מאגר הכתר משלי פרק ח עם פירוש רש"י

פרק ח
[א] הֲלֹֽא־חָכְמָ֥ה תִקְרָ֑א וּ֝תְבוּנָ֗ה תִּתֵּ֥ן קוֹלָֽהּ:
[ב] בְּרֹאשׁ־מְרֹמִ֥ים עֲלֵי־דָ֑רֶךְ בֵּ֖ית נְתִיב֣וֹת נִצָּֽבָה:
[ג] לְיַד־שְׁעָרִ֥ים לְפִי־קָ֑רֶת מְב֖וֹא פְתָחִ֣ים תָּרֹֽנָּה:
[ד] אֲלֵיכֶ֣ם אִישִׁ֣ים אֶקְרָ֑א וְ֝קוֹלִ֗י אֶל־בְּנֵ֥י אָדָֽם:
[ה] הָבִ֣ינוּ פְתָאיִ֣ם עָרְמָ֑ה וּ֝כְסִילִ֗ים הָבִ֥ינוּ לֵֽב:
[ו] שִׁ֭מְעוּ כִּֽי־נְגִידִ֣ים אֲדַבֵּ֑ר וּמִפְתַּ֥ח שְׂ֝פָתַ֗י מֵישָׁרִֽים:
[ז] כִּֽי־אֱ֭מֶת יֶהְגֶּ֣ה חִכִּ֑י וְתוֹעֲבַ֖ת שְׂפָתַ֣י רֶֽשַׁע:
[ח] בְּצֶ֥דֶק כָּל־אִמְרֵי־פִ֑י אֵ֥ין בָּ֝הֶ֗ם נִפְתָּ֥ל וְעִקֵּֽשׁ:
[ט] כֻּלָּ֣ם נְ֭כֹחִים לַמֵּבִ֑ין וִ֝ישָׁרִ֗ים לְמֹ֣צְאֵי דָֽעַת:
[י] קְחֽוּ־מוּסָרִ֥י וְאַל־כָּ֑סֶף וְ֝דַ֗עַת מֵחָר֥וּץ נִבְחָֽר:
[יא] כִּֽי־טוֹבָ֣ה חָ֭כְמָה מִפְּנִינִ֑ים וְכָל־חֲ֝פָצִ֗ים לֹ֣א יִֽשְׁווּ־בָֽהּ:
[יב] אֲֽנִי־חָ֭כְמָה שָׁכַ֣נְתִּי עָרְמָ֑ה וְדַ֖עַת מְזִמּ֣וֹת אֶמְצָֽא:
[יג] יִ֥רְאַ֣ת יְהוָה֮ שְֽׂנֹ֫את רָ֥ע גֵּ֮אָ֤ה וְגָא֨וֹן׀ וְדֶ֣רֶךְ רָ֭ע וּפִ֨י תַהְפֻּכ֬וֹת שָׂנֵֽאתִי:
[יד] לִֽי־עֵ֭צָה וְתוּשִׁיָּ֑ה אֲנִ֥י בִ֝ינָ֗ה לִ֣י גְבוּרָֽה:
[טו] בִּ֭י מְלָכִ֣ים יִמְלֹ֑כוּ וְ֝רֹזְנִ֗ים יְחֹ֣קֲקוּ צֶֽדֶק:
[טז] בִּ֭י שָׂרִ֣ים יָשֹׂ֑רוּ וּ֝נְדִיבִ֗ים כָּל־שֹׁ֥פְטֵי צֶֽדֶק:
[יז] אֲ֭נִי אֹהֲבַ֣יה אֹהֲבַ֣י אֵהָ֑ב וּ֝מְשַׁחֲרַ֗י יִמְצָאֻֽנְנִי:
[יח] עֹֽשֶׁר־וְכָב֥וֹד אִתִּ֑י ה֥וֹן עָ֝תֵ֗ק וּצְדָקָֽה:
[יט] ט֣וֹב פִּ֭רְיִי מֵחָר֣וּץ וּמִפָּ֑ז וּ֝תְבוּאָתִ֗י מִכֶּ֥סֶף נִבְחָֽר:
[כ] בְּאֹֽרַח־צְדָקָ֥ה אֲהַלֵּ֑ךְ בְּ֝ת֗וֹךְ נְתִיב֥וֹת מִשְׁפָּֽט:
[כא] לְהַנְחִ֖יל אֹהֲבַ֥י ׀ יֵ֑שׁ וְאֹצְרֹ֖תֵיהֶ֣ם אֲמַלֵּֽא:
[כב] יְֽהוָ֗ה קָ֭נָנִי רֵאשִׁ֣ית דַּרְכּ֑וֹ קֶ֖דֶם מִפְעָלָ֣יו מֵאָֽז:
[כג] מֵ֭עוֹלָם נִסַּ֥כְתִּי מֵרֹ֗אשׁ מִקַּדְמֵי־אָֽרֶץ:
[כד] בְּאֵין־תְּהֹמ֥וֹת חוֹלָ֑לְתִּי בְּאֵ֥ין מַ֝עְיָנ֗וֹת נִכְבַּדֵּי־מָֽיִם:
[כה] בְּטֶ֣רֶם הָרִ֣ים הָטְבָּ֑עוּ לִפְנֵ֖י גְבָע֣וֹת חוֹלָֽלְתִּי:
[כו] עַד־לֹ֣א עָ֭שָׂה אֶ֣רֶץ וְחוּצ֑וֹת וְ֝רֹ֗אשׁ עַפְר֥וֹת תֵּבֵֽל:
[כז] בַּהֲכִינ֣וֹ שָׁ֭מַיִם שָׁ֣ם אָ֑נִי בְּחֻ֥קוֹ ח֝וּג עַל־פְּנֵ֥י תְהֽוֹם:
[כח] בְּאַמְּצ֣וֹ שְׁחָקִ֣ים מִמָּ֑עַל בַּ֝עֲז֗וֹז עִינ֥וֹת תְּהֽוֹם:
[כט] בְּשׂ֮וּמ֤וֹ לַיָּ֨ם׀ חֻקּ֗וֹ וּ֭מַיִם לֹ֣א יַֽעַבְרוּ־פִ֑יו בְּ֝חוּק֗וֹ מ֣וֹסְדֵי אָֽרֶץ:
[ל] וָאֶהְיֶ֥ה אֶצְל֗וֹ אָ֫מ֥וֹן וָאֶהְיֶ֣ה שַׁ֭עֲשׁוּעִים י֤וֹם ׀ י֑וֹם מְשַׂחֶ֖קֶת לְפָנָ֣יו בְּכָל־עֵֽת:
[לא] מְ֭שַׂחֶקֶת בְּתֵבֵ֣ל אַרְצ֑וֹ וְ֝שַׁעֲשֻׁעַ֗י אֶת־בְּנֵ֥י אָדָֽם: פ
[לב] וְעַתָּ֣ה בָ֭נִים שִׁמְעוּ־לִ֑י וְ֝אַשְׁרֵ֗י דְּרָכַ֥י יִשְׁמֹֽרוּ:
[לג] שִׁמְע֖וּ מוּסָ֥ר וַחֲכָ֗מוּ וְאַל־תִּפְרָֽעוּ:
[לד] אַ֥שְֽׁרֵי אָדָם֮ שֹׁמֵ֪עַֽ֫ לִ֥י לִשְׁקֹ֣ד עַל־דַּ֭לְתֹתַי י֤וֹם ׀ י֑וֹם לִ֝שְׁמֹ֗ר מְזוּזֹ֥ת פְּתָחָֽי:
[לה] כִּ֣י מֹ֭צְאִי מָצָ֣אי מָצָ֣א חַיִּ֑ים וַיָּ֥פֶק רָ֝צ֗וֹן מֵיְהוָֽה:
[לו] וְֽ֭חֹטְאִי חֹמֵ֣ס נַפְשׁ֑וֹ כָּל־מְ֝שַׂנְאַ֗י אָ֣הֲבוּ מָֽוֶת:

פרק ח
(א) הלא חכמה תקרא - הלא התורה מכרזת אליכם דברים האמורים למטה בענין. (ג-ד) לפי קרת - תקרה הנתונה על השער , ויושבים עליה. תרונה - תזעקנה. ומה היא אומרת? אליכם אישים אקרא. (ו) שמעו כי נגידים אדבר - דברי נגידות וחשיבות. (ח) נפתל ועקש - עקמומיות. (י) מחרוץ - ממיני הזהב הוא. (יא) מפנינים - מרגליות. לא ישוו בה - לא ידמו לשויה. (יב) שכנתי ערמה - אצל ערמה; שכיון שלמד אדם תורה , נכנס בו ערמימות של כל דבר (ראה סוטה כא , ב). (יג) יראת יי' שנאת רע - זהו המוסר שהחכמה מכרזת לבריות (ראה לעיל , א - ד). (טו) בי מלכים ימלוכו - שהדינים והמשפטים אני מלמדם. (יז) אהב - כמו 'אאהב'. אהבי - אהביה כתיב; אמר הקדוש ברוך הוא: אני אהביה של תורה אהב. זו שמעתי מרבי אהרן , בשם רבי נתן. ימצאנני - נו"ן יתירה: חמשים שערי בינה אמציאנו. (כא) להנחיל אוהבי יש - יש אתי נחלה רבה. (כב) ראשית דרכו - קודם בריאתו של עולם (ראה פסחים נד , א). (כג) נסכתי מראש - לשון 'נסיכי בני אדם' (ראה מי' ה , ד). (כד) חוללתי - נבראתי. (כה) בטרם הרים הטבעו - בתוך המים. (כו) ארץ וחוצות - ארץ ישראל ושאר ארצות (ראה תענית י , א). וראש עפרות תבל - אדם הראשון (ראה סנה' לח , א). (כז) בחקו חוג על פני תהום - כשרקע חוג הארץ על המים , חוק גבול בל יעבור. חוג - לשון 'הקף' כמו "ובמחוגה יתארהו" (יש' מד , יג) 'קונפאש' בלעז. (כח) בעזוז - כשהגביר מעיינות תהום. (כט) בשומו לים חוקו - וגזר על ים סוף כשבראו , על מנת להבקע לפני משה. בחקו מוסדי ארץ - בחיקתו , מלשון חקו; כמו "על כפים חקתיך" (יש' מט , טז); וכן "ומחיק הארץ" (יח' מג , יד). (ל) אמון - גדילה אצלו; לשון "האמונים עלי תולע" (איכה ד , ה). יום יום - אלפים שנה (ראה תה' צ , ד וויק"ר יט , א). (לא) משחקת בתבל ארצו - כל דורות הרשעים שהיו מאדם ועד נח ומנח ועד אברהם הייתי משחקת עליהם. ושעשועי - צפיתי עד בא דור המדבר ויקבלוני. (לב-לג) ועתה בנים שמעו לי , ואל תפרעו - ואל תבטלו מוסרי. (לד) לשקוד - לשמור. על דלתותי - להכנס ראשון לבית המדרש ולבית הכנסת ולצאת אחרון.