מאגר הכתר דברים פרק יט עם עין המסורה

פרק יט
[א] כִּֽי־יַכְרִ֞ית יְהוָ֤ה אֱלֹהֶ֙יךָ֙ אֶת־הַגּוֹיִ֔ם אֲשֶׁר֙ יְהוָ֣ה אֱלֹהֶ֔יךָ נֹתֵ֥ן לְךָ֖ אֶת־אַרְצָ֑ם וִירִשְׁתָּ֕ם וְיָשַׁבְתָּ֥ בְעָרֵיהֶ֖ם וּבְבָתֵּיהֶֽם:
[ב] שָׁל֥וֹשׁ עָרִ֖ים תַּבְדִּ֣יל לָ֑ךְ בְּת֣וֹךְ אַרְצְךָ֔ אֲשֶׁר֙ יְהוָ֣ה אֱלֹהֶ֔יךָ נֹתֵ֥ן לְךָ֖ לְרִשְׁתָּֽהּ:
[ג] תָּכִ֣ין לְךָ֘ הַדֶּרֶךְ֒ וְשִׁלַּשְׁתָּ֙ אֶת־גְּב֣וּל אַרְצְךָ֔ אֲשֶׁ֥ר יַנְחִֽילְךָ֖ יְהוָ֣ה אֱלֹהֶ֑יךָ וְהָיָ֕ה לָנ֥וּס שָׁ֖מָּה כָּל־רֹצֵֽחַ:
[ד] וְזֶה֙ דְּבַ֣ר הָרֹצֵ֔חַ אֲשֶׁר־יָנ֥וּס שָׁ֖מָּה וָחָ֑י אֲשֶׁ֨ר יַכֶּ֤ה אֶת־רֵעֵ֙הוּ֙ בִּבְלִי־דַ֔עַת וְה֛וּא לֹא־שֹׂנֵ֥א ל֖וֹ מִתְּמֹ֥ל שִׁלְשֹֽׁם:
[ה] וַאֲשֶׁר֩ יָבֹ֨א אֶת־רֵעֵ֥הוּ בַיַּעַר֘ לַחְטֹ֣ב עֵצִים֒ וְנִדְּחָ֨ה יָד֤וֹ בַגַּרְזֶן֙ לִכְרֹ֣ת הָעֵ֔ץ וְנָשַׁ֤ל הַבַּרְזֶל֙ מִן־הָעֵ֔ץ וּמָצָ֥א אֶת־רֵעֵ֖הוּ וָמֵ֑ת ה֗וּא יָנ֛וּס אֶל־אַחַ֥ת הֶעָרִים־הָאֵ֖לֶּה וָחָֽי:
[ו] פֶּן־יִרְדֹּף֩ גֹּאֵ֨ל הַדָּ֜ם אַחֲרֵ֣י הָרֹצֵ֗חַ כִּי־יֵחַם֘ לְבָבוֹ֒ וְהִשִּׂיג֛וֹ כִּֽי־יִרְבֶּ֥ה הַדֶּ֖רֶךְ וְהִכָּ֣הוּ נָ֑פֶשׁ וְלוֹ֙ אֵ֣ין מִשְׁפַּט־מָ֔וֶת כִּ֠י לֹ֣א שֹׂנֵ֥א ה֛וּא ל֖וֹ מִתְּמ֥וֹל שִׁלְשֽׁוֹם:
[ז] עַל־כֵּ֛ן אָנֹכִ֥י מְצַוְּךָ֖ לֵאמֹ֑ר שָׁלֹ֥שׁ עָרִ֖ים תַּבְדִּ֥יל לָֽךְ:
[ח] וְאִם־יַרְחִ֞יב יְהוָ֤ה אֱלֹהֶ֙יךָ֙ אֶת־גְּבֻ֣לְךָ֔ כַּאֲשֶׁ֥ר נִשְׁבַּ֖ע לַאֲבֹתֶ֑יךָ וְנָ֤תַן לְךָ֙ אֶת־כָּל־הָאָ֔רֶץ אֲשֶׁ֥ר דִּבֶּ֖ר לָתֵ֥ת לַאֲבֹתֶֽיךָ:
[ט] כִּֽי־תִשְׁמֹר֩ אֶת־כָּל־הַמִּצְוָ֨ה הַזֹּ֜את לַעֲשֹׂתָ֗הּ אֲשֶׁ֨ר אָנֹכִ֣י מְצַוְּךָ֘ הַיּוֹם֒ לְאַהֲבָ֞ה אֶת־יְהוָ֧ה אֱלֹהֶ֛יךָ וְלָלֶ֥כֶת בִּדְרָכָ֖יו כָּל־הַיָּמִ֑ים וְיָסַפְתָּ֨ לְךָ֥ עוֹד֙ שָׁלֹ֣שׁ עָרִ֔ים עַ֖ל הַשָּׁלֹ֥שׁ הָאֵֽלֶּה:
[י] וְלֹ֤א יִשָּׁפֵךְ֙ דָּ֣ם נָקִ֔י בְּקֶ֣רֶב אַרְצְךָ֔ אֲשֶׁר֙ יְהוָ֣ה אֱלֹהֶ֔יךָ נֹתֵ֥ן לְךָ֖ נַחֲלָ֑ה וְהָיָ֥ה עָלֶ֖יךָ דָּמִֽים: פ
[יא] וְכִֽי־יִהְיֶ֥ה אִישׁ֙ שֹׂנֵ֣א לְרֵעֵ֔הוּ וְאָ֤רַב לוֹ֙ וְקָ֣ם עָלָ֔יו וְהִכָּ֥הוּ נֶ֖פֶשׁ וָמֵ֑ת וְנָ֕ס אֶל־אַחַ֖ת הֶעָרִ֥ים הָאֵֽל:
[יב] וְשָֽׁלְחוּ֙ זִקְנֵ֣י עִיר֔וֹ וְלָקְח֥וּ אֹת֖וֹ מִשָּׁ֑ם וְנָתְנ֣וּ אֹת֗וֹ בְּיַ֛ד גֹּאֵ֥ל הַדָּ֖ם וָמֵֽת:
[יג] לֹא־תָח֥וֹס עֵינְךָ֖ עָלָ֑יו וּבִעַרְתָּ֧ דַֽם־הַנָּקִ֛י מִיִּשְׂרָאֵ֖ל וְט֥וֹב לָֽךְ: ס
[ששי] [יד] לֹ֤א תַסִּיג֙ גְּב֣וּל רֵֽעֲךָ֔ אֲשֶׁ֥ר גָּבְל֖וּ רִאשֹׁנִ֑ים בְּנַחֲלָֽתְךָ֙ אֲשֶׁ֣ר תִּנְחַ֔ל בָּאָ֕רֶץ אֲשֶׁר֙ יְהוָ֣ה אֱלֹהֶ֔יךָ נֹתֵ֥ן לְךָ֖ לְרִשְׁתָּֽהּ: ס
[טו] לֹֽא־יָקוּם֩ עֵ֨ד אֶחָ֜ד בְּאִ֗ישׁ לְכָל־עָוֺן֙ וּלְכָל־חַטָּ֔את בְּכָל־חֵ֖טְא אֲשֶׁ֣ר יֶחֱטָ֑א עַל־פִּ֣י׀ שְׁנֵ֣י עֵדִ֗ים א֛וֹ עַל־פִּ֥י שְׁלֹשָֽׁה־עֵדִ֖ים יָק֥וּם דָּבָֽר:
[טז] כִּֽי־יָק֥וּם עֵד־חָמָ֖ס בְּאִ֑ישׁ לַעֲנ֥וֹת בּ֖וֹ סָרָֽה:
[יז] וְעָמְד֧וּ שְׁנֵֽי־הָאֲנָשִׁ֛ים אֲשֶׁר־לָהֶ֥ם הָרִ֖יב לִפְנֵ֣י יְהוָ֑ה לִפְנֵ֤י הַכֹּֽהֲנִים֙ וְהַשֹּׁ֣פְטִ֔ים אֲשֶׁ֥ר יִהְי֖וּ בַּיָּמִ֥ים הָהֵֽם:
[יח] וְדָרְשׁ֥וּ הַשֹּׁפְטִ֖ים הֵיטֵ֑ב וְהִנֵּ֤ה עֵֽד־שֶׁ֙קֶר֙ הָעֵ֔ד שֶׁ֖קֶר עָנָ֥ה בְאָחִֽיו:
[יט] וַעֲשִׂ֣יתֶם ל֔וֹ כַּאֲשֶׁ֥ר זָמַ֖ם לַעֲשׂ֣וֹת לְאָחִ֑יו וּבִעַרְתָּ֥ הָרָ֖ע מִקִּרְבֶּֽךָ:
[כ] וְהַנִּשְׁאָרִ֖ים יִשְׁמְע֣וּ וְיִרָ֑אוּ וְלֹא־יֹסִ֨פוּ לַעֲשׂ֜וֹת ע֗וֹד כַּדָּבָ֥ר הָרָ֛ע הַזֶּ֖ה בְּקִרְבֶּֽךָ:
[כא] וְלֹ֥א תָח֖וֹס עֵינֶ֑ךָ נֶ֣פֶשׁ בְּנֶ֗פֶשׁ עַ֤יִן בְּעַ֙יִן֙ שֵׁ֣ן בְּשֵׁ֔ן יָ֥ד בְּיָ֖ד רֶ֥גֶל בְּרָֽגֶל: ס

פרק יט
(ב) שלוש - ג' מלא בתורה: במ' כב , לב; דב' טז , טז; יט , ב. שלוש - ה' מלא באורייתא ובנביאייא: ראה דב' טז , טז. נתן לך לרשתה - ג': דב' יט , ב , יד; כא , א. (ג) ושלשת - ב': דב' יט , ג; ש"א כ , יט. (ד) וזה - כ"ג ראשי פסוקים: ראה דב' יד , יב. מתמל - ד' חסר (בלישנא): בר' לא , ה; *שמ' כא , כט; *דב' ד , מב; יט , ד. (ה) ואשר - י"ב ראשי פסוקים: ראה דב' יא , ד. ואשר יבא - ב': במ' כז , יז; *דב' יט , ה. ונשל - ג': *דב' ז , א , כב; יט , ה. (ו) יחם - ב' , חד בפתח וחד בקמץ: *דב' יט , ו; קה' ד , יא. אין משפט - ב' (חד בפתח וחד בקמץ): דב' יט , ו; יש' נט , טו. שלשום - ב' מלא בתורה: בר' לא , ב; *דב' יט , ו. (ח) כאשר נשבע לאבתיך - ד' (בלישנא): שמ' יג , יא; דב' יג , יח; יט , ח; כט , יב. את - כל - הארץ - י"ד (בלישנא): בר' יג , טו; במ' יד , כא; דב' יט , ח; לד , א; יהו' ב , ג , כד; ט , כד; י , מ; יא , טז , כג; כא , מא; יר' מה , ד; נא , כה; תה' עב , יט. (ט) לעשתה - ב': דב' יא , כב; יט , ט. וללכת - ד': *דב' יט , ט; כו , יז; יהו' כב , ה; איוב לד , ח. (י) ולא - י"ז ראשי פסוקים בסיפרא: ראה דב' א , כו. (יא) וכי - ח' ראשי פסוקים בסיפרא: ראה דב' יד , כד. וכי - יהיה - ד': וי' יג , מב; *דב' טו , כא; יט , יא; כא , כב. האל - ח' (לשון חול): ראה דב' ד , מב. (יג) דם - הנקי - ג': *דב' יט , יג; מ"ב כד , ד; יר' כב , יז. וטוב - י"ז: ראה דב' ה , ל. (יד) ראשנים - ה': ראה דב' ד , לב. תנחל - ד' זוגין מן ב' ב' זקפא , אחד בקמץ ואחד בפתח (ארבעה זוגות מלים מוטעמות בזקף , המלה מנוקדת פעם בקמץ ופעם בפתח): בר' לב , יב; ש"א יז , ט. - בר' מא , ה; מ"א יט , ה. - במ' יח , כ; דב' יט , יד. - מ"א יא , לז; יש' מז , ג. תנחל - ב' (בתורה , אחד בפתח ואחד בקמץ): במ' יח , כ; דב' יט , יד. נתן לך לרשתה - ג': דב' יט , ב , יד; כא , א. (יז) שני - האנשים - ד': *דב' יט , יז; יהו' ב , ד , כג; מ"א כא , יג. הריב - ב': דב' יט , יז; מש' יז , יד. (יח) השפטים - ד': *דב' יט , יח; מ"ב כג , כב; רות א , א; דה"ב יט , ו. וחד: והשפטים - דב' יט , יז. (כ) ויראו - ו' (בקמץ , ד' חסר וב' מלא): ראה דב' יז , יג. (כא) ולא - י"ז ראשי פסוקים בסיפרא: ראה דב' א , כו. ולא תחוס - ה': ראה דב' יג , ט. עינך - ו' חסר (בלישנא): ראה דב' טו , יח. עין בעין - ג': במ' יד , יד; *דב' יט , כא; יש' נב , ח.