מאגר הכתר תהלים פרק קכו טקסט וניקוד

פרק קכו
[א] שִׁיר הַמַּעֲלוֹת פ
בְּשׁוּב יְהוָה אֶת־שִׁיבַת צִיּוֹן הָיִינוּ כְּחֹלְמִים:
[ב] אָז יִמָּלֵא שְׂחוֹק פִּינוּ וּלְשׁוֹנֵנוּ רִנָּה אָז יֹאמְרוּ בַגּוֹיִם הִגְדִּיל יְהוָה לַעֲשׂוֹת עִם־אֵלֶּה:
[ג] הִגְדִּיל יְהוָה לַעֲשׂוֹת עִמָּנוּ הָיִינוּ שְׂמֵחִים:
[ד] שׁוּבָה יְהוָה אֶת־שְׁבִותֵנוּ שְׁבִיתֵנוּ כַּאֲפִיקִים בַּנֶּגֶב:
[ה] הַזֹּרְעִים בְּדִמְעָה בְּרִנָּה יִקְצֹרוּ:
[ו] הָלוֹךְ יֵלֵךְ׀ וּבָכֹה נֹשֵׂא מֶשֶׁךְ־הַזָּרַע בֹּא־יָבֹא בְרִנָּה נֹשֵׂא אֲלֻמֹּתָיו: פ