מאגר הכתר שמות פרק לה עם עין המסורה

פרק לה
{פרשת ויקהל} [א] וַיַּקְהֵ֣ל מֹשֶׁ֗ה אֶֽת־כָּל־עֲדַ֛ת בְּנֵ֥י יִשְׂרָאֵ֖ל וַיֹּ֣אמֶר אֲלֵהֶ֑ם אֵ֚לֶּה הַדְּבָרִ֔ים אֲשֶׁר־צִוָּ֥ה יְהוָ֖ה לַעֲשֹׂ֥ת אֹתָֽם:
[ב] שֵׁ֣שֶׁת יָמִים֘ תֵּעָשֶׂ֣ה מְלָאכָה֒ וּבַיּ֣וֹם הַשְּׁבִיעִ֗י יִהְיֶ֨ה לָכֶ֥ם קֹ֛דֶשׁ שַׁבַּ֥ת שַׁבָּת֖וֹן לַיהוָ֑ה כָּל־הָעֹשֶׂ֥ה ב֛וֹ מְלָאכָ֖ה יוּמָֽת:
[ג] לֹא־תְבַעֲר֣וּ אֵ֔שׁ בְּכֹ֖ל מֹשְׁבֹֽתֵיכֶ֑ם בְּי֖וֹם הַשַּׁבָּֽת: פ
[ד] וַיֹּ֣אמֶר מֹשֶׁ֔ה אֶל־כָּל־עֲדַ֥ת בְּנֵֽי־יִשְׂרָאֵ֖ל לֵאמֹ֑ר זֶ֣ה הַדָּבָ֔ר אֲשֶׁר־צִוָּ֥ה יְהוָ֖ה לֵאמֹֽר:
[ה] קְח֨וּ מֵאִתְּכֶ֤ם תְּרוּמָה֙ לַֽיהוָ֔ה כֹּ֚ל נְדִ֣יב לִבּ֔וֹ יְבִיאֶ֕הָ אֵ֖ת תְּרוּמַ֣ת יְהוָ֑ה זָהָ֥ב וָכֶ֖סֶף וּנְחֹֽשֶׁת:
[ו] וּתְכֵ֧לֶת וְאַרְגָּמָ֛ן וְתוֹלַ֥עַת שָׁנִ֖י וְשֵׁ֥שׁ וְעִזִּֽים:
[ז] וְעֹרֹ֨ת אֵילִ֧ם מְאָדָּמִ֛ים וְעֹרֹ֥ת תְּחָשִׁ֖ים וַעֲצֵ֥י שִׁטִּֽים:
[ח] וְשֶׁ֖מֶן לַמָּא֑וֹר וּבְשָׂמִים֙ לְשֶׁ֣מֶן הַמִּשְׁחָ֔ה וְלִקְטֹ֖רֶת הַסַּמִּֽים:
[ט] וְאַ֨בְנֵי־שֹׁ֔הַם וְאַבְנֵ֖י מִלֻּאִ֑ים לָאֵפ֖וֹד וְלַחֹֽשֶׁן:
[י] וְכָל־חֲכַם־לֵ֖ב בָּכֶ֑ם יָבֹ֣אוּ וְיַעֲשׂ֔וּ אֵ֛ת כָּל־אֲשֶׁ֥ר צִוָּ֖ה יְהוָֽה:
[יא] אֶ֨ת־הַמִּשְׁכָּ֔ן אֶֽת־אָהֳל֖וֹ וְאֶת־מִכְסֵ֑הוּ אֶת־קְרָסָיו֙ וְאֶת־קְרָשָׁ֔יו אֶת־בְּרִיחָ֕ו אֶת־עַמֻּדָ֖יו וְאֶת־אֲדָנָֽיו:
[יב] אֶת־הָאָרֹ֥ן וְאֶת־בַּדָּ֖יו אֶת־הַכַּפֹּ֑רֶת וְאֵ֖ת פָּרֹ֥כֶת הַמָּסָֽךְ:
[יג] אֶת־הַשֻּׁלְחָ֥ן וְאֶת־בַּדָּ֖יו וְאֶת־כָּל־כֵּלָ֑יו וְאֵ֖ת לֶ֥חֶם הַפָּנִֽים:
[יד] וְאֶת־מְנֹרַ֧ת הַמָּא֛וֹר וְאֶת־כֵּלֶ֖יהָ וְאֶת־נֵרֹתֶ֑יהָ וְאֵ֖ת שֶׁ֥מֶן הַמָּאֽוֹר:
[טו] וְאֶת־מִזְבַּ֤ח הַקְּטֹ֙רֶת֙ וְאֶת־בַּדָּ֔יו וְאֵת֙ שֶׁ֣מֶן הַמִּשְׁחָ֔ה וְאֵ֖ת קְטֹ֣רֶת הַסַּמִּ֑ים וְאֶת־מָסַ֥ךְ הַפֶּ֖תַח לְפֶ֥תַח הַמִּשְׁכָּֽן:
[טז] אֵ֣ת׀ מִזְבַּ֣ח הָעֹלָ֗ה וְאֶת־מִכְבַּ֤ר הַנְּחֹ֙שֶׁת֙ אֲשֶׁר־ל֔וֹ אֶת־בַּדָּ֖יו וְאֶת־כָּל־כֵּלָ֑יו אֶת־הַכִּיֹּ֖ר וְאֶת־כַּנּֽוֹ:
[יז] אֵ֚ת קַלְעֵ֣י הֶחָצֵ֔ר אֶת־עַמֻּדָ֖יו וְאֶת־אֲדָנֶ֑יהָ וְאֵ֕ת מָסַ֖ךְ שַׁ֥עַר הֶחָצֵֽר:
[יח] אֶת־יִתְדֹ֧ת הַמִּשְׁכָּ֛ן וְאֶת־יִתְדֹ֥ת הֶחָצֵ֖ר וְאֶת־מֵיתְרֵיהֶֽם:
[יט] אֶת־בִּגְדֵ֥י הַשְּׂרָ֖ד לְשָׁרֵ֣ת בַּקֹּ֑דֶשׁ אֶת־בִּגְדֵ֤י הַקֹּ֙דֶשׁ֙ לְאַהֲרֹ֣ן הַכֹּהֵ֔ן וְאֶת־בִּגְדֵ֥י בָנָ֖יו לְכַהֵֽן:
[כ] וַיֵּ֥צְא֛וּ כָּל־עֲדַ֥ת בְּנֵֽי־יִשְׂרָאֵ֖ל מִלִּפְנֵ֥י מֹשֶֽׁה:
[שני] [כא] וַיָּבֹ֕אוּ כָּל־אִ֖ישׁ אֲשֶׁר־נְשָׂא֣וֹ לִבּ֑וֹ וְכֹ֡ל אֲשֶׁר֩ נָדְבָ֨ה רוּח֜וֹ אֹת֗וֹ הֵ֠בִיאוּ אֶת־תְּרוּמַ֨ת יְהוָ֜ה לִמְלֶ֨אכֶת אֹ֤הֶל מוֹעֵד֙ וּלְכָל־עֲבֹ֣דָת֔וֹ וּלְבִגְדֵ֖י הַקֹּֽדֶשׁ:
[כב] וַיָּבֹ֥אוּ הָאֲנָשִׁ֖ים עַל־הַנָּשִׁ֑ים כֹּ֣ל׀ נְדִ֣יב לֵ֗ב הֵ֠בִיאוּ חָ֣ח וָנֶ֜זֶם וְטַבַּ֤עַת וְכוּמָז֙ כָּל־כְּלִ֣י זָהָ֔ב וְכָל־אִ֕ישׁ אֲשֶׁ֥ר הֵנִ֛יף תְּנוּפַ֥ת זָהָ֖ב לַיהוָֽה:
[כג] וְכָל־אִ֞ישׁ אֲשֶׁר־נִמְצָ֣א אִתּ֗וֹ תְּכֵ֧לֶת וְאַרְגָּמָ֛ן וְתוֹלַ֥עַת שָׁנִ֖י וְשֵׁ֣שׁ וְעִזִּ֑ים וְעֹרֹ֨ת אֵילִ֧ם מְאָדָּמִ֛ים וְעֹרֹ֥ת תְּחָשִׁ֖ים הֵבִֽיאוּ:
[כד] כָּל־מֵרִ֗ים תְּר֤וּמַת כֶּ֙סֶף֙ וּנְחֹ֔שֶׁת הֵבִ֕יאוּ אֵ֖ת תְּרוּמַ֣ת יְהוָ֑ה וְכֹ֡ל אֲשֶׁר֩ נִמְצָ֨א אִתּ֜וֹ עֲצֵ֥י שִׁטִּ֛ים לְכָל־מְלֶ֥אכֶת הָעֲבֹדָ֖ה הֵבִֽיאוּ:
[כה] וְכָל־אִשָּׁ֥ה חַכְמַת־לֵ֖ב בְּיָדֶ֣יהָ טָו֑וּ וַיָּבִ֣יאוּ מַטְוֶ֗ה אֶֽת־הַתְּכֵ֙לֶת֙ וְאֶת־הָֽאַרְגָּמָ֔ן אֶת־תּוֹלַ֥עַת הַשָּׁנִ֖י וְאֶת־הַשֵּֽׁשׁ:
[כו] וְכָ֨ל־הַנָּשִׁ֔ים אֲשֶׁ֨ר נָשָׂ֥א לִבָּ֛ן אֹתָ֖נָה בְּחָכְמָ֑ה טָו֖וּ אֶת־הָעִזִּֽים:
[כז] וְהַנְּשִׂאִ֣ם הֵבִ֔יאוּ אֵ֚ת אַבְנֵ֣י הַשֹּׁ֔הַם וְאֵ֖ת אַבְנֵ֣י הַמִּלֻּאִ֑ים לָאֵפ֖וֹד וְלַחֹֽשֶׁן:
[כח] וְאֶת־הַבֹּ֖שֶׂם וְאֶת־הַשָּׁ֑מֶן לְמָא֕וֹר וּלְשֶׁ֙מֶן֙ הַמִּשְׁחָ֔ה וְלִקְטֹ֖רֶת הַסַּמִּֽים:
[כט] כָּל־אִ֣ישׁ וְאִשָּׁ֗ה אֲשֶׁ֨ר נָדַ֣ב לִבָּם֘ אֹתָם֒ לְהָבִיא֙ לְכָל־הַמְּלָאכָ֔ה אֲשֶׁ֨ר צִוָּ֧ה יְהוָ֛ה לַעֲשׂ֖וֹת בְּיַד־מֹשֶׁ֑ה הֵבִ֧יאוּ בְנֵי־יִשְׂרָאֵ֛ל נְדָבָ֖ה לַיהוָֽה: פ
[שלישי] [ל] וַיֹּ֤אמֶר מֹשֶׁה֙ אֶל־בְּנֵ֣י יִשְׂרָאֵ֔ל רְא֛וּ קָרָ֥א יְהוָ֖ה בְּשֵׁ֑ם בְּצַלְאֵ֛ל בֶּן־אוּרִ֥י בֶן־ח֖וּר לְמַטֵּ֥ה יְהוּדָֽה:
[לא] וַיְמַלֵּ֥א אֹת֖וֹ ר֣וּחַ אֱלֹהִ֑ים בְּחָכְמָ֛ה בִּתְבוּנָ֥ה וּבְדַ֖עַת וּבְכָל־מְלָאכָֽה:
[לב] וְלַחְשֹׁ֖ב מַחֲשָׁבֹ֑ת לַעֲשֹׂ֛ת בַּזָּהָ֥ב וּבַכֶּ֖סֶף וּבַנְּחֹֽשֶׁת:
[לג] וּבַחֲרֹ֥שֶׁת אֶ֛בֶן לְמַלֹּ֖את וּבַחֲרֹ֣שֶׁת עֵ֑ץ לַעֲשׂ֖וֹת בְּכָל־מְלֶ֥אכֶת מַחֲשָֽׁבֶת:
[לד] וּלְהוֹרֹ֖ת נָתַ֣ן בְּלִבּ֑וֹ ה֕וּא וְאָהֳלִיאָ֥ב בֶּן־אֲחִיסָמָ֖ךְ לְמַטֵּה־דָֽן:
[לה] מִלֵּ֨א אֹתָ֜ם חָכְמַת־לֵ֗ב לַעֲשׂוֹת֘ כָּל־מְלֶ֣אכֶת חָרָ֣שׁ ׀ וְחֹשֵׁב֒ וְרֹקֵ֞ם בַּתְּכֵ֣לֶת וּבָאַרְגָּמָ֗ן בְּתוֹלַ֧עַת הַשָּׁנִ֛י וּבַשֵּׁ֖שׁ וְאֹרֵ֑ג עֹשֵׂי֙ כָּל־מְלָאכָ֔ה וְחֹשְׁבֵ֖י מַחֲשָׁבֹֽת:

פרק לה
(א) אלה הדברים - ה': *שמ' יט , ו; לה , א; *דב' א , א; יש' מב , טז; זכ' ח , טז. לעשת - י"ב חסר: שמ' לה , א , לב; לו , א , ב , ג , ה; וי' ח , לד; במ' ט , ד , ו; נחמ' ח , טו; יב , כז; יג , כז. לעשת - י"ג חסר (בלישנא): ראה ההערה הקודמת , אך כאן מונים גם את 'ולעשת' - עז' ז , י. (ב) תעשה - ז': ראה שמ' כה , לא. (ג) משבתיכם - ג' חסר: שמ' לה , ג; *וי' כג , יד , לא. (ד) ויאמר משה אל - כל - עדת (אמירה אל כל עדת) - ג': שמ' טז , ט; לה , ד; במ' יד , ז. (ה) זהב וכסף ונחשת - ג': שמ' כה , ג; לה , ה; דה"א יח , י. (ח) ושמן - ח' זוגין (מחלפין , קדמיה לא נסיב ו"ו ותינינא נסיב ו"ו): ראה שמ' כה , ו. למאור - ג' (ב' מלא , בסיפרא): שמ' כה , ו; כז , כ; לה , ח. (ט) ואבני - שהם - ח' זוגין מחלפין , קדמיה לא נסיב ו"ו ותינינא נסיב ו"ו: ראה שמ' כה , ו. לאפוד - ג' , ב' מלא וחד חסר: שמ' כה , ז; לה , ט , כז. (י) וכל - ח' ראשי פסוקים בסיפרא: *שמ' יב , מד; יג , יג; כ , טו; לה , י , כג , כה , כו; לח , כ. ויעשו - ג' רפין: *שמ' ה , ט; לה , י; במ' ט , ב. (יא) בריחו - ב' חסר: *שמ' לה , יא; לט , לג. (יב) ואת - בדיו - ד': *שמ' לה , יב , יג , טו; לט , לה. ואת פרכת - ב': *שמ' לה , יב; לט , לד. (יג) ואת - בדיו - ד': *שמ' לה , יב , יג , טו; לט , לה. ואת לחם - ב': *שמ' לה , יג; לט , לו. (יד) ואת - נרתיה - ב': שמ' לה , יד; במ' ד , ט. ואת שמן - ז': ראה שמ' לא , יא. (טו) ואת - מזבח - ט': ראה שמ' ל , כז. ואת - בדיו - ד': *שמ' לה , יב , יג , טו; לט , לה. ואת שמן - ז': ראה שמ' לא , יא. (יז) את - י"ח פסוקים 'את את ואת ואת': בר' א , טז; שמ' לה , יז; לט , לז; מ , ט; וי' ח , ל; יד , מה; במ' יט , ה; לג , נב; דב' יד , ז; כו , ז; יהו' טו , יד; שו' א , כה; ש"ב ד , יב; כא , ח; מ"א ז , נא; יר' לב , יד; נא , כח; נחמ' ט , כד. (יט) ואת - בגדי - ז': ראה שמ' לא , י. (כ) מלפני משה - ב': שמ' לה , כ; לו , ג. (כא) נשאו - ג': שמ' לה , כא; לו , ב; מ"ב ב , טז. (כב) וכומז - ב': שמ' לה , כב; במ' לא , נ. כלי זהב - ג': *שמ' לה , כב; במ' לא , נ; מ"ב יב , יד. וכל - איש - י"ו: שמ' לה , כב , כג; לו , א; שו' ג , כט; כ , לג; ש"א יד , כב; יז , יט , כד; כב , ב (פעמיים); ש"ב טז , יח; יז , יד , כד; מ"ב כג , ב; יח' לט , כ; דה"ב לד , ל. (כג) וכל - ח' ראשי פסוקים בסיפרא: ראה לעיל , י. וכל - איש - י"ו: ראה לעיל , כב. (כד) מרים - ג': *שמ' לה , כד; מש' ג , לה; יד , כט. וחד: ומרים - תה' ג , ד. מלאכת העבדה - ב': שמ' לה , כד; דה"א ט , יט. (כה) וכל - ח' ראשי פסוקים בסיפרא: ראה לעיל , י. וכל - אשה - ג': שמ' לה , כה; במ' לא , יז; שו' כא , יא. בידיה - ג': *שמ' לה , כה; מש' יד , א; *איכה א , יז. טוו - ב': שמ' לה , כה , כו. ויביאו - ל"ו (מלא וחסר): ראה שמ' לב , ג. תולעת השני - ו' (בלישנא): ראה שמ' כח , ה. (כו) וכל - ח' ראשי פסוקים בסיפרא: ראה לעיל , י. וכל - הנשים - ג': *שמ' לה , כו; יר' מד , טו; *אס' א , כ. אתנה - ב' , חד חסר וחד מלא: *שמ' לה , כו; יח' לד , כא. טוו - ב': שמ' לה , כה , כו. (כז) והנשאם - ב' , חד חסר וחד מלא: שמ' לה , כז; יהו' כב , לב. לאפוד - ג' (ב' מלא וחד חסר): שמ' כה , ז; לה , ט , כז. (כט) צוה יי' לעשות ביד - משה (צווי ביד משה) - י': שמ' לה , כט; וי' ח , לו; במ' טו , כג; לו , יג; יהו' יד , ב; כא , ב , ח; שו' ג , ד; נחמ' ח , יד; ט , יד. (לא) וימלא - ט': בר' כט , כח; שמ' לה , לא; וי' ט , יז; במ' יד , כד; שו' יז , ה , יב; מ"ב כג , יד; כד , ד; נח' ב , יג. רוח אלהים - ח' (בלישנא): ראה שמ' לא , ג. ובדעת - ה': ראה שמ' לא , ג. (לב) ולחשב - ב': שמ' לה , לב; דה"ב ב , יג. מחשבת - ג' חסר: שמ' לא , ד; לה , לב , לה. לעשת - י"ב חסר: ראה לעיל , א. לעשת - י"ג חסר (בלישנא): ראה לעיל , א. (לג) ובחרשת - ב' (ראשי פסוקים): שמ' לא , ה; לה , לג. למלאת - ו' (חסר ומלא): ראה שמ' לא , ה. ובחרשת - ב' (אמצעי פסוקים): שמ' לא , ה; לה , לג. מחשבֶת - ב': שמ' לה , לג; דה"ב ב , יג. (לד) ולהורת - ב': שמ' לה , לד; וי' י , יא. (לה) בתולעת השני - ו' (בלישנא): ראה שמ' כח , ה. עשי - י"ו כתיב יו"ד (בצירי , חסר ומלא , בלישנא , לא כולל 'בעשי'): *שמ' לה , לה; יש' יט , י; מל' ג , טו; תה' קג , כ , כא; קז , כג; מש' יב , כב; *אס' ג , ט; ט , ג; נחמ' יג , י; דה"א כב , טו; כז , כו; דה"ב כד , יג; כו , יג; לד , י , יז. ומן 'ויהי בשנת עשרים ושלש שנה' (מ"ב יב , ז) עד סוף דסיפרא דכותהון. עשי - ח' (בצירי , בלישנא): *שמ' טו , יא; לה , לה; יש' יט , י; סד , ד; יר' י , יב; נא , טו; מש' יב , כב; כב , ב. (המניין מתייחס רק לספרים שבהם צורות 'עֹשֵה' הן במיעוט לעומת 'עֹשֶה' בסגול). מחשבת - ג' חסר: שמ' לא , ד; לה , לב , לה.