מאגר הכתר שמות פרק כט עם עין המסורה

פרק כט
[רביעי] [א] וְזֶ֨ה הַדָּבָ֜ר אֲשֶֽׁר־תַּעֲשֶׂ֥ה לָהֶ֛ם לְקַדֵּ֥שׁ אֹתָ֖ם לְכַהֵ֣ן לִ֑י לְ֠קַח פַּ֣ר אֶחָ֧ד בֶּן־בָּקָ֛ר וְאֵילִ֥ם שְׁנַ֖יִם תְּמִימִֽם:
[ב] וְלֶ֣חֶם מַצּ֗וֹת וְחַלֹּ֤ת מַצֹּת֙ בְּלוּלֹ֣ת בַּשֶּׁ֔מֶן וּרְקִיקֵ֥י מַצּ֖וֹת מְשֻׁחִ֣ים בַּשָּׁ֑מֶן סֹ֥לֶת חִטִּ֖ים תַּעֲשֶׂ֥ה אֹתָֽם:
[ג] וְנָתַתָּ֤ אוֹתָם֙ עַל־סַ֣ל אֶחָ֔ד וְהִקְרַבְתָּ֥ אֹתָ֖ם בַּסָּ֑ל וְאֶ֨ת־הַפָּ֔ר וְאֵ֖ת שְׁנֵ֥י הָאֵילִֽם:
[ד] וְאֶת־אַהֲרֹ֤ן וְאֶת־בָּנָיו֙ תַּקְרִ֔יב אֶל־פֶּ֖תַח אֹ֣הֶל מוֹעֵ֑ד וְרָחַצְתָּ֥ אֹתָ֖ם בַּמָּֽיִם:
[ה] וְלָקַחְתָּ֣ אֶת־הַבְּגָדִ֗ים וְהִלְבַּשְׁתָּ֤ אֶֽת־אַהֲרֹן֙ אֶת־הַכֻּתֹּ֔נֶת וְאֵת֙ מְעִ֣יל הָאֵפֹ֔ד וְאֶת־הָאֵפֹ֖ד וְאֶת־הַחֹ֑שֶׁן וְאָפַדְתָּ֣ ל֔וֹ בְּחֵ֖שֶׁב הָאֵפֹֽד:
[ו] וְשַׂמְתָּ֥ הַמִּצְנֶ֖פֶת עַל־רֹאשׁ֑וֹ וְנָתַתָּ֛ אֶת־נֵ֥זֶר הַקֹּ֖דֶשׁ עַל־הַמִּצְנָֽפֶת:
[ז] וְלָֽקַחְתָּ֙ אֶת־שֶׁ֣מֶן הַמִּשְׁחָ֔ה וְיָצַקְתָּ֖ עַל־רֹאשׁ֑וֹ וּמָשַׁחְתָּ֖ אֹתֽוֹ:
[ח] וְאֶת־בָּנָ֖יו תַּקְרִ֑יב וְהִלְבַּשְׁתָּ֖ם כֻּתֳּנֹֽת:
[ט] וְחָגַרְתָּ֩ אֹתָ֨ם אַבְנֵ֜ט אַהֲרֹ֣ן וּבָנָ֗יו וְחָבַשְׁתָּ֤ לָהֶם֙ מִגְבָּעֹ֔ת וְהָיְתָ֥ה לָהֶ֛ם כְּהֻנָּ֖ה לְחֻקַּ֣ת עוֹלָ֑ם וּמִלֵּאתָ֥ יַֽד־אַהֲרֹ֖ן וְיַד־בָּנָֽיו:
[י] וְהִקְרַבְתָּ֙ אֶת־הַפָּ֔ר לִפְנֵ֖י אֹ֣הֶל מוֹעֵ֑ד וְסָמַ֨ךְ אַהֲרֹ֧ן וּבָנָ֛יו אֶת־יְדֵיהֶ֖ם עַל־רֹ֥אשׁ הַפָּֽר:
[יא] וְשָׁחַטְתָּ֥ אֶת־הַפָּ֖ר לִפְנֵ֣י יְהוָ֑ה פֶּ֖תַח אֹ֥הֶל מוֹעֵֽד:
[יב] וְלָֽקַחְתָּ֙ מִדַּ֣ם הַפָּ֔ר וְנָתַתָּ֛ה עַל־קַרְנֹ֥ת הַמִּזְבֵּ֖חַ בְּאֶצְבָּעֶ֑ךָ וְאֶת־כָּל־הַדָּ֣ם תִּשְׁפֹּ֔ךְ אֶל־יְס֖וֹד הַמִּזְבֵּֽחַ:
[יג] וְלָקַחְתָּ֗ אֶֽת־כָּל־הַחֵלֶב֘ הַֽמֲכַסֶּ֣ה אֶת־הַקֶּרֶב֒ וְאֵ֗ת הַיֹּתֶ֙רֶת֙ עַל־הַכָּבֵ֔ד וְאֵת֙ שְׁתֵּ֣י הַכְּלָיֹ֔ת וְאֶת־הַחֵ֖לֶב אֲשֶׁ֣ר עֲלֵיהֶ֑ן וְהִקְטַרְתָּ֖ הַמִּזְבֵּֽחָה:
[יד] וְאֶת־בְּשַׂ֤ר הַפָּר֙ וְאֶת־עֹר֣וֹ וְאֶת־פִּרְשׁ֔וֹ תִּשְׂרֹ֣ף בָּאֵ֔שׁ מִח֖וּץ לַֽמַּחֲנֶ֑ה חַטָּ֖את הֽוּא:
[טו] וְאֶת־הָאַ֥יִל הָאֶחָ֖ד תִּקָּ֑ח וְסָ֨מְכ֜וּ אַהֲרֹ֧ן וּבָנָ֛יו אֶת־יְדֵיהֶ֖ם עַל־רֹ֥אשׁ הָאָֽיִל:
[טז] וְשָׁחַטְתָּ֖ אֶת־הָאָ֑יִל וְלָֽקַחְתָּ֙ אֶת־דָּמ֔וֹ וְזָרַקְתָּ֥ עַל־הַמִּזְבֵּ֖חַ סָבִֽיב:
[יז] וְאֶ֨ת־הָאַ֔יִל תְּנַתֵּ֖חַ לִנְתָחָ֑יו וְרָחַצְתָּ֤ קִרְבּוֹ֙ וּכְרָעָ֔יו וְנָתַתָּ֥ עַל־נְתָחָ֖יו וְעַל־רֹאשֽׁוֹ:
[יח] וְהִקְטַרְתָּ֤ אֶת־כָּל־הָאַ֙יִל֙ הַמִּזְבֵּ֔חָה עֹלָ֥ה ה֖וּא לַֽיהוָ֑ה רֵ֣יחַ נִיח֔וֹחַ אִשֶּׁ֥ה לַיהוָ֖ה הֽוּא:
[חמישי] [יט] וְלָ֣קַחְתָּ֔ אֵ֖ת הָאַ֣יִל הַשֵּׁנִ֑י וְסָמַ֨ךְ אַהֲרֹ֧ן וּבָנָ֛יו אֶת־יְדֵיהֶ֖ם עַל־רֹ֥אשׁ הָאָֽיִל:
[כ] וְשָׁחַטְתָּ֣ אֶת־הָאַ֗יִל וְלָקַחְתָּ֤ מִדָּמוֹ֙ וְנָתַתָּ֡ה עַל־תְּנוּךְ֩ אֹ֨זֶן אַהֲרֹ֜ן וְעַל־תְּנ֨וּךְ אֹ֤זֶן בָּנָיו֙ הַיְמָנִ֔ית וְעַל־בֹּ֤הֶן יָדָם֙ הַיְמָנִ֔ית וְעַל־בֹּ֥הֶן רַגְלָ֖ם הַיְמָנִ֑ית וְזָרַקְתָּ֧ אֶת־הַדָּ֛ם עַל־הַמִּזְבֵּ֖חַ סָבִֽיב:
[כא] וְלָקַחְתָּ֞ מִן־הַדָּ֨ם אֲשֶׁ֥ר עַֽל־הַמִּזְבֵּחַ֘ וּמִשֶּׁ֣מֶן הַמִּשְׁחָה֒ וְהִזֵּיתָ֤ עַֽל־אַהֲרֹן֙ וְעַל־בְּגָדָ֔יו וְעַל־בָּנָ֛יו וְעַל־בִּגְדֵ֥י בָנָ֖יו אִתּ֑וֹ וְקָדַ֥שׁ הוּא֙ וּבְגָדָ֔יו וּבָנָ֛יו וּבִגְדֵ֥י בָנָ֖יו אִתּֽוֹ:
[כב] וְלָקַחְתָּ֣ מִן־הָ֠אַיִל הַחֵ֨לֶב וְהָאַלְיָ֜ה וְאֶת־הַחֵ֣לֶב׀ הַֽמֲכַסֶּ֣ה אֶת־הַקֶּ֗רֶב וְאֵ֨ת יֹתֶ֤רֶת הַכָּבֵד֙ וְאֵ֣ת׀ שְׁתֵּ֣י הַכְּלָיֹ֗ת וְאֶת־הַחֵ֙לֶב֙ אֲשֶׁ֣ר עֲלֵיהֶ֔ן וְאֵ֖ת שׁ֣וֹק הַיָּמִ֑ין כִּ֛י אֵ֥יל מִלֻּאִ֖ים הֽוּא:
[כג] וְכִכַּ֨ר לֶ֜חֶם אַחַ֗ת וְֽחַלַּ֨ת לֶ֥חֶם שֶׁ֛מֶן אַחַ֖ת וְרָקִ֣יק אֶחָ֑ד מִסַּל֙ הַמַּצּ֔וֹת אֲשֶׁ֖ר לִפְנֵ֥י יְהוָֽה:
[כד] וְשַׂמְתָּ֣ הַכֹּ֔ל עַ֚ל כַּפֵּ֣י אַהֲרֹ֔ן וְעַ֖ל כַּפֵּ֣י בָנָ֑יו וְהֵנַפְתָּ֥ אֹתָ֛ם תְּנוּפָ֖ה לִפְנֵ֥י יְהוָֽה:
[כה] וְלָקַחְתָּ֤ אֹתָם֙ מִיָּדָ֔ם וְהִקְטַרְתָּ֥ הַמִּזְבֵּ֖חָה עַל־הָעֹלָ֑ה לְרֵ֤יחַ נִיח֙וֹחַ֙ לִפְנֵ֣י יְהוָ֔ה אִשֶּׁ֥ה ה֖וּא לַיהוָֽה:
[כו] וְלָקַחְתָּ֣ אֶת־הֶחָזֶ֗ה מֵאֵ֤יל הַמִּלֻּאִים֙ אֲשֶׁ֣ר לְאַהֲרֹ֔ן וְהֵנַפְתָּ֥ אֹת֛וֹ תְּנוּפָ֖ה לִפְנֵ֣י יְהוָ֑ה וְהָיָ֥ה לְךָ֖ לְמָנָֽה:
[כז] וְקִדַּשְׁתָּ֞ אֵ֣ת׀ חֲזֵ֣ה הַתְּנוּפָ֗ה וְאֵת֙ שׁ֣וֹק הַתְּרוּמָ֔ה אֲשֶׁ֥ר הוּנַ֖ף וַאֲשֶׁ֣ר הוּרָ֑ם מֵאֵיל֙ הַמִּלֻּאִ֔ים מֵאֲשֶׁ֥ר לְאַהֲרֹ֖ן וּמֵאֲשֶׁ֥ר לְבָנָֽיו:
[כח] וְהָיָה֩ לְאַהֲרֹ֨ן וּלְבָנָ֜יו לְחָק־עוֹלָ֗ם מֵאֵת֙ בְּנֵ֣י יִשְׂרָאֵ֔ל כִּ֥י תְרוּמָ֖ה ה֑וּא וּתְרוּמָ֞ה יִהְיֶ֨ה מֵאֵ֤ת בְּנֵֽי־יִשְׂרָאֵל֙ מִזִּבְחֵ֣י שַׁלְמֵיהֶ֔ם תְּרוּמָתָ֖ם לַיהוָֽה:
[כט] וּבִגְדֵ֤י הַקֹּ֙דֶשׁ֙ אֲשֶׁ֣ר לְאַהֲרֹ֔ן יִהְי֥וּ לְבָנָ֖יו אַחֲרָ֑יו לְמָשְׁחָ֣ה בָהֶ֔ם וּלְמַלֵּא־בָ֖ם אֶת־יָדָֽם:
[ל] שִׁבְעַ֣ת יָמִ֗ים יִלְבָּשָׁ֧ם הַכֹּהֵ֛ן תַּחְתָּ֖יו מִבָּנָ֑יו אֲשֶׁ֥ר יָבֹ֛א אֶל־אֹ֥הֶל מוֹעֵ֖ד לְשָׁרֵ֥ת בַּקֹּֽדֶשׁ:
[לא] וְאֵ֛ת אֵ֥יל הַמִּלֻּאִ֖ים תִּקָּ֑ח וּבִשַּׁלְתָּ֥ אֶת־בְּשָׂר֖וֹ בְּמָקֹ֥ם קָדֹֽשׁ:
[לב] וְאָכַ֨ל אַהֲרֹ֤ן וּבָנָיו֙ אֶת־בְּשַׂ֣ר הָאַ֔יִל וְאֶת־הַלֶּ֖חֶם אֲשֶׁ֣ר בַּסָּ֑ל פֶּ֖תַח אֹ֥הֶל מוֹעֵֽד:
[לג] וְאָכְל֤וּ אֹתָם֙ אֲשֶׁ֣ר כֻּפַּ֣ר בָּהֶ֔ם לְמַלֵּ֥א אֶת־יָדָ֖ם לְקַדֵּ֣שׁ אֹתָ֑ם וְזָ֥ר לֹא־יֹאכַ֖ל כִּי־קֹ֥דֶשׁ הֵֽם:
[לד] וְֽאִם־יִוָּתֵ֞ר מִבְּשַׂ֧ר הַמִּלֻּאִ֛ים וּמִן־הַלֶּ֖חֶם עַד־הַבֹּ֑קֶר וְשָׂרַפְתָּ֤ אֶת־הַנּוֹתָר֙ בָּאֵ֔שׁ לֹ֥א יֵאָכֵ֖ל כִּי־קֹ֥דֶשׁ הֽוּא:
[לה] וְעָשִׂ֜יתָ לְאַהֲרֹ֤ן וּלְבָנָיו֙ כָּ֔כָה כְּכֹ֥ל אֲשֶׁר־צִוִּ֖יתִי אֹתָ֑כָה שִׁבְעַ֥ת יָמִ֖ים תְּמַלֵּ֥א יָדָֽם:
[לו] וּפַ֨ר חַטָּ֜את תַּעֲשֶׂ֤ה לַיּוֹם֙ עַל־הַכִּפֻּרִ֔ים וְחִטֵּאתָ֙ עַל־הַמִּזְבֵּ֔חַ בְּכַפֶּרְךָ֖ עָלָ֑יו וּמָשַׁחְתָּ֥ אֹת֖וֹ לְקַדְּשֽׁוֹ:
[לז] שִׁבְעַ֣ת יָמִ֗ים תְּכַפֵּר֙ עַל־הַמִּזְבֵּ֔חַ וְקִדַּשְׁתָּ֖ אֹת֑וֹ וְהָיָ֤ה הַמִּזְבֵּחַ֙ קֹ֣דֶשׁ קָדָשִׁ֔ים כָּל־הַנֹּגֵ֥עַ בַּמִּזְבֵּ֖חַ יִקְדָּֽשׁ: ס
[ששי] [לח] וְזֶ֕ה אֲשֶׁ֥ר תַּעֲשֶׂ֖ה עַל־הַמִּזְבֵּ֑חַ כְּבָשִׂ֧ים בְּנֵֽי־שָׁנָ֛ה שְׁנַ֥יִם לַיּ֖וֹם תָּמִֽיד:
[לט] אֶת־הַכֶּ֥בֶשׂ הָאֶחָ֖ד תַּעֲשֶׂ֣ה בַבֹּ֑קֶר וְאֵת֙ הַכֶּ֣בֶשׂ הַשֵּׁנִ֔י תַּעֲשֶׂ֖ה בֵּ֥ין הָעַרְבָּֽיִם:
[מ] וְעִשָּׂרֹ֨ן סֹ֜לֶת בָּל֨וּל בְּשֶׁ֤מֶן כָּתִית֙ רֶ֣בַע הַהִ֔ין וְנֵ֕סֶךְ רְבִיעִ֥ת הַהִ֖ין יָ֑יִן לַכֶּ֖בֶשׂ הָאֶחָֽד:
[מא] וְאֵת֙ הַכֶּ֣בֶשׂ הַשֵּׁנִ֔י תַּעֲשֶׂ֖ה בֵּ֣ין הָעַרְבָּ֑יִם כְּמִנְחַ֨ת הַבֹּ֤קֶר וּכְנִסְכָּהּ֙ תַּֽעֲשֶׂה־לָּ֔הּ לְרֵ֣יחַ נִיחֹ֔חַ אִשֶּׁ֖ה לַיהוָֽה:
[מב] עֹלַ֤ת תָּמִיד֙ לְדֹרֹ֣תֵיכֶ֔ם פֶּ֥תַח אֹֽהֶל־מוֹעֵ֖ד לִפְנֵ֣י יְהוָ֑ה אֲשֶׁ֨ר אִוָּעֵ֤ד לָכֶם֙ שָׁ֔מָּה לְדַבֵּ֥ר אֵלֶ֖יךָ שָֽׁם:
[מג] וְנֹעַדְתִּ֥י שָׁ֖מָּה לִבְנֵ֣י יִשְׂרָאֵ֑ל וְנִקְדַּ֖שׁ בִּכְבֹדִֽי:
[מד] וְקִדַּשְׁתִּ֛י אֶת־אֹ֥הֶל מוֹעֵ֖ד וְאֶת־הַמִּזְבֵּ֑חַ וְאֶת־אַהֲרֹ֧ן וְאֶת־בָּנָ֛יו אֲקַדֵּ֖שׁ לְכַהֵ֥ן לִֽי:
[מה] וְשָׁ֣כַנְתִּ֔י בְּת֖וֹךְ בְּנֵ֣י יִשְׂרָאֵ֑ל וְהָיִ֥יתִי לָהֶ֖ם לֵאלֹהִֽים:
[מו] וְיָדְע֗וּ כִּ֣י אֲנִ֤י יְהוָה֙ אֱלֹ֣הֵיהֶ֔ם אֲשֶׁ֨ר הוֹצֵ֧אתִי אֹתָ֛ם מֵאֶ֥רֶץ מִצְרַ֖יִם לְשָׁכְנִ֣י בְתוֹכָ֑ם אֲנִ֖י יְהוָ֥ה אֱלֹהֵיהֶֽם: פ

פרק כט
(א) וזה - כ"ג ראשי פסוקים: בר' ו , טו; שמ' כט , א , לח; וי' יא , כט; במ' ח , ד; יח , יא; לד , ז; דב' יד , יב; טו , ב; יח , ג; יט , ד; יהו' ה , ד; שו' כא , יא; ש"א ב , לד; מ"א ז , כח; ט , טו; יא , כז; מ"ב יט , כט; יש' לז , ל; לח , ז; יח' מז , טו; איוב כא , כה; עז' ז , יא. וזה הדבר - ד': *שמ' כט , א; יהו' ה , ד; שו' כא , יא; מ"א יא , כז. לקח - ב': שמ' כט , א; מש' כ , טז. (ואחד: ולקח - יח' לז , טז). ואילם - ז' (חסר ומלא): בר' לב , טו; שמ' כט , א; וי' כג , יח; דב' לב , יד; יח' כז , כא; דה"ב יג , ט; כט , כא. (ב) ולחם - ד' ראשי פסוקים: *בר' מז , יג; *שמ' כט , ב; וי' כג , יד; *נחמ' ט , טו. מצת - ד' חסר: שמ' יב , יח; יג , ו; כט , ב; וי' ב , ד. (ג) ונתת - כ"ח חסר (בלישנא): ראה שמ' כה , טז. אותם (הראשון בפסוק) - ל"ט מלא בתורה: בר' מא , ח; מט , כח , כט; נ , כא; שמ' יד , ט; כט , ג; וי' י , ב; יד , ו; טו , י , כט; יז , ה; כב , טז; כג , מג; כד , ו; כה , נה; במ' ד , יב , יט , כג , מט; ה , ד; ו , כ; ז , ג , ה , ו; כה , ד , יז; דב' א , טו; ג , ו , כח; ט , כח; י , טו; יב , כט; יח , יב , יד; כו , טז; כז , ד , כו; לא , ז , י. ואת - הפר - ג': *שמ' כט , ג; וי' ח , יז; שו' ו , כח. ואת שני - ג': שמ' יח , ג; כט , ג; וי' ח , ב. (ה) ואת - האפד - ב': שמ' כט , ה; שו' יח , יז. (ו) ונתת - כ"ח חסר (בלישנא): ראה שמ' כה , טז. (ח) והלבשתם - ב': *שמ' כט , ח; במ' כ , כו. (י) לפני אהל מועד - ז': שמ' כט , י; *וי' ג , ח , יג; ד , יד; *במ' ג , ז , לח; ח , ט. (יב) ונתתה - י"ה מלא בסיפרא: ראה שמ' כא , כג. (יד) ואת - בשר - ב': שמ' כט , יד; יר' יט , ט. תשרף באש - ג': *שמ' כט , יד; יהו' יא , ו; יר' לח , כג. חטאת הוא - ד': *שמ' כט , יד; וי' ד , כא , כד; ה , ט. (טו) ואת - האיל - ה': שמ' כט , טו , יז; וי' ח , כ; ט , יח; *במ' ו , יז. (יז) ואת - האיל - ה': ראה לעיל , טו. ונתת - כ"ח חסר (בלישנא): ראה שמ' כה , טז. (יח) ריח ניחוח - ח' (בתורה): שמ' כט , יח; וי' ו , ח , יד; כג , יג; במ' טו , ג , ז; כח , יג; כט , ח. וכל 'אשה ריח ניחח' דכותהון. ניחוח - ג' מלא בתורה: שמ' כט , יח , כה; וי' א , ט. (כ) ונתתה - י"ה מלא בסיפרא: ראה שמ' כא , כג. תנוך - ח': שמ' כט , כ (פעמיים); *וי' ח , כג , כד; יד , יד , יז , כה , כח. אזן - כ"ה: שמ' כט , כ (פעמיים); וי' ח , כג; יד , יד , יז , כה , כח; ש"א ט , טו; ש"ב ז , כז; כב , מה; יש' נ , ד , ה; עמ' ג , יב; תה' יח , מה; צד , ט; מש' טו , לא; כ , יב; כה , יב; איוב יב , יא; כט , יא; לג , טז; לד , ג; מב , ה; קה' א , ח; דה"א יז , כה. (כא) על - אהרן - ה': ראה שמ' כח , לה. ובגדיו - ד': שמ' כט , כא; וי' כא , י; ש"ב א , ב; מש' ו , כז. (כב) ואת - החלב - ה': שמ' כט , כב; *וי' ג , ט; ז , ג , לג; ט , י. וכל 'ואת שתי הכליות' דכותהון. (כג) ורקיק אחד - ב': שמ' כט , כג; וי' ח , כו. (כה) לריח - י"ו: *שמ' כט , כה , מא; *וי' ב , יב; ג , טז; ד , לא; ח , כא , כח; יז , ו; במ' טו , כד; יח , יז; כח , ו , כז; כט , ב , ו; יח' טז , יט; שה"ש א , ג. ניחוח - ג' מלא (בתורה): שמ' כט , יח , כה; וי' א , ט. אשה הוא ליי' - ג': *שמ' כט , כה; וי' ח , כא , כח. (כז) ומאשר - ב': בר' לא , א; שמ' כט , כז. (כח) לחק - עולם - י"א בלישנא: שמ' כט , כח; ל , כא; וי' ו , יא , טו; ז , לד; י , טו; כד , ט; במ' יח , ח , יא , יט; יר' ה , כב. הוא - ד' (דמטעין וסוברים: היא): שמ' כט , כח; *וי' כד , ט; כה , לד; במ' ה , טו. (לא) קדש - י"ג חסר: שמ' כט , לא; *וי' ו , ט , יט , כ; כא , ז , ח; כד , ט; במ' ו , ה , ח; *דב' כו , יט; יח' מב , יג; נחמ' ח , ט , יא. (לב) ואת - הלחם - ג': בר' כז , יז; שמ' כט , לב; וי' ח , לא. (לג) קדש הם - ג': שמ' כט , לג; וי' טז , ד; *במ' יח , יז. הם - י"ב סופי פסוקים: *בר' מ , יב , יח; שמ' יח , כו; כט , לג; וי' יא , מב; *במ' א , טז; שו' ח , כד; מ"א כ , ג; יש' מט , כא; יח' יב , ב; עז' ב , נט; *נחמ' ז , סא. (לד) עד - הבקר - ד' בתורה: שמ' טז , כג , כד; כט , לד; וי' ו , ב. (לו) ליום - כ': שמ' יט , יא; כט , לו , לח; *במ' ז , יא (פעמיים); כח , ג , כד; יר' לז , כא; יח' ד , י; ל , ב; מג , כה; מה , כג (פעמיים); מו , יג; יואל א , טו; מל' ג , יז; אס' ג , יד; ח , יג; דה"א כו , יז (פעמיים). וחטאת - ג': שמ' כט , לו; יח' מג , כ; מה , יח. (לז) תכפר - ב': שמ' כט , לז; יר' יח , כג. והיה המזבח - ב': שמ' כט , לז; מ , י. (לח) וזה - כ"ג ראשי פסוקים: ראה לעיל , א. ליום - כ': ראה לעיל , לו. (לט) ואת הכבש - ד': *שמ' כט , לט , מא; במ' כח , ד , ח. (מ) ועשרן - ב' חסר: שמ' כט , מ; במ' כח , יג. ועשרן - ה' , ג' מלא וב' חסר: שמ' כט , מ; וי' יד , כא; *במ' כח , יג; כט , ד , טו. בלול - ד': שמ' כט , מ; וי' יד , כא; במ' טו , ד , ט. בשמן - ו' רפין: *שמ' כט , מ; *במ' כח , ה; לה , כה; תה' פט , כא; צב , יא; *אס' ב , יב. רבע - ב': שמ' כט , מ; ש"א ט , ח. וכל שם אנש דכותהון. ונסך - ב': שמ' כט , מ; ל , ט. (מא) ואת הכבש - ד': *שמ' כט , לט , מא; במ' כח , ד , ח. לריח - י"ו: ראה לעיל , כה. (מב) שמה - ה' פסוקים 'שמה שם': שמ' כט , מב; מ"ב ט , ב; יז , כז; יש' לד , טו; דה"א ד , מא. עלת תמיד - ד' (חסר ומלא): *שמ' כט , מב; *במ' כח , ו; יח' מו , טו; עז' ג , ה. (מג) ונעדתי - ב' , חד חסר וחד מלא: *שמ' כה , כב; כט , מג. ונעדתי שמה - י' ראשי פסוקים (פסוקים הפותחים בתיבה כלשהי ולאחריה התיבה 'שמה'): בר' כט , ג; שמ' כט , מג; *דב' ד , מב; יב , ו; יהו' כ , ג; שו' יח , טו; מ"ב ו , יד; ט , ב; יח' יא , יח; תה' קכב , ה. (מד) ואת - המזבח - ד': שמ' כט , מד; *וי' טז , כ , לג; במ' ז , א. (מו) אני יי' אלהיהם - ח': שמ' כט , מו (פעמיים); וי' כו , מד; יח' כח , כו; לד , ל; לט , כב , כח; זכ' י , ו.