מאגר הכתר דברים פרק לד עם עין המסורה

פרק לד
[א] וַיַּ֨עַל מֹשֶׁ֜ה מֵעַרְבֹ֤ת מוֹאָב֙ אֶל־הַ֣ר נְב֔וֹ רֹ֚אשׁ הַפִּסְגָּ֔ה אֲשֶׁ֖ר עַל־פְּנֵ֣י יְרֵח֑וֹ וַיַּרְאֵ֨הוּ יְהוָ֧ה אֶת־כָּל־הָאָ֛רֶץ אֶת־הַגִּלְעָ֖ד עַד־דָּֽן:
[ב] וְאֵת֙ כָּל־נַפְתָּלִ֔י וְאֶת־אֶ֥רֶץ אֶפְרַ֖יִם וּמְנַשֶּׁ֑ה וְאֵת֙ כָּל־אֶ֣רֶץ יְהוּדָ֔ה עַ֖ד הַיָּ֥ם הָאַחֲרֽוֹן:
[ג] וְאֶת־הַנֶּ֗גֶב וְֽאֶת־הַכִּכָּ֞ר בִּקְעַ֧ת יְרֵח֛וֹ עִ֥יר הַתְּמָרִ֖ים עַד־צֹֽעַר:
[ד] וַיֹּ֨אמֶר יְהוָ֜ה אֵלָ֗יו זֹ֤את הָאָ֙רֶץ֙ אֲשֶׁ֣ר נִ֠שְׁבַּעְתִּי לְאַבְרָהָ֨ם לְיִצְחָ֤ק וּֽלְיַעֲקֹב֙ לֵאמֹ֔ר לְזַרְעֲךָ֖ אֶתְּנֶ֑נָּה הֶרְאִיתִ֣יךָ בְעֵינֶ֔יךָ וְשָׁ֖מָּה לֹ֥א תַעֲבֹֽר:
[ה] וַיָּ֨מָת שָׁ֜ם מֹשֶׁ֧ה עֶבֶד־יְהוָ֛ה בְּאֶ֥רֶץ מוֹאָ֖ב עַל־פִּ֥י יְהוָֽה:
[ו] וַיִּקְבֹּ֨ר אֹת֤וֹ בַגַּי֙ בְּאֶ֣רֶץ מוֹאָ֔ב מ֖וּל בֵּ֣ית פְּע֑וֹר וְלֹא־יָדַ֥ע אִישׁ֙ אֶת־קְבֻ֣רָת֔וֹ עַ֖ד הַיּ֥וֹם הַזֶּֽה:
[ז] וּמֹשֶׁ֗ה בֶּן־מֵאָ֧ה וְעֶשְׂרִ֛ים שָׁנָ֖ה בְּמֹת֑וֹ לֹא־כָהֲתָ֥ה עֵינ֖וֹ וְלֹא־נָ֥ס לֵחֹֽה:
[ח] וַיִּבְכּוּ֩ בְנֵ֨י יִשְׂרָאֵ֧ל אֶת־מֹשֶׁ֛ה בְּעַֽרְבֹ֥ת מוֹאָ֖ב שְׁלֹשִׁ֣ים י֑וֹם וַֽיִּתְּמ֔וּ יְמֵ֥י בְכִ֖י אֵ֥בֶל מֹשֶֽׁה:
[ט] וִיהוֹשֻׁ֣עַ בִּן־נ֗וּן מָלֵא֙ ר֣וּחַ חָכְמָ֔ה כִּֽי־סָמַ֥ךְ מֹשֶׁ֛ה אֶת־יָדָ֖יו עָלָ֑יו וַיִּשְׁמְע֨וּ אֵלָ֤יו בְּנֵֽי־יִשְׂרָאֵל֙ וַֽיַּעֲשׂ֔וּ כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה:
[י] וְלֹא־קָ֨ם נָבִ֥יא ע֛וֹד בְּיִשְׂרָאֵ֖ל כְּמֹשֶׁ֑ה אֲשֶׁר֙ יְדָע֣וֹ יְהוָ֔ה פָּנִ֖ים אֶל־פָּנִֽים:
[יא] לְכָל־הָ֨אֹתֹ֜ת וְהַמּוֹפְתִ֗ים אֲשֶׁ֤ר שְׁלָחוֹ֙ יְהוָ֔ה לַעֲשׂ֖וֹת בְּאֶ֣רֶץ מִצְרָ֑יִם לְפַרְעֹ֥ה וּלְכָל־עֲבָדָ֖יו וּלְכָל־אַרְצֽוֹ:
[יב] וּלְכֹל֙ הַיָּ֣ד הַחֲזָקָ֔ה וּלְכֹ֖ל הַמּוֹרָ֣א הַגָּד֑וֹל אֲשֶׁר֙ עָשָׂ֣ה מֹשֶׁ֔ה לְעֵינֵ֖י כָּל־יִשְׂרָאֵֽל:

פרק לד
(א) אל - הר - י"ו: ראה דב' לב , מט. ויראהו - ב' (בפתח): דב' לד , א; מ"ב ו , ו. את - כל - הארץ - י"ד (בלישנא): ראה דב' יט , ח. (ד) ויאמר יי' - ה' בטעמא (אזלא גרש , בראשי פסוקים) בסיפרא: ראה דב' א , מב. ויאמר יי' אליו - ו' ראשי פסוקים (מלא וחסר): שמ' ד , יא; דב' לד , ד; מ"א ט , ג; יט , טו; יח' ט , ד; הו' א , ד. (ו) ויקבר אתו - ב': דב' לד , ו; מ"ב כא , כו. בגי - ג' חסר אל"ף (בלישנא): דב' לד , ו; יהו' ח , יא; מי' א , ו. בגי - ט' מלים חסר אל"ף בתורה: ראה דב' יא , יב. ולא - ידע - י"א: *בר' יט , לג , לה; לא , לב; לט , ו; וי' ה , יז; דב' לד , ו; יש' מב , כה; מש' ז , כג; ט , יח; איוב לה , טו; קה' ו , ה. ולא - ידע - ו' בתורה: בר' יט , לג , לה; לא , לב; לט , ו; וי' ה , יז; דב' לד , ו. (ז) ומשה - ז' ראשי פסוקים: שמ' ג , א; ז , ז; יא , י; יט , ג; לג , ז; דב' לד , ז; דה"א כג , יד. במתו - ג' חסר (בלישנא): *במ' לג , לט; דב' לד , ז; מ"ב טו , ה. עינו - ח': ראה דב' כח , נד. (י) ולא - י"ז ראשי פסוקים בסיפרא: ראה דב' א , כו. ולא - קם - ב': דב' לד , י; אס' ה , ט. וחד: לא קם - מ"ב כג , כה. פנים אל - פנים - ה': *בר' לב , לא; *שמ' לג , יא; דב' לד , י; שו' ו , כב; יח' כ , לה. (יא) והמופתים - ב' מלא בתורה (בלישנא): דב' ד , לד; לד , יא. וכל נביאייא דכותהון בר מן חד: ומפתים - יר' לב , כ. וכל כתיבייא דכותה חסר. (יב) ולכל - ד' ראשי פסוקים: בר' א , ל; שמ' יא , ז; דב' לד , יב; דה"א כג , לא. הגדול - ח' מלא בתורה: ראה דב' א , יט.