מאגר הכתר שמואל ב פרק כג עם עין המסורה

פרק כג
[א] וְאֵ֛לֶּה דִּבְרֵ֥י דָוִ֖ד הָאַחֲרֹנִ֑ים נְאֻ֧ם דָּוִ֣ד בֶּן־יִשַׁ֗י וּנְאֻ֤ם הַגֶּ֙בֶר֙ הֻ֣קַם עָ֔ל מְשִׁ֙יחַ֙ אֱלֹהֵ֣י יַעֲקֹ֔ב וּנְעִ֖ים זְמִר֥וֹת יִשְׂרָאֵֽל:
[ב] ר֥וּחַ יְהוָ֖ה דִּבֶּר־בִּ֑י וּמִלָּת֖וֹ עַל־לְשׁוֹנִֽי:
[ג] אָמַר֙ אֱלֹהֵ֣י יִשְׂרָאֵ֔ל לִ֥י דִבֶּ֖ר צ֣וּר יִשְׂרָאֵ֑ל מוֹשֵׁל֙ בָּאָדָ֔ם צַדִּ֕יק מוֹשֵׁ֖ל יִרְאַ֥ת אֱלֹהִֽים:
[ד] וּכְא֥וֹר בֹּ֖קֶר יִזְרַח־שָׁ֑מֶשׁ בֹּ֚קֶר לֹ֣א עָב֔וֹת מִנֹּ֥גַהּ מִמָּטָ֖ר דֶּ֥שֶׁא מֵאָֽרֶץ:
[ה] כִּי־לֹא־כֵ֥ן בֵּיתִ֖י עִם־אֵ֑ל כִּי֩ בְרִ֨ית עוֹלָ֜ם שָׂ֣ם לִ֗י עֲרוּכָ֤ה בַכֹּל֙ וּשְׁמֻרָ֔ה כִּי־כָל־יִשְׁעִ֥י וְכָל־חֵ֖פֶץ כִּי־לֹ֥א יַצְמִֽיחַ:
[ו] וּבְלִיַּ֕עַל כְּק֥וֹץ מֻנָ֖ד כֻּלָּ֑הַם כִּי־לֹ֥א בְיָ֖ד יִקָּֽחוּ:
[ז] וְאִישׁ֙ יִגַּ֣ע בָּהֶ֔ם יִמָּלֵ֥א בַרְזֶ֖ל וְעֵ֣ץ חֲנִ֑ית וּבָאֵ֕שׁ שָׂר֥וֹף יִשָּׂרְפ֖וּ בַּשָּֽׁבֶת: פ
[ח] אֵ֛לֶּה שְׁמ֥וֹת הַגִּבֹּרִ֖ים אֲשֶׁ֣ר לְדָוִ֑ד יֹשֵׁ֨ב בַּשֶּׁ֜בֶת תַּחְכְּמֹנִ֣י׀ רֹ֣אשׁ הַשָּׁלִשִׁ֗י ה֚וּא עֲדִינ֣וֹ הָעֶצְנִ֔ו הָעֶצְנִ֔י עַל־שְׁמֹנֶ֥ה מֵא֛וֹת חָלָ֖ל בְּפַ֥עַם אֶחָֽד אֶחָֽת: ס
[ט] וְאַחֲרָ֛ו וְאַחֲרָ֛יו אֶלְעָזָ֥ר בֶּן־דֹּדֹ֖י דּוֹד֖וֹ בֶּן־אֲחֹחִ֑י בִּשְׁלֹשָׁ֨ה ַגִּבֹּרִ֜ים הַגִּבֹּרִ֜ים עִם־דָּוִ֗ד בְּחָרְפָ֤ם בַּפְּלִשְׁתִּים֙ נֶאֶסְפוּ־שָׁ֣ם לַמִּלְחָמָ֔ה וַֽיַּעֲל֖וּ אִ֥ישׁ יִשְׂרָאֵֽל:
[י] ה֣וּא קָם֩ וַיַּ֨ךְ בַּפְּלִשְׁתִּ֜ים עַ֣ד׀ כִּֽי־יָגְעָ֣ה יָד֗וֹ וַתִּדְבַּ֤ק יָדוֹ֙ אֶל־הַחֶ֔רֶב וַיַּ֧עַשׂ יְהוָ֛ה תְּשׁוּעָ֥ה גְדוֹלָ֖ה בַּיּ֣וֹם הַה֑וּא וְהָעָ֛ם יָשֻׁ֥בוּ אַחֲרָ֖יו אַךְ־לְפַשֵּֽׁט: ס
[יא] וְאַחֲרָ֛יו שַׁמָּ֥ה בֶן־אָגֵ֖א הָרָרִ֑י וַיֵּאָסְפ֨וּ פְלִשְׁתִּ֜ים לַחַיָּ֗ה וַתְּהִי־שָׁ֞ם חֶלְקַ֤ת הַשָּׂדֶה֙ מְלֵאָ֣ה עֲדָשִׁ֔ים וְהָעָ֥ם נָ֖ס מִפְּנֵ֥י פְלִשְׁתִּֽים:
[יב] וַיִּתְיַצֵּ֤ב בְּתוֹךְ־הַחֶלְקָה֙ וַיַּצִּילֶ֔הָ וַיַּ֖ךְ אֶת־פְּלִשְׁתִּ֑ים וַיַּ֥עַשׂ יְהוָ֖ה תְּשׁוּעָ֥ה גְדוֹלָֽה: ס
[יג] וַיֵּרְד֨וּ שְׁלֹשָׁ֜ים שְׁלוֹשָׁ֜ה מֵהַשְּׁלֹשִׁ֣ים רֹ֗אשׁ וַיָּבֹ֤אוּ אֶל־קָצִיר֙ אֶל־דָּוִ֔ד אֶל־מְעָרַ֖ת עֲדֻלָּ֑ם וְחַיַּ֣ת פְּלִשְׁתִּ֔ים חֹנָ֖ה בְּעֵ֥מֶק רְפָאִֽים:
[יד] וְדָוִ֖ד אָ֣ז בַּמְּצוּדָ֑ה וּמַצַּ֣ב פְּלִשְׁתִּ֔ים אָ֖ז בֵּ֥ית לָֽחֶם:
[טו] וַיִּתְאַוֶּ֥ה דָוִ֖ד וַיֹּאמַ֑ר מִ֚י יַשְׁקֵ֣נִי מַ֔יִם מִבֹּ֥אר בֵּֽית־לֶ֖חֶם אֲשֶׁ֥ר בַּשָּֽׁעַר: ס
[טז] וַיִּבְקְעוּ֩ שְׁלֹ֨שֶׁת הַגִּבֹּרִ֜ים בְּמַחֲנֵ֣ה פְלִשְׁתִּ֗ים וַיִּֽשְׁאֲבוּ־מַ֙יִם֙ מִבֹּ֤אר בֵּֽית־לֶ֙חֶם֙ אֲשֶׁ֣ר בַּשַּׁ֔עַר וַיִּשְׂא֖וּ וַיָּבִ֣אוּ אֶל־דָּוִ֑ד וְלֹ֤א אָבָה֙ לִשְׁתּוֹתָ֔ם וַיַּסֵּ֥ךְ אֹתָ֖ם לַיהוָֽה:
[יז] וַיֹּ֡אמֶר חָלִילָה֩ לִּ֨י יְהוָ֜ה מֵעֲשֹׂ֣תִי זֹ֗את הֲדַ֤ם הָאֲנָשִׁים֙ הַהֹלְכִ֣ים בְּנַפְשׁוֹתָ֔ם וְלֹ֥א אָבָ֖ה לִשְׁתּוֹתָ֑ם אֵ֣לֶּה עָשׂ֔וּ שְׁלֹ֖שֶׁת הַגִּבֹּרִֽים: ס
[יח] וַאֲבִישַׁ֞י אֲחִ֣י׀ יוֹאָ֣ב בֶּן־צְרוּיָ֗ה ה֚וּא רֹ֣אשׁ הַשְּׁלֹשָׁ֔י הַשְּׁלוֹשָׁ֔ה וְהוּא֙ עוֹרֵ֣ר אֶת־חֲנִית֔וֹ עַל־שְׁלֹ֥שׁ מֵא֖וֹת חָלָ֑ל וְלוֹ־שֵׁ֖ם בַּשְּׁלֹשָֽׁה:
[יט] מִן־הַשְּׁלֹשָׁה֙ הֲכִ֣י נִכְבָּ֔ד וַיְהִ֥י לָהֶ֖ם לְשָׂ֑ר וְעַד־הַשְּׁלֹשָׁ֖ה לֹא־בָֽא: ס
[כ] וּבְנָיָ֨הוּ בֶן־יְהוֹיָדָ֧ע בֶּן־אִֽישׁ־חַ֛יִ חַ֛יִל רַב־פְּעָלִ֖ים מִֽקַּבְצְאֵ֑ל ה֣וּא הִכָּ֗ה אֵ֣ת שְׁנֵ֤י אֲרִאֵל֙ מוֹאָ֔ב וְ֠הוּא יָרַ֞ד וְהִכָּ֧ה אֶֽת־הָאֲרִ֛יה הָאֲרִ֛י בְּת֥וֹךְ הַבֹּ֖אר בְּי֥וֹם הַשָּֽׁלֶג:
[כא] וְהֽוּא־הִכָּה֩ אֶת־אִ֨ישׁ מִצְרִ֜י אִ֣שׁר אִ֣ישׁ מַרְאֶ֗ה וּבְיַ֤ד הַמִּצְרִי֙ חֲנִ֔ית וַיֵּ֥רֶד אֵלָ֖יו בַּשָּׁ֑בֶט וַיִּגְזֹ֤ל אֶֽת־הַחֲנִית֙ מִיַּ֣ד הַמִּצְרִ֔י וַיַּהַרְגֵ֖הוּ בַּחֲנִיתֽוֹ:
[כב] אֵ֣לֶּה עָשָׂ֔ה בְּנָיָ֖הוּ בֶּן־יְהוֹיָדָ֑ע וְלוֹ־שֵׁ֖ם בִּשְׁלֹשָׁ֥ה הַגִּבֹּרִֽים:
[כג] מִן־הַשְּׁלֹשִׁ֣ים נִכְבָּ֔ד וְאֶל־הַשְּׁלֹשָׁ֖ה לֹא־בָ֑א וַיְשִׂמֵ֥הוּ דָוִ֖ד אֶל־מִשְׁמַעְתּֽוֹ: ס
[כד] עֲשָׂהאֵ֥ל אֲחִֽי־יוֹאָ֖ב בַּשְּׁלֹשִׁ֑ים אֶלְחָנָ֥ן בֶּן־דֹּד֖וֹ בֵּ֥ית לָֽחֶם: ס
[כה] שַׁמָּה֙ הַחֲרֹדִ֔י אֱלִיקָ֖א הַחֲרֹדִֽי: ס
[כו] חֶ֚לֶץ הַפַּלְטִ֔י עִירָ֥א בֶן־עִקֵּ֖שׁ הַתְּקוֹעִֽי: ס
[כז] אֲבִיעֶ֙זֶר֙ הָעַנְּתֹתִ֔י מְבֻנַּ֖י הַחֻשָׁתִֽי: ס
[כח] צַלְמוֹן֙ הָאֲחֹחִ֔י מַהְרַ֖י הַנְּטֹפָתִֽי: ס
[כט] חֵ֥לֶב בֶּֽן־בַּעֲנָ֖ה הַנְּטֹפָתִ֑י ס אִתַּי֙ בֶּן־רִיבַ֔י מִגִּבְעַ֖ת בְּנֵ֥י בִנְיָמִֽן: ס

[ל] בְּנָיָ֙הוּ֙ פִּרְעָ֣תֹנִ֔י הִדַּ֖י מִנַּ֥חֲלֵי גָֽעַשׁ: ס
[לא] אֲבִֽי־עַלְבוֹן֙ הָעַרְבָתִ֔י עַזְמָ֖וֶת הַבַּרְחֻמִֽי: ס
[לב] אֶלְיַחְבָּא֙ הַשַּׁ֣עַלְבֹנִ֔י בְּנֵ֥י יָשֵׁ֖ן יְהוֹנָתָֽן: ס
[לג] שַׁמָּה֙ הַהֲרָרִ֔י אֲחִיאָ֥ם בֶּן־שָׁרָ֖ר הָארָרִֽי: ס
[לד] אֱלִיפֶ֥לֶט בֶּן־אֲחַסְבַּ֖י בֶּן־הַמַּעֲכָתִ֑י ס אֱלִיעָ֥ם בֶּן־אֲחִיתֹ֖פֶל הַגִּלֹנִֽי: ס

[לה] חֶצְרַו֙ חֶצְרַי֙ הַֽכַּרְמְלִ֔י פַּעֲרַ֖י הָאַרְבִּֽי: ס
[לו] יִגְאָ֤ל בֶּן־נָתָן֙ מִצֹּבָ֔ה ס בָּנִ֖י הַגָּדִֽי: ס

[לז] צֶ֖לֶק הָעַמֹּנִ֑י ס נַחְרַי֙ הַבְּאֵ֣רֹתִ֔י נֹשֵׂ֕אי נֹשֵׂ֕א כְּלֵ֖י יוֹאָ֥ב בֶּן־צְרֻיָֽה: ס

[לח] עִירָא֙ הַיִּתְרִ֔י גָּרֵ֖ב הַיִּתְרִֽי: ס
[לט] אֽוּרִיָּה֙ הַחִתִּ֔י כֹּ֖ל שְׁלֹשִׁ֥ים וְשִׁבְעָֽה: פ

פרק כג
(א) הקם - ג': שמ' מ , יז; ש"ב כג , א; יר' לה , יד. על - ב' בקמץ: ש"ב כג , א; הו' ז , טז. זמרות - ד' (בכתיבים שונים): ש"ב כג , א; יש' כד , טז; תה' קיט , נד; איוב לה , י. (ב) רוח יי' - ה' בסיפרא (בלישנא): ראה ש"א י , ו. (ג) אלהי ישראל (שלא קדם לו שם אלהות. הספירה לא כוללת את הצירוף 'ארון אלהי ישראל') - כ"ח (בלישנא): ראה ש"א א , יז. מושל - י"ד מלא: ש"ב כג , ג (פעמיים); מ"א ה , א; מי' ה , א; תה' פט , י; מש' כג , א; כח , טו; כט , כו; קה' ט , יז; י , ד; דה"א כט , יב; דה"ב ז , יח;ט , כו; כ , ו. יראת אלהים - ג': *בר' כ , יא; ש"ב כג , ג; *נחמ' ה , טו. (ד) עבות - ב': ש"ב כג , ד; תה' עז , יח. (ה) לא - כן - י"ט (בלישנא , כולל 'לוא'): ראה ש"ב יח , יד. בכל - ז' (דגושים): *בר' טז , יב; כד , א; ש"ב כג , ה; תה' קג , יט; קה' ה , ח; *עז' י , יז; דה"א כט , יב. (ו) ובליעל - ב': ש"א ל , כב; ש"ב כג , ו. יקחו - י': וי' כא , ז (פעמיים); ש"ב כג , ו; מ"ב כ , יח; יש' לט , ז; יר' מט , כט; יח' כב , כה; כג , כה; מד , כב; איוב כז , יג. (ז) ימלא - ח': ש"ב כג , ז; מ"ב ג , יז; יש' ו , ד; יר' יג , יב (פעמיים); תה' עא , ח; קכו , ב; מש' כ , יז. ישרפו - ב': ש"ב כג , ז; *מי' א , ז. (ח) אלה - ז' ראשי פסוקים בנביאים: יהו' יג , לב; יט , נא; כ , ט; ש"ב כג , ח , כב; מ"א ט , כג; זכ' ח , טז. אחת (קרי; אחד כתיב) - י"א פסוקים קוראים תי"ו ולא כתוב: ראה ש"ב יב , כד. אלה שמות - ה': *בר' לו , י; *במ' ג , ג; יג , טז; לד , יז; ש"ב כג , ח. (ט) דדו - כ"ד כתיב יו"ד בסוף תיבותא וקרי ו"ו: ש"ב כג , ט; יש' כה , י; יר' ב , כז; ו , כה (פעמיים); יג , כ (פעמיים); כג , יח; מח , כ (פעמיים); נ , יא (ארבע פעמים); תה' יז , יא; איוב ו , כט; לג , כא , כח (פעמיים); עז' י , לה , מד; נחמ' יב , יד; דה"ב ט , כט; לד , ט. גברים (כתיב; הגברים קרי) - י"ג חסר ה"א בראש התיבה וקרי: ראה ש"א יד , לב. (י) ישבו - ז' חסר: שו' ב , יט; ש"ב כג , י; יר' טו , יט; כד , ז; הו' ג , ה; יד , ח; תה' ו , יא. (יא) הררי - ב' (חד כתיב אל"ף וחד חסר אל"ף): ש"ב כג , יא , לג. ויאספו - י"ב: ראה ש"א יז , א. (יג) חנה - ב' וחסר: ש"ב כג , יג; דה"א יא , טו. (טו) ויאמר - צ"א (בפתח): ראה ש"א ג , יח. מבאר - ג' כתיב אל"ף (בלישנא): ש"ב כג , טו , טז , כ. (טז) מבאר - ג' כתיב אל"ף (בלישנא): ראה לעיל. ויבאו - ל"ו (חסר ומלא): ראה ש"א א , כה. ויסך - ג': *בר' לה , יד; ש"ב כג , טז; מ"ב טז , יג. (יז) מעשתי - ה' חסר בלישנא (לא כולל: 'לעשת' , 'ולעשת'): בר' יח , כה; וי' ט , כב; יח , כט; דב' ד , יד; ש"ב כג , יז. הדם - ב': ש"ב כג , יז; דה"א יא , יט. (יח) בשלשה - ב' , חד חסר וחד מלא: ש"ב כג , יח; דה"א יא , כ. (יט) הכי - ה': ראה ש"ב ט , א. ועד - השלשה - ב': ש"ב כג , יט; דה"א יא , כא. (כ) פעלים - ב': ש"ב כג , כ; דה"א יא , כב. הבאר - ג' כתיב אל"ף (בלישנא): ראה לעיל , טו. (כא) והוא - ל"ג ראשי פסוקים: ראה ש"א יז , כג. אש - ג' חסר (בלישנא): ש"ב יד , יט; כג , כא; מי' ו , י. (כב) אלה - ז' ראשי פסוקים בנביאים: ראה לעיל , ח. (כה) החרדי - ב' וחסר: ש"ב כג , כה (פעמיים). (כט) ריבי - ב': ש"ב כג , כט; דה"א יא , לא. ואחד: ויריבי - דה"א יא , מו. (ל) פרעתני - ב' חסר: ש"ב כג , ל; דה"א יא , לא. (לב) השעלבני - ב': ש"ב כג , לב; דה"א יא , לג. (לג) ההררי - ג': ש"ב כג , לג; דה"א יא , לד , לה. האררי - ב' , חד כתיב אל"ף וחד חסר אל"ף: ש"ב כג , יא , לג. (לד) הגלני - ב': ש"ב טו , יב; כג , לד. (לז) הבארתי - ד' זוגות מחליפין (מלה אחת באל"ף והאחרת ללא אל"ף): יהו' כא , ל - דה"א ו , נט; *בר' מב , לח - מד , כט; ש"ב כג , לז - דה"א יא , לט; יר' ו , יד - ח , יא. צריה - ג' חסר: ש"ב יד , א; טז , י; כג , לז.