מאגר הכתר דברים פרק ד עם עין המסורה

פרק ד
[א] וְעַתָּ֣ה יִשְׂרָאֵ֗ל שְׁמַ֤ע אֶל־הַֽחֻקִּים֙ וְאֶל־הַמִּשְׁפָּטִ֔ים אֲשֶׁ֧ר אָנֹכִ֛י מְלַמֵּ֥ד אֶתְכֶ֖ם לַעֲשׂ֑וֹת לְמַ֣עַן תִּֽחְי֗וּ וּבָאתֶם֙ וִירִשְׁתֶּ֣ם אֶת־הָאָ֔רֶץ אֲשֶׁ֧ר יְהוָ֛ה אֱלֹהֵ֥י אֲבֹתֵיכֶ֖ם נֹתֵ֥ן לָכֶֽם:
[ב] לֹ֣א תֹסִ֗פוּ עַל־הַדָּבָר֙ אֲשֶׁ֤ר אָנֹכִי֙ מְצַוֶּ֣ה אֶתְכֶ֔ם וְלֹ֥א תִגְרְע֖וּ מִמֶּ֑נּוּ לִשְׁמֹ֗ר אֶת־מִצְוֺת֙ יְהוָ֣ה אֱלֹהֵיכֶ֔ם אֲשֶׁ֥ר אָנֹכִ֖י מְצַוֶּ֥ה אֶתְכֶֽם:
[ג] עֵֽינֵיכֶם֙ הָרֹא֔וֹת אֵ֛ת אֲשֶׁר־עָשָׂ֥ה יְהוָ֖ה בְּבַ֣עַל פְּע֑וֹר כִּ֣י כָל־הָאִ֗ישׁ אֲשֶׁ֤ר הָלַךְ֙ אַחֲרֵ֣י בַֽעַל־פְּע֔וֹר הִשְׁמִיד֛וֹ יְהוָ֥ה אֱלֹהֶ֖יךָ מִקִּרְבֶּֽךָ:
[ד] וְאַתֶּם֙ הַדְּבֵקִ֔ים בַּיהוָ֖ה אֱלֹהֵיכֶ֑ם חַיִּ֥ים כֻּלְּכֶ֖ם הַיּֽוֹם:
[שני] [ה] רְאֵ֣ה׀ לִמַּ֣דְתִּי אֶתְכֶ֗ם חֻקִּים֙ וּמִשְׁפָּטִ֔ים כַּאֲשֶׁ֥ר צִוַּ֖נִי יְהוָ֣ה אֱלֹהָ֑י לַעֲשׂ֣וֹת כֵּ֔ן בְּקֶ֣רֶב הָאָ֔רֶץ אֲשֶׁ֥ר אַתֶּ֛ם בָּאִ֥ים שָׁ֖מָּה לְרִשְׁתָּֽהּ:
[ו] וּשְׁמַרְתֶּם֘ וַעֲשִׂיתֶם֒ כִּ֣י הִ֤וא חָכְמַתְכֶם֙ וּבִ֣ינַתְכֶ֔ם לְעֵינֵ֖י הָעַמִּ֑ים אֲשֶׁ֣ר יִשְׁמְע֗וּן אֵ֚ת כָּל־הַחֻקִּ֣ים הָאֵ֔לֶּה וְאָמְר֗וּ רַ֚ק עַם־חָכָ֣ם וְנָב֔וֹן הַגּ֥וֹי הַגָּד֖וֹל הַזֶּֽה:
[ז] כִּ֚י מִי־ג֣וֹי גָּד֔וֹל אֲשֶׁר־ל֥וֹ אֱלֹהִ֖ים קְרֹבִ֣ים אֵלָ֑יו כַּיהוָ֣ה אֱלֹהֵ֔ינוּ בְּכָל־קָרְאֵ֖נוּ אֵלָֽיו:
[ח] וּמִי֙ גּ֣וֹי גָּד֔וֹל אֲשֶׁר־ל֛וֹ חֻקִּ֥ים וּמִשְׁפָּטִ֖ים צַדִּיקִ֑ם כְּכֹל֙ הַתּוֹרָ֣ה הַזֹּ֔את אֲשֶׁ֧ר אָנֹכִ֛י נֹתֵ֥ן לִפְנֵיכֶ֖ם הַיּֽוֹם:
[ט] רַ֡ק הִשָּׁ֣מֶר לְךָ֩ וּשְׁמֹ֨ר נַפְשְׁךָ֜ מְאֹ֗ד פֶּן־תִּשְׁכַּ֨ח אֶת־הַדְּבָרִ֜ים אֲשֶׁר־רָא֣וּ עֵינֶ֗יךָ וּפֶן־יָס֙וּרוּ֙ מִלְּבָ֣בְךָ֔ כֹּ֖ל יְמֵ֣י חַיֶּ֑יךָ וְהוֹדַעְתָּ֥ם לְבָנֶ֖יךָ וְלִבְנֵ֥י בָנֶֽיךָ:
[י] י֗וֹם אֲשֶׁ֨ר עָמַ֜דְתָּ לִפְנֵ֨י יְהוָ֣ה אֱלֹהֶיךָ֘ בְּחֹרֵב֒ בֶּאֱמֹ֨ר יְהוָ֜ה אֵלַ֗י הַקְהֶל־לִי֙ אֶת־הָעָ֔ם וְאַשְׁמִעֵ֖ם אֶת־דְּבָרָ֑י אֲשֶׁ֨ר יִלְמְד֜וּן לְיִרְאָ֣ה אֹתִ֗י כָּל־הַיָּמִים֙ אֲשֶׁ֨ר הֵ֤ם חַיִּים֙ עַל־הָ֣אֲדָמָ֔ה וְאֶת־בְּנֵיהֶ֖ם יְלַמֵּדֽוּן:
[יא] וַתִּקְרְב֥וּן וַתַּעַמְד֖וּן תַּ֣חַת הָהָ֑ר וְהָהָ֞ר בֹּעֵ֤ר בָּאֵשׁ֙ עַד־לֵ֣ב הַשָּׁמַ֔יִם חֹ֖שֶׁךְ עָנָ֥ן וַעֲרָפֶֽל:
[יב] וַיְדַבֵּ֧ר יְהוָ֛ה אֲלֵיכֶ֖ם מִתּ֣וֹךְ הָאֵ֑שׁ ק֤וֹל דְּבָרִים֙ אַתֶּ֣ם שֹׁמְעִ֔ים וּתְמוּנָ֛ה אֵינְכֶ֥ם רֹאִ֖ים זוּלָתִ֥י קֽוֹל:
[יג] וַיַּגֵּ֨ד לָכֶ֜ם אֶת־בְּרִית֗וֹ אֲשֶׁ֨ר צִוָּ֤ה אֶתְכֶם֙ לַעֲשׂ֔וֹת עֲשֶׂ֖רֶת הַדְּבָרִ֑ים וַֽיִּכְתְּבֵ֔ם עַל־שְׁנֵ֖י לֻח֥וֹת אֲבָנִֽים:
[יד] וְאֹתִ֞י צִוָּ֤ה יְהוָה֙ בָּעֵ֣ת הַהִ֔וא לְלַמֵּ֣ד אֶתְכֶ֔ם חֻקִּ֖ים וּמִשְׁפָּטִ֑ים לַעֲשֹׂתְכֶ֣ם אֹתָ֔ם בָּאָ֕רֶץ אֲשֶׁ֥ר אַתֶּ֛ם עֹבְרִ֥ים שָׁ֖מָּה לְרִשְׁתָּֽהּ:
[טו] וְנִשְׁמַרְתֶּ֥ם מְאֹ֖ד לְנַפְשֹׁתֵיכֶ֑ם כִּ֣י לֹ֤א רְאִיתֶם֙ כָּל־תְּמוּנָ֔ה בְּי֗וֹם דִּבֶּ֨ר יְהוָ֧ה אֲלֵיכֶ֛ם בְּחֹרֵ֖ב מִתּ֥וֹךְ הָאֵֽשׁ:
[טז] פֶּ֨ן־תַּשְׁחִת֔וּן וַעֲשִׂיתֶ֥ם לָכֶ֛ם פֶּ֖סֶל תְּמוּנַ֣ת כָּל־סָ֑מֶל תַּבְנִ֥ית זָכָ֖ר א֥וֹ נְקֵבָֽה:
[יז] תַּבְנִ֕ית כָּל־בְּהֵמָ֖ה אֲשֶׁ֣ר בָּאָ֑רֶץ תַּבְנִית֙ כָּל־צִפּ֣וֹר כָּנָ֔ף אֲשֶׁ֥ר תָּע֖וּף בַּשָּׁמָֽיִם:
[יח] תַּבְנִ֕ית כָּל־רֹמֵ֖שׂ בָּאֲדָמָ֑ה תַּבְנִ֛ית כָּל־דָּגָ֥ה אֲשֶׁר־בַּמַּ֖יִם מִתַּ֥חַת לָאָֽרֶץ:
[יט] וּפֶן־תִּשָּׂ֨א עֵינֶ֜יךָ הַשָּׁמַ֗יְמָה וְֽ֠רָאִיתָ אֶת־הַשֶּׁ֨מֶשׁ וְאֶת־הַיָּרֵ֜חַ וְאֶת־הַכּוֹכָבִ֗ים כֹּ֚ל צְבָ֣א הַשָּׁמַ֔יִם וְנִדַּחְתָּ֛ וְהִשְׁתַּחֲוִ֥יתָ לָהֶ֖ם וַעֲבַדְתָּ֑ם אֲשֶׁ֨ר חָלַ֜ק יְהוָ֤ה אֱלֹהֶ֙יךָ֙ אֹתָ֔ם לְכֹל֙ הָֽעַמִּ֔ים תַּ֖חַת כָּל־הַשָּׁמָֽיִם:
[כ] וְאֶתְכֶם֙ לָקַ֣ח יְהוָ֔ה וַיּוֹצִ֥א אֶתְכֶ֛ם מִכּ֥וּר הַבַּרְזֶ֖ל מִמִּצְרָ֑יִם לִהְי֥וֹת ל֛וֹ לְעַ֥ם נַחֲלָ֖ה כַּיּ֥וֹם הַזֶּֽה:
[כא] וַיהוָ֥ה הִתְאַנַּף־בִּ֖י עַל־דִּבְרֵיכֶ֑ם וַיִּשָּׁבַ֗ע לְבִלְתִּ֤י עָבְרִי֙ אֶת־הַיַּרְדֵּ֔ן וּלְבִלְתִּי־בֹא֙ אֶל־הָאָ֣רֶץ הַטּוֹבָ֔ה אֲשֶׁר֙ יְהוָ֣ה אֱלֹהֶ֔יךָ נֹתֵ֥ן לְךָ֖ נַחֲלָֽה:
[כב] כִּ֣י אָנֹכִ֥י מֵת֙ בָּאָ֣רֶץ הַזֹּ֔את אֵינֶ֥נִּי עֹבֵ֖ר אֶת־הַיַּרְדֵּ֑ן וְאַתֶּם֙ עֹֽבְרִ֔ים וִירִשְׁתֶּ֕ם אֶת־הָאָ֥רֶץ הַטּוֹבָ֖ה הַזֹּֽאת:
[כג] הִשָּׁמְר֣וּ לָכֶ֗ם פֶּֽן־תִּשְׁכְּחוּ֙ אֶת־בְּרִ֤ית יְהוָה֙ אֱלֹ֣הֵיכֶ֔ם אֲשֶׁ֥ר כָּרַ֖ת עִמָּכֶ֑ם וַעֲשִׂיתֶ֨ם לָכֶ֥ם פֶּ֙סֶל֙ תְּמ֣וּנַת כֹּ֔ל אֲשֶׁ֥ר צִוְּךָ֖ יְהוָ֥ה אֱלֹהֶֽיךָ:
[כד] כִּ֚י יְהוָ֣ה אֱלֹהֶ֔יךָ אֵ֥שׁ אֹכְלָ֖ה ה֑וּא אֵ֖ל קַנָּֽא: פ
[כה] כִּֽי־תוֹלִ֤יד בָּנִים֙ וּבְנֵ֣י בָנִ֔ים וְנוֹשַׁנְתֶּ֖ם בָּאָ֑רֶץ וְהִשְׁחַתֶּ֗ם וַעֲשִׂ֤יתֶם פֶּ֙סֶל֙ תְּמ֣וּנַת כֹּ֔ל וַעֲשִׂיתֶ֥ם הָרַ֛ע בְּעֵינֵ֥י יְהוָֽה־אֱלֹהֶ֖יךָ לְהַכְעִיסֽוֹ:
[כו] הַעִידֹתִי֩ בָכֶ֨ם הַיּ֜וֹם אֶת־הַשָּׁמַ֣יִם וְאֶת־הָאָ֗רֶץ כִּֽי־אָבֹ֣ד תֹּאבֵדוּן֘ מַהֵר֒ מֵעַ֣ל הָאָ֔רֶץ אֲשֶׁ֨ר אַתֶּ֜ם עֹבְרִ֧ים אֶת־הַיַּרְדֵּ֛ן שָׁ֖מָּה לְרִשְׁתָּ֑הּ לֹֽא־תַאֲרִיכֻ֤ן יָמִים֙ עָלֶ֔יהָ כִּ֥י הִשָּׁמֵ֖ד תִּשָּׁמֵדֽוּן:
[כז] וְהֵפִ֧יץ יְהוָ֛ה אֶתְכֶ֖ם בָּעַמִּ֑ים וְנִשְׁאַרְתֶּם֙ מְתֵ֣י מִסְפָּ֔ר בַּגּוֹיִ֕ם אֲשֶׁ֨ר יְנַהֵ֧ג יְהוָ֛ה אֶתְכֶ֖ם שָֽׁמָּה:
[כח] וַעֲבַדְתֶּם־שָׁ֣ם אֱלֹהִ֔ים מַעֲשֵׂ֖ה יְדֵ֣י אָדָ֑ם עֵ֣ץ וָאֶ֔בֶן אֲשֶׁ֤ר לֹֽא־יִרְאוּן֙ וְלֹ֣א יִשְׁמְע֔וּן וְלֹ֥א יֹאכְל֖וּן וְלֹ֥א יְרִיחֻֽן:
[כט] וּבִקַּשְׁתֶּ֥ם מִשָּׁ֛ם אֶת־יְהוָ֥ה אֱלֹהֶ֖יךָ וּמָצָ֑אתָ כִּ֣י תִדְרְשֶׁ֔נּוּ בְּכָל־לְבָבְךָ֖ וּבְכָל־נַפְשֶֽׁךָ:
[ל] בַּצַּ֣ר לְךָ֔ וּמְצָא֕וּךָ כֹּ֖ל הַדְּבָרִ֣ים הָאֵ֑לֶּה בְּאַֽחֲרִית֙ הַיָּמִ֔ים וְשַׁבְתָּ֙ עַד־יְהוָ֣ה אֱלֹהֶ֔יךָ וְשָׁמַעְתָּ֖ בְּקֹלֽוֹ:
[לא] כִּ֣י אֵ֤ל רַחוּם֙ יְהוָ֣ה אֱלֹהֶ֔יךָ לֹ֥א יַרְפְּךָ֖ וְלֹ֣א יַשְׁחִיתֶ֑ךָ וְלֹ֤א יִשְׁכַּח֙ אֶת־בְּרִ֣ית אֲבֹתֶ֔יךָ אֲשֶׁ֥ר נִשְׁבַּ֖ע לָהֶֽם:
[לב] כִּ֣י שְׁאַל־נָא֩ לְיָמִ֨ים רִאשֹׁנִ֜ים אֲשֶׁר־הָי֣וּ לְפָנֶ֗יךָ לְמִן־הַיּוֹם֙ אֲשֶׁר֩ בָּרָ֨א אֱלֹהִ֤ים ׀ אָדָם֙ עַל־הָאָ֔רֶץ וּלְמִקְצֵ֥ה הַשָּׁמַ֖יִם וְעַד־קְצֵ֣ה הַשָּׁמָ֑יִם הֲנִֽהְיָ֗ה כַּדָּבָ֤ר הַגָּדוֹל֙ הַזֶּ֔ה א֖וֹ הֲנִשְׁמַ֥ע כָּמֹֽהוּ:
[לג] הֲשָׁ֣מַֽע עָם֩ ק֨וֹל אֱלֹהִ֜ים מְדַבֵּ֧ר מִתּוֹךְ־הָאֵ֛שׁ כַּאֲשֶׁר־שָׁמַ֥עְתָּ אַתָּ֖ה וַיֶּֽחִי:
[לד] א֣וֹ׀ הֲנִסָּ֣ה אֱלֹהִ֗ים לָ֠בוֹא לָקַ֨חַת ל֣וֹ גוֹי֘ מִקֶּ֣רֶב גּוֹי֒ בְּמַסֹּת֩ בְּאֹתֹ֨ת וּבְמוֹפְתִ֜ים וּבְמִלְחָמָ֗ה וּבְיָ֤ד חֲזָקָה֙ וּבִזְר֣וֹעַ נְטוּיָ֔ה וּבְמוֹרָאִ֖ים גְּדֹלִ֑ים כְּ֠כֹל אֲשֶׁר־עָשָׂ֨ה לָכֶ֜ם יְהוָ֧ה אֱלֹהֵיכֶ֛ם בְּמִצְרַ֖יִם לְעֵינֶֽיךָ:
[לה] אַתָּה֙ הָרְאֵ֣תָ לָדַ֔עַת כִּ֥י יְהוָ֖ה ה֣וּא הָאֱלֹהִ֑ים אֵ֥ין ע֖וֹד מִלְבַדּֽוֹ:
[לו] מִן־הַשָּׁמַ֛יִם הִשְׁמִיעֲךָ֥ אֶת־קֹל֖וֹ לְיַסְּרֶ֑ךָּ וְעַל־הָאָ֗רֶץ הֶרְאֲךָ֙ אֶת־אִשּׁ֣וֹ הַגְּדוֹלָ֔ה וּדְבָרָ֥יו שָׁמַ֖עְתָּ מִתּ֥וֹךְ הָאֵֽשׁ:
[לז] וְתַ֗חַת כִּ֤י אָהַב֙ אֶת־אֲבֹתֶ֔יךָ וַיִּבְחַ֥ר בְּזַרְע֖וֹ אַחֲרָ֑יו וַיּוֹצִאֲךָ֧ בְּפָנָ֛יו בְּכֹח֥וֹ הַגָּדֹ֖ל מִמִּצְרָֽיִם:
[לח] לְהוֹרִ֗ישׁ גּוֹיִ֛ם גְּדֹלִ֧ים וַעֲצֻמִ֛ים מִמְּךָ֖ מִפָּנֶ֑יךָ לַהֲבִיאֲךָ֗ לָתֶת־לְךָ֧ אֶת־אַרְצָ֛ם נַחֲלָ֖ה כַּיּ֥וֹם הַזֶּֽה:
[לט] וְיָדַעְתָּ֣ הַיּ֗וֹם וַהֲשֵׁבֹתָ֘ אֶל־לְבָבֶךָ֒ כִּ֤י יְהוָה֙ ה֣וּא הָאֱלֹהִ֔ים בַּשָּׁמַ֣יִם מִמַּ֔עַל וְעַל־הָאָ֖רֶץ מִתָּ֑חַת אֵ֖ין עֽוֹד:
[מ] וְשָׁמַרְתָּ֞ אֶת־חֻקָּ֣יו וְאֶת־מִצְוֺתָ֗יו אֲשֶׁ֨ר אָנֹכִ֤י מְצַוְּךָ֙ הַיּ֔וֹם אֲשֶׁר֙ יִיטַ֣ב לְךָ֔ וּלְבָנֶ֖יךָ אַחֲרֶ֑יךָ וּלְמַ֨עַן תַּאֲרִ֤יךְ יָמִים֙ עַל־הָ֣אֲדָמָ֔ה אֲשֶׁ֨ר יְהוָ֧ה אֱלֹהֶ֛יךָ נֹתֵ֥ן לְךָ֖ כָּל־הַיָּמִֽים: פ
[שלישי] [מא] אָ֣ז יַבְדִּ֤יל מֹשֶׁה֙ שָׁלֹ֣שׁ עָרִ֔ים בְּעֵ֖בֶר הַיַּרְדֵּ֑ן מִזְרְחָ֖ה שָֽׁמֶשׁ:
[מב] לָנֻ֨ס שָׁ֜מָּה רוֹצֵ֗חַ אֲשֶׁ֨ר יִרְצַ֤ח אֶת־רֵעֵ֙הוּ֙ בִּבְלִי־דַ֔עַת וְה֛וּא לֹא־שֹׂנֵ֥א ל֖וֹ מִתְּמֹ֣ל שִׁלְשֹׁ֑ם וְנָ֗ס אֶל־אַחַ֛ת מִן־הֶעָרִ֥ים הָאֵ֖ל וָחָֽי:
[מג] אֶת־בֶּ֧צֶר בַּמִּדְבָּ֛ר בְּאֶ֥רֶץ הַמִּישֹׁ֖ר לָרֽאוּבֵנִ֑י וְאֶת־רָאמֹ֤ת בַּגִּלְעָד֙ לַגָּדִ֔י וְאֶת־גּוֹלָ֥ן בַּבָּשָׁ֖ן לַֽמֲנַשִּֽׁי:
[מד] וְזֹ֖את הַתּוֹרָ֑ה אֲשֶׁר־שָׂ֣ם מֹשֶׁ֔ה לִפְנֵ֖י בְּנֵ֥י יִשְׂרָאֵֽל:
[מה] אֵ֚לֶּה הָעֵדֹ֔ת וְהַחֻקִּ֖ים וְהַמִּשְׁפָּטִ֑ים אֲשֶׁ֨ר דִּבֶּ֤ר מֹשֶׁה֙ אֶל־בְּנֵ֣י יִשְׂרָאֵ֔ל בְּצֵאתָ֖ם מִמִּצְרָֽיִם:
[מו] בְּעֵ֨בֶר הַיַּרְדֵּ֜ן בַּגַּ֗יְא מ֚וּל בֵּ֣ית פְּע֔וֹר בְּאֶ֗רֶץ סִיחֹן֙ מֶ֣לֶךְ הָאֱמֹרִ֔י אֲשֶׁ֥ר יוֹשֵׁ֖ב בְּחֶשְׁבּ֑וֹן אֲשֶׁ֨ר הִכָּ֤ה מֹשֶׁה֙ וּבְנֵ֣י יִשְׂרָאֵ֔ל בְּצֵאתָ֖ם מִמִּצְרָֽיִם:
[מז] וַיִּֽירְשׁ֨וּ אֶת־אַרְצ֜וֹ וְאֶת־אֶ֣רֶץ׀ ע֣וֹג מֶלֶךְ־הַבָּשָׁ֗ן שְׁנֵי֙ מַלְכֵ֣י הָאֱמֹרִ֔י אֲשֶׁ֖ר בְּעֵ֣בֶר הַיַּרְדֵּ֑ן מִזְרַ֖ח שָֽׁמֶשׁ:
[מח] מֵעֲרֹעֵ֞ר אֲשֶׁ֨ר עַל־שְׂפַת־נַ֧חַל אַרְנֹ֛ן וְעַד־הַ֥ר שִׂיאֹ֖ן ה֥וּא חֶרְמֽוֹן:
[מט] וְכָל־הָ֨עֲרָבָ֜ה עֵ֤בֶר הַיַּרְדֵּן֙ מִזְרָ֔חָה וְעַ֖ד יָ֣ם הָעֲרָבָ֑ה תַּ֖חַת אַשְׁדֹּ֥ת הַפִּסְגָּֽה: פ

פרק ד
(א) תחיו - ג': דב' ד , א; יר' לה , ז; עמ' ה , יד. (ב) מצוה אתכם - ה' מיחדין (בלי תיבת 'היום'): *דב' ד , ב (פעמיים); יא , כב; יב , יא; יג , א. וכל העם דכותהון. מצות יי' אלהיכם - ה': דב' ד , ב; ו , יז; יא , כז , כח; דה"א כח , ח. (ג) עיניכם - י"ג: בר' ג , ה; מה , יב; במ' טו , לט; דב' ד , ג; יא , ז , יח; יד , א; יהו' כד , ז; יש' כט , י; מ , כו; נא , ו; יר' יג , כ; יח' כד , כא. הראות - ד' (מלא וחסר): דב' ג , כא; ד , ג; יא , ז; *קה' יב , ג. (ה) הארץ אשר אתם באים - ב': דב' ד , ה; עז' ט , יא. באים שמה לרשתה - ב': דב' ד , ה; ל , יח. ושארא 'עברים שמה לרשתה' (או: 'בא שמה לרשתה'). (ו) ישמעון - ה': ראה דב' ב , כה. הגדול - ח' מלא בתורה: ראה דב' א , יט. (ז) כיי' - ד': *שמ' ח , ו; *דב' ד , ז; ש"א ב , ב; תה' קיג , ה. קראנו - ב': דב' ד , ז; תה' כ , י. (ח) אנכי נתן - ז': דב' ד , ח; ה , כח; יא , כו , לב; יהו' א , ב; יא , ו; ש"א כד , ד. (ט) ופן - ה': דב' ד , ט , יט; יב , ל; יר' נא , מו; מש' ל , ט. יסורו - ב' מלא: דב' ד , ט; הו' ז , יד. (י) באמר - ג': *דב' ד , י; יח' לו , כ; תה' מב , ד. (ואחד: כאמר - יהו' ו , ח). הקהל - ג': *וי' ח , ג; דב' ד , י; לא , יב. (ואחד: והקהל - במ' כ , ח). ואשמעם - ב' , חד חסר וחד מלא: דב' ד , י; יש' מח , ג. ילמדון - ב': דב' ד , י; *מי' ד , ג. הם חיים - ג': דב' ד , י; מ"א ח , מ; דה"ב ו , לא. ואת - בניהם - ד': *דב' ד , י; יהו' ה , ז; ש"א ו , י; דה"ב כה , ד. (יא) ותקרבון - ג': *דב' א , כב; ד , יא; ה , כ. וההר - ג': דב' ד , יא; ה , כ; ט , טו. (יד) לעשתכם - ב' , חד חסר וחד מלא (בלישנא): דב' ד , יד; יר' ז , יג. לעשתכם - ה' חסר בלישנא (לא כולל: 'לעשת' , 'ולעשת'): בר' יח , כה; וי' ט , כב; יח , כט; דב' ד , יד; ש"ב כג , יז. (טו) ונשמרתם - ה': ראה דב' ב , ד. (טז) תשחתון - ב' וחסר: דב' ד , טז; לא , כט. (יז) צפור - ט' מלא בתורה (בלישנא): בר' ז , יד; וי' יד , ה , נב; במ' כב , ב , ד , טז; דב' ד , יז; יד , יא; כב , ו. (יט) ופן - ה': ראה לעיל , ט. השמימה - י"א: בר' טו , ה; כח , יב; שמ' ט , ח , י; *דב' ד , יט; ל , יב; יהו' ח , כ; שו' יג , כ; כ , מ; איוב ב , יב; דה"ב ו , יג. ועבדתם - ד' בקמץ: *דב' ד , יט; ח , יט; ל , יז; מ"א יב , ז. (כ) ויוצא - ד': *דב' ד , כ; מ"ב יא , יב; תה' עח , טז; קה , מג. (כא) ויי' - כ"ב בתורה: בר' יג , יד; יח , יז; יט , כד; כא , א; כד , א , לה , נו; שמ' ט , כג; י , יג; יב , כט , לו; יג , כא; במ' יד , ט; ל , ו , ט , יג; דב' ד , כא; יז , טז; כו , יח; לא , ב , ח; לב , ל. (כד) אכלה - ה': *דב' ד , כד; ט , ג; יב , כ; יר' יב , יב; יואל ב , ה. (וחד: ואכלה - יח' ג , ג). (כה) בעיני - ל"ג בתורה: בר' ו , ח; יט , יד; כא , יא; כח , ח; לא , לה; לג , ח , טו; לד , יח; לח , ז , י; לט , כא; מא , לז; מה , טז; מז , כה; שמ' ג , כא; ה , כא; יא , ג (פעמיים); יב , לו; כא , ח; וי' י , יט; במ' כג , כז; כד , א; לב , יג; דב' ד , כה; ו , יח; ט , יח; יב , כה , כח; יג , יט; יז , ב; כא , ט; לא , כט. (כו) העידתי - ב' מלא: דב' ד , כו; יר' מב , יט. את - השמים ואת - הארץ - י"ג: בר' א , א; שמ' כ , יא; לא , יז; דב' ד , כו; ל , יט; לא , כח; מ"ב יט , טו; יש' לז , טז; יר' כג , כד; לב , יז; *חגי ב , ו , כא; דה"ב ב , יא. תאבדון - ד': דב' ד , כו; ח , יט , כ; ל , יח. תאריכן - ב' וחסר: דב' ד , כו; ל , יח. (כז) מתי מספר - ה': בר' לד , ל; דב' ד , כז; יר' מד , כח; תה' קה , יב; דה"א טז , יט. ושארא 'מתי מעט' , 'במתי מעט'. (כח) לא - ט' פסוקים 'לא ולא ולא ולא': דב' ד , כח; ה , יז; יהו' כג , ז; מ"ב יז , לה; יט , לב; יש' ה , כז; לז , לג; יר' טז , ו; יח' ז , יא. ישמעון - ה': ראה דב' ב , כה. יריחן - ב' (אחד חסר ואחד מלא ו"ו): דב' ד , כח; תה' קטו , ו. (כט) ובקשתם - ג': *במ' טז , י; *דב' ד , כט; יר' כט , יג. (וחד: בקשתם - יח' לד , ד). (ל) ומצאוך - ב': *דב' ד , ל; ש"א י , ג. עד - יי' - ה': *דב' ד , ל; ל , ב; יש' יט , כב; הו' יד , ב; *איכה ג , מ. בקלו - ג' חסר (בסופי פסוקים בסיפרא): דב' ד , ל; ט , כג; כו , יז. (לא) לא - ל"ד פסוקים 'לא ולא ולא': ראה דב' א , מב. ישחיתך - ב': דב' ד , לא; דה"ב לה , כא. (לב) כי - י' ראשי פסוקים בטעמא (מונח לפני גרשיים או תלישא קטנה) בתורה: ראה דב' ג , יא. ראשנים - ה': *וי' כו , מה; דב' ד , לב; יט , יד; יש' סא , ד; תה' עט , ח. למן - היום - ג' בתורה: שמ' ט , יח; דב' ד , לב; ט , ז. למן - היום - ח' (בלישנא): שמ' ט , יח; דב' ד , לב; ט , ז; ש"ב ז , יא; יט , כה; יר' ז , כה; לב , לא; חגי ב , יח. למן - היום - ז': שמ' ט , יח; דב' ד , לב; ט , ז; ש"ב יט , כה; יר' ז , כה; לב , לא; חגי ב , יח. ברא אלהים - ג': *בר' א , א; ב , ג; *דב' ד , לב. על - הארץ - ט' בסיפרא: דב' ד , לב; ח , י; יא , כא; יב , טז , כד; טו , כג; כב , ו; כג , כא; כח , נו. ועד - קצה - ה': דב' ד , לב; יג , ח; כח , סד; יר' יב , יב; כה , לג. כדבר הגדול הזה - ג' (בלישנא): דב' ד , לב; ש"א יב , טז; מ"ב ח , יג. הגדול - ח' מלא בתורה: ראה דב' א , יט. הנשמע - ב': דב' ד , לב; *נחמ' יג , כז. (לג) עם - י"ז (בקמץ): במ' כג , ט , כד; דב' ד , לג; שו' ט , לו , לז; מ"ב יג , ז; טו , י; יש' מב , ו; יח' לג , לא; יואל ב , טז; תה' יח , מד; סב , ט; עב , ד; מש' יד , כח; איוב לד , כ; אס' ג , ח; דה"א יז , כא. וכל אתנח וזקף וסופי פסוקים כותהון. (לד) או - כ"ו פסוקים שיש בהם כל אותיות אל"ף בי"ת: שמ' טז , טז; דב' ד , לד; יהו' כג , יג; מ"ב ד , לט; ו , לב; ז , ח; יש' ה , כה; סו , יז; יר' כב , ג; לב , כט; יח' יז , ט; לח , יב; הו' י , ח; יג , ב; עמ' ט , יג; צפ' ג , ח; זכ' ו , יא; קה' ד , ח; אס' ג , יג; דנ' ב , מה; ג , כב; ד , כ; ז , יט; עז' ז , כח; נחמ' ג , ז; דה"ב כו , יא. הנסה - ב': דב' ד , לד; איוב ד , ב. ובמופתים - ב' מלא (בתורה , בלישנא): דב' ד , לד; לד , יא. (וכל נביאייא דכותהון בר מן חד: ומפתים - יר' לב , כ. וכל כתיבייא דכותה חסר). ובמופתים - ג' (מלא וחסר): דב' ד , לד; כו , ח; יר' לב , כא. ובמלחמה - ג': דב' ד , לד; הו' א , ז; איוב ה , כ. וחד: במלחמה - דנ' יא , כ. ובזרוע - ג' מלא (בתורה , בלישנא): *שמ' ו , ו; דב' ד , לד; לג , כ. (וכל נביאייא וכתיבייא דכותהון בר מן ג' חסר: ש"א ב , לא; יש' כח , כד; יח' יז , ט). (לה) אתה - ד' ראשי פסוקים בתורה: בר' מא , מ; שמ' ז , ב; דב' ב , יח; ד , לה. אתה - י"א ראשי פסוקים בתורה ובנביאים: ראה דב' ב , יח. הראת - ב' , חד חסר וחד מלא: שמ' כו , ל; דב' ד , לה. (לו) מן - ג' ראשי פסוקים בתורה: בר' ז , ח; י , יא; דב' ד , לו. אשו - ב': דב' ד , לו; איוב יח , ה. הגדולה - ד' מלא בתורה (בלישנא): במ' כב , יח; *דב' ד , לו; כה , יג , יד. (וכל קרייה דכותהון בר מן ח' (חסר): שו' טו , יח; יר' יא , טז; עז' ט , ז , יג; נחמ' א , ג; ב , י; ז , ד; ט , לז). ודבריו - ה': *דב' ד , לו; איוב לד , לה; קה' ט , טז; דה"ב יג , כב; לה , כז. (לז) ותחת - ב' ראשי פסוקים: דב' ד , לז; יח' א , כג. אהב - ד': בר' לז , ג , ד; *דב' ד , לז; מ"א יא , א. ויוצאך - ב' חסר (יו"ד): דב' ד , לז; ה , טו. בפניו - ה': דב' ד , לז; כה , ט; הו' ה , ה; ז , י; מש' כא , כט. (לט) אל - לבבך - ב': דב' ד , לט; ל , א. ועל - הארץ מתחת - ג': דב' ד , לט; יהו' ב , יא; מ"א ח , כג. (מ) ושמרת - י"ב: שמ' יג , י; טו , כו; דב' ד , מ; ו , ג; ז , יא; ח , ו; יא , א; טז , יב; יז , י; כו , טז; מ"א ב , ג; ו , יב. ואת - מצותיו - ג': *דב' ד , מ; יג , ה; *קה' יב , יג. אשר יי' אלהיך - ד' בטעמא (אזלא , דרגא , תביר) בסיפרא (בלישנא): דב' ג , כ; ד , מ; טז , יח; כו , ב. (מא) מזרחה - ג': דב' ד , מא; יהו' יב , א; שו' כא , יט. (מב) לנס - ב' חסר: במ' לה , ו; דב' ד , מב. לנס שמה - י' ראשי פסוקים (הפסוק פותח בתיבה כל שהיא ואחריה התיבה 'שמה'): בר' כט , ג; שמ' כט , מג; *דב' ד , מב; יב , ו; יהו' כ , ג; שו' יח , טו; מ"ב ו , יד; ט , ב; יח' יא , יח; תה' קכב , ה. רוצח - ד' מלא (בלישנא): דב' ד , מב; יהו' כ , ג , ו; איוב כד , יד. מתמל - ד' חסר (בלישנא): בר' לא , ה; *שמ' כא , כט; *דב' ד , מב; יט , ד. מן - הערים - ב': דב' ד , מב; שו' כ , יד. מן - הערים - ג' (בלישנא): דב' ד , מב; שו' כ , יד; דה"ב טו , ח. האל - ח' (לשון חול): *בר' יט , ח , כה; כו , ג , ד; וי' יח , כז; דב' ד , מב; ז , כב; יט , יא. (מג) את - י' ראשי פסוקים בסיפרא: *דב' ד , מג; ה , יט; ו , יג; י , כ; יא , כז; יג , א; יד , ט , טז; טו , ג; כו , יז. ואת - ראמת - ג' (חסר ומלא): *דב' ד , מג; יהו' כ , ח; דה"א ו , נח. ראמת - ג' כתיב אל"ף (בלישנא): דב' ד , מג; יהו' כ , ח; יח' כז , טז. למנשי - ד' (בלישנא): דב' ד , מג; כט , ז; מ"ב י , לג; דה"א כו , לב. (מד) וזאת - י"ו ראשי פסוקים: שמ' כה , ג; וי' ו , ז; ז , א , יא; טו , ג; *במ' ד , יט , לא; ו , יג; דב' ד , מד; ו , א; לג , א , ז; יר' מד , כט; זכ' יד , יב; מל' ב , יג; רות ד , ז. (מו) יושב - י"ז מלא בתורה (בלישנא): ראה דב' א , ד. ובני ישראל - ה"י (באמצע פסוק): *שמ' יד , ח; טו , א , יט; *וי' כד , כג; במ' כו , ד; *דב' ד , מו; יהו' י , כ; יב , ו , ז; שו' כ , לב; ש"א יד , יח; ש"ב כא , ב; הו' ב , ב; *עז' ג , א; *נחמ' ז , עב. וכל ראשי פסוקים דכותהון. (מט) ועד ים - ד': שמ' כג , לא; *דב' ג , יז; ד , מט; יהו' יב , ג.