מאגר הכתר תהלים פרק ו טקסט וניקוד

פרק ו
[א] לַמְנַצֵּחַ בִּנְגִינוֹת עַל־הַשְּׁמִינִית ס מִזְמוֹר לְדָוִד:

[ב] יְהוָה אַל־בְּאַפְּךָ תוֹכִיחֵנִי וְאַל־בַּחֲמָתְךָ תְיַסְּרֵנִי:
[ג] חָנֵּנִי יְהוָה כִּי אֻמְלָל אָנִי רְפָאֵנִי יְהוָה כִּי נִבְהֲלוּ עֲצָמָי:
[ד] וְנַפְשִׁי נִבְהֲלָה מְאֹד וְאַתָּ וְאַתָּה יְהוָה עַד־מָתָי:
[ה] שׁוּבָה יְהוָה חַלְּצָה נַפְשִׁי הוֹשִׁיעֵנִי לְמַעַן חַסְדֶּךָ:
[ו] כִּי אֵין בַּמָּוֶת זִכְרֶךָ בִּשְׁאוֹל מִי יוֹדֶה־לָּךְ:
[ז] יָגַעְתִּי׀ בְּאַנְחָתִי אַשְׂחֶה בְכָל־לַיְלָה מִטָּתִי בְּדִמְעָתִי עַרְשִׂי אַמְסֶה:
[ח] עָשֲׁשָׁה מִכַּעַס עֵינִי עָתְקָה בְּכָל־צוֹרֲרָי:
[ט] סוּרוּ מִמֶּנִּי כָּל־פֹּעֲלֵי אָוֶן כִּי־שָׁמַע יְהוָה קוֹל בִּכְיִי:
[י] שָׁמַע יְהוָה תְּחִנָּתִי יְהוָה תְּפִלָּתִי יִקָּח:
[יא] יֵבֹשׁוּ׀ וְיִבָּהֲלוּ מְאֹד כָּל־אֹיְבָי יָשֻׁבוּ יֵבֹשׁוּ רָגַע: פ