מאגר הכתר מיכה פרק ו עם פירוש ראב"ע פירוש בע"פ שנמסר לתלמיד

פרק ו
[א] שִׁמְעוּ־נָ֕א אֵ֥ת אֲשֶׁר־יְהוָ֖ה אֹמֵ֑ר ק֚וּם רִ֣יב אֶת־הֶהָרִ֔ים וְתִשְׁמַ֥עְנָה הַגְּבָע֖וֹת קוֹלֶֽךָ:
[ב] שִׁמְע֤וּ הָרִים֙ אֶת־רִ֣יב יְהוָ֔ה וְהָאֵתָנִ֖ים מ֣וֹסְדֵי אָ֑רֶץ כִּ֣י רִ֤יב לַֽיהוָה֙ עִם־עַמּ֔וֹ וְעִם־יִשְׂרָאֵ֖ל יִתְוַכָּֽח:
[ג] עַמִּ֛י מֶה־עָשִׂ֥יתִי לְךָ֖ וּמָ֣ה הֶלְאֵתִ֑יךָ עֲנֵ֥ה בִֽי:
[ד] כִּ֤י הֶעֱלִתִ֙יךָ֙ מֵאֶ֣רֶץ מִצְרַ֔יִם וּמִבֵּ֥ית עֲבָדִ֖ים פְּדִיתִ֑יךָ וָאֶשְׁלַ֣ח לְפָנֶ֔יךָ אֶת־מֹשֶׁ֖ה אַהֲרֹ֥ן וּמִרְיָֽם:
[ה] עַמִּ֗י זְכָר־נָא֙ מַה־יָּעַ֗ץ בָּלָק֙ מֶ֣לֶךְ מוֹאָ֔ב וּמֶה־עָנָ֥ה אֹת֖וֹ בִּלְעָ֣ם בֶּן־בְּע֑וֹר מִן־הַשִּׁטִּים֙ עַד־הַגִּלְגָּ֔ל לְמַ֕עַן דַּ֖עַת צִדְק֥וֹת יְהוָֽה:
[ו] בַּמָּה֙ אֲקַדֵּ֣ם יְהוָ֔ה אִכַּ֖ף לֵאלֹהֵ֣י מָר֑וֹם הַאֲקַדְּמֶ֣נּוּ בְעוֹל֔וֹת בַּעֲגָלִ֖ים בְּנֵ֥י שָׁנָֽה:
[ז] הֲיִרְצֶ֤ה יְהוָה֙ בְּאַלְפֵ֣י אֵילִ֔ים בְּרִֽבֲב֖וֹת נַחֲלֵי־שָׁ֑מֶן הַאֶתֵּ֤ן בְּכוֹרִי֙ פִּשְׁעִ֔י פְּרִ֥י בִטְנִ֖י חַטַּ֥את נַפְשִֽׁי:
[ח] הִגִּ֥יד לְךָ֛ אָדָ֖ם מַה־טּ֑וֹב וּמָֽה־יְהוָ֞ה דּוֹרֵ֣שׁ מִמְּךָ֗ כִּ֣י אִם־עֲשׂ֤וֹת מִשְׁפָּט֙ וְאַ֣הֲבַת חֶ֔סֶד וְהַצְנֵ֥עַ לֶ֖כֶת עִם־אֱלֹהֶֽיךָ: ס
[ט] ק֤וֹל יְהוָה֙ לָעִ֣יר יִקְרָ֔א וְתוּשִׁיָּ֖ה יִרְאֶ֣ה שְׁמֶ֑ךָ שִׁמְע֥וּ מַטֶּ֖ה וּמִ֥י יְעָדָֽהּ:
[י] ע֗וֹד הַאִשׁ֙ בֵּ֣ית רָשָׁ֔ע אֹצְר֖וֹת רֶ֑שַׁע וְאֵיפַ֥ת רָז֖וֹן זְעוּמָֽה:
[יא] הַאֶזְכֶּ֖ה בְּמֹ֣אזְנֵי רֶ֑שַׁע וּבְכִ֖יס אַבְנֵ֥י מִרְמָֽה:
[יב] אֲשֶׁ֤ר עֲשִׁירֶ֙יהָ֙ מָלְא֣וּ חָמָ֔ס וְיֹשְׁבֶ֖יהָ דִּבְּרוּ־שָׁ֑קֶר וּלְשׁוֹנָ֖ם רְמִיָּ֥ה בְּפִיהֶֽם:
[יג] וְגַם־אֲנִ֖י הֶחֱלֵ֣יתִי הַכּוֹתֶ֑ךָ הַשְׁמֵ֖ם עַל־חַטֹּאתֶֽךָ:
[יד] אַתָּ֤ה תֹאכַל֙ וְלֹ֣א תִשְׂבָּ֔ע וְיֶשְׁחֲךָ֖ בְּקִרְבֶּ֑ךָ וְתַסֵּג֙ וְלֹ֣א תַפְלִ֔יט וַאֲשֶׁ֥ר תְּפַלֵּ֖ט לַחֶ֥רֶב אֶתֵּֽן:
[טו] אַתָּ֥ה תִזְרַ֖ע וְלֹ֣א תִקְצ֑וֹר אַתָּ֤ה תִדְרֹֽךְ־זַ֙יִת֙ וְלֹא־תָס֣וּךְ שֶׁ֔מֶן וְתִיר֖וֹשׁ וְלֹ֥א תִשְׁתֶּה־יָּֽיִן:
[טז] וְיִשְׁתַּמֵּ֞ר חֻקּ֣וֹת עָמְרִ֗י וְכֹל֙ מַעֲשֵׂ֣ה בֵית־אַחְאָ֔ב וַתֵּלְכ֖וּ בְּמֹעֲצוֹתָ֑ם לְמַעַן֩ תִּתִּ֨י אֹתְךָ֜ לְשַׁמָּ֗ה וְיֹשְׁבֶ֙יהָ֙ לִשְׁרֵקָ֔ה וְחֶרְפַּ֥ת עַמִּ֖י תִּשָּֽׂאוּ: פ

פרק ו
(א) שמעו נא - ישראל , את אשר יי' אומר: קום ריב עם הקדוש ברוך הוא עד שישמעו ההרים , ותשמענה הגבעות קולך. (ג) עמי מה עשיתי לך ומה צויתי אותך , עד שהלאיתיך - כלומר: שהוגעתיך? ענה בי - כלומר: העד בי! (ה) עמי זכר נא מה יעץ בלק מלך מואב ומה ענה אותו בלעם בן בעור , ומה עשיתם לי בשיטים ובגלגל! (ו-ז) ואם תאמרו: בשביל זה עון , במה אקדם יי' ואכף ראש לאלהי מרום? אם אקדמנו בעולות ובעגלים בני שנה? ואם ירצה יי' באלפי אלים (בנוסחנו: אילים) , ברבבות נחלי שמן? ואם אתן בכורי בעבור פשעי , ופרי בטני בעבור חטאת נפשי? (ח) הגיד לך אדם מה טוב - פירוש: לא ירצה הקדוש ברוך הוא לא זבחים ולא עולות , אלא זה ירצה: עשות משפט וצדקה , ואהב חסד , והצנע לכת עם אלהיך. (ט) קול יי' לעיר יקרא - פירוש: קול שלהקדוש ברוך הוא לעיר יקרא , וכך יאמר: שמעו מטה תוכחה , ומי יעד אותה לבוא; כלומר: מי נתן הזמן. ותושיה יראה שמך - פירוש: ומי שיש בו חכמה יראה שמך , כלומר: יראה פעלך , ואינו צריך לזו הקריאה. (י) עוד האיש בבית (בנוסחנו: בית) רשע - פירוש: על כל הרעות אשר עשיתם , עדיין ביתכם בית רשע ואוצרות רשע. ואיפת רזון זעומה - פירוש: מקוללת; ודמיונו: "זעום יי' יפול שם" (מש' כב , יד). (יא-יב) האזכה במאזני רשע - פירוש: זה העֹשר שיש להם , כמו שנאמר: אשר עשיריה מלאו חמס. אין מי שיאמר כי לא זכיתי , כי בשביל מאזני רשע שהיו לי; אלא שהלכתי ביושר. (יג) ועל כן אני החיליתי אותם והכיתי אותם. (יד) וישחך מקרבך (לפנינו: בקרבך) - פירוש: וישח אותך מקרבך; כלומר: בגלוי. ותסג ולא תפליט - פירוש: תהיו נשותיכם הרות ולא תלדו , ואשר תלדו - לחרב אתן. (טז) וישתמר חקות עמרי - פירוש: כל זו הרעה תבוא עליכם , ועדיין תשמרו חקות עמרי! וחרפת עמי... - יש מפרשים: וחרפת עמים תשאו; ויש מפרשים , שאומר לשרים: וחרפת עמי ישראל תשאו.