מאגר הכתר שמות פרק ח עם עין המסורה

פרק ח
[א] וַיֹּ֣אמֶר יְהוָה֘ אֶל־מֹשֶׁה֒ אֱמֹ֣ר אֶֽל־אַהֲרֹ֗ן נְטֵ֤ה אֶת־יָֽדְךָ֙ בְּמַטֶּ֔ךָ עַ֨ל־הַנְּהָרֹ֔ת עַל־הַיְאֹרִ֖ים וְעַל־הָאֲגַמִּ֑ים וְהַ֥עַל אֶת־הַֽצֲפַרְדְּעִ֖ים עַל־אֶ֥רֶץ מִצְרָֽיִם:
[ב] וַיֵּ֤ט אַֽהֲרֹן֙ אֶת־יָד֔וֹ עַ֖ל מֵימֵ֣י מִצְרָ֑יִם וַתַּ֙עַל֙ הַצְּפַרְדֵּ֔עַ וַתְּכַ֖ס אֶת־אֶ֥רֶץ מִצְרָֽיִם:
[ג] וַיַּעֲשׂוּ־כֵ֥ן הַחַרְטֻמִּ֖ים בְּלָטֵיהֶ֑ם וַיַּעֲל֥וּ אֶת־הַֽצֲפַרְדְּעִ֖ים עַל־אֶ֥רֶץ מִצְרָֽיִם:
[ד] וַיִּקְרָ֨א פַרְעֹ֜ה לְמֹשֶׁ֣ה וּֽלְאַהֲרֹ֗ן וַיֹּ֙אמֶר֙ הַעְתִּ֣ירוּ אֶל־יְהוָ֔ה וְיָסֵר֙ הַֽצֲפַרְדְּעִ֔ים מִמֶּ֖נִּי וּמֵֽעַמִּ֑י וַאֲשַׁלְּחָה֙ אֶת־הָעָ֔ם וְיִזְבְּח֖וּ לַיהוָֽה:
[ה] וַיֹּ֨אמֶר מֹשֶׁ֣ה לְפַרְעֹה֘ הִתְפָּאֵ֣ר עָלַי֒ לְמָתַ֣י׀ אַעְתִּ֣יר לְךָ֗ וְלַעֲבָדֶ֙יךָ֙ וּֽלְעַמְּךָ֔ לְהַכְרִית֙ הַֽצֲפַרְדְּעִ֔ים מִמְּךָ֖ וּמִבָּתֶּ֑יךָ רַ֥ק בַּיְאֹ֖ר תִּשָּׁאַֽרְנָה:
[ו] וַיֹּ֖אמֶר לְמָחָ֑ר וַיֹּ֙אמֶר֙ כִּדְבָ֣רְךָ֔ לְמַ֣עַן תֵּדַ֔ע כִּי־אֵ֖ין כַּיהוָ֥ה אֱלֹהֵֽינוּ:
[חמישי] [ז] וְסָר֣וּ הַֽצֲפַרְדְּעִ֗ים מִמְּךָ֙ וּמִבָּ֣תֶּ֔יךָ וּמֵעֲבָדֶ֖יךָ וּמֵעַמֶּ֑ךָ רַ֥ק בַּיְאֹ֖ר תִּשָּׁאַֽרְנָה:
[ח] וַיֵּצֵ֥א מֹשֶׁ֛ה וְאַהֲרֹ֖ן מֵעִ֣ם פַּרְעֹ֑ה וַיִּצְעַ֤ק מֹשֶׁה֙ אֶל־יְהוָ֔ה עַל־דְּבַ֥ר הַֽצֲפַרְדְּעִ֖ים אֲשֶׁר־שָׂ֥ם לְפַרְעֹֽה:
[ט] וַיַּ֥עַשׂ יְהוָ֖ה כִּדְבַ֣ר מֹשֶׁ֑ה וַיָּמֻ֙תוּ֙ הַֽצֲפַרְדְּעִ֔ים מִן־הַבָּתִּ֥ים מִן־הַחֲצֵרֹ֖ת וּמִן־הַשָּׂדֹֽת:
[י] וַיִּצְבְּר֥וּ אֹתָ֖ם חֳמָרִ֣ם חֳמָרִ֑ם וַתִּבְאַ֖שׁ הָאָֽרֶץ:
[יא] וַיַּ֣רְא פַּרְעֹ֗ה כִּ֤י הָֽיְתָה֙ הָֽרֲוָחָ֔ה וְהַכְבֵּד֙ אֶת־לִבּ֔וֹ וְלֹ֥א שָׁמַ֖ע אֲלֵהֶ֑ם כַּאֲשֶׁ֖ר דִּבֶּ֥ר יְהוָֽה: ס
[יב] וַיֹּ֣אמֶר יְהוָה֘ אֶל־מֹשֶׁה֒ אֱמֹר֙ אֶֽל־אַהֲרֹ֔ן נְטֵ֣ה אֶֽת־מַטְּךָ֔ וְהַ֖ךְ אֶת־עֲפַ֣ר הָאָ֑רֶץ וְהָיָ֥ה לְכִנִּ֖ם בְּכָל־אֶ֥רֶץ מִצְרָֽיִם:
[יג] וַיַּעֲשׂוּ־כֵ֗ן וַיֵּט֩ אַהֲרֹ֨ן אֶת־יָד֤וֹ בְמַטֵּ֙הוּ֙ וַיַּךְ֙ אֶת־עֲפַ֣ר הָאָ֔רֶץ וַתְּהִי֙ הַכִּנָּ֔ם בָּאָדָ֖ם וּבַבְּהֵמָ֑ה כָּל־עֲפַ֥ר הָאָ֛רֶץ הָיָ֥ה כִנִּ֖ים בְּכָל־אֶ֥רֶץ מִצְרָֽיִם:
[יד] וַיַּעֲשׂוּ־כֵ֨ן הַחַרְטֻמִּ֧ים בְּלָטֵיהֶ֛ם לְהוֹצִ֥יא אֶת־הַכִּנִּ֖ים וְלֹ֣א יָכֹ֑לוּ וַתְּהִי֙ הַכִּנָּ֔ם בָּאָדָ֖ם וּבַבְּהֵמָֽה:
[טו] וַיֹּאמְר֤וּ הַֽחַרְטֻמִּם֙ אֶל־פַּרְעֹ֔ה אֶצְבַּ֥ע אֱלֹהִ֖ים הִ֑וא וַיֶּחֱזַ֤ק לֵב־פַּרְעֹה֙ וְלֹא־שָׁמַ֣ע אֲלֵהֶ֔ם כַּאֲשֶׁ֖ר דִּבֶּ֥ר יְהוָֽה: ס
[טז] וַיֹּ֨אמֶר יְהוָ֜ה אֶל־מֹשֶׁ֗ה הַשְׁכֵּ֤ם בַּבֹּ֙קֶר֙ וְהִתְיַצֵּב֙ לִפְנֵ֣י פַרְעֹ֔ה הִנֵּ֖ה יוֹצֵ֣א הַמָּ֑יְמָה וְאָמַרְתָּ֣ אֵלָ֗יו כֹּ֚ה אָמַ֣ר יְהוָ֔ה שַׁלַּ֥ח עַמִּ֖י וְיַעַבְדֻֽנִי:
[יז] כִּ֣י אִם־אֵינְךָ֘ מְשַׁלֵּ֣חַ אֶת־עַמִּי֒ הִנְנִי֩ מַשְׁלִ֨יחַ בְּךָ֜ וּבַעֲבָדֶ֧יךָ וּֽבְעַמְּךָ֛ וּבְבָתֶּ֖יךָ אֶת־הֶעָרֹ֑ב וּמָ֨לְא֜וּ בָּתֵּ֤י מִצְרַ֙יִם֙ אֶת־הֶ֣עָרֹ֔ב וְגַ֥ם הָאֲדָמָ֖ה אֲשֶׁר־הֵ֥ם עָלֶֽיהָ:
[יח] וְהִפְלֵיתִי֩ בַיּ֨וֹם הַה֜וּא אֶת־אֶ֣רֶץ גֹּ֗שֶׁן אֲשֶׁ֤ר עַמִּי֙ עֹמֵ֣ד עָלֶ֔יהָ לְבִלְתִּ֥י הֱיֽוֹת־שָׁ֖ם עָרֹ֑ב לְמַ֣עַן תֵּדַ֔ע כִּ֛י אֲנִ֥י יְהוָ֖ה בְּקֶ֥רֶב הָאָֽרֶץ:
[ששי] [יט] וְשַׂמְתִּ֣י פְדֻ֔ת בֵּ֥ין עַמִּ֖י וּבֵ֣ין עַמֶּ֑ךָ לְמָחָ֥ר יִהְיֶ֖ה הָאֹ֥ת הַזֶּֽה:
[כ] וַיַּ֤עַשׂ יְהוָה֙ כֵּ֔ן וַיָּבֹא֙ עָרֹ֣ב כָּבֵ֔ד בֵּ֥יתָה פַרְעֹ֖ה וּבֵ֣ית עֲבָדָ֑יו וּבְכָל־אֶ֧רֶץ מִצְרַ֛יִם תִּשָּׁחֵ֥ת הָאָ֖רֶץ מִפְּנֵ֥י הֶעָרֹֽב:
[כא] וַיִּקְרָ֣א פַרְעֹ֔ה אֶל־מֹשֶׁ֖ה וּֽלְאַהֲרֹ֑ן וַיֹּ֗אמֶר לְכ֛וּ זִבְח֥וּ לֵאלֹהֵיכֶ֖ם בָּאָֽרֶץ:
[כב] וַיֹּ֣אמֶר מֹשֶׁ֗ה לֹ֤א נָכוֹן֙ לַעֲשׂ֣וֹת כֵּ֔ן כִּ֚י תּוֹעֲבַ֣ת מִצְרַ֔יִם נִזְבַּ֖ח לַיהוָ֣ה אֱלֹהֵ֑ינוּ הֵ֣ן נִזְבַּ֞ח אֶת־תּוֹעֲבַ֥ת מִצְרַ֛יִם לְעֵינֵיהֶ֖ם וְלֹ֥א יִסְקְלֻֽנוּ:
[כג] דֶּ֚רֶךְ שְׁלֹ֣שֶׁת יָמִ֔ים נֵלֵ֖ךְ בַּמִּדְבָּ֑ר וְזָבַ֙חְנוּ֙ לַיהוָ֣ה אֱלֹהֵ֔ינוּ כַּאֲשֶׁ֖ר יֹאמַ֥ר אֵלֵֽינוּ:
[כד] וַיֹּ֣אמֶר פַּרְעֹ֗ה אָנֹכִ֞י אֲשַׁלַּ֤ח אֶתְכֶם֙ וּזְבַחְתֶּ֞ם לַיהוָ֤ה אֱלֹֽהֵיכֶם֙ בַּמִּדְבָּ֔ר רַ֛ק הַרְחֵ֥ק לֹא־תַרְחִ֖יקוּ לָלֶ֑כֶת הַעְתִּ֖ירוּ בַּעֲדִֽי:
[כה] וַיֹּ֣אמֶר מֹשֶׁ֗ה הִנֵּ֨ה אָנֹכִ֜י יוֹצֵ֤א מֵֽעִמָּךְ֙ וְהַעְתַּרְתִּ֣י אֶל־יְהוָ֔ה וְסָ֣ר הֶעָרֹ֗ב מִפַּרְעֹ֛ה מֵעֲבָדָ֥יו וּמֵעַמּ֖וֹ מָחָ֑ר רַ֗ק אַל־יֹסֵ֤ף פַּרְעֹה֙ הָתֵ֔ל לְבִלְתִּי֙ שַׁלַּ֣ח אֶת־הָעָ֔ם לִזְבֹּ֖חַ לַיהוָֽה:
[כו] וַיֵּצֵ֥א מֹשֶׁ֖ה מֵעִ֣ם פַּרְעֹ֑ה וַיֶּעְתַּ֖ר אֶל־יְהוָֽה:
[כז] וַיַּ֤עַשׂ יְהוָה֙ כִּדְבַ֣ר מֹשֶׁ֔ה וַיָּ֙סַר֙ הֶעָרֹ֔ב מִפַּרְעֹ֖ה מֵעֲבָדָ֣יו וּמֵעַמּ֑וֹ לֹ֥א נִשְׁאַ֖ר אֶחָֽד:
[כח] וַיַּכְבֵּ֤ד פַּרְעֹה֙ אֶת־לִבּ֔וֹ גַּ֖ם בַּפַּ֣עַם הַזֹּ֑את וְלֹ֥א שִׁלַּ֖ח אֶת־הָעָֽם: פ

פרק ח
(א) ויאמר יי' - ד' בטעמא בסיפרא (מונח זרקא): *שמ' ד , כא; ח , א , יב; ט , ח. הנהרת - ד' חסר (בלישנא): שמ' ז , יט; ח , א; יש' מד , כז; יח' לא , ד. והעל - ב': שמ' ח , א; במ' כ , כה. הצפרדעים על - ב': שמ' ח , א , ג. (ג) בלטיהם - ג': שמ' ז , כב; ח , ג , יד. הצפרדעים על - ב': שמ' ח , א , ג. (ד) ויסר - ג': שמ' ח , ד; י , יז; במ' כא , ז. ואשלחה - ב': שמ' ח , ד; ט , כח. ויזבחו - ב' (רפין): שמ' ח , ד; תה' קז , כב. (ה) ולעבדיך - ג': *שמ' ח , ה; *במ' לב , ד; יר' לז , יח. תשארנה - ב': שמ' ח , ה , ז. (ו) למחר - ה': *שמ' ח , ו , יט; במ' יא , יח; יהו' ז , יג; אס' ה , יב. כיי' - ד': *שמ' ח , ו; *דב' ד , ז; ש"א ב , ב; תה' קיג , ה. (ז) תשארנה - ב': שמ' ח , ה , ז. (ח) משה ואהרן - כ"ח (בתורה): ראה שמ' ד , כט. (ט) מן - ד' פסוקים דאית בהון 'מן מן ומן': *שמ' ח , ט; וי' א , ב; במ' לא , מז; יר' כא , ז. החצרת - ד' חסר (בתורה , בלישנא): שמ' ח , ט; *במ' לג , יז , יח; דב' א , א. (י) חמרם - ג' (מלא וחסר): שמ' ח , י (פעמיים); במ' יא , לב. (יב) ויאמר יי' - ד' בטעמא בסיפרא (מונח זרקא): *שמ' ד , כא; ח , א , יב; ט , ח. והך - ב': שמ' ח , יב; יח' כא , יט. בכל - ארץ מצרים - י"ח (בתורה): ראה שמ' ה , יב. (יג) הכנם - ב': שמ' ח , יג , יד. בכל - ארץ מצרים - י"ח (בתורה): ראה שמ' ה , יב. (יד) בלטיהם - ג': שמ' ז , כב; ח , ג , יד. הכנם - ב': שמ' ח , יג , יד. ולא יכלו - ג': *שמ' ח , יד; מ"ב ג , כו; *יונה א , יג. (טו) החרטמם - ב' חסר (בלישנא): שמ' ח , טו; ט , יא. ויחזק - ה"י: ראה שמ' ז , יג. (טז) ויאמר יי' - י"ב בטעמא (אזלא גריש) בסיפרא: ראה שמ' ד , יא. יוצא - ט' מלא: שמ' ח , טז , כה; יא , ד; יהו' ו , א; שו' א , כד; ש"א יח , טז; ש"ב טז , ה; יט , ח; יח' א , יג. (וכל כתובים כותהון בר מן א': תה' יט , ו). יוצא - ג' מלא בתורה: שמ' ח , טז , כה; יא , ד. המימה - ב': שמ' ז , טו; ח , טז. (יז) משלח - ז': בר' מג , ד , ה; שמ' ח , יז; וי' יח , כד; כ , כג; יר' ח , יז; כט , יז. ובעמך - ג': שמ' ז , כט; ח , יז; דה"א כא , יז. ומלאו - ג' בתורה (בלישנא): בר' כט , כא; שמ' ח , יז; י , ו. (יט) פדת - ג' , ב' מלא וחד חסר: *שמ' ח , יט; תה' קיא , ט; קל , ז. למחר - ה': ראה לעיל , ו. האת - ג' חסר: שמ' ד , ח (פעמיים); ח , יט. (כ) ביתה פרעה - ב': *בר' מז , יד; שמ' ח , כ. ובכל - ארץ - ה': בר' מא , נד; שמ' ח , כ; וי' כה , כד; מ"א ט , יט; דה"ב ח , ו. (כב) ליי' אלהינו - ט' (כולל שם אדנות): ראה שמ' ג , יח. (כג) ליי' אלהינו - ט' (כולל שם אדנות): ראה שמ' ג , יח. (כד) אשלח - ט': בר' לח , יז; *שמ' ח , כד; י , י; כג , כז; דב' לב , כד; מ"א ט , ז; יח' ה , טז; יד , יט; דה"ב ז , יג. וחד: ואשלח - זכ' ח , י. (כה) יוצא - ט' מלא: ראה לעיל , טז. יוצא - ג' מלא בתורה: שמ' ח , טז , כה; יא , ד. שלח - ט' דגשא מיחדין: ראה שמ' ד , כג. (כו) ויעתר - ד' , ב' ראשי פסוקים ושנים באמצעי פסוקים: *בר' כה , כא; *שמ' ח , כו; י , יח; שו' יג , ח. (כח) ויכבד - ב': שמ' ח , כח; ט , לד.