מאגר הכתר דניאל פרק א עם פירוש ר' ישעיה מטראני

פרק א
[א] בִּשְׁנַ֣ת שָׁל֔וֹשׁ לְמַלְכ֖וּת יְהוֹיָקִ֣ים מֶֽלֶךְ־יְהוּדָ֑ה בָּ֣א נְבוּכַדְנֶאצַּ֧ר מֶלֶךְ־בָּבֶ֛ל יְרוּשָׁלִַ֖ם וַיָּ֥צַר עָלֶֽיהָ:
[ב] וַיִּתֵּן֩ אֲדנָ֨י בְּיָד֜וֹ אֶת־יְהוֹיָקִ֣ים מֶלֶךְ־יְהוּדָ֗ה וּמִקְצָת֙ כְּלֵ֣י בֵית־הָאֱלֹהִ֔ים וַיְבִיאֵ֥ם אֶֽרֶץ־שִׁנְעָ֖ר בֵּ֣ית אֱלֹהָ֑יו וְאֶת־הַכֵּלִ֣ים הֵבִ֔יא בֵּ֖ית אוֹצַ֥ר אֱלֹהָֽיו:
[ג] וַיֹּ֣אמֶר הַמֶּ֔לֶךְ לְאַשְׁפְּנַ֖ז רַ֣ב סָרִיסָ֑יו לְהָבִ֞יא מִבְּנֵ֧י יִשְׂרָאֵ֛ל וּמִזֶּ֥רַע הַמְּלוּכָ֖ה וּמִן־הַֽפַּרְתְּמִֽים:
[ד] יְלָדִ֣ים אֲשֶׁ֣ר אֵֽין־בָּהֶ֣ם כָּל־מאוּם֩ מוּם֩ וְטוֹבֵ֨י מַרְאֶ֜ה וּמַשְׂכִּלִ֣ים בְּכָל־חָכְמָ֗ה וְיֹ֤דְעֵי דַ֙עַת֙ וּמְבִינֵ֣י מַדָּ֔ע וַֽאֲשֶׁר֙ כֹּ֣חַ בָּהֶ֔ם לַעֲמֹ֖ד בְּהֵיכַ֣ל הַמֶּ֑לֶךְ וּֽלְלַמְּדָ֥ם סֵ֖פֶר וּלְשׁ֥וֹן כַּשְׂדִּֽים:
[ה] וַיְמַן֩ לָהֶ֨ם הַמֶּ֜לֶךְ דְּבַר־י֣וֹם בְּיוֹמ֗וֹ מִפַּת־בַּ֤ג הַמֶּ֙לֶךְ֙ וּמִיֵּ֣ין מִשְׁתָּ֔יו וּֽלְגַדְּלָ֖ם שָׁנִ֣ים שָׁל֑וֹשׁ וּמִ֨קְצָתָ֔ם יַעַמְד֖וּ לִפְנֵ֥י הַמֶּֽלֶךְ:
[ו] וַיְהִ֥י בָהֶ֖ם מִבְּנֵ֣י יְהוּדָ֑ה דָּנִיֵּ֣אל חֲנַנְיָ֔ה מִישָׁאֵ֖ל וַעֲזַרְיָֽה:
[ז] וַיָּ֧שֶׂם לָהֶ֛ם שַׂ֥ר הַסָּרִיסִ֖ים שֵׁמ֑וֹת וַיָּ֨שֶׂם לְדָֽנִיֵּ֜אל בֵּ֣לְטְשַׁאצַּ֗ר וְלַֽחֲנַנְיָה֙ שַׁדְרַ֔ךְ וּלְמִישָׁאֵ֣ל מֵישַׁ֔ךְ וְלַעֲזַרְיָ֖ה עֲבֵ֥ד נְגֽוֹ:
[ח] וַיָּ֤שֶׂם דָּנִיֵּאל֙ עַל־לִבּ֔וֹ אֲשֶׁ֧ר לֹֽא־יִתְגָּאַ֛ל בְּפַת־בַּ֥ג הַמֶּ֖לֶךְ וּבְיֵ֣ין מִשְׁתָּ֑יו וַיְבַקֵּשׁ֙ מִשַּׂ֣ר הַסָּרִיסִ֔ים אֲשֶׁ֖ר לֹ֥א יִתְגָּאָֽל:
[ט] וַיִּתֵּ֤ן הָֽאֱלֹהִים֙ אֶת־דָּ֣נִיֵּ֔אל לְחֶ֖סֶד וּֽלְרַחֲמִ֑ים לִפְנֵ֖י שַׂ֥ר הַסָּרִיסִֽים:
[י] וַיֹּ֜אמֶר שַׂ֤ר הַסָּרִיסִים֙ לְדָ֣נִיֵּ֔אל יָרֵ֤א אֲנִי֙ אֶת־אֲדֹנִ֣י הַמֶּ֔לֶךְ אֲשֶׁ֣ר מִנָּ֔ה אֶת־מַאֲכַלְכֶ֖ם וְאֶת־מִשְׁתֵּיכֶ֑ם אֲשֶׁ֡ר לָמָּה֩ יִרְאֶ֨ה אֶת־פְּנֵיכֶ֜ם זֹֽעֲפִ֗ים מִן־הַיְלָדִים֙ אֲשֶׁ֣ר כְּגִֽילְכֶ֔ם וְחִיַּבְתֶּ֥ם אֶת־רֹאשִׁ֖י לַמֶּֽלֶךְ:
[יא] וַיֹּ֥אמֶר דָּנִיֵּ֖אל אֶל־הַמֶּלְצַ֑ר אֲשֶׁ֤ר מִנָּה֙ שַׂ֣ר הַסָּֽרִיסִ֔ים עַל־דָּנִיֵּ֣אל חֲנַנְיָ֔ה מִישָׁאֵ֖ל וַעֲזַרְיָֽה:
[יב] נַס־נָ֥א אֶת־עֲבָדֶ֖יךָ יָמִ֣ים עֲשָׂרָ֑ה וְיִתְּנוּ־לָ֜נוּ מִן־הַזֵּרֹעִ֛ים וְנֹאכְלָ֖ה וּמַ֥יִם וְנִשְׁתֶּֽה:
[יג] וְיֵרָא֤וּ לְפָנֶ֙יךָ֙ מַרְאֵ֔ינוּ וּמַרְאֵה֙ הַיְלָדִ֔ים הָאֹ֣כְלִ֔ים אֵ֖ת פַּת־בַּ֣ג הַמֶּ֑לֶךְ וְכַאֲשֶׁ֣ר תִּרְאֵ֔ה עֲשֵׂ֖ה עִם־עֲבָדֶֽיךָ:
[יד] וַיִּשְׁמַ֥ע לָהֶ֖ם לַדָּבָ֣ר הַזֶּ֑ה וַיְנַסֵּ֖ם יָמִ֥ים עֲשָׂרָֽה:
[טו] וּמִקְצָת֙ יָמִ֣ים עֲשָׂרָ֔ה נִרְאָ֤ה מַרְאֵיהֶם֙ ט֔וֹב וּבְרִיאֵ֖י בָּשָׂ֑ר מִ֨ן־כָּל־הַיְלָדִ֔ים הָאֹ֣כְלִ֔ים אֵ֖ת פַּת־בַּ֥ג הַמֶּֽלֶךְ:
[טז] וַיְהִ֣י הַמֶּלְצַ֗ר נֹשֵׂא֙ אֶת־פַּת־בָּגָ֔ם וְיֵ֖ין מִשְׁתֵּיהֶ֑ם וְנֹתֵ֥ן לָהֶ֖ם זֵרְעֹנִֽים:
[יז] וְהַיְלָדִ֤ים הָאֵ֙לֶּה֙ אַרְבַּעְתָּ֔ם נָתַ֨ן לָהֶ֧ם הָאֱלֹהִ֛ים מַדָּ֥ע וְהַשְׂכֵּ֖ל בְּכָל־סֵ֣פֶר וְחָכְמָ֑ה וְדָנִיֵּ֣אל הֵבִ֔ין בְּכָל־חָז֖וֹן וַחֲלֹמֽוֹת:
[יח] וּלְמִקְצָת֙ הַיָּמִ֔ים אֲשֶׁר־אָמַ֥ר הַמֶּ֖לֶךְ לַהֲבִיאָ֑ם וַיְבִיאֵם֙ שַׂ֣ר הַסָּרִיסִ֔ים לִפְנֵ֖י נְבֻכַדְנֶצַּֽר:
[יט] וַיְדַבֵּ֣ר אִתָּם֘ הַמֶּלֶךְ֒ וְלֹ֤א נִמְצָא֙ מִכֻּלָּ֔ם כְּדָנִיֵּ֣אל חֲנַנְיָ֔ה מִישָׁאֵ֖ל וַעֲזַרְיָ֑ה וַיַּעַמְד֖וּ לִפְנֵ֥י הַמֶּֽלֶךְ:
[כ] וְכֹ֗ל דְּבַר֙ חָכְמַ֣ת בִּינָ֔ה אֲשֶׁר־בִּקֵּ֥שׁ מֵהֶ֖ם הַמֶּ֑לֶךְ וַֽיִּמְצָאֵ֞ם עֶ֣שֶׂר יָד֗וֹת עַ֤ל כָּל־הַֽחַרְטֻמִּים֙ הָֽאַשָּׁפִ֔ים אֲשֶׁ֖ר בְּכָל־מַלְכוּתֽוֹ:
[כא] וַֽיְהִי֙ דָּֽנִיֵּ֔אל עַד־שְׁנַ֥ת אַחַ֖ת לְכ֥וֹרֶשׁ הַמֶּֽלֶךְ: ס

פרק א
(א) בשנת שלש למלכות יהויקים מלך יהודה בא נבוכדנצר (בנוסחנו: נבוכדנאצר) מלך בבל - והלא בשנת שלוש למלכות יהויקים עדיין נבוכדנצר לא היה מלך , שנאמר בירמיהו "בשנה הרביעית ליהויקים... היא השנה הראשונית לנבוכדנצר מלך בבל" (כה , א) , אלמא בשנת ארבע ליהויקים מלך; והאיך אומר כאן בשנת שלש למלכות יהויקים? אלא , לא תוכל לפרש אלא 'בשנת שלש למרדו'. שבשנת ארבע ליהויקים מלך , כמו שאמרנו , ובשנה הראשונה שמלך כיבש נינוה , ובשנה שנייה כיבש יהויקים , כדאמרינן במגילה (יא , ב); והיא שנת חמישית ליהויקים. "ויהי לו יהויקים עבד שלש שנים" (מ"ב כד , א) - שנה ששית ליהויקים ושביעית ושמינית , ומרד בו שנה תשיעית ועשירית ואחת עשרה. ובשנת אחת עשרה שנה , שהיא שנת שלש למרדו , בא נבוכדנצר מלך בבל בירושלים , ונמסר יהויקים בידו והרגו , ונתקיים בו "קבורת חמור יקבר סחוב והשלך מהלאה לשער ירושלם (יר' כב , יט); והמליך יהויכין בנו תחתיו , ולתשובת השנה שלח מבבל והגלהו והמליך על ירושלם צדקיהו אחי יהויקים , ומלך אחת עשרה שנה (ראה דה"ב לו , י - יא) , ובשנת אחת עשרה למלכותו היו חורבות ירושלם ונשרף בית אלהינו (ראה מ"ב כה , ב ואי'). (ב) ומקצת כלי בית האלהים - לפי שנותרו המשכן והאהל וכל כליו שגנזם יאשיהו (ראה יומא נב , ב) ולא גלו לבבל. בית אלהיו - בית עבודה זרה שלו. והכלים הכניס לאוצר עבודה זרה. (ד) ואשר כח בהם - שיוכלו לכבוש את יצרם מכל צרכיהם (ראה סנה' צג , ב) , והיו ראויים והגונים לעמוד לפני המלך. (ה) מפת בג - כמו "ונתתיך לבג לגוים" (יח' כה , ז) , ופיתרונו: למאכל; כך פירש רד"ק ז"ל. ומקצתם - של אלו שלש שנים; כמו "ויהי מקץ שנתים ימים" (בר' מא , א). (ז) וישם לדניאל בלטשאצר - שינה שמותם שיהיו נקראים בשמות (עבודה זרה). (ח) אשר לא יתגאל - שלא יטנף עצמו במאכל ובמשתה הגוים. (י) אשר כגילכם - אשר כיוצא בכם בקומתכם ודמותכם; כמו 'אחיו של ראש ובן גילו של ראש' (ראה מגילה יא , א). (יב) נס - כמו 'נַסֵה' , והוא בפלס "צו" (וי' ו , ב). מן הזרועים - כגון פולים ואפונים שרויים במים. (יג) פת בג - פת מאכלם. (יט) ולא נמצא מכולם - ולא נמצא מכל הילדים שלקח , אחד חכם כאלו ארבעה; שלא לבד אלו לקח אלא הרבה היו. אבל אלו ארבעה חכמו על כולם. (כ) האשפים - חוזים בכוכבים. (כא) ויהי דניאל - בחצר מלכי בבל עד שנה אחת לכורש - והוא כורש הגדול בן אחשורוש , שבנה הבית.