מאגר הכתר ויקרא פרק ט עם עין המסורה

פרק ט
{פרשת שמיני} [א] וַֽיְהִי֙ בַּיּ֣וֹם הַשְּׁמִינִ֔י קָרָ֣א מֹשֶׁ֔ה לְאַהֲרֹ֖ן וּלְבָנָ֑יו וּלְזִקְנֵ֖י יִשְׂרָאֵֽל:
[ב] וַיֹּ֣אמֶר אֶֽל־אַהֲרֹ֗ן קַח־לְ֠ךָ עֵ֣גֶל בֶּן־בָּקָ֧ר לְחַטָּ֛את וְאַ֥יִל לְעֹלָ֖ה תְּמִימִ֑ם וְהַקְרֵ֖ב לִפְנֵ֥י יְהוָֽה:
[ג] וְאֶל־בְּנֵ֥י יִשְׂרָאֵ֖ל תְּדַבֵּ֣ר לֵאמֹ֑ר קְח֤וּ שְׂעִיר־עִזִּים֙ לְחַטָּ֔את וְעֵ֨גֶל וָכֶ֧בֶשׂ בְּנֵי־שָׁנָ֛ה תְּמִימִ֖ם לְעֹלָֽה:
[ד] וְשׁ֨וֹר וָאַ֜יִל לִשְׁלָמִ֗ים לִזְבֹּחַ֙ לִפְנֵ֣י יְהוָ֔ה וּמִנְחָ֖ה בְּלוּלָ֣ה בַשָּׁ֑מֶן כִּ֣י הַיּ֔וֹם יְהוָ֖ה נִרְאָ֥ה אֲלֵיכֶֽם:
[ה] וַיִּקְח֗וּ אֵ֚ת אֲשֶׁ֣ר צִוָּ֣ה מֹשֶׁ֔ה אֶל־פְּנֵ֖י אֹ֣הֶל מוֹעֵ֑ד וַֽיִּקְרְבוּ֙ כָּל־הָ֣עֵדָ֔ה וַיַּעַמְד֖וּ לִפְנֵ֥י יְהוָֽה:
[ו] וַיֹּ֣אמֶר מֹשֶׁ֔ה זֶ֧ה הַדָּבָ֛ר אֲשֶׁר־צִוָּ֥ה יְהוָ֖ה תַּעֲשׂ֑וּ וְיֵרָ֥א אֲלֵיכֶ֖ם כְּב֥וֹד יְהוָֽה:
[ז] וַיֹּ֨אמֶר מֹשֶׁ֜ה אֶֽל־אַהֲרֹ֗ן קְרַ֤ב אֶל־הַמִּזְבֵּחַ֙ וַעֲשֵׂ֞ה אֶת־חַטָּֽאתְךָ֙ וְאֶת־עֹ֣לָתֶ֔ךָ וְכַפֵּ֥ר בַּעַדְךָ֖ וּבְעַ֣ד הָעָ֑ם וַעֲשֵׂ֞ה אֶת־קָרְבַּ֤ן הָעָם֙ וְכַפֵּ֣ר בַּעֲדָ֔ם כַּאֲשֶׁ֖ר צִוָּ֥ה יְהוָֽה:
[ח] וַיִּקְרַ֥ב אַהֲרֹ֖ן אֶל־הַמִּזְבֵּ֑חַ וַיִּשְׁחַ֛ט אֶת־עֵ֥גֶל הַחַטָּ֖את אֲשֶׁר־לֽוֹ:
[ט] וַ֠יַּקְרִבוּ בְּנֵ֨י אַהֲרֹ֣ן אֶת־הַדָּם֘ אֵלָיו֒ וַיִּטְבֹּ֤ל אֶצְבָּעוֹ֙ בַּדָּ֔ם וַיִּתֵּ֖ן עַל־קַרְנ֣וֹת הַמִּזְבֵּ֑חַ וְאֶת־הַדָּ֣ם יָצַ֔ק אֶל־יְס֖וֹד הַמִּזְבֵּֽחַ:
[י] וְאֶת־הַחֵ֨לֶב וְאֶת־הַכְּלָיֹ֜ת וְאֶת־הַיֹּתֶ֤רֶת מִן־הַכָּבֵד֙ מִן־הַ֣חַטָּ֔את הִקְטִ֖יר הַמִּזְבֵּ֑חָה כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה:
[יא] וְאֶת־הַבָּשָׂ֖ר וְאֶת־הָע֑וֹר שָׂרַ֣ף בָּאֵ֔שׁ מִח֖וּץ לַֽמַּחֲנֶֽה:
[יב] וַיִּשְׁחַ֖ט אֶת־הָעֹלָ֑ה וַ֠יַּמְצִאוּ בְּנֵ֨י אַהֲרֹ֤ן אֵלָיו֙ אֶת־הַדָּ֔ם וַיִּזְרְקֵ֥הוּ עַל־הַמִּזְבֵּ֖חַ סָבִֽיב:
[יג] וְאֶת־הָעֹלָ֗ה הִמְצִ֧יאוּ אֵלָ֛יו לִנְתָחֶ֖יהָ וְאֶת־הָרֹ֑אשׁ וַיַּקְטֵ֖ר עַל־הַמִּזְבֵּֽחַ:
[יד] וַיִּרְחַ֥ץ אֶת־הַקֶּ֖רֶב וְאֶת־הַכְּרָעָ֑יִם וַיַּקְטֵ֥ר עַל־הָעֹלָ֖ה הַמִּזְבֵּֽחָה:
[טו] וַיַּקְרֵ֕ב אֵ֖ת קָרְבַּ֣ן הָעָ֑ם וַיִּקַּ֞ח אֶת־שְׂעִ֤יר הַֽחַטָּאת֙ אֲשֶׁ֣ר לָעָ֔ם וַיִּשְׁחָטֵ֥הוּ וַֽיְחַטְּאֵ֖הוּ כָּרִאשֽׁוֹן:
[טז] וַיַּקְרֵ֖ב אֶת־הָעֹלָ֑ה וַֽיַּעֲשֶׂ֖הָ כַּמִּשְׁפָּֽט:
[שני] [יז] וַיַּקְרֵב֘ אֶת־הַמִּנְחָה֒ וַיְמַלֵּ֤א כַפּוֹ֙ מִמֶּ֔נָּה וַיַּקְטֵ֖ר עַל־הַמִּזְבֵּ֑חַ מִלְּבַ֖ד עֹלַ֥ת הַבֹּֽקֶר:
[יח] וַיִּשְׁחַ֤ט אֶת־הַשּׁוֹר֙ וְאֶת־הָאַ֔יִל זֶ֥בַח הַשְּׁלָמִ֖ים אֲשֶׁ֣ר לָעָ֑ם וַ֠יַּמְצִאוּ בְּנֵ֨י אַהֲרֹ֤ן אֶת־הַדָּם֙ אֵלָ֔יו וַיִּזְרְקֵ֥הוּ עַל־הַמִּזְבֵּ֖חַ סָבִֽיב:
[יט] וְאֶת־הַחֲלָבִ֖ים מִן־הַשּׁ֑וֹר וּמִ֨ן־הָאַ֔יִל הָאַלְיָ֤ה וְהַֽמֲכַסֶּה֙ וְהַכְּלָיֹ֔ת וְיֹתֶ֖רֶת הַכָּבֵֽד:
[כ] וַיָּשִׂ֥ימוּ אֶת־הַחֲלָבִ֖ים עַל־הֶחָז֑וֹת וַיַּקְטֵ֥ר הַחֲלָבִ֖ים הַמִּזְבֵּֽחָה:
[כא] וְאֵ֣ת הֶחָז֗וֹת וְאֵת֙ שׁ֣וֹק הַיָּמִ֔ין הֵנִ֧יף אַהֲרֹ֛ן תְּנוּפָ֖ה לִפְנֵ֣י יְהוָ֑ה כַּאֲשֶׁ֖ר צִוָּ֥ה מֹשֶֽׁה:
[כב] וַיִּשָּׂ֨א אַהֲרֹ֧ן אֶת־יָדָ֛ו יָדָ֛יו אֶל־הָעָ֖ם וַֽיְבָרֲכֵ֑ם וַיֵּ֗רֶד מֵעֲשֹׂ֧ת הַחַטָּ֛את וְהָעֹלָ֖ה וְהַשְּׁלָמִֽים:
[כג] וַיָּבֹ֨א מֹשֶׁ֤ה וְאַֽהֲרֹן֙ אֶל־אֹ֣הֶל מוֹעֵ֔ד וַיֵּ֣צְא֔וּ וַֽיְבָרֲכ֖וּ אֶת־הָעָ֑ם וַיֵּרָ֥א כְבוֹד־יְהוָ֖ה אֶל־כָּל־הָעָֽם:
[שלישי] [כד] וַתֵּ֤צֵא אֵשׁ֙ מִלִּפְנֵ֣י יְהוָ֔ה וַתֹּ֙אכַל֙ עַל־הַמִּזְבֵּ֔חַ אֶת־הָעֹלָ֖ה וְאֶת־הַחֲלָבִ֑ים וַיַּ֤רְא כָּל־הָעָם֙ וַיָּרֹ֔נּוּ וַֽיִּפְּל֖וּ עַל־פְּנֵיהֶֽם:

פרק ט
(ג) ואל - בני ישראל תדבר לאמר - ד': *שמ' ל , לא; וי' ט , ג; כד , טו; במ' כז , ח. (ד) ושור - ה': וי' ט , ד; כב , כג , כח; במ' ז , ג; ש"א כב , יט. לזבח לפני יי' (זביחה לפני יי') - ד': וי' ט , ד; ש"א יא , טו; מ"א ח , סב; דה"ב ז , ד. (ה) אל - פני - ט': ראה וי' ו , ז. (ז) אל - המזבח - ט': ראה וי' א , טו. חטאתך - ב': *וי' ט , ז; ש"ב יב , יג. וחד: וחטאתך - יש' ו , ז. עלתך - ג': וי' ט , ז; במ' כג , ג , טו. וכפר - ד': *וי' ט , ז (פעמיים); במ' יז , יא; תה' עט , ט. (ח) ויקרב - ה' בפתח: *וי' ט , ח; ש"א יז , מח; ש"ב כ , יז; מ"ב טז , יב; יונה א , ו. אל - המזבח - ט': ראה וי' א , טו. (ט) ויקרבו - ב' (חסר): וי' ט , ט; יהו' ח , כג. ויקרבו - י' חסר בלישנא: ראה וי' ב , ד. קרנות - ד' מלא בתורה: *וי' ד , ז; ח , טו; ט , ט; טז , יח. (י) ואת - החלב - ה': ראה וי' ג , ט. (יב) וימצאו - ב' וחסר: וי' ט , יב , יח. (יג) ואת - העלה - ג' (חסר ומלא): וי' ט , יג; יד , יג; יח' מה , יז. ויקטר על - המזבח - ג' (בלישנא): וי' ו , ח; ט , יג , יז. (טז) ויעשה - ב': וי' ט , טז; ש"ב יב , ד. (יז) וימלא - ט': בר' כט , כח; שמ' לה , לא; וי' ט , יז; במ' יד , כד; שו' יז , ה , יב; מ"ב כג , יד; כד , ד; נח' ב , יג. ויקטר על - המזבח - ג' (בלישנא): וי' ו , ח; ט , יג , יז. (יח) ואת - האיל - ה': ראה וי' ח , כ. וימצאו - ב' וחסר: וי' ט , יב , יח. (כא) כאשר צוה משה - ג' יחידין (לא כולל 'כאשר צוה משה עבד יי''): שמ' טז , כד; וי' ט , כא; דה"א טו , טו. (והשאר: צווי יי' למשה). (כב) ידו - ה' חסר (בלישנא): שמ' לב , יט; וי' ט , כב; טז , כא; יח' מג , כו; איוב ה , יח. מעשת - ב' חסר: בר' יח , כה; *וי' ט , כב. מעשת - ה' חסר (בלישנא , לא כולל 'לעשת' , 'ולעשת'): בר' יח , כה; וי' ט , כב; יח , כט; דב' ד , יד; ש"ב כג , יז. (כג) משה ואהרן - כ"ח (בתורה , לא כולל 'משה ואהרן ובניו' וכן 'ביד משה ואהרן'): שמ' ד , כט; ה , א , ד; ו , כז; ז , ו , י , כ; ח , ח; י , ג; יב , כח , מג; טז , ו; כד , ט; וי' ט , כג; במ' א , יז , מד; ג , לט; ד , לד , לז , מא , מה , מו; ח , כ; יד , ה; יז , ח; כ , ו , י; כו , סד. וירא - כ': בר' יב , ז; יז , א; יח , א; כו , ב , כד; לה , ט; מו , כט; שמ' ג , ב; וי' ט , כג; במ' טז , יט; יז , ז; כ , ו; דב' לא , טו; שו' ו , יב; יג , ג; ש"ב כב , יא; מ"א ט , ב; יח' י , ח; יט , יא; דה"ב ז , יב. (כד) וירא כל - העם - ב': וי' ט , כד; מ"א יח , לט.