מאגר הכתר ויקרא פרק כ עם עין המסורה

פרק כ
[חמישי] [א] וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר:
[ב] וְאֶל־בְּנֵ֣י יִשְׂרָאֵל֘ תֹּאמַר֒ אִ֣ישׁ אִישׁ֩ מִבְּנֵ֨י יִשְׂרָאֵ֜ל וּמִן־הַגֵּ֣ר׀ הַגָּ֣ר בְּיִשְׂרָאֵ֗ל אֲשֶׁ֨ר יִתֵּ֧ן מִזַּרְע֛וֹ לַמֹּ֖לֶךְ מ֣וֹת יוּמָ֑ת עַ֥ם הָאָ֖רֶץ יִרְגְּמֻ֥הוּ בָאָֽבֶן:
[ג] וַאֲנִ֞י אֶתֵּ֤ן אֶת־פָּנַי֙ בָּאִ֣ישׁ הַה֔וּא וְהִכְרַתִּ֥י אֹת֖וֹ מִקֶּ֣רֶב עַמּ֑וֹ כִּ֤י מִזַּרְעוֹ֙ נָתַ֣ן לַמֹּ֔לֶךְ לְמַ֗עַן טַמֵּא֙ אֶת־מִקְדָּשִׁ֔י וּלְחַלֵּ֖ל אֶת־שֵׁ֥ם קָדְשִֽׁי:
[ד] וְאִ֡ם הַעְלֵ֣ם יַעְלִימוּ֩ עַ֨ם הָאָ֜רֶץ אֶת־עֵֽינֵיהֶם֙ מִן־הָאִ֣ישׁ הַה֔וּא בְּתִתּ֥וֹ מִזַּרְע֖וֹ לַמֹּ֑לֶךְ לְבִלְתִּ֖י הָמִ֥ית אֹתֽוֹ:
[ה] וְשַׂמְתִּ֨י אֲנִ֧י אֶת־פָּנַ֛י בָּאִ֥ישׁ הַה֖וּא וּבְמִשְׁפַּחְתּ֑וֹ וְהִכְרַתִּ֨י אֹת֜וֹ וְאֵ֣ת׀ כָּל־הַזֹּנִ֣ים אַחֲרָ֗יו לִזְנ֛וֹת אַחֲרֵ֥י הַמֹּ֖לֶךְ מִקֶּ֥רֶב עַמָּֽם:
[ו] וְהַנֶּ֗פֶשׁ אֲשֶׁ֨ר תִּפְנֶ֤ה אֶל־הָֽאֹבֹת֙ וְאֶל־הַיִּדְּעֹנִ֔ים לִזְנֹ֖ת אַחֲרֵיהֶ֑ם וְנָתַתִּ֤י אֶת־פָּנַי֙ בַּנֶּ֣פֶשׁ הַהִ֔וא וְהִכְרַתִּ֥י אֹת֖וֹ מִקֶּ֥רֶב עַמּֽוֹ:
[ז] וְהִ֨תְקַדִּשְׁתֶּ֔ם וִהְיִיתֶ֖ם קְדֹשִׁ֑ים כִּ֛י אֲנִ֥י יְהוָ֖ה אֱלֹהֵיכֶֽם:
[ששי] [ח] וּשְׁמַרְתֶּם֙ אֶת־חֻקֹּתַ֔י וַעֲשִׂיתֶ֖ם אֹתָ֑ם אֲנִ֥י יְהוָ֖ה מְקַדִּשְׁכֶֽם:
[ט] כִּֽי־אִ֣ישׁ אִ֗ישׁ אֲשֶׁ֨ר יְקַלֵּ֧ל אֶת־אָבִ֛יו וְאֶת־אִמּ֖וֹ מ֣וֹת יוּמָ֑ת אָבִ֧יו וְאִמּ֛וֹ קִלֵּ֖ל דָּמָ֥יו בּֽוֹ:
[י] וְאִ֗ישׁ אֲשֶׁ֤ר יִנְאַף֙ אֶת־אֵ֣שֶׁת אִ֔ישׁ אֲשֶׁ֥ר יִנְאַ֖ף אֶת־אֵ֣שֶׁת רֵעֵ֑הוּ מֽוֹת־יוּמַ֥ת הַנֹּאֵ֖ף וְהַנֹּאָֽפֶת:
[יא] וְאִ֗ישׁ אֲשֶׁ֤ר יִשְׁכַּב֙ אֶת־אֵ֣שֶׁת אָבִ֔יו עֶרְוַ֥ת אָבִ֖יו גִּלָּ֑ה מֽוֹת־יוּמְת֥וּ שְׁנֵיהֶ֖ם דְּמֵיהֶ֥ם בָּֽם:
[יב] וְאִ֗ישׁ אֲשֶׁ֤ר יִשְׁכַּב֙ אֶת־כַּלָּת֔וֹ מ֥וֹת יוּמְת֖וּ שְׁנֵיהֶ֑ם תֶּ֥בֶל עָשׂ֖וּ דְּמֵיהֶ֥ם בָּֽם:
[יג] וְאִ֗ישׁ אֲשֶׁ֨ר יִשְׁכַּ֤ב אֶת־זָכָר֙ מִשְׁכְּבֵ֣י אִשָּׁ֔ה תּוֹעֵבָ֥ה עָשׂ֖וּ שְׁנֵיהֶ֑ם מ֥וֹת יוּמָ֖תוּ דְּמֵיהֶ֥ם בָּֽם:
[יד] וְאִ֗ישׁ אֲשֶׁ֨ר יִקַּ֧ח אֶת־אִשָּׁ֛ה וְאֶת־אִמָּ֖הּ זִמָּ֣ה הִ֑וא בָּאֵ֞שׁ יִשְׂרְפ֤וּ אֹתוֹ֙ וְאֶתְהֶ֔ן וְלֹא־תִהְיֶ֥ה זִמָּ֖ה בְּתוֹכֲכֶֽם:
[טו] וְאִ֗ישׁ אֲשֶׁ֨ר יִתֵּ֧ן שְׁכָבְתּ֛וֹ בִּבְהֵמָ֖ה מ֣וֹת יוּמָ֑ת וְאֶת־הַבְּהֵמָ֖ה תַּהֲרֹֽגוּ:
[טז] וְאִשָּׁ֗ה אֲשֶׁ֨ר תִּקְרַ֤ב אֶל־כָּל־בְּהֵמָה֙ לְרִבְעָ֣ה אֹתָ֔הּ וְהָרַגְתָּ֥ אֶת־הָאִשָּׁ֖ה וְאֶת־הַבְּהֵמָ֑ה מ֥וֹת יוּמָ֖תוּ דְּמֵיהֶ֥ם בָּֽם:
[יז] וְאִ֣ישׁ אֲשֶׁר־יִקַּ֣ח אֶת־אֲחֹת֡וֹ בַּת־אָבִ֣יו א֣וֹ בַת־אִ֠מּוֹ וְרָאָ֨ה אֶת־עֶרְוָתָ֜הּ וְהִֽיא־תִרְאֶ֤ה אֶת־עֶרְוָתוֹ֙ חֶ֣סֶד ה֔וּא וְנִ֨כְרְת֔וּ לְעֵינֵ֖י בְּנֵ֣י עַמָּ֑ם עֶרְוַ֧ת אֲחֹת֛וֹ גִּלָּ֖ה עֲוֺנ֥וֹ יִשָּֽׂא:
[יח] וְ֠אִישׁ אֲשֶׁר־יִשְׁכַּ֨ב אֶת־אִשָּׁ֜ה דָּוָ֗ה וְגִלָּ֤ה אֶת־עֶרְוָתָהּ֙ אֶת־מְקֹרָ֣הּ הֶעֱרָ֔ה וְהִ֕וא גִּלְּתָ֖ה אֶת־מְק֣וֹר דָּמֶ֑יהָ וְנִכְרְת֥וּ שְׁנֵיהֶ֖ם מִקֶּ֥רֶב עַמָּֽם:
[יט] וְעֶרְוַ֨ת אֲח֧וֹת אִמְּךָ֛ וַאֲח֥וֹת אָבִ֖יךָ לֹ֣א תְגַלֵּ֑ה כִּ֧י אֶת־שְׁאֵר֛וֹ הֶעֱרָ֖ה עֲוֺנָ֥ם יִשָּֽׂאוּ:
[כ] וְאִ֗ישׁ אֲשֶׁ֤ר יִשְׁכַּב֙ אֶת־דֹּ֣דָת֔וֹ עֶרְוַ֥ת דֹּד֖וֹ גִּלָּ֑ה חֶטְאָ֥ם יִשָּׂ֖אוּ עֲרִירִ֥ים יָמֻֽתוּ:
[כא] וְאִ֗ישׁ אֲשֶׁ֥ר יִקַּ֛ח אֶת־אֵ֥שֶׁת אָחִ֖יו נִדָּ֣ה הִ֑וא עֶרְוַ֥ת אָחִ֛יו גִּלָּ֖ה עֲרִירִ֥ים יִהְיֽוּ:
[כב] וּשְׁמַרְתֶּ֤ם אֶת־כָּל־חֻקֹּתַי֙ וְאֶת־כָּל־מִשְׁפָּטַ֔י וַעֲשִׂיתֶ֖ם אֹתָ֑ם וְלֹא־תָקִ֤יא אֶתְכֶם֙ הָאָ֔רֶץ אֲשֶׁ֨ר אֲנִ֜י מֵבִ֥יא אֶתְכֶ֛ם שָׁ֖מָּה לָשֶׁ֥בֶת בָּֽהּ:
[שביעי] [כג] וְלֹ֤א תֵֽלְכוּ֙ בְּחֻקֹּ֣ת הַגּ֔וֹי אֲשֶׁר־אֲנִ֥י מְשַׁלֵּ֖חַ מִפְּנֵיכֶ֑ם כִּ֤י אֶת־כָּל־אֵ֙לֶּה֙ עָשׂ֔וּ וָאָקֻ֖ץ בָּֽם:
[כד] וָאֹמַ֣ר לָכֶ֗ם אַתֶּם֘ תִּֽירְשׁ֣וּ אֶת־אַדְמָתָם֒ וַאֲנִ֞י אֶתְּנֶ֤נָּה לָכֶם֙ לָרֶ֣שֶׁת אֹתָ֔הּ אֶ֛רֶץ זָבַ֥ת חָלָ֖ב וּדְבָ֑שׁ אֲנִי֙ יְהוָ֣ה אֱלֹהֵיכֶ֔ם אֲשֶׁר־הִבְדַּ֥לְתִּי אֶתְכֶ֖ם מִן־הָעַמִּֽים:
[מפטיר] [כה] וְהִבְדַּלְתֶּ֞ם בֵּֽין־הַבְּהֵמָ֤ה הַטְּהֹרָה֙ לַטְּמֵאָ֔ה וּבֵין־הָע֥וֹף הַטָּמֵ֖א לַטָּהֹ֑ר וְלֹֽא־תְשַׁקְּצ֨וּ אֶת־נַפְשֹׁתֵיכֶ֜ם בַּבְּהֵמָ֣ה וּבָע֗וֹף וּבְכֹל֙ אֲשֶׁ֣ר תִּרְמֹ֣שׂ הָאֲדָמָ֔ה אֲשֶׁר־הִבְדַּ֥לְתִּי לָכֶ֖ם לְטַמֵּֽא:
[כו] וִהְיִ֤יתֶם לִי֙ קְדֹשִׁ֔ים כִּ֥י קָד֖וֹשׁ אֲנִ֣י יְהוָ֑ה וָאַבְדִּ֥ל אֶתְכֶ֛ם מִן־הָעַמִּ֖ים לִהְי֥וֹת לִֽי:
[כז] וְאִ֣ישׁ אֽוֹ־אִשָּׁ֗ה כִּי־יִהְיֶ֨ה בָהֶ֥ם א֛וֹב א֥וֹ יִדְּעֹנִ֖י מ֣וֹת יוּמָ֑תוּ בָּאֶ֛בֶן יִרְגְּמ֥וּ אֹתָ֖ם דְּמֵיהֶ֥ם בָּֽם: פ

פרק כ
(ג) ואני - ס"ז ראשי פסוקים: בר' ו , יז; ט , ט; מח , ז , כב; שמ' ג , יט; ז , ג; יד , יז; לא , ו; וי' כ , ג; במ' ג , יב; יח , ו; יהו' ח , ה; ש"א יט , ג; כ , כ; ש"ב יג , יג; יש' מט , ד; נט , כא; יר' א , יח; ה , ד; יא , יט; יז , טז; כג , ג; כו , יד; מ , י; יח' ד , ה; לד , כד; הו' ה , יב; ז , טו; יונה ב , ה , י; ד , יא; מי' ז , ז; חב' ג , יח; זכ' ב , ט; תה' ב , ו; ה , ח; יג , ו; כו , יא; ל , ז; לא , טו , כג; לה , יג; לח , יד; מ , יח; מא , יג; נב , י; נט , יז; סט , יד , ל; ע , ו; עא , יד; עג , ב , כב , כג , כח; עה , י; פח , יד; קט , כה; איוב יט , כה; רות ד , ד; דנ' ח , ה , כז; י , ח; יא , א; יב , ח; נחמ' ו , י; דה"ב ו , ב. ואני אתן - ב': שמ' ב , ט; וי' כ , ג. בָאיש - ה' (בתורה): בר' יט , ט; כו , יא; וי' כ , ג , ה; דב' כט , יט. מקרב עמו - ג': וי' יז , ד; כ , ג , ו. טַמּא - ב': וי' יג , מד; כ , ג. (ה) בָאיש - ה' (בתורה): ראה לעיל , ג. (ו) מקרב עמו - ג': וי' יז , ד; כ , ג , ו. (ז) כי אני יי' אלהיכם - י': ראה וי' יא , מד. (ח) אני יי' מקדשכם - ד': שמ' לא , יג; *וי' כ , ח; כא , ח; כב , לב. (ט) ואת - אמו - ג': בר' ב , כד; וי' כ , ט; מש' ל , יא. (יג) יומָתו - ג' (בקמץ , בעניינא): וי' כ , יג , טז , כז. (יד) ולא - תהיה - ח': *וי' כ , יד; כו , לז; במ' כז , יז; דב' כח , יג; ש"א כה , לא; יש' ז , ז; יח' ג , כו; *דנ' יא , כט. בתוככם - י"ב בתורה (מלא וחסר): ראה וי' טז , כט. (טו) בבהמה - ד' (רפין בסיפרא; כלומר: בי"ת ראשונה בחיריק ושניה ללא דגש): *וי' ז , כא; כ , טו; כז , י , כו. (טז) אל - כל - מראש ספר ויקרא עד וי' טז , לד 'על כל' , 'ועל כל' בר מן א'. ומן וי' טז , לד עד סוף הספר 'אל כל' , 'ואל כל' בר מן א': ראה וי' ב , ב. יומָתו - ג' (בקמץ , בעניינא): וי' כ , יג , טז , כז. (יז) והיא - י"א כתיב יו"ד בתורה (בלישנא): ראה וי' יא , לט. ישא - ל"ז: ראה וי' יט , ח. (יח) את - י"ו פסוקים דאית בהון 'את את את את': ראה וי' ה , כג. דוה - ג': *וי' כ , יח; יש' ל , כב; *איכה א , יג. מקרה - ב' , חד חסר וחד מלא: *וי' כ , יח; יר' נא , לו. הערה - ג': *וי' כ , יח , יט; יש' נג , יב. דמיה - ג' (ומלא): וי' יב , ז; כ , יח; יש' כו , כא. (יט) וערות - ג': בר' ט , כג; וי' יח , ז; כ , יט. וערות - ה"י ראשי פסוקים נסב ו"ו מיחדין (כלומר: הצורות היחידות מסוגן הבאות בו"ו בראש פסוק): וי' כ , יט; במ' ג , לד; ז , יג; דב' ג , כח; ש"ב טו , לה; יש' כה , ז; יח' לג , יד; לז , כא; עמ' ח , ג; מל' א , יד; תה' מט , יג; פט , ו; איוב ט , כה; קה' יב , א; דנ' ה , כה. הערה - ג': *וי' כ , יח , יט; יש' נג , יב. ישָאו - ו' (בקמץ): וי' כ , יט , כ; במ' ז , ט; יש' ס , ו; יח' לו , ז; חב' ב , ו. (כ) ישָאו - ו' (בקמץ): ראה לעיל , יט. (כב) ולא - תקיא - ב': וי' יח , כח; כ , כב. (כג) ולא תלכו - ב': וי' כ , כג; *מי' ב , ג. משלח - ז': ראה וי' יח , כד. (כד) ואני - ו' פסוקים 'ואני אני' (באמצע הפסוק): בר' לד , ל; לז , ל; וי' כ , כד; ש"ב טו , כ; יש' מט , כא; יר' כג , כד. (כה) לטהר - ה' חסר (בלישנא): ראה וי' יא , מז. בבהמה - ו' (דגושים): ראה וי' יא , ג. ובכל אשר - ה': שמ' כג , יג; *וי' כ , כה; *דב' יד , כו; ש"א יד , מז; יח' כג , ז. (כו) ואבדל - ב' חסר (בלישנא): וי' כ , כו; יש' נט , ב. (כז) ידעני - ד' (ג' חסר וחד מלא , בלישנא): וי' כ , כז; *דב' יח , יא; ש"א כח , ט; דה"ב לג , ו. יומָתו - ג' (בקמץ , בעניינא): וי' כ , יג , טז , כז.