מאגר הכתר שמות פרק ט עם עין המסורה

פרק ט
[א] וַיֹּ֤אמֶר יְהוָה֙ אֶל־מֹשֶׁ֔ה בֹּ֖א אֶל־פַּרְעֹ֑ה וְדִבַּרְתָּ֣ אֵלָ֗יו כֹּֽה־אָמַ֤ר יְהוָה֙ אֱלֹהֵ֣י הָעִבְרִ֔ים שַׁלַּ֥ח אֶת־עַמִּ֖י וְיַעַבְדֻֽנִי:
[ב] כִּ֛י אִם־מָאֵ֥ן אַתָּ֖ה לְשַׁלֵּ֑חַ וְעוֹדְךָ֖ מַחֲזִ֥יק בָּֽם:
[ג] הִנֵּ֨ה יַד־יְהוָ֜ה הוֹיָ֗ה בְּמִקְנְךָ֙ אֲשֶׁ֣ר בַּשָּׂדֶ֔ה בַּסּוּסִ֤ים בַּֽחֲמֹרִים֙ בַּגְּמַלִּ֔ים בַּבָּקָ֖ר וּבַצֹּ֑אן דֶּ֖בֶר כָּבֵ֥ד מְאֹֽד:
[ד] וְהִפְלָ֣ה יְהוָ֔ה בֵּ֚ין מִקְנֵ֣ה יִשְׂרָאֵ֔ל וּבֵ֖ין מִקְנֵ֣ה מִצְרָ֑יִם וְלֹ֥א יָמ֛וּת מִכָּל־לִבְנֵ֥י יִשְׂרָאֵ֖ל דָּבָֽר:
[ה] וַיָּ֥שֶׂם יְהוָ֖ה מוֹעֵ֣ד לֵאמֹ֑ר מָחָ֗ר יַעֲשֶׂ֧ה יְהוָ֛ה הַדָּבָ֥ר הַזֶּ֖ה בָּאָֽרֶץ:
[ו] וַיַּ֨עַשׂ יְהוָ֜ה אֶת־הַדָּבָ֤ר הַזֶּה֙ מִֽמָּחֳרָ֔ת וַיָּ֕מָת כֹּ֖ל מִקְנֵ֣ה מִצְרָ֑יִם וּמִמִּקְנֵ֥ה בְנֵֽי־יִשְׂרָאֵ֖ל לֹא־מֵ֥ת אֶחָֽד:
[ז] וַיִּשְׁלַ֣ח פַּרְעֹ֔ה וְהִנֵּ֗ה לֹא־מֵ֛ת מִמִּקְנֵ֥ה יִשְׂרָאֵ֖ל עַד־אֶחָ֑ד וַיִּכְבַּד֙ לֵ֣ב פַּרְעֹ֔ה וְלֹ֥א שִׁלַּ֖ח אֶת־הָעָֽם: פ
[ח] וַיֹּ֣אמֶר יְהוָה֘ אֶל־מֹשֶׁ֣ה וְאֶֽל־אַהֲרֹן֒ קְח֤וּ לָכֶם֙ מְלֹ֣א חָפְנֵיכֶ֔ם פִּ֖יחַ כִּבְשָׁ֑ן וּזְרָק֥וֹ מֹשֶׁ֛ה הַשָּׁמַ֖יְמָה לְעֵינֵ֥י פַרְעֹֽה:
[ט] וְהָיָ֣ה לְאָבָ֔ק עַ֖ל כָּל־אֶ֣רֶץ מִצְרָ֑יִם וְהָיָ֨ה עַל־הָאָדָ֜ם וְעַל־הַבְּהֵמָ֗ה לִשְׁחִ֥ין פֹּרֵ֛חַ אֲבַעְבֻּעֹ֖ת בְּכָל־אֶ֥רֶץ מִצְרָֽיִם:
[י] וַיִּקְח֞וּ אֶת־פִּ֣יחַ הַכִּבְשָׁ֗ן וַיַּֽעַמְדוּ֙ לִפְנֵ֣י פַרְעֹ֔ה וַיִּזְרֹ֥ק אֹת֛וֹ מֹשֶׁ֖ה הַשָּׁמָ֑יְמָה וַיְהִ֗י שְׁחִין֙ אֲבַעְבֻּעֹ֔ת פֹּרֵ֕חַ בָּאָדָ֖ם וּבַבְּהֵמָֽה:
[יא] וְלֹא־יָכְל֣וּ הַחַרְטֻמִּ֗ים לַעֲמֹ֛ד לִפְנֵ֥י מֹשֶׁ֖ה מִפְּנֵ֣י הַשְּׁחִ֑ין כִּֽי־הָיָ֣ה הַשְּׁחִ֔ין בַּחַרְטֻמִּ֖ם וּבְכָל־מִצְרָֽיִם:
[יב] וַיְחַזֵּ֤ק יְהוָה֙ אֶת־לֵ֣ב פַּרְעֹ֔ה וְלֹ֥א שָׁמַ֖ע אֲלֵהֶ֑ם כַּאֲשֶׁ֛ר דִּבֶּ֥ר יְהוָ֖ה אֶל־מֹשֶֽׁה: ס
[יג] וַיֹּ֤אמֶר יְהוָה֙ אֶל־מֹשֶׁ֔ה הַשְׁכֵּ֣ם בַּבֹּ֔קֶר וְהִתְיַצֵּ֖ב לִפְנֵ֣י פַרְעֹ֑ה וְאָמַרְתָּ֣ אֵלָ֗יו כֹּֽה־אָמַ֤ר יְהוָה֙ אֱלֹהֵ֣י הָעִבְרִ֔ים שַׁלַּ֥ח אֶת־עַמִּ֖י וְיַעַבְדֻֽנִי:
[יד] כִּ֣י׀ בַּפַּ֣עַם הַזֹּ֗את אֲנִ֨י שֹׁלֵ֜חַ אֶת־כָּל־מַגֵּפֹתַי֙ אֶֽל־לִבְּךָ֔ וּבַעֲבָדֶ֖יךָ וּבְעַמֶּ֑ךָ בַּעֲב֣וּר תֵּדַ֔ע כִּ֛י אֵ֥ין כָּמֹ֖נִי בְּכָל־הָאָֽרֶץ:
[טו] כִּ֤י עַתָּה֙ שָׁלַ֣חְתִּי אֶת־יָדִ֔י וָאַ֥ךְ אוֹתְךָ֛ וְאֶֽת־עַמְּךָ֖ בַּדָּ֑בֶר וַתִּכָּחֵ֖ד מִן־הָאָֽרֶץ:
[טז] וְאוּלָ֗ם בַּעֲב֥וּר זֹאת֙ הֶעֱמַדְתִּ֔יךָ בַּעֲב֖וּר הַרְאֹתְךָ֣ אֶת־כֹּחִ֑י וּלְמַ֛עַן סַפֵּ֥ר שְׁמִ֖י בְּכָל־הָאָֽרֶץ:
[שביעי] [יז] עוֹדְךָ֖ מִסְתּוֹלֵ֣ל בְּעַמִּ֑י לְבִלְתִּ֖י שַׁלְּחָֽם:
[יח] הִנְנִ֤י מַמְטִיר֙ כָּעֵ֣ת מָחָ֔ר בָּרָ֖ד כָּבֵ֣ד מְאֹ֑ד אֲשֶׁ֨ר לֹא־הָיָ֤ה כָמֹ֙הוּ֙ בְּמִצְרַ֔יִם לְמִן־הַיּ֥וֹם הִוָּסְדָ֖ה וְעַד־עָֽתָּה:
[יט] וְעַתָּ֗ה שְׁלַ֤ח הָעֵז֙ אֶֽת־מִקְנְךָ֔ וְאֵ֛ת כָּל־אֲשֶׁ֥ר לְךָ֖ בַּשָּׂדֶ֑ה כָּל־הָאָדָ֨ם וְהַבְּהֵמָ֜ה אֲשֶֽׁר־יִמָּצֵ֣א בַשָּׂדֶ֗ה וְלֹ֤א יֵֽאָסֵף֙ הַבַּ֔יְתָה וְיָרַ֧ד עֲלֵהֶ֛ם הַבָּרָ֖ד וָמֵֽתוּ:
[כ] הַיָּרֵא֙ אֶת־דְּבַ֣ר יְהוָ֔ה מֵעַבְדֵ֖י פַּרְעֹ֑ה הֵנִ֛יס אֶת־עֲבָדָ֥יו וְאֶת־מִקְנֵ֖הוּ אֶל־הַבָּתִּֽים:
[כא] וַאֲשֶׁ֥ר לֹא־שָׂ֛ם לִבּ֖וֹ אֶל־דְּבַ֣ר יְהוָ֑ה וַֽיַּעֲזֹ֛ב אֶת־עֲבָדָ֥יו וְאֶת־מִקְנֵ֖הוּ בַּשָּׂדֶֽה: פ
[כב] וַיֹּ֨אמֶר יְהוָ֜ה אֶל־מֹשֶׁ֗ה נְטֵ֤ה אֶת־יָֽדְךָ֙ עַל־הַשָּׁמַ֔יִם וִיהִ֥י בָרָ֖ד בְּכָל־אֶ֣רֶץ מִצְרָ֑יִם עַל־הָאָדָ֣ם וְעַל־הַבְּהֵמָ֗ה וְעַ֛ל כָּל־עֵ֥שֶׂב הַשָּׂדֶ֖ה בְּאֶ֥רֶץ מִצְרָֽיִם:
[כג] וַיֵּ֨ט מֹשֶׁ֣ה אֶת־מַטֵּהוּ֘ עַל־הַשָּׁמַיִם֒ וַיהוָ֗ה נָתַ֤ן קֹלֹת֙ וּבָרָ֔ד וַתִּ֥הֲלַךְ אֵ֖שׁ אָ֑רְצָה וַיַּמְטֵ֧ר יְהוָ֛ה בָּרָ֖ד עַל־אֶ֥רֶץ מִצְרָֽיִם:
[כד] וַיְהִ֣י בָרָ֔ד וְאֵ֕שׁ מִתְלַקַּ֖חַת בְּת֣וֹךְ הַבָּרָ֑ד כָּבֵ֣ד מְאֹ֔ד אֲ֠שֶׁר לֹא־הָיָ֤ה כָמֹ֙הוּ֙ בְּכָל־אֶ֣רֶץ מִצְרַ֔יִם מֵאָ֖ז הָיְתָ֥ה לְגֽוֹי:
[כה] וַיַּ֨ךְ הַבָּרָ֜ד בְּכָל־אֶ֣רֶץ מִצְרַ֗יִם אֵ֚ת כָּל־אֲשֶׁ֣ר בַּשָּׂדֶ֔ה מֵאָדָ֖ם וְעַד־בְּהֵמָ֑ה וְאֵ֨ת כָּל־עֵ֤שֶׂב הַשָּׂדֶה֙ הִכָּ֣ה הַבָּרָ֔ד וְאֶת־כָּל־עֵ֥ץ הַשָּׂדֶ֖ה שִׁבֵּֽר:
[כו] רַ֚ק בְּאֶ֣רֶץ גֹּ֔שֶׁן אֲשֶׁר־שָׁ֖ם בְּנֵ֣י יִשְׂרָאֵ֑ל לֹ֥א הָיָ֖ה בָּרָֽד:
[כז] וַיִּשְׁלַ֣ח פַּרְעֹ֗ה וַיִּקְרָא֙ לְמֹשֶׁ֣ה וּֽלְאַהֲרֹ֔ן וַיֹּ֥אמֶר אֲלֵהֶ֖ם חָטָ֣אתִי הַפָּ֑עַם יְהוָה֙ הַצַּדִּ֔יק וַאֲנִ֥י וְעַמִּ֖י הָרְשָׁעִֽים:
[כח] הַעְתִּ֙ירוּ֙ אֶל־יְהוָ֔ה וְרַ֕ב מִֽהְיֹ֛ת קֹלֹ֥ת אֱלֹהִ֖ים וּבָרָ֑ד וַאֲשַׁלְּחָ֣ה אֶתְכֶ֔ם וְלֹ֥א תֹסִפ֖וּן לַעֲמֹֽד:
[כט] וַיֹּ֤אמֶר אֵלָיו֙ מֹשֶׁ֔ה כְּצֵאתִי֙ אֶת־הָעִ֔יר אֶפְרֹ֥שׂ אֶת־כַּפַּ֖י אֶל־יְהוָ֑ה הַקֹּל֣וֹת יֶחְדָּל֗וּן וְהַבָּרָד֙ לֹ֣א יִֽהְיֶה־ע֔וֹד לְמַ֣עַן תֵּדַ֔ע כִּ֥י לַיהוָ֖ה הָאָֽרֶץ:
[ל] וְאַתָּ֖ה וַעֲבָדֶ֑יךָ יָדַ֕עְתִּי כִּ֚י טֶ֣רֶם תִּֽירְא֔וּן מִפְּנֵ֖י יְהוָ֥ה אֱלֹהִֽים:
[לא] וְהַפִּשְׁתָּ֥ה וְהַשְּׂעֹרָ֖ה נֻכָּ֑תָה כִּ֤י הַשְּׂעֹרָה֙ אָבִ֔יב וְהַפִּשְׁתָּ֖ה גִּבְעֹֽל:
[לב] וְהַחִטָּ֥ה וְהַכֻּסֶּ֖מֶת לֹ֣א נֻכּ֑וּ כִּ֥י אֲפִילֹ֖ת הֵֽנָּה:
[מפטיר] [לג] וַיֵּצֵ֨א מֹשֶׁ֜ה מֵעִ֤ם פַּרְעֹה֙ אֶת־הָעִ֔יר וַיִּפְרֹ֥שׂ כַּפָּ֖יו אֶל־יְהוָ֑ה וַֽיַּחְדְּל֤וּ הַקֹּלוֹת֙ וְהַבָּרָ֔ד וּמָטָ֖ר לֹא־נִתַּ֥ךְ אָֽרְצָה:
[לד] וַיַּ֣רְא פַּרְעֹ֗ה כִּֽי־חָדַ֨ל הַמָּטָ֧ר וְהַבָּרָ֛ד וְהַקֹּלֹ֖ת וַיֹּ֣סֶף לַחֲטֹ֑א וַיַּכְבֵּ֥ד לִבּ֖וֹ ה֥וּא וַעֲבָדָֽיו:
[לה] וַֽיֶּחֱזַק֙ לֵ֣ב פַּרְעֹ֔ה וְלֹ֥א שִׁלַּ֖ח אֶת־בְּנֵ֣י יִשְׂרָאֵ֑ל כַּאֲשֶׁ֛ר דִּבֶּ֥ר יְהוָ֖ה בְּיַד־מֹשֶֽׁה: פ

פרק ט
(א) ודברת אליו - ד': *שמ' ד , טו; ט , א; מ"א כא , יט (פעמיים). אלהי העברים - ה': ראה שמ' ה , ג. שלח - ט' דגשא מיחדין: ראה שמ' ד , כג. (ד) והפלה - ב' , חד כתיב אל"ף וחד כתיב ה"א: שמ' ט , ד; דב' כח , נט. (ה) וישם - ל"ג בתורה: בר' ב , ח; ד , טו; כב , ו , ט; כד , ט; כח , יא , יח; ל , לו; לא , כא; לג , ב; לז , לד; מא , מב; מז , כו; מח , כ; שמ' ט , ה; יד , כא; יט , ז; כד , ו; לט , ז; מ , יח , יט , כ , כא , כד , כו , כח , ל; וי' ח , ח , ט (פעמיים) , כו; במ' כג , ה , טז. יעשה... הדבר (עשייה הדבר) - י"א חסר 'את': ראה שמ' א , יח. (ז) ויכבד - ב' (בלישנא): שמ' ט , ז; יש' סו , ה. (ח) ויאמר יי' - ד' בטעמא בסיפרא (מונח זרקא): *שמ' ד , כא; ח , א , יב; ט , ח. ויאמר יי' אל - משה ואל - אהרן - ה': ראה שמ' ז , ח. פיח כבשן - י"ד זוגין , חד לית בה ה"א ותינינא כתב ה"א: בר' מא , ב , ד. - *שמ' ט , ח , י. - כח , כד; לט , יז. - ש"א כג , יט; כו , א. - ש"ב יח , כט , לב. - כ , יד , טו. - יש' ב , יא , יז. - יר' ל , יח; לא , לז. - לב , יא , יב. - יח' לד , ז , ט. - מ , כג , כז. - תה' נ , ו; צז , ו. - *עז' ב , סג; נחמ' ז , סה. - דה"א ח , כח; כג , ט. השמימה - י"א: בר' טו , ה; כח , יב; שמ' ט , ח , י; *דב' ד , יט; ל , יב; יהו' ח , כ; שו' יג , כ; כ , מ; איוב ב , יב; דה"ב ו , יג. (ט) אבעבעת - ב': שמ' ט , ט , י. בכל - ארץ מצרים - י"ח (בתורה): ראה שמ' ה , יב. (י) פיח הכבשן - י"ד זוגין , חד לית בה ה"א ותינינא כתב ה"א: ראה לעיל , ח. השמימה - י"א: ראה לעיל , ח. אבעבעת - ב': שמ' ט , ט , י. (יא) ולא - ז' ראשי פסוקים בסיפרא: ראה שמ' ב , ג. בחרטמם - ב' חסר (בלישנא): שמ' ח , טו; ט , יא. (יג) אלהי העברים - ה': ראה שמ' ה , ג. שלח - ט' דגשא מיחדין: ראה שמ' ד , כג. (יד) אני שלח - ב' (מלא וחסר): *שמ' ט , יד; יח' ב , ד. (טו) אותך - י"ז מלא בלשון זכר (בלישנא): בר' יז , ב; כ , ו; מ , יט; מא , לט; *שמ' ט , טו; כה , ט , כב; לב , י; דב' ט , יד; ש"ב כד , כד; יר' כה , טו; יח' ב , ג , ד; ג , כז; כט , ה; לח , ד; תה' כה , ה. (טז) ואולם - ה' ראשי פסוקים: שמ' ט , טז; במ' יד , כא; ש"א כה , לד; מ"א ז , ז; מי' ג , ח. וכל איוב כותהון בר מן ג' ('אולם'): איוב ב , ה; ה , ח; יג , ג. הראתך - ב' , חד חסר וחד מלא: שמ' ט , טז; יח' מ , ד. ספר - ב': שמ' ט , טז; יש' מג , כו. (יח) למן - היום - ג' בתורה: שמ' ט , יח; דב' ד , לב; ט , ז. למן - היום - ח' (בלישנא): שמ' ט , יח; דב' ד , לב; ט , ז; ש"ב ז , יא; יט , כה; יר' ז , כה; לב , לא; חגי ב , יח. למן - היום - ז': שמ' ט , יח; דב' ד , לב; ט , ז; ש"ב יט , כה; יר' ז , כה; לב , לא; חגי ב , יח. (יט) ולא יאסף - ב': *שמ' ט , יט; איוב כז , יט. הביתה - י"ט: בר' יט , י; כד , לב; לט , יא; מג , טז , כו (פעמיים); שמ' ט , יט; יהו' ב , יח; שו' יט , טו , יח; ש"א ו , ז; ש"ב יג , ז; יד , לא; יז , כ; מ"א יג , ז , טו; יז , כג; מ"ב ד , לב; ט , ו. עלהם - י"ג חסר בתורה: ראה שמ' ה , יד. ומתו - ח' (בקמץ): בר' לג , יג; שמ' ט , יט; כח , מג; במ' ד , טו , כ; דב' יז , ה; כב , כד; עמ' ו , ט. ומתו - ז' (בתורה , בקמץ): בר' לג , יג; שמ' ט , יט; כח , מג; במ' ד , טו , כ; דב' יז , ה; כב , כד. (כ) הירא - ב': שמ' ט , כ; *דב' כ , ח. (כא) ואשר - י"ב ראשי פסוקים: שמ' ט , כא; כא , יג; וי' כה , לג; דב' יא , ד , ה , ו; יט , ה; מי' ג , ג; נחמ' ה , יח; ז , עא; ח , טו; י , לא. ואשר לא - ח': שמ' ט , כא; כא , יג; דב' יא , ב; יש' נב , טו; יח' יח , יח; מי' ג , ה; צפ' א , ו; *נחמ' י , לא. (כב) ויאמר יי' - י"ב בטעמא (אזלא גריש , בסיפרא): ראה שמ' ד , יא. ויהי - ל"ב (ו"ו בחיריק): בר' א , ו; ט , כו , כז; שמ' ט , כב; י , כא; יח , יט; דב' לג , ו; ש"א י , ה; כ , יג; כח , כב; ש"ב ה , כד; יח , כב , כג; מ"א יג , לג; יד , ה; כא , ב; מ"ב ב , ט; יר' יג , י; הו' יד , ז; עמ' ה , יד; מי' א , ב; מל' ג , י; תה' ט , י; פא , טז; צ , יז; קד , כ; רות ג , ד; ד , יב; דה"א יד , טו; כב , טז; דה"ב יח , יב; יט , יא. בכל - ארץ מצרים - י"ח (בתורה): ראה שמ' ה , יב. (כג) ויי' - כ"ב בתורה: בר' יג , יד; יח , יז; יט , כד; כא , א; כד , א , לה , נו; שמ' ט , כג; י , יג; יב , כט , לו; יג , כא; במ' יד , ט; ל , ו , ט , יג; דב' ד , כא; יז , טז; כו , יח; לא , ב , ח; לב , ל. קלת - ד' חסר: שמ' ט , כג , כח; יט , טז; ש"א יב , יח. (כד) מתלקחת - ב': שמ' ט , כד; יח' א , ד. בכל - ארץ מצרים - י"ח (בתורה): ראה שמ' ה , יב. (כה) בכל - ארץ מצרים - י"ח (בתורה): ראה שמ' ה , יב. (כז) ועמי - י"א: שמ' ט , כז; שו' יב , ב; יר' ב , יא , לב; ה , לא; ח , ז; לא , יג; הו' יא , ז; אס' ז , ג , ד; דה"א כח , ב. (כח) מהית - ח' חסר (בלישנא): שמ' ט , כח; יט , טז; כג , א; לו , יח; לט , כא; מ , טו; *וי' יא , מה; כו , יג. קלת - ד' חסר: שמ' ט , כג , כח; יט , טז; ש"א יב , יח. ואשלחה - ב': שמ' ח , ד; ט , כח. תספון - ד' , ג' כתיב תספון וחד כתיב תאספון: בר' מד , כג; *שמ' ה , ז; ט , כח; דב' יז , טז. (כט) הקלות - ו' כתיב כן (בלישנא): שמ' ט , כט , לג; ש"א יב , יז; תה' צג , ד; איוב כח , כו; לח , כה. (ל) תיראון - ב': שמ' ט , ל; דב' א , כט. מפני יי' - ב' בתורה: בר' ג , ח; שמ' ט , ל. מפני יי' אלהים - ג': בר' ג , ח; שמ' ט , ל; צפ' א , ז. (לא) והפשתה - ב': שמ' ט , לא (פעמיים). (לג) ויחדלו - ב': בר' יא , ח; שמ' ט , לג. הקלות - ו' כתיב כן (בלישנא): ראה לעיל , כט. נתך - ג': *שמ' ט , לג; ש"ב כא , י; יר' מב , יח. (לד) ויכבד - ב': שמ' ח , כח; ט , לד. (לה) ויחזק - ה"י: ראה שמ' ז , יג.