹת בְּשַׂ֣ר עֶרְוָ֑ה מִמָּתְנַ֥יִם וְעַד־יְרֵכַ֖יִם יִהְיֽוּ:
[מג] וְהָיוּ֩ עַל־אַהֲרֹ֨ן וְעַל־בָּנָ֜יו בְּבֹאָ֣ם׀ אֶל־אֹ֣הֶל מוֹעֵ֗ד א֣וֹ בְגִשְׁתָּ֤ם אֶל־הַמִּזְבֵּחַ֙ לְשָׁרֵ֣ת בַּקֹּ֔דֶשׁ וְלֹא־יִשְׂא֥וּ עָוֺ֖ן וָמֵ֑תוּ חֻקַּ֥ת עוֹלָ֛ם ל֖וֹ וּלְזַרְע֥וֹ אַחֲרָֽיו: ס

פרק כח
(א) ואתה - ב' בטעמא (פזר) בראשי פסוקים בתורה: שמ' כח , א; במ' א , נ. הקרב - ד': שמ' כח , א; וי' ו , ז; *במ' ג , ו; יח , ב. (ואחד: והקרב - וי' ט , ב). לכהנו - לי - ג': שמ' כח , א , ג , ד. (ב) בגדי - קדש - ג': *שמ' כח , ב , ד; וי' טז , ד. (ג) חכמי - לב - ב': שמ' כח , ג; איוב לז , כד. לכהנו - לי - ג': שמ' כח , א , ג , ד. (ד) ואלה - י"ז ראשי פסוקים בתורה: ראה שמ' כא , א. וכתנת - ב': שמ' כח , ד; ש"ב יג , יט. בגדי - קדש - ג': *שמ' כח , ב , ד; וי' טז , ד. לכהנו - לי - ג': שמ' כח , א , ג , ד. ואלה - י"ז ראשי פסוקים בתורה: ראה שמ' כא , א. (ה) והם - ט' ראשי פסוקים: בר' מב , כג; *שמ' כח , ה; דב' ט , כט; מש' א , יח; נחמ' א , י; ט , טז , לה; דה"א ט , כג; דה"ב ט , כד. את - הזהב - ו': שמ' כח , ה; במ' לא , כב , נא , נד; מ"א ו , לב; זכ' יג , ט. תולעת השני - ו' (בלישנא): שמ' כח , ה; לה , כה , לה; לח , כג; לט , א , ג. (ו) זהב - ב' בטעמא (תלישא גדולה): שמ' כח , ו , טו. תולעת שני - ב': שמ' כח , ו; במ' ד , ח. (ז) אל - שני - ג': שמ' כח , ז; ש"א ב , לד; מ"ב ה , כג. (ט) ופתחת - ג': שמ' כח , ט , לו; יש' כ , ב. (יא) חרש - ג' בפתח: שמ' כח , יא; יש' מד , יב , יג. שמת - ג' חסר בסיפרא: שמ' כח , יא , כא; לט , יד. משבצות - ג' מלא (בלישנא): שמ' כח , יא , כה; תה' מה , יד. (יב) זכרן - ג' חסר (בלישנא): שמ' כח , יב (פעמיים) , כט. שמותם - ב' מלא בתורה: שמ' כח , יב; *במ' יג , ד. לזכרן - ח' (חסר ומלא , בלישנא): שמ' יב , יד; יג , ט; כח , יב , כט; ל , טז; במ' י , י; יהו' ד , ז; זכ' ו , יד. לזכרן - ז' (חסר ומלא): שמ' יב , יד; כח , יב , כט; ל , טז; במ' י , י; יהו' ד , ז; זכ' ו , יד. (יג) ועשית - י"ד פסוקים בתורה מן ג' מלין: ראה שמ' כב , יז. (יד) ונתתה - י"ה מלא בסיפרא: ראה שמ' כא , כג. (טו) זהב - ב' בטעמא (תלישא גדולה): שמ' כח , ו , טו. (יז) וברקת - ב': שמ' כח , יז; לט , י. (יח) ויהלם - ג': *שמ' כח , יח; לט , יא; יח' כח , יג. (יט) ואחלמה - ב': שמ' כח , יט; לט , יב. (כ) ושהם - ב' בתרי לשנין: שמ' כח , כ; דה"א כד , כז. וישפה - ג': שמ' כח , כ; לט , יג; יח' כח , יג. במלואתם - ב' , חד מלא וחד חסר: שמ' כח , כ; לט , יג. (כא) שמת - ג' חסר בסיפרא: שמ' כח , יא , כא; לט , יד. לשני - עשר - ו' בלישנא: שמ' כח , כא; *במ' ז , ג; יהו' ג , יב; מ"א ז , כה; יח' לב , א; מז , יג. (כג) טבעות - ז' מלא (בלישנא): שמ' כח , כג (פעמיים) , כו , כז; יש' ג , כא; עז' ב , מג; נחמ' ז , מו. ונתת - כ"ח חסר (בלישנא): ראה שמ' כה , טז. (כד) ונתתה - י"ה מלא בסיפרא: ראה שמ' כא , כג. שתי עבתת - י"ד זוגין , חד לית בה ה"א ותינינא כתיב ה"א: בר' מא , ב , ד. - *שמ' ט , ח , י. - כח , כד; לט , יז. - ש"א כג , יט; כו , א. - ש"ב יח , כט , לב. - כ , יד , טו. - יש' ב , יא , יז. - יר' ל , יח; לא , לז. - לב , יא , יב. - יח' לד , ז , ט. - מ , כג , כז. - תה' נ , ו; צז , ו. - *עז' ב , סג; נחמ' ז , סה. - דה"א ח , כח; כג , ט. (כה) ואת שתי - ו': *בר' יט , טו; לב , כג; שמ' כח , כה; לט , יח; ש"א ל , יח; יח' לה , י. וכל 'ואת שתי הכליות' דכותהון. המשבצות - ג' מלא (בלישנא): שמ' כח , יא , כה; תה' מה , יד. ונתתה - י"ה מלא בסיפרא: ראה שמ' כא , כג. כתפות - ב' מלא בתורה: שמ' כח , כה , כז. (כו) טבעות - ז' מלא (בלישנא): ראה לעיל , כג. אשר אל - ח': *שמ' כח , כו; לט , יט; יר' לו , כג; יח' ח , יד; מ , מד; מא , יב; מב , יג; מז , טז. אל - עבר - ז': שמ' כח , כו; לט , יט; דב' ל , יג; יהו' כב , יא; יח' א , ט , יב; י , כב. (כז) טבעות - ז' מלא (בלישנא): ראה לעיל , כג. ונתתה - י"ה מלא בסיפרא: ראה שמ' כא , כג. כתפות - ב' מלא (בתורה): שמ' כח , כה , כז. האפוד - ז' מלא: שמ' כח , כז (פעמיים) , כח (שלוש פעמים) , לא; וכל נביאים (שו' יח , יז , יח , כ; ש"א כא , י; כג , ט; ל , ז - נמנים כאחד). (כח) האפוד - ז' מלא: ראה לעיל , כז. ולא - יזח - ב': שמ' כח , כח; לט , כא. (כט) לזכרן - ג' חסר (בלישנא): שמ' כח , יב (פעמיים) , כט. לזכרן - ח' (חסר ומלא , בלישנא): ראה לעיל , יב. לזכרן - ז' (חסר ומלא): ראה לעיל , יב. (ל) ונתת - כ"ח חסר (בלישנא): ראה שמ' כה , טז. אל - י"ט פסוקים 'אל על על': בר' מב , כא; *שמ' י , יב , כא; כח , ל; לד , א; מ , כ; במ' טו , לח; דב' יא , כט; כב , כד; שו' יא , לז; ש"א טו , א; ש"ב ו , כא; מ"א ב , יט; טו , כ; כא , ד; יש' כב , טו; יח' ג , כג; מח , כא; נחמ' א , ו. (לא) האפוד - ז' מלא: ראה לעיל , כז. כליל תכלת - ג': *שמ' כח , לא; לט , כב; במ' ד , ו. (לב) תחרא - ב': שמ' כח , לב; לט , כג. (לג) רמני - ב' , חד חסר וחד מלא: שמ' כח , לג; לט , כד. רמני - ט' חסר (בלישנא , כולל 'רמן'): *שמ' כח , לג; לט , כו (פעמיים); *במ' לג , יט , כ; מ"א טו , יח; מ"ב ה , יח (פעמיים); שה"ש ח , ב. (לה) על - אהרן - ה': *שמ' כח , לה , מג; כט , כא; לב , א; וי' ח , ל. ונשמע - ג' , ב' בפתח וחד בקמץ: *שמ' כד , ז; כח , לה; אס' א , כ. ובצאתו - ב': שמ' כח , לה; דה"ב כג , ז. (לו) ופתחת - ג': שמ' כח , ט , לו; יש' כ , ב. (לח) מצח - ב': שמ' כח , לח; יח' ג , ז. וחד: ומצח - יר' ג , ג. (לט) הכתנת - ב': בר' לז , לב; שמ' כח , לט. (מ) ומגבעות - ב' מלא (בלישנא): שמ' כח , מ; וי' ח , יג. (מב) ועשה - ג' ראשי פסוקים: בר' כז , ד; שמ' כה , יט; כח , מב. (מג) על - אהרן - ה': ראה לעיל , לה. אל - המזבח - ט': *שמ' כח , מג; ל , כ; מ , לב; וי' א , טו; ב , ח; ט , ז , ח; טז , יח; במ' ה , כה. ולא - ישאו - ד': שמ' כח , מג; וי' כב , ט; יח' לד , כט; לט , י. ומתו - ח' (בקמץ): בר' לג , יג; שמ' ט , יט; כח , מג; במ' ד , טו , כ; דב' יז , ה; כב , כד; עמ' ו , ט. ומתו - ז' (בתורה , בקמץ): בר' לג , יג; שמ' ט , יט; כח , מג; במ' ד , טו , כ; דב' יז , ה; כב , כד.