מאגר הכתר שמות פרק מ עם עין המסורה

פרק מ
[חמישי] [א] וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר:
[ב] בְּיוֹם־הַחֹ֥דֶשׁ הָרִאשׁ֖וֹן בְּאֶחָ֣ד לַחֹ֑דֶשׁ תָּקִ֕ים אֶת־מִשְׁכַּ֖ן אֹ֥הֶל מוֹעֵֽד:
[ג] וְשַׂמְתָּ֣ שָׁ֔ם אֵ֖ת אֲר֣וֹן הָעֵד֑וּת וְסַכֹּתָ֥ עַל־הָאָרֹ֖ן אֶת־הַפָּרֹֽכֶת:
[ד] וְהֵבֵאתָ֙ אֶת־הַשֻּׁלְחָ֔ן וְעָרַכְתָּ֖ אֶת־עֶרְכּ֑וֹ וְהֵבֵאתָ֙ אֶת־הַמְּנֹרָ֔ה וְהַעֲלֵיתָ֖ אֶת־נֵרֹתֶֽיהָ:
[ה] וְנָתַתָּ֞ה אֶת־מִזְבַּ֤ח הַזָּהָב֙ לִקְטֹ֔רֶת לִפְנֵ֖י אֲר֣וֹן הָעֵדֻ֑ת וְשַׂמְתָּ֛ אֶת־מָסַ֥ךְ הַפֶּ֖תַח לַמִּשְׁכָּֽן:
[ו] וְנָ֣תַתָּ֔ה אֵ֖ת מִזְבַּ֣ח הָעֹלָ֑ה לִפְנֵ֕י פֶּ֖תַח מִשְׁכַּ֥ן אֹֽהֶל־מוֹעֵֽד:
[ז] וְנָֽתַתָּ֙ אֶת־הַכִּיֹּ֔ר בֵּֽין־אֹ֥הֶל מוֹעֵ֖ד וּבֵ֣ין הַמִּזְבֵּ֑חַ וְנָתַתָּ֥ שָׁ֖ם מָֽיִם:
[ח] וְשַׂמְתָּ֥ אֶת־הֶחָצֵ֖ר סָבִ֑יב וְנָ֣תַתָּ֔ אֶת־מָסַ֖ךְ שַׁ֥עַר הֶחָצֵֽר:
[ט] וְלָקַחְתָּ֙ אֶת־שֶׁ֣מֶן הַמִּשְׁחָ֔ה וּמָשַׁחְתָּ֥ אֶת־הַמִּשְׁכָּ֖ן וְאֶת־כָּל־אֲשֶׁר־בּ֑וֹ וְקִדַּשְׁתָּ֥ אֹת֛וֹ וְאֶת־כָּל־כֵּלָ֖יו וְהָ֥יָה קֹֽדֶשׁ:
[י] וּמָשַׁחְתָּ֛ אֶת־מִזְבַּ֥ח הָעֹלָ֖ה וְאֶת־כָּל־כֵּלָ֑יו וְקִדַּשְׁתָּ֙ אֶת־הַמִּזְבֵּ֔חַ וְהָיָ֥ה הַמִּזְבֵּ֖חַ קֹ֥דֶשׁ קָדָשִֽׁים:
[יא] וּמָשַׁחְתָּ֥ אֶת־הַכִּיֹּ֖ר וְאֶת־כַּנּ֑וֹ וְקִדַּשְׁתָּ֖ אֹתֽוֹ:
[יב] וְהִקְרַבְתָּ֤ אֶֽת־אַהֲרֹן֙ וְאֶת־בָּנָ֔יו אֶל־פֶּ֖תַח אֹ֣הֶל מוֹעֵ֑ד וְרָחַצְתָּ֥ אֹתָ֖ם בַּמָּֽיִם:
[יג] וְהִלְבַּשְׁתָּ֙ אֶֽת־אַהֲרֹ֔ן אֵ֖ת בִּגְדֵ֣י הַקֹּ֑דֶשׁ וּמָשַׁחְתָּ֥ אֹת֛וֹ וְקִדַּשְׁתָּ֥ אֹת֖וֹ וְכִהֵ֥ן לִֽי:
[יד] וְאֶת־בָּנָ֖יו תַּקְרִ֑יב וְהִלְבַּשְׁתָּ֥ אֹתָ֖ם כֻּתֳּנֹֽת:
[טו] וּמָשַׁחְתָּ֣ אֹתָ֗ם כַּאֲשֶׁ֤ר מָשַׁ֙חְתָּ֙ אֶת־אֲבִיהֶ֔ם וְכִהֲנ֖וּ לִ֑י וְ֠הָיְתָה לִהְיֹ֨ת לָהֶ֧ם מָשְׁחָתָ֛ם לִכְהֻנַּ֥ת עוֹלָ֖ם לְדֹרֹתָֽם:
[טז] וַיַּ֖עַשׂ מֹשֶׁ֑ה כְּ֠כֹל אֲשֶׁ֨ר צִוָּ֧ה יְהוָ֛ה אֹת֖וֹ כֵּ֥ן עָשָֽׂה: ס
[ששי] [יז] וַיְהִ֞י בַּחֹ֧דֶשׁ הָרִאשׁ֛וֹן בַּשָּׁנָ֥ה הַשֵּׁנִ֖ית בְּאֶחָ֣ד לַחֹ֑דֶשׁ הוּקַ֖ם הַמִּשְׁכָּֽן:
[יח] וַיָּ֨קֶם מֹשֶׁ֜ה אֶת־הַמִּשְׁכָּ֗ן וַיִּתֵּן֙ אֶת־אֲדָנָ֔יו וַיָּ֙שֶׂם֙ אֶת־קְרָשָׁ֔יו וַיִּתֵּ֖ן אֶת־בְּרִיחָ֑יו וַיָּ֖קֶם אֶת־עַמּוּדָֽיו:
[יט] וַיִּפְרֹ֤שׂ אֶת־הָאֹ֙הֶל֙ עַל־הַמִּשְׁכָּ֔ן וַיָּ֜שֶׂם אֶת־מִכְסֵ֥ה הָאֹ֛הֶל עָלָ֖יו מִלְמָ֑עְלָה כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה: ס
[כ] וַיִּקַּ֞ח וַיִּתֵּ֤ן אֶת־הָעֵדֻת֙ אֶל־הָ֣אָרֹ֔ן וַיָּ֥שֶׂם אֶת־הַבַּדִּ֖ים עַל־הָאָרֹ֑ן וַיִּתֵּ֧ן אֶת־הַכַּפֹּ֛רֶת עַל־הָאָרֹ֖ן מִלְמָֽעְלָה:
[כא] וַיָּבֵ֣א אֶת־הָאָרֹן֘ אֶל־הַמִּשְׁכָּן֒ וַיָּ֗שֶׂם אֵ֚ת פָּרֹ֣כֶת הַמָּסָ֔ךְ וַיָּ֕סֶךְ עַ֖ל אֲר֣וֹן הָעֵד֑וּת כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה: ס
[כב] וַיִּתֵּ֤ן אֶת־הַשֻּׁלְחָן֙ בְּאֹ֣הֶל מוֹעֵ֔ד עַ֛ל יֶ֥רֶךְ הַמִּשְׁכָּ֖ן צָפֹ֑נָה מִח֖וּץ לַפָּרֹֽכֶת:
[כג] וַיַּעֲרֹ֥ךְ עָלָ֛יו עֵ֥רֶךְ לֶ֖חֶם לִפְנֵ֣י יְהוָ֑ה כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה: ס
[כד] וַיָּ֤שֶׂם אֶת־הַמְּנֹרָה֙ בְּאֹ֣הֶל מוֹעֵ֔ד נֹ֖כַח הַשֻּׁלְחָ֑ן עַ֛ל יֶ֥רֶךְ הַמִּשְׁכָּ֖ן נֶֽגְבָּה:
[כה] וַיַּ֥עַל הַנֵּרֹ֖ת לִפְנֵ֣י יְהוָ֑ה כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה: ס
[כו] וַיָּ֛שֶׂם אֶת־מִזְבַּ֥ח הַזָּהָ֖ב בְּאֹ֣הֶל מוֹעֵ֑ד לִפְנֵ֖י הַפָּרֹֽכֶת:
[כז] וַיַּקְטֵ֥ר עָלָ֖יו קְטֹ֣רֶת סַמִּ֑ים כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה: ס
[שביעי] [כח] וַיָּ֛שֶׂם אֶת־מָסַ֥ךְ הַפֶּ֖תַח לַמִּשְׁכָּֽן:
[כט] וְאֵת֙ מִזְבַּ֣ח הָעֹלָ֔ה שָׂ֕ם פֶּ֖תַח מִשְׁכַּ֣ן אֹֽהֶל־מוֹעֵ֑ד וַיַּ֣עַל עָלָ֗יו אֶת־הָעֹלָה֙ וְאֶת־הַמִּנְחָ֔ה כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה: ס
[ל] וַיָּ֙שֶׂם֙ אֶת־הַכִּיֹּ֔ר בֵּֽין־אֹ֥הֶל מוֹעֵ֖ד וּבֵ֣ין הַמִּזְבֵּ֑חַ וַיִּתֵּ֥ן שָׁ֛מָּה מַ֖יִם לְרָחְצָֽה:
[לא] וְרָחֲצ֣וּ מִמֶּ֔נּוּ מֹשֶׁ֖ה וְאַהֲרֹ֣ן וּבָנָ֑יו אֶת־יְדֵיהֶ֖ם וְאֶת־רַגְלֵיהֶֽם:
[לב] בְּבֹאָ֞ם אֶל־אֹ֣הֶל מוֹעֵ֗ד וּבְקָרְבָתָ֛ם אֶל־הַמִּזְבֵּ֖חַ יִרְחָ֑צוּ כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה: ס
[לג] וַיָּ֣קֶם אֶת־הֶחָצֵ֗ר סָבִיב֙ לַמִּשְׁכָּ֣ן וְלַמִּזְבֵּ֔חַ וַיִּתֵּ֕ן אֶת־מָסַ֖ךְ שַׁ֣עַר הֶחָצֵ֑ר וַיְכַ֥ל מֹשֶׁ֖ה אֶת־הַמְּלָאכָֽה: פ
[מפטיר] [לד] וַיְכַ֥ס הֶעָנָ֖ן אֶת־אֹ֣הֶל מוֹעֵ֑ד וּכְב֣וֹד יְהוָ֔ה מָלֵ֖א אֶת־הַמִּשְׁכָּֽן:
[לה] וְלֹא־יָכֹ֣ל מֹשֶׁ֗ה לָבוֹא֙ אֶל־אֹ֣הֶל מוֹעֵ֔ד כִּֽי־שָׁכַ֥ן עָלָ֖יו הֶעָנָ֑ן וּכְב֣וֹד יְהוָ֔ה מָלֵ֖א אֶת־הַמִּשְׁכָּֽן:
[לו] וּבְהֵעָל֤וֹת הֶֽעָנָן֙ מֵעַ֣ל הַמִּשְׁכָּ֔ן יִסְע֖וּ בְּנֵ֣י יִשְׂרָאֵ֑ל בְּכֹ֖ל מַסְעֵיהֶֽם:
[לז] וְאִם־לֹ֥א יֵעָלֶ֖ה הֶעָנָ֑ן וְלֹ֣א יִסְע֔וּ עַד־י֖וֹם הֵעָלֹתֽוֹ:
[לח] כִּי֩ עֲנַ֨ן יְהוָ֤ה עַֽל־הַמִּשְׁכָּן֙ יוֹמָ֔ם וְאֵ֕שׁ תִּהְיֶ֥ה לַ֖יְלָה בּ֑וֹ לְעֵינֵ֥י כָל־בֵּֽית־יִשְׂרָאֵ֖ל בְּכָל־מַסְעֵיהֶֽם:

פרק מ
(ב) הראשון - ס"ג (מלא וחסר , לא כולל 'הראישון'): בר' כה , כה; כו , א; לב , יח; מ , יג; שמ' ד , ח; יב , טו (פעמיים) , טז; מ , ב , יז; וי' ד , כא; כג , ה , ז , לה , לט , מ; במ' ז , יב; ט , א; כ , א; כא , כו; כח , טז , יח; לג , ג (פעמיים); דב' י , ד; טז , ד; כד , ד; יהו' ד , יט; שו' כ , כב; ש"א יז , ל; ש"ב יח , כז; מ"ב יז , מ; יש' ח , כג; מג , כז; יר' נ , יז; יח' מ , כא; הו' ב , ט; חגי ב , ג , ט; זכ' יד , י; מש' יח , יז; רות ג , י; אס' ג , ז , יב; דנ' ח , כא; י , ד , יב; יא , יג; עז' ג , יב; ו , יט; ז , ט; ח , לא; י , יז; נחמ' ח , יח; דה"א יב , טז; כד , ז; כה , ט; כז , ב , ג; דה"ב כט , ג , יז (פעמיים); לה , א. הראשון - ס"ד (מנין זה כולל גם 'הראישון' - איוב טו , ז). (ג) ארון העדות - י"ב (בכתיבים שונים): ראה שמ' כה , כב. העדות - ח' מלא בתורה: ראה שמ' כו , לג. (ד) את - י"ו פסוקים דאית בהון 'את את את את': ראה שמ' כא , לה. ערכו - ג': שמ' מ , ד; מ"ב יב , ה; איוב מא , ד. (ה) ונתתה - י"ה מלא בסיפרא: ראה שמ' כא , כג. ארון העדת - י"ב (בכתיבים שונים): ראה שמ' כה , כב. (ו) ונתתה - י"ה מלא בסיפרא: ראה שמ' כא , כג. פתח משכן אהל - מועד - ב': *שמ' מ , ו , כט. (ז) ונתת - כ"ח חסר (בלישנא): ראה שמ' כה , טז. ונתת שם (נתינה שם) - ז': שמ' מ , ז; דב' כח , סה; מ"א ו , יט; יח' ו , יג; כ , כח; מז , כג; שה"ש ז , יג. ונתת שם מים - ב' (בלישנא): שמ' ל , יח; מ , ז. (ח) ונתת - כ"ח חסר (בלישנא): ראה שמ' כה , טז. (ט) את - י"ח פסוקים 'את את ואת ואת': ראה שמ' לה , יז. (י) והיה המזבח - ב': שמ' כט , לז; מ , י. (טו) להית - ח' חסר בלישנא: ראה שמ' כג , א. משחתם - ב' בתרי לישנין: שמ' מ , טו; וי' כב , כה. (יז) הראשון - ס"ג (מלא וחסר , לא כולל 'הראישון'): ראה לעיל , ב. הראשון - ס"ד (מנין זה כולל גם 'הראישון' - איוב טו , ז). הוקם - ג' (מלא וחסר): שמ' מ , יז; ש"ב כג , א; יר' לה , יד. (יח) את - ד' פסוקים 'את את את את את': שמ' מ , יח; דב' יז , ה; יהו' כד , טו; מ"א ז , כא. ויקם - כ': שמ' מ , יח (פעמיים) , לג; שו' ב , טז; ג , ט , טו; מ"א ז , כא (שלש פעמים); ח , כ; יא , יד , כג; טז , לב; מ"ב כא , ג; תה' מ , ג; עח , ה; דנ' ט , יב; דה"ב ג , יז; ו , י; לג , ג. וישם - ל"ג בתורה: ראה שמ' כד , ו. עמודיו - ד' מלא (בלישנא): *שמ' לו , לח; מ , יח; *במ' ד , לא; שה"ש ג , י. (יט) וישם - ל"ג בתורה: ראה שמ' כד , ו. את - מכסה - ב': בר' ח , יג; שמ' מ , יט. (כ) אל - י"ט פסוקים 'אל על על': ראה שמ' כח , ל. אל - הארן - ב': *שמ' כה , טז; מ , כ. (ואחד: ואל - הארן - שמ' כה , כא). וישם - ל"ג בתורה: ראה שמ' כד , ו. (כא) ויבא - נ"א (י"ח מנהן בתורה): ראה שמ' לז , ה. אל - המשכן - כל לשון 'משכן' , 'משכנותיך' , 'המשכן' 'על' , בר מן ג' 'אל': שמ' מ , כא; *במ' יז , כח; תה' מג , ג. וישם - ל"ג בתורה: ראה שמ' כד , ו. ויסך - ד': שמ' מ , כא; ש"ב יב , כ; איוב ג , כג; לח , ח. ארון העדות - י"ב (בכתיבים שונים): ראה שמ' כה , כב. העדות - ח' מלא בתורה: ראה שמ' כו , לג. (כב) צפנה - ח' בתורה (בלישנא): בר' יג , יד; כח , יד; שמ' מ , כב; וי' א , יא; *במ' ב , כה; ג , לה; דב' ב , ג; ג , כז. (כד) וישם - ל"ג בתורה: ראה שמ' כד , ו. נגבה - כ"ז (בלישנא , לא כולל 'הנגבה'): ראה שמ' כו , יח. (כו) וישם - ל"ג בתורה: ראה שמ' כד , ו. (כז) קטרת סמים - ד': *שמ' ל , ז; מ , כז; *וי' טז , יב; דה"ב ב , ג. (ואחד: וקטרת סמים - דה"ב יג , יא). (כח) וישם - ל"ג בתורה: ראה שמ' כד , ו. (כט) ואת - ג' פסוקים 'ואת את ואת את' ('ואת' הראשונה בראש הפסוק): שמ' מ , כט; וי' ז , ג; יר' מא , ג. ואת מזבח - ט': ראה שמ' ל , כז. פתח משכן אהל - מועד - ב': *שמ' מ , ו , כט. ואת - המנחה - ח': שמ' מ , כט; וי' יד , כ; שו' יג , יט; מ"א ח , סד (פעמיים); יח' מה , יז; מו , טו; דה"ב ז , ז. (ל) וישם - ל"ג בתורה: ראה שמ' כד , ו. לרחצה - ד': *שמ' ל , יח; מ , ל; דה"ב ד , ו (פעמיים). (לא) ואהרן ובניו - ג': שמ' מ , לא; *במ' ג , לח; דה"א ו , לד. (לב) אל - המזבח - ט': ראה שמ' כח , מג. (לג) ויקם - כ': ראה לעיל , יח. ולמזבח - ב': שמ' מ , לג; יואל ב , יז. (לה) ולא - ז' ראשי פסוקים בסיפרא: שמ' ב , ג; ז , ד; ט , יא; יב , י; טז , כ; כ , כג; מ , לה. (לח) ענן - ד': שמ' מ , לח; *וי' טז , יג; יח' ח , יא; איוב לז , יא. (ואחד: וענן - במ' י , לד). בית - ישראל - ד' בתורה: שמ' טז , לא; מ , לח; וי' י , ו; במ' כ , כט. בית - ישראל - כ': שמ' טז , לא; מ , לח; וי' י , ו; *במ' כ , כט; יהו' כא , מג; ש"א ז , ב , ג; ש"ב א , יב; ו , ה , טו; יב , ח; טז , ג; מ"א יב , כא; כ , לא; יש' ה , ז; יד , ב; מו , ג; תה' קטו , יב; קלה , יט; רות ד , יא. (וכל ירמיה ויחזקאל דכותיה בר מן י"ח 'בני ישראל'. ומן ראש דתרי עשר עד 'צר וסביב הארץ' (עמ' ג , יא) דכותהון בר מן ד' 'בית ישראל': הו' א , ד , ו; ה , א; יב , א. ומן 'צר וסביב הארץ' עד סוף הספר דכותהון בר מן ד' 'בני ישראל': עמ' ג , יב; ד , ה; ט , ז; מי' ה , ב).