מאגר הכתר איכה פרק ה עם תרגום מגילות

פרק ה
[א] הֱוִי דְכִיר יְיָ מָא דַהֲוָה לַנָא אִסתַּכַּל וַחֲזִי כִסוּפַנָא :
[ב] אַחסָנְתַנָא אִתהֲפַכַת לְחִילוֹנַי בָּתַּנָא לְנֻכרָאִין :
[ג] הֲוֵינָא דָמַיִין בְּגָלוּתָא לְיַתמִין דְּלֵית לְהוֹן אָב אִמָתַנָא כְּאַרמְלָן :
[ד] מֵימַנָא בְּכַספָּא שְׁתֵינָא קֵיסַנָא בִּדמִין יֵיתוֹן :
[ה] עַל פְּרֵיקַת צַורַנָא אִטְעַננָא כַּד הֲוֵינָא אָזְלִין בְּשִׁביָא חֲזָא נְבוּכַדנֶצַר רַשִׁיעָא סָרְכַיָא וְרַבָּנֵי עַמָא דְיִשׂרָאֵל דְּאָזְלִין רֵיקָנִין פַּקֵיד לְמִטעַנהוֹן חָלָא דְעַל סְפַר פְּרָת בְּגֵין דְּלָא יְהָכוּן רֵיקָנִין וּבהַהוּא זִמנָא לְאֵינָא וְלָא הֲוָת נְיָחָא לַנָא :
[ו] מִצרַיִם יְהַבנָא סְמָד לְאִתפַּרסָמָא וְאַתּוּר לְמִסבַּע לַחמָא :
[ז] אֲבָהָתַנָא חָבוּ וְלָיְתֵיהוֹן וַאֲנַחנָא עֲוָיָתְהוֹן סוֹבַרנָא :
[ח] בְּנֵי חָם דְּאִתמְסַרוּ עַבדִין לִבנֵיהוֹן דְּשֵׁם אִנוּן שְׁלִיטוּ בַנָא פָּרֵיק לֵית מִיֶדהוֹן :
[ט] בְּסַכָּנַת נַפשַׁנָא נֵיתֵי לְחֵים פַּרנָסוּתַנָא מִן קֳדָם קָטֵיל בְּחַרבָּא דְּאָתֵי מִסְטַר מַדבְּרָא :
[י] מַשׁכַּנָא כְּתַנוּרָא אִתקְדַרוּ מִן קֳדָם מַפַּח כַּפנָא :
[יא] נְשַׁיָא דְמִתנַסבָּן לִגבַר בְּצִיוֹן אִתעַנִיוּ בְּתוּלָתָא בְּקִרוֵי יְהוּדָה מֵאוּמָא כַסדָּאֵי :
[יב] רַברְבָנִין בְּיֶדהוֹן אִצטְלִיבוּ אַפֵּי סָבַיָא לָא אִתהֲדַרוּ :
[יג] עוּלֵימַיָא רִחיָא נְטַלוּ וְרָבְיָן בִּצלִיבַת קֵיסָא תְקַלוּ :
[יד] סָבַיָא מִתְּרַע סַנהֶדרִין אִתבְּטַלוּ וְעוּלֵימַיָא מִבֵּית זְמָרֵיהוֹן :
[טו] בְּטַל חֶדוַת לִבַּנָא אִתהֲפֵיך לְאֶבלָא חִנגַנָא :
[טז] נְפַלַת כְּלִיל רֵישַׁנָא וָי לַנָא אֲרֵי חַבנָא :
[יז] עַל דֵּין בֵּית מַקדְּשָׁא דְאִצטַדִּי הֲוָה חַלָשׁ לִבַּנָא עַל אִלֵין עַמָא דִגלוֹ מִתַּמָן אַחשִׁיכוּ עֵינַנָא :
[יח] עַל טוּרָא דְצִיוֹן דַּהֲוָה צָדֵי תַּעלִין אָזְלִין בֵּיהּ :
[יט] אַתּ הוּא יְיָ לְעָלַם בֵּית מוֹתְבָך בִּשׁמַיָא כֻּרסֵי יְקָרָך לְדָרֵי דָרָא :
[כ] לְמָא לְעָלְמִין תַּשׁלֵינַנָא תִּשׁבְּקִינַנָא לְאוֹרָכוּת יוֹמַיָא :
[כא] אֲתֵיבנָא יְיָ לְוָתָך וּנתוּב בִּתיוּבתָּא שְׁלֵימְתָא תְחַדֵּית יוֹמַנָא לְטָב כְּיוֹמִין קַדמָאִין :
[כב] אֲרוּם אֱלָהֵין מֵיקָץ תְּקוּץ בַּנָא רְגַזתָּא עֲלַנָא לַחדָּא :