מאגר הכתר נחמיה פרק ז עם עין המסורה

פרק ז
[א] וַיְהִ֗י כַּאֲשֶׁ֤ר נִבְנְתָה֙ הַחוֹמָ֔ה וָאַעֲמִ֖יד הַדְּלָת֑וֹת וַיִּפָּ֥קְד֛וּ הַשּׁוֹעֲרִ֥ים וְהַמְשֹׁרֲרִ֖ים וְהַלְוִיִּֽם:
[ב] וָאֲצַוֶּ֞ה אֶת־חֲנָ֣נִי אָחִ֗י וְאֶת־חֲנַנְיָ֛ה שַׂ֥ר הַבִּירָ֖ה עַל־יְרוּשָׁלִָ֑ם כִּי־הוּא֙ כְּאִ֣ישׁ אֱמֶ֔ת וְיָרֵ֥א אֶת־הָאֱלֹהִ֖ים מֵרַבִּֽים:
[ג] וָיאֹמַ֣ר וָאֹמַ֣ר לָהֶ֗ם לֹ֣א יִפָּתְח֞וּ שַׁעֲרֵ֤י יְרוּשָׁלִַם֙ עַד־חֹ֣ם הַשֶּׁ֔מֶשׁ וְעַ֨ד הֵ֥ם עֹמְדִ֛ים יָגִ֥יפוּ הַדְּלָת֖וֹת וֶאֱחֹ֑זוּ וְהַעֲמֵ֗יד מִשְׁמְרוֹת֙ יֹשְׁבֵ֣י יְרוּשָׁלִַ֔ם אִ֚ישׁ בְּמִשְׁמָר֔וֹ וְאִ֖ישׁ נֶ֥גֶד בֵּיתֽוֹ:
[ד] וְהָעִ֞יר רַחֲבַ֤ת יָדַ֙יִם֙ וּגְדֹלָ֔ה וְהָעָ֥ם מְעַ֖ט בְּתוֹכָ֑הּ וְאֵ֥ין בָּתִּ֖ים בְּנוּיִֽם:
[ה] וַיִּתֵּ֤ן אֱלֹהַי֙ אֶל־לִבִּ֔י וָאֶקְבְּצָ֞ה אֶת־הַחֹרִ֧ים וְאֶת־הַסְּגָנִ֛ים וְאֶת־הָעָ֖ם לְהִתְיַחֵ֑שׂ וָאֶמְצָ֗א סֵ֤פֶר הַיַּ֙חַשׂ֙ הָעוֹלִ֣ים בָּרִאשׁוֹנָ֔ה וָאֶמְצָ֖א כָּת֥וּב בּֽוֹ: פ
[ו] אֵ֣לֶּה׀ בְּנֵ֣י הַמְּדִינָ֗ה הָעֹלִים֙ מִשְּׁבִ֣י הַגּוֹלָ֔ה אֲשֶׁ֣ר הֶגְלָ֔ה נְבוּכַדְנֶצַּ֖ר מֶ֣לֶךְ בָּבֶ֑ל וַיָּשׁ֧וּבוּ לִירוּשָׁלִַ֛ם וְלִיהוּדָ֖ה אִ֥ישׁ לְעִירֽוֹ:
[ז] הַבָּאִ֣ים עִם־זְרֻבָּבֶ֗ל יֵשׁ֡וּעַ נְחֶמְיָ֡ה עֲ֠זַרְיָה רַעַמְיָ֨ה נַחֲמָ֜נִי מָרְדֳּכַ֥י בִּלְשָׁ֛ן מִסְפֶּ֥רֶת בִּגְוַ֖י נְח֣וּם בַּעֲנָ֑ה מִסְפַּ֕ר אַנְשֵׁ֖י עַ֥ם יִשְׂרָאֵֽל: ס
[ח] בְּנֵ֣י פַרְעֹ֔שׁ אַלְפַּ֕יִם מֵאָ֖ה וְשִׁבְעִ֥ים וּשְׁנָֽיִם: ס
[ט] בְּנֵ֣י שְׁפַטְיָ֔ה שְׁלֹ֥שׁ מֵא֖וֹת שִׁבְעִ֥ים וּשְׁנָֽיִם: ס
[י] בְּנֵ֣י אָרַ֔ח שֵׁ֥שׁ מֵא֖וֹת חֲמִשִּׁ֥ים וּשְׁנָֽיִם: ס
[יא] בְּנֵֽי־פַחַ֥ת מוֹאָ֛ב לִבְנֵ֥י יֵשׁ֖וּעַ וְיוֹאָ֑ב אַלְפַּ֕יִם וּשְׁמֹנֶ֥ה מֵא֖וֹת שְׁמֹנָ֥ה עָשָֽׂר: ס
[יב] בְּנֵ֣י עֵילָ֔ם אֶ֕לֶף מָאתַ֖יִם חֲמִשִּׁ֥ים וְאַרְבָּעָֽה: ס
[יג] בְּנֵ֣י זַתּ֔וּא שְׁמֹנֶ֥ה מֵא֖וֹת אַרְבָּעִ֥ים וַחֲמִשָּֽׁה: ס
[יד] בְּנֵ֣י זַכָּ֔י שְׁבַ֥ע מֵא֖וֹת וְשִׁשִּֽׁים: ס
[טו] בְּנֵ֣י בִנּ֔וּי שֵׁ֥שׁ מֵא֖וֹת אַרְבָּעִ֥ים וּשְׁמֹנָֽה: ס
[טז] בְּנֵ֣י בֵבָ֔י שֵׁ֥שׁ מֵא֖וֹת עֶשְׂרִ֥ים וּשְׁמֹנָֽה: ס
[יז] בְּנֵ֣י עַזְגָּ֔ד אַלְפַּ֕יִם שְׁלֹ֥שׁ מֵא֖וֹת עֶשְׂרִ֥ים וּשְׁנָֽיִם: ס
[יח] בְּנֵי֙ אֲדֹ֣נִיקָ֔ם שֵׁ֥שׁ מֵא֖וֹת שִׁשִּׁ֥ים וְשִׁבְעָֽה: ס
[יט] בְּנֵ֣י בִגְוָ֔י אַלְפַּ֖יִם שִׁשִּׁ֥ים וְשִׁבְעָֽה: ס
[כ] בְּנֵ֣י עָדִ֔ין שֵׁ֥שׁ מֵא֖וֹת חֲמִשִּׁ֥ים וַחֲמִשָּֽׁה: ס
[כא] בְּנֵֽי־אָטֵ֥ר לְחִזְקִיָּ֖ה תִּשְׁעִ֥ים וּשְׁמֹנָֽה: ס
[כב] בְּנֵ֣י חָשֻׁ֔ם שְׁלֹ֥שׁ מֵא֖וֹת עֶשְׂרִ֥ים וּשְׁמֹנָֽה: ס
[כג] בְּנֵ֣י בֵצָ֔י שְׁלֹ֥שׁ מֵא֖וֹת עֶשְׂרִ֥ים וְאַרְבָּעָֽה: ס
[כד] בְּנֵ֣י חָרִ֔יף מֵאָ֖ה שְׁנֵ֥ים עָשָֽׂר: ס
[כה] בְּנֵ֥י גִבְע֖וֹן תִּשְׁעִ֥ים וַחֲמִשָּֽׁה: ס
[כו] אַנְשֵׁ֤י בֵֽית־לֶ֙חֶם֙ וּנְטֹפָ֔ה מֵאָ֖ה שְׁמֹנִ֥ים וּשְׁמֹנָֽה: ס
[כז] אַנְשֵׁ֣י עֲנָת֔וֹת מֵאָ֖ה עֶשְׂרִ֥ים וּשְׁמֹנָֽה: ס
[כח] אַנְשֵׁ֥י בֵית־עַזְמָ֖וֶת אַרְבָּעִ֥ים וּשְׁנָֽיִם: ס
[כט] אַנְשֵׁ֨י קִרְיַ֤ת יְעָרִים֙ כְּפִירָ֣ה וּבְאֵר֔וֹת שְׁבַ֥ע מֵא֖וֹת אַרְבָּעִ֥ים וּשְׁלֹשָֽׁה: ס
[ל] אַנְשֵׁ֤י הָרָמָה֙ וָגָ֔בַע שֵׁ֥שׁ מֵא֖וֹת עֶשְׂרִ֥ים וְאֶחָֽד: ס
[לא] אַנְשֵׁ֣י מִכְמָ֔ס מֵאָ֖ה וְעֶשְׂרִ֥ים וּשְׁנָֽיִם: ס
[לב] אַנְשֵׁ֤י בֵֽית־אֵל֙ וְהָעָ֔י מֵאָ֖ה עֶשְׂרִ֥ים וּשְׁלֹשָֽׁה: ס
[לג] אַנְשֵׁ֥י נְב֛וֹ אַחֵ֖ר חֲמִשִּׁ֥ים וּשְׁנָֽיִם: ס
[לד] בְּנֵי֙ עֵילָ֣ם אַחֵ֔ר אֶ֕לֶף מָאתַ֖יִם חֲמִשִּׁ֥ים וְאַרְבָּעָֽה: ס
[לה] בְּנֵ֣י חָרִ֔ם שְׁלֹ֥שׁ מֵא֖וֹת וְעֶשְׂרִֽים: ס
[לו] בְּנֵ֣י יְרֵח֔וֹ שְׁלֹ֥שׁ מֵא֖וֹת אַרְבָּעִ֥ים וַחֲמִשָּֽׁה: ס
[לז] בְּנֵי־לֹד֙ חָדִ֣יד וְאֹנ֔וֹ שְׁבַ֥ע מֵא֖וֹת וְעֶשְׂרִ֥ים וְאֶחָֽד: ס
[לח] בְּנֵ֣י סְנָאָ֔ה שְׁלֹ֣שֶׁת אֲלָפִ֔ים תְּשַׁ֥ע מֵא֖וֹת וּשְׁלֹשִֽׁים: פ
[לט] הַכֹּהֲנִ֑ים בְּנֵ֤י יְדַֽעְיָה֙ לְבֵ֣ית יֵשׁ֔וּעַ תְּשַׁ֥ע מֵא֖וֹת שִׁבְעִ֥ים וּשְׁלֹשָֽׁה: ס
[מ] בְּנֵ֣י אִמֵּ֔ר אֶ֖לֶף חֲמִשִּׁ֥ים וּשְׁנָֽיִם: ס
[מא] בְּנֵ֣י פַשְׁח֔וּר אֶ֕לֶף מָאתַ֖יִם אַרְבָּעִ֥ים וְשִׁבְעָֽה: ס
[מב] בְּנֵ֣י חָרִ֔ם אֶ֖לֶף שִׁבְעָ֥ה עָשָֽׂר: ס
[מג] הַלְוִיִּ֑ם בְּנֵֽי־יֵשׁ֧וּעַ לְקַדְמִיאֵ֛ל לִבְנֵ֥י לְהוֹדְוָ֖ה שִׁבְעִ֥ים וְאַרְבָּעָֽה: ס
[מד] הַֽמְשֹׁרֲרִ֑ים בְּנֵ֣י אָסָ֔ף מֵאָ֖ה אַרְבָּעִ֥ים וּשְׁמֹנָֽה: ס
[מה] הַשֹּׁעֲרִ֗ים בְּנֵֽי־שַׁלֻּ֤ם בְּנֵֽי־אָטֵר֙ בְּנֵֽי־טַלְמֹ֣ן בְּנֵֽי־עַקּ֔וּב בְּנֵ֥י חֲטִיטָ֖א בְּנֵ֣י שֹׁבָ֑י מֵאָ֖ה שְׁלֹשִׁ֥ים וּשְׁמֹנָֽה: פ
[מו] הַנְּתִינִ֑ים בְּנֵי־צִחָ֥א בְנֵי־חֲשֻׂפָ֖א בְּנֵ֥י טַבָּעֽוֹת: ס
[מז] בְּנֵי־קֵירֹ֥ס בְּנֵי־סִיעָ֖א בְּנֵ֥י פָדֽוֹן: ס
[מח] בְּנֵי־לְבָנָ֥ה בְנֵי־חֲגָבָ֖א בְּנֵ֥י שַׁלְמָֽי: ס
[מט] בְּנֵי־חָנָ֥ן בְּנֵי־גִדֵּ֖ל בְּנֵי־גָֽחַר: ס
[נ] בְּנֵי־רְאָיָ֥ה בְנֵי־רְצִ֖ין בְּנֵ֥י נְקוֹדָֽא: ס
[נא] בְּנֵי־גַזָּ֥ם בְּנֵי־עֻזָּ֖א בְּנֵ֥י פָסֵֽחַ: ס
[נב] בְּנֵי־בֵסַ֥י בְּנֵי־מְעוּנִ֖ים בְּנֵ֥י נְפִֽושְׁסִֽים נְפִֽישְׁסִֽים: ס
[נג] בְּנֵי־בַקְבּ֥וּק בְּנֵֽי־חֲקוּפָ֖א בְּנֵ֥י חַרְחֽוּר: ס
[נד] בְּנֵי־בַצְלִ֥ית בְּנֵֽי־מְחִידָ֖א בְּנֵ֥י חַרְשָֽׁא: ס
[נה] בְּנֵי־בַרְק֥וֹס בְּֽנֵי־סִֽיסְרָ֖א בְּנֵי־תָֽמַח: ס
[נו] בְּנֵ֥י נְצִ֖יחַ בְּנֵ֥י חֲטִיפָֽא: ס
[נז] בְּנֵ֖י עַבְדֵ֣י שְׁלֹמֹ֑ה בְּנֵי־סוֹטַ֥י בְּנֵי־סֹפֶ֖רֶת בְּנֵ֥י פְרִידָֽא: ס
[נח] בְּנֵי־יַעְלָ֥א בְנֵי־דַרְק֖וֹן בְּנֵ֥י גִדֵּֽל: ס
[נט] בְּנֵ֧י שְׁפַטְיָ֣ה בְנֵֽי־חַטִּ֗יל ס בְּנֵ֛י פֹּכֶ֥רֶת הַצְּבָיִ֖ים בְּנֵ֥י אָמֽוֹן: ס

[ס] כָּ֨ל־הַנְּתִינִ֔ים וּבְנֵ֖י עַבְדֵ֣י שְׁלֹמֹ֑ה שְׁלֹ֥שׁ מֵא֖וֹת תִּשְׁעִ֥ים וּשְׁנָֽיִם: פ
[סא] וְאֵ֗לֶּה הָעוֹלִים֙ מִתֵּ֥ל מֶ֙לַח֙ תֵּ֣ל חַרְשָׁ֔א כְּר֥וּב אַדּ֖וֹן וְאִמֵּ֑ר וְלֹ֣א יָכְל֗וּ לְהַגִּ֤יד בֵּית־אֲבֹתָם֙ וְזַרְעָ֔ם אִ֥ם מִיִּשְׂרָאֵ֖ל הֵֽם: ס
[סב] בְּנֵי־דְלָיָ֥ה בְנֵֽי־טוֹבִיָּ֖ה בְּנֵ֣י נְקוֹדָ֑א שֵׁ֥שׁ מֵא֖וֹת וְאַרְבָּעִ֥ים וּשְׁנָֽיִם: ס
[סג] וּמִן־הַכֹּ֣הֲנִ֔ים בְּנֵ֥י חֳבַיָּ֖ה בְּנֵ֣י הַקּ֑וֹץ בְּנֵ֣י בַרְזִלַּ֗י אֲשֶׁ֣ר לָ֠קַח מִבְּנ֞וֹת בַּרְזִלַּ֤י הַגִּלְעָדִי֙ אִשָּׁ֔ה וַיִּקָּרֵ֖א עַל־שְׁמָֽם:
[סד] אֵ֗לֶּה בִּקְשׁ֧וּ כְתָבָ֛ם הַמִּתְיַחְשִׂ֖ים וְלֹ֣א נִמְצָ֑א וַיְגֹאֲל֖וּ מִן־הַכְּהֻנָּֽה:
[סה] וַיֹּ֤אמֶר הַתִּרְשָׁ֙תָא֙ לָהֶ֔ם אֲשֶׁ֥ר לֹא־יֹאכְל֖וּ מִקֹּ֣דֶשׁ הַקֳּדָשִׁ֑ים עַ֛ד עֲמֹ֥ד הַכֹּהֵ֖ן לְאוּרִ֥ים וְתֻמִּיֽם:
[סו] כָּל־הַקָּהָ֖ל כְּאֶחָ֑ד אַרְבַּ֣ע רִבּ֔וֹא אַלְפַּ֖יִם שְׁלֹשׁ־מֵא֥וֹת וְשִׁשִּֽׁים:
[סז] מִ֠לְּבַד עַבְדֵיהֶ֤ם וְאַמְהֹֽתֵיהֶם֙ אֵ֔לֶּה שִׁבְעַ֣ת אֲלָפִ֔ים שְׁלֹ֥שׁ מֵא֖וֹת שְׁלֹשִׁ֣ים וְשִׁבְעָ֑ה וְלָהֶ֗ם מְשֹֽׁרֲרִים֙ וּמְשֹׁ֣רֲר֔וֹת מָאתַ֖יִם וְאַרְבָּעִ֥ים וַחֲמִשָּֽׁה: ס
[סח] גְּמַלִּ֕ים אַרְבַּ֥ע מֵא֖וֹת שְׁלֹשִׁ֣ים וַחֲמִשָּׁ֑ה חֲמֹרִ֕ים שֵׁ֣שֶׁת אֲלָפִ֔ים שְׁבַ֥ע מֵא֖וֹת וְעֶשְׂרִֽים:
[סט] וּמִקְצָת֙ רָאשֵׁ֣י הָאָב֔וֹת נָתְנ֖וּ לַמְּלָאכָ֑ה הַתִּרְשָׁ֜תָא נָתַ֣ן לָאוֹצָ֗ר זָהָ֞ב דַּרְכְּמֹנִ֥ים אֶ֙לֶף֙ מִזְרָק֣וֹת חֲמִשִּׁ֔ים כָּתְנוֹת֙ כֹּֽהֲנִ֔ים שְׁלֹשִׁ֖ים וַחֲמֵ֥שׁ מֵאֽוֹת: ס
[ע] וּמֵרָאשֵׁ֣י הָאָב֗וֹת נָֽתְנוּ֙ לְאוֹצַ֣ר הַמְּלָאכָ֔ה זָהָ֕ב דַּרְכְּמוֹנִ֖ים שְׁתֵּ֣י רִבּ֑וֹת וְכֶ֕סֶף מָנִ֖ים אַלְפַּ֥יִם וּמָאתָֽיִם:
[עא] וַאֲשֶׁ֣ר נָתְנוּ֘ שְׁאֵרִ֣ית הָעָם֒ זָהָ֗ב דַּרְכְּמֹנִים֙ שְׁתֵּ֣י רִבּ֔וֹא וְכֶ֖סֶף מָנִ֣ים אַלְפָּ֑יִם וְכָתְנֹ֥ת כֹּהֲנִ֖ים שִׁשִּׁ֥ים וְשִׁבְעָֽה:
[עב] וַיֵּשְׁב֣וּ הַכֹּהֲנִ֣ים וְהַלְוִיִּ֡ם וְהַשּׁוֹעֲרִים֩ וְהַמְשֹׁרֲרִ֨ים וּמִן־הָעָ֧ם וְהַנְּתִינִ֛ים וְכָל־יִשְׂרָאֵ֖ל בְּעָרֵיהֶ֑ם ס וַיִּגַּע֙ הַחֹ֣דֶשׁ הַשְּׁבִיעִ֔י וּבְנֵ֥י יִשְׂרָאֵ֖ל בְּעָרֵיהֶֽם:

פרק ז
(א) ויפקדו - ג': ש"ב ב , ל; *נחמ' ז , א; יב , מד. השוערים - ח' מלא בסיפרא (בלישנא): *עז' ב , ע; נחמ' ז , א , עב; י , כט , מ; יא , יט; יב , כה; יג , ה. השוערים - י' מלא (בלישנא): עז' ב , ע; *נחמ' ז , א , עב; י , כט , מ; יא , יט; יב , כה; יג , ה; דה"ב כג , יט; לד , יג. השוערים והמשררים - ד' (בלישנא): *נחמ' ז , א , עב; י , כט , מ. (ב) כאיש - כ': במ' יד , טו; שו' ו , טז; כ , א , ח , יא; ש"א יא , ז; ש"ב יט , טו; יש' מב , יג; סו , יג; יר' ו , כג; יד , ט; כג , ט; נ , מב; זכ' ד , א; תה' לח , טו; מש' ו , יא; כד , לד; עז' ג , א; נחמ' ז , ב; ח , א. (ג) ויאמר - ד' דכתיב 'ויאמר' וקרי 'ואמר': ש"ב א , ח; זכ' ד , ב; *נחמ' ה , ט; ז , ג. עד - י"ז פסוקים 'עד ועד': ראה נחמ' ג , כד. (ד) וגדלה - ב' , חד מלא וחד חסר: קה' ט , יג; *נחמ' ז , ד. (ה) אל - לבי - ב' (בסיפרא): נחמ' ב , יב; ז , ה. ואת - העם - י"ב: בר' יד , טז; מז , כא; במ' יג , יח; *דב' ב , ד; יהו' ו , י; שו' ט , מה; ש"א לא , ט; ש"ב יב , לא; יר' כא , ז; נחמ' ז , ה; דה"א י , ט; כ , ג. העולים - ב' מלא: *נחמ' ז , ה , סא. בראשונה - ח' מלא: *דב' יג , י; ש"ב ז , י; יר' ז , יב; מש' כ , כא; נחמ' ז , ה; דה"א יא , ו (פעמיים); יז , ט. (ו) אלה - ד' ראשי פסוקים בסיפרא: עז' ב , סב; נחמ' ז , ו , סד; יב , כו. אשר הגלה - י"א זוגין מן ב' בענינא בטעמא , חד זקף לרומא וחד נחית לתהומא (כלומר: זוגות של שתי מלים או צירופי מלים זהים בקטע אחד או בהקשרים דומים , המוטעמים פעם בטעם , שסימנו הגראפי בא מעל לאות , והוא לרוב זקף; ופעם בטעם הבא מתחת לאות , והוא לרוב תביר; ושניהם מהווים גם הדרכה מוסיקלית באשר לגובה הצליל או נמיכותו , בו תיקרא המלה): שמ' ו , ט , יב. - *וי' כג , יב , יט. - כו , לט , מ. - יהו' א , א; שו' א , א. - ש"א ב , כו; ג , א. - ש"ב ו , ז; דה"א יג , י. - ש"ב ח , ג; דה"א יח , ג. - מ"ב כא , ח; דה"ב לג , ח. - יח' ד , יא , טז. - חב' א , ז; זכ' י , ד. - עז' ב , א; נחמ' ז , ו. וישובו לירושלם ('שיבה לירושלם') - ה': זכ' א , טז; עז' ב , א; *נחמ' ז , ו; דה"ב יט , א; לד , ז. (ז) הבאים - ג' ראשי פסוקים: יש' כז , ו; עז' ח , לה; נחמ' ז , ז. בלשן - ב': עז' ב , ב; נחמ' ז , ז. אנשי עם ישראל - ב': עז' ב , ב; נחמ' ז , ז. (יא) ישוע ויואב - ח' זוגין מחלפין , קדמיה לא נסיב ו"ו ותיניניא נסיב ו"ו: בר' יד , א , ט. - שמ' כה , ו; לה , ח. - שמ' כה , ז; לה , ט. - וי' יא , ג; דב' יד , ו. - מש' ט , ד , טז. - עז' ב , ו; *נחמ' ז , יא. - עז' ב , סד; נחמ' ז , סו. - דה"ב א , יא , יב. (ב'אכלה ואכלה' יש דוגמא נוספת: עז' ב , נט; נחמ' ז , סא). (יב) אלף מאתים - ז' (בסיפרא): *עז' ב , ז , יב , לא , לח; נחמ' ז , יב , לד , מא. (יד) בני זכי - ב': עז' ב , ט; נחמ' ז , יד. (טו) בנוי - ז' (בלישנא): ראה נחמ' ג , כד. (טז) בני בבי - ב': עז' ב , יא; נחמ' ז , טז. בבי - ב' זקף: עז' ב , יא; נחמ' ז , טז. (כא) לחזקיה - ב': *מ"ב יח , י; נחמ' ז , כא. לחזקיה - י"ב (בלישנא): מ"ב יח , א , י , יג , יד (פעמיים) , טו , טז (פעמיים); צפ' א , א; מש' כה , א; נחמ' ז , כא; י , יח. (כג) בצי - ב' (זקף קמץ): עז' ב , יז; נחמ' ז , כג. (כט) אנשי קרית יערים - ב': ש"א ז , א; *נחמ' ז , כט. (ל) וגבע - ב' (זקף קמץ): עז' ב , כו; נחמ' ז , ל. (לא) מכמס - ב' כתיב סמ"ך: עז' ב , כז; נחמ' ז , לא. (לב) והעי - ב' (זקף קמץ): עז' ב , כח; נחמ' ז , לב. (לד) אחר אלף - ב': עז' ב , לא; נחמ' ז , לד. אלף מאתים - ז' (בסיפרא): ראה לעיל , יב. (לז) ואנו - ג' חסר: דב' כא , יז; איוב יח , יב; *נחמ' ז , לז. (לט) הכהנים - ג' ראשי פסוקים: יר' ב , ח; עז' ב , לו; נחמ' ז , לט. (מא) אלף מאתים - ז' (בסיפרא): ראה לעיל , יב. (מג) הלוים - ג' ראשי פסוקים בסיפרא: עז' ב , מ; נחמ' ז , מג; יב , כב. (מה) שלם - ו' חסר בכתובים (בלישנא): עז' י , כד; נחמ' ז , מה; דה"א ד , כה; ט , לא; דה"ב כח , יב; לד , כב. שבי - ב' וחסר: עז' ב , מב; נחמ' ז , מה. (מו) צחא - ג' (חסר ומלא בלישנא): עז' ב , מג; נחמ' ז , מו; יא , כא. חשפא - ג' , ב' כתיב אל"ף וחד כתיב ה"א: יח' ד , ז; עז' ב , מג; נחמ' ז , מו. טבעות - ז' מלא (בלישנא): שמ' כח , כג (פעמיים) , כו , כז; יש' ג , כא; עז' ב , מג; נחמ' ז , מו. (מט) גחר - ב' , חד פתח וחד קמץ: עז' ב , מז; נחמ' ז , מט. (נג) חקופא - ב': עז' ב , נא; נחמ' ז , נג. (נה) ברקוס - ב': עז' ב , נג; נחמ' ז , נה. (נז) סוטי - ב' , חד חסר וחד מלא: עז' ב , נה; נחמ' ז , נז. (נח) יעלא - ב' , חד כתיב אל"ף וחד כתיב ה"א: עז' ב , נו; נחמ' ז , נח. (סא) העולים - ב' מלא: *נחמ' ז , ה , סא. ואמר - ח' זוגין מחלפין קדמיה לא נסיב ו"ו ותיניניא נסיב ו"ו: ראה לעיל , יא. אבתם - ב' חסר בכתובים: עז' י , טז; נחמ' ז , סא. אבתם - ה' חסר: מ"א ט , ט; יד , כב; מ"ב יז , מא; עז' י , טז; *נחמ' ז , סא. וכל התורה דכותהון בר מן ב': במ' א , טז; יז , יח. אם - ג' בטעמא (מרכא): במ' יג , יט; עז' ב , נט; נחמ' ז , סא. הם - י"ב בסופי פסוקים: *בר' מ , יב , יח; שמ' יח , כו; כט , לג; וי' יא , מב; *במ' א , טז; שו' ח , כד; מ"א כ , ג; יש' מט , כא; יח' יב , ב; עז' ב , נט; *נחמ' ז , סא. (סב) דליה - ג': עז' ב , ס; נחמ' ו , י; ז , סב. (סג) ומן - הכהנים - ג': עז' ז , ז; נחמ' ז , סג; דה"א ט , י. ויקרא - ה': ש"ב יח , ט , יח; יח' כ , כט; *עז' ב , סא; נחמ' ז , סג. (סד) אלה - ד' ראשי פסוקים בסיפרא: עז' ב , סב; נחמ' ז , ו , סד; יב , כו. (סה) עמד הכהן - י"ד זוגין , חד לית בה ה"א ותינינא כתב ה"א: בר' מא , ב , ד. - *שמ' ט , ח , י. - כח , כד; לט , יז. - ש"א כג , יט; כו , א. - ש"ב יח , כט , לב. - כ , יד , טו. - יש' ב , יא , יז. - יר' ל , יח; לא , לז. - לב , יא , יב. - יח' לד , ז , ט. - מ , כג , כז. - תה' נ , ו; צז , ו. - *עז' ב , סג; נחמ' ז , סה. - דה"א ח , כח; כג , ט. לאורים ותמים - י"ד זוגין , קדמאה נסיב למ"ד ותינינא לא נסיב: בר' יז , ד , ה. - שמ' כז , ג; לח , ג. - במ' טז , כד , כז. - *במ' כב , ד , י. - דב' כב , יט , כט. - יהו' טו , ז; יח , יז. - ש"ב יח , כח; כד , כ. - מש' י , יז; טו , כד. - כ , טז; כז , יג. - כא , ט; כה , כד. - שה"ש ב , ו; ח , ג. - *דנ' ה , ב , ג. - עז' ב , סג; נחמ' ז , סה. - דה"ב יח , כא , כב. (סו) כאחד - ז' (בקמץ): יש' סה , כה; קה' יא , ו; *עז' ב , סד; ג , ט; ו , כ; נחמ' ז , סו; דה"ב ה , יג. רבוא - ג' מלא: עז' ב , סד; נחמ' ז , סו , עא. שלש - מאות וששים - ח' זוגין מחלפין , קדמיה לא נסיב ו"ו ותיניניא נסיב ו"ו: ראה לעיל , יא. (סז) ולהם - ח': בר' ו , כא; מג , לב; *דב' א , לט; שו' ו , ה; *עז' ב , סה; ו , כ; נחמ' ז , סז; דה"ב כה , יד. (סט) כתנות - ב' מלא: בר' ג , כא; נחמ' ז , סט. (ע) ומראשי - ג': עז' ב , סח; *נחמ' ז , ע; דה"ב יט , ח. דרכמונים - ב' מלא: עז' ב , סט; נחמ' ז , ע. רבות - ב' , חד כתיב אל"ף: עז' ב , סט; נחמ' ז , ע. (עא) ואשר - י"ב ראשי פסוקים: ראה נחמ' ה , יח. רבוא - ג' מלא: עז' ב , סד; נחמ' ז , סו , עא. (עב) והשוערים - ח' מלא בסיפרא (בלישנא): ראה נחמ' ז , א. והשוערים - י' מלא (בלישנא): ראה נחמ' ז , א. והשוערים והמשררים - ד' (בלישנא): *נחמ' ז , א , עב; י , כט , מ. וכל - ישראל - ל"ה (באמצע פסוק): דב' כא , כא; יהו' ג , יז; ז , כד; ח , טו , כא; י , טו , כט , לא , לד , לו , לח , מג; ש"א יז , יא; ש"ב ג , לז; ד , א; יח , יז; מ"א ח , סב , סה; יא , טז; טו , כז; טז , יז; מ"ב ט , יד; עז' ב , ע; ח , כה; י , ה; נחמ' ז , עב; דה"א יא , ד; יג , ו , ח; דה"ב ז , ו , ח; י , ג; יב , א; יג , ד , טו. וכל ראשי פסוקים כותהון. ובני ישראל - ה"י (באמצע פסוק): *שמ' יד , ח; טו , א , יט; *וי' כד , כג; במ' כו , ד; *דב' ד , מו; יהו' י , כ; יב , ו , ז; שו' כ , לב; ש"א יד , יח; ש"ב כא , ב; הו' ב , ב; *עז' ג , א; *נחמ' ז , עב. וכל ראשי פסוקים דכותהון.