מאגר הכתר שמות פרק לח עם עין המסורה

פרק לח
[שביעי] [א] וַיַּ֛עַשׂ אֶת־מִזְבַּ֥ח הָעֹלָ֖ה עֲצֵ֣י שִׁטִּ֑ים חָמֵשׁ֩ אַמּ֨וֹת אָרְכּ֜וֹ וְחָֽמֵשׁ־אַמּ֤וֹת רָחְבּוֹ֙ רָב֔וּעַ וְשָׁלֹ֥שׁ אַמּ֖וֹת קֹמָתֽוֹ:
[ב] וַיַּ֣עַשׂ קַרְנֹתָ֗יו עַ֚ל אַרְבַּ֣ע פִּנֹּתָ֔יו מִמֶּ֖נּוּ הָי֣וּ קַרְנֹתָ֑יו וַיְצַ֥ף אֹת֖וֹ נְחֹֽשֶׁת:
[ג] וַיַּ֜עַשׂ אֶֽת־כָּל־כְּלֵ֣י הַמִּזְבֵּ֗חַ אֶת־הַסִּירֹ֤ת וְאֶת־הַיָּעִים֙ וְאֶת־הַמִּזְרָקֹ֔ת אֶת־הַמִּזְלָגֹ֖ת וְאֶת־הַמַּחְתֹּ֑ת כָּל־כֵּלָ֖יו עָשָׂ֥ה נְחֹֽשֶׁת:
[ד] וַיַּ֤עַשׂ לַמִּזְבֵּחַ֙ מִכְבָּ֔ר מַעֲשֵׂ֖ה רֶ֣שֶׁת נְחֹ֑שֶׁת תַּ֧חַת כַּרְכֻּבּ֛וֹ מִלְּמַ֖טָּה עַד־חֶצְיֽוֹ:
[ה] וַיִּצֹ֞ק אַרְבַּ֧ע טַבָּעֹ֛ת בְּאַרְבַּ֥ע הַקְּצָוֺ֖ת לְמִכְבַּ֣ר הַנְּחֹ֑שֶׁת בָּתִּ֖ים לַבַּדִּֽים:
[ו] וַיַּ֥עַשׂ אֶת־הַבַּדִּ֖ים עֲצֵ֣י שִׁטִּ֑ים וַיְצַ֥ף אֹתָ֖ם נְחֹֽשֶׁת:
[ז] וַיָּבֵ֨א אֶת־הַבַּדִּ֜ים בַּטַּבָּעֹ֗ת עַ֚ל צַלְעֹ֣ת הַמִּזְבֵּ֔חַ לָשֵׂ֥את אֹת֖וֹ בָּהֶ֑ם נְב֥וּב לֻחֹ֖ת עָשָׂ֥ה אֹתֽוֹ: ס
[ח] וַיַּ֗עַשׂ אֵ֚ת הַכִּיּ֣וֹר נְחֹ֔שֶׁת וְאֵ֖ת כַּנּ֣וֹ נְחֹ֑שֶׁת בְּמַרְאֹת֙ הַצֹּ֣בְאֹ֔ת אֲשֶׁ֣ר צָֽבְא֔וּ פֶּ֖תַח אֹ֥הֶל מוֹעֵֽד: ס
[ט] וַיַּ֖עַשׂ אֶת־הֶחָצֵ֑ר לִפְאַ֣ת׀ נֶ֣גֶב תֵּימָ֗נָה קַלְעֵ֤י הֶחָצֵר֙ שֵׁ֣שׁ מָשְׁזָ֔ר מֵאָ֖ה בָּאַמָּֽה:
[י] עַמּוּדֵיהֶ֣ם עֶשְׂרִ֔ים וְאַדְנֵיהֶ֥ם עֶשְׂרִ֖ים נְחֹ֑שֶׁת וָוֵ֧י הָעַמּוּדִ֛ים וַחֲשֻׁקֵיהֶ֖ם כָּֽסֶף:
[יא] וְלִפְאַ֤ת צָפוֹן֙ מֵאָ֣ה בָאַמָּ֔ה עַמּוּדֵיהֶ֣ם עֶשְׂרִ֔ים וְאַדְנֵיהֶ֥ם עֶשְׂרִ֖ים נְחֹ֑שֶׁת וָוֵ֧י הָעַמּוּדִ֛ים וַחֲשֻׁקֵיהֶ֖ם כָּֽסֶף:
[יב] וְלִפְאַת־יָ֗ם קְלָעִים֙ חֲמִשִּׁ֣ים בָּאַמָּ֔ה עַמּוּדֵיהֶ֣ם עֲשָׂרָ֔ה וְאַדְנֵיהֶ֖ם עֲשָׂרָ֑ה וָוֵ֧י הָעַמֻּדִ֛ים וַחֲשׁוּקֵיהֶ֖ם כָּֽסֶף:
[יג] וְלִפְאַ֛ת קֵ֥דְמָה מִזְרָ֖חָה חֲמִשִּׁ֥ים אַמָּֽה:
[יד] קְלָעִ֛ים חֲמֵשׁ־עֶשְׂרֵ֥ה אַמָּ֖ה אֶל־הַכָּתֵ֑ף עַמּוּדֵיהֶ֣ם שְׁלֹשָׁ֔ה וְאַדְנֵיהֶ֖ם שְׁלֹשָֽׁה:
[טו] וְלַכָּתֵ֣ף הַשֵּׁנִ֗ית מִזֶּ֤ה וּמִזֶּה֙ לְשַׁ֣עַר הֶחָצֵ֔ר קְלָעִ֕ים חֲמֵ֥שׁ עֶשְׂרֵ֖ה אַמָּ֑ה עַמֻּדֵיהֶ֣ם שְׁלֹשָׁ֔ה וְאַדְנֵיהֶ֖ם שְׁלֹשָֽׁה:
[טז] כָּל־קַלְעֵ֧י הֶחָצֵ֛ר סָבִ֖יב שֵׁ֥שׁ מָשְׁזָֽר:
[יז] וְהָאֲדָנִ֣ים לָעַמֻּדִים֘ נְחֹשֶׁת֒ וָוֵ֨י הָעַמּוּדִ֜ים וַחֲשׁוּקֵיהֶם֙ כֶּ֔סֶף וְצִפּ֥וּי רָאשֵׁיהֶ֖ם כָּ֑סֶף וְהֵם֙ מְחֻשָּׁקִ֣ים כֶּ֔סֶף כֹּ֖ל עַמֻּדֵ֥י הֶחָצֵֽר:
[מפטיר] [יח] וּמָסַ֞ךְ שַׁ֤עַר הֶחָצֵר֙ מַעֲשֵׂ֣ה רֹקֵ֔ם תְּכֵ֧לֶת וְאַרְגָּמָ֛ן וְתוֹלַ֥עַת שָׁנִ֖י וְשֵׁ֣שׁ מָשְׁזָ֑ר וְעֶשְׂרִ֤ים אַמָּה֙ אֹ֔רֶךְ וְקוֹמָ֤ה בְרֹ֙חַב֙ חָמֵ֣שׁ אַמּ֔וֹת לְעֻמַּ֖ת קַלְעֵ֥י הֶחָצֵֽר:
[יט] וְעַמֻּֽדֵיהֶם֙ אַרְבָּעָ֔ה וְאַדְנֵיהֶ֥ם אַרְבָּעָ֖ה נְחֹ֑שֶׁת וָוֵיהֶ֣ם כֶּ֔סֶף וְצִפּ֧וּי רָאשֵׁיהֶ֛ם וַחֲשֻׁקֵיהֶ֖ם כָּֽסֶף:
[כ] וְֽכָל־הַיְתֵדֹ֞ת לַמִּשְׁכָּ֧ן וְלֶחָצֵ֛ר סָבִ֖יב נְחֹֽשֶׁת: ס
{פרשת פקודי} [כא] אֵ֣לֶּה פְקוּדֵ֤י הַמִּשְׁכָּן֙ מִשְׁכַּ֣ן הָעֵדֻ֔ת אֲשֶׁ֥ר פֻּקַּ֖ד עַל־פִּ֣י מֹשֶׁ֑ה עֲבֹדַת֙ הַלְוִיִּ֔ם בְּיַד֙ אִֽיתָמָ֔ר בֶּֽן־אַהֲרֹ֖ן הַכֹּהֵֽן:
[כב] וּבְצַלְאֵ֛ל בֶּן־אוּרִ֥י בֶן־ח֖וּר לְמַטֵּ֣ה יְהוּדָ֑ה עָשָׂ֕ה אֵ֛ת כָּל־אֲשֶׁר־צִוָּ֥ה יְהוָ֖ה אֶת־מֹשֶֽׁה:
[כג] וְאִתּ֗וֹ אָהֳלִיאָ֞ב בֶּן־אֲחִיסָמָ֛ךְ לְמַטֵּה־דָ֖ן חָרָ֣שׁ וְחֹשֵׁ֑ב וְרֹקֵ֗ם בַּתְּכֵ֙לֶת֙ וּבָֽאַרְגָּמָ֔ן וּבְתוֹלַ֥עַת הַשָּׁנִ֖י וּבַשֵּֽׁשׁ: ס
[כד] כָּל־הַזָּהָ֗ב הֶֽעָשׂוּי֙ לַמְּלָאכָ֔ה בְּכֹ֖ל מְלֶ֣אכֶת הַקֹּ֑דֶשׁ וַיְהִ֣י׀ זְהַ֣ב הַתְּנוּפָ֗ה תֵּ֤שַׁע וְעֶשְׂרִים֙ כִּכָּ֔ר וּשְׁבַ֨ע מֵא֧וֹת וּשְׁלֹשִׁ֛ים שֶׁ֖קֶל בְּשֶׁ֥קֶל הַקֹּֽדֶשׁ:
[כה] וְכֶ֛סֶף פְּקוּדֵ֥י הָעֵדָ֖ה מְאַ֣ת כִּכָּ֑ר וְאֶלֶף֩ וּשְׁבַ֨ע מֵא֜וֹת וַחֲמִשָּׁ֧ה וְשִׁבְעִ֛ים שֶׁ֖קֶל בְּשֶׁ֥קֶל הַקֹּֽדֶשׁ:
[כו] בֶּ֚קַע לַגֻּלְגֹּ֔לֶת מַחֲצִ֥ית הַשֶּׁ֖קֶל בְּשֶׁ֣קֶל הַקֹּ֑דֶשׁ לְכֹ֨ל הָעֹבֵ֜ר עַל־הַפְּקֻדִ֗ים מִבֶּ֨ן עֶשְׂרִ֤ים שָׁנָה֙ וָמַ֔עְלָה לְשֵׁשׁ־מֵא֥וֹת אֶ֙לֶף֙ וּשְׁלֹ֣שֶׁת אֲלָפִ֔ים וַחֲמֵ֥שׁ מֵא֖וֹת וַחֲמִשִּֽׁים:
[כז] וַיְהִ֗י מְאַת֙ כִּכַּ֣ר הַכֶּ֔סֶף לָצֶ֗קֶת אֵ֚ת אַדְנֵ֣י הַקֹּ֔דֶשׁ וְאֵ֖ת אַדְנֵ֣י הַפָּרֹ֑כֶת מְאַ֧ת אֲדָנִ֛ים לִמְאַ֥ת הַכִּכָּ֖ר כִּכָּ֥ר לָאָֽדֶן:
[כח] וְאֶת־הָאֶ֜לֶף וּשְׁבַ֤ע הַמֵּאוֹת֙ וַחֲמִשָּׁ֣ה וְשִׁבְעִ֔ים עָשָׂ֥ה וָוִ֖ים לָעַמּוּדִ֑ים וְצִפָּ֥ה רָאשֵׁיהֶ֖ם וְחִשַּׁ֥ק אֹתָֽם:
[כט] וּנְחֹ֥שֶׁת הַתְּנוּפָ֖ה שִׁבְעִ֣ים כִּכָּ֑ר וְאַלְפַּ֥יִם וְאַרְבַּע־מֵא֖וֹת שָֽׁקֶל:
[ל] וַיַּ֣עַשׂ בָּ֗הּ אֶת־אַדְנֵי֙ פֶּ֚תַח אֹ֣הֶל מוֹעֵ֔ד וְאֵת֙ מִזְבַּ֣ח הַנְּחֹ֔שֶׁת וְאֶת־מִכְבַּ֥ר הַנְּחֹ֖שֶׁת אֲשֶׁר־ל֑וֹ וְאֵ֖ת כָּל־כְּלֵ֥י הַמִּזְבֵּֽחַ:
[לא] וְאֶת־אַדְנֵ֤י הֶחָצֵר֙ סָבִ֔יב וְאֶת־אַדְנֵ֖י שַׁ֣עַר הֶחָצֵ֑ר וְאֵ֨ת כָּל־יִתְדֹ֧ת הַמִּשְׁכָּ֛ן וְאֶת־כָּל־יִתְדֹ֥ת הֶחָצֵ֖ר סָבִֽיב:

פרק לח
(א) קמתו - ב' חסר: ראה שמ' כה , י. (ג) את - הסירת - ב' (בלישנא): שמ' לח , ג; מ"ב כה , יד. את - הסירת - ב' (בכתיבים שונים): שמ' לח , ג; דה"ב ד , יא. הסירת - ב' חסר ו"ו: שמ' לח , ג; מ"ב כה , יד. המזרקת - ב' חסר: כל אוריתא (שמ' לח , ג; במ' ד , יד - נחשבים כמקרה אחד); יר' נב , יח. את - המזלגת - ב': שמ' לח , ג; *במ' ד , יד. המחתת - ג': שמ' לח , ג; במ' ד , יד; יז , ב. כל - כליו - י"ד זוגין , קדמאה נסיב למ"ד ותינינא לא נסיב: ראה שמ' כז , ג. (ד) מכבר - ב' בקמץ: שמ' כז , ד; לח , ד. (ו) ויעש את - הבדים - ג': שמ' לז , טו , כח; לח , ו. (ז) ויבא - נ"א (י"ח מנהן בתורה): ראה שמ' לז , ה. לשאת - כ"ד: ראה שמ' כה , יד. נבוב - ב': שמ' כז , ח; לח , ז. (ח) הכיור - ג' מלא בתורה (בלישנא): *שמ' ל , יח; לא , ט; לח , ח. (וכל נביאיה דכותיה בר מן ב' (חסר): מ"א ז , ל; מ"ב טז , יז). במראת - ד' , ב' חסר וב' מלא: *בר' מו , ב; *שמ' לח , ח; יח' ח , ג; מ , ב. הצבאת - ב' (אחד חסר ואחד מלא): שמ' לח , ח; ש"א ב , כב. (י) עמודיהם - ד' מלא: *שמ' לח , י , יא , יב , יד. ואדניהם עשרים - ד': שמ' כז , י , יא; לח , י , יא. (יא) עמודיהם - ד' מלא: *שמ' לח , י , יא , יב , יד. ואדניהם עשרים - ד': שמ' כז , י , יא; לח , י , יא. (יב) עמודיהם - ד' מלא: *שמ' לח , י , יא , יב , יד. העמדים - י"א חסר (בלישנא): ראה שמ' כז , י. וחשוקיהם - ב' מלא: שמ' לח , יב , יז. (יד) עמודיהם - ד' מלא: *שמ' לח , י , יא , יב , יד. (יז) לעמדים - ב' , חד חסר וחד מלא: שמ' לח , יז , כח. לעמדים - י"א חסר (בלישנא): ראה שמ' כז , י. וחשוקיהם - ב' מלא: שמ' לח , יב , יז. וצפוי - ב': שמ' לח , יז , יט. וצפוי - ה' (בלישנא): *שמ' לח , יז , יט; במ' יז , ג , ד; יש' ל , כב. ראשיהם - י"ג: ראה שמ' לו , לח. עמדי - ב' חסר (בלישנא): שמ' לח , יז; במ' ג , לז. (יט) וצפוי - ה' (בלישנא): ראה לעיל , יז. וצפוי - ב': שמ' לח , יז , יט. ראשיהם - י"ג: ראה שמ' לו , לח. (כ) וכל - ח' ראשי פסוקים בסיפרא: ראה שמ' לה , י. (כג) ובתולעת השני - ו' (בלישנא): ראה שמ' כח , ה. (כד) העשוי - ב': שמ' ג , טז; לח , כד. מלאכת הקדש - ב': שמ' לו , ד; לח , כד. זְהַב - ד': שמ' לח , כד; במ' ז , פו; לא , נב; דה"א ג , ו. (כה) וחמשה ושבעים - ב': שמ' לח , כה , כח. (כו) בקע - ב': בר' כד , כב; שמ' לח , כו. לגלגלת - ג': שמ' טז , טז; לח , כו; במ' ג , מז. (כז) את אדני - ב': שמ' לח , כז , ל. למאת - ב': שמ' לח , כז; דה"ב כה , ט. למאת הככר - ב': שמ' לח , כז; דה"ב כה , ט. (כח) האלף - ג' (אל"ף בסגול): *שמ' לח , כח; יהו' יח , כח; שה"ש ח , יב. וחד: האָלף - ש"א יז , יח. האלף - ד': שמ' לח , כח; יהו' יח , כח; ש"א יז , יח; *שה"ש ח , יב. וחמשה ושבעים - ב': שמ' לח , כה , כח. לעמודים - ב' , חד מלא וחד חסר: שמ' לח , יז , כח. ראשיהם - י"ג: ראה שמ' לו , לח. (ל) את - אדני - ב': שמ' לח , כז , ל. ואת - מזבח - ט': ראה שמ' ל , כז. מזבח הנחשת - ב' בתורה: שמ' לח , ל; לט , לט.