מאגר הכתר שמואל ב פרק ה עם עין המסורה

פרק ה
[א] וַיָּבֹ֜אוּ כָּל־שִׁבְטֵ֧י יִשְׂרָאֵ֛ל אֶל־דָּוִ֖ד חֶבְר֑וֹנָה וַיֹּאמְר֣וּ לֵאמֹ֔ר הִנְנ֛וּ עַצְמְךָ֥ וּֽבְשָׂרְךָ֖ אֲנָֽחְנוּ:
[ב] גַּם־אֶתְמ֣וֹל גַּם־שִׁלְשׁ֗וֹם בִּֽהְי֨וֹת שָׁא֥וּל מֶ֙לֶךְ֙ עָלֵ֔ינוּ אַתָּ֗ה הָיִ֛יתָהַ הָיִ֛יתָ מּוֹצִ֥יא הַמּוֹצִ֥יא וְהַמֵּבִ֖י אֶת־יִשְׂרָאֵ֑ל וַיֹּ֨אמֶר יְהוָ֜ה לְךָ֗ אַתָּ֨ה תִרְעֶ֤ה אֶת־עַמִּי֙ אֶת־יִשְׂרָאֵ֔ל וְאַתָּ֛ה תִּהְיֶ֥ה לְנָגִ֖יד עַל־יִשְׂרָאֵֽל:
[ג] וַ֠יָּבֹאוּ כָּל־זִקְנֵ֨י יִשְׂרָאֵ֤ל אֶל־הַמֶּ֙לֶךְ֙ חֶבְר֔וֹנָה וַיִּכְרֹ֣ת לָהֶם֩ הַמֶּ֨לֶךְ דָּוִ֥ד בְּרִ֛ית בְּחֶבְר֖וֹן לִפְנֵ֣י יְהוָ֑ה וַיִּמְשְׁח֧וּ אֶת־דָּוִ֛ד לְמֶ֖לֶךְ עַל־יִשְׂרָאֵֽל: ס
[ד] בֶּן־שְׁלֹשִׁ֥ים שָׁנָ֛ה דָּוִ֖ד בְּמָלְכ֑וֹ אַרְבָּעִ֥ים שָׁנָ֖ה מָלָֽךְ:
[ה] בְּחֶבְרוֹן֙ מָלַ֣ךְ עַל־יְהוּדָ֔ה שֶׁ֥בַע שָׁנִ֖ים וְשִׁשָּׁ֣ה חֳדָשִׁ֑ים וּבִירוּשָׁלִַ֣ם מָלַ֗ךְ שְׁלֹשִׁ֤ים וְשָׁלֹשׁ֙ שָׁנָ֔ה עַ֥ל כָּל־יִשְׂרָאֵ֖ל וִיהוּדָֽה:
[ו] וַיֵּ֨לֶךְ הַמֶּ֤לֶךְ וַֽאֲנָשָׁיו֙ יְר֣וּשָׁלִַ֔ם אֶל־הַיְבֻסִ֖י יוֹשֵׁ֣ב הָאָ֑רֶץ וַיֹּ֨אמֶר לְדָוִ֤ד לֵאמֹר֙ לֹא־תָב֣וֹא הֵ֔נָּה כִּ֣י אִם־הֱסִֽירְךָ֗ הַעִוְרִ֤ים וְהַפִּסְחִים֙ לֵאמֹ֔ר לֹא־יָב֥וֹא דָוִ֖ד הֵֽנָּה:
[ז] וַיִּלְכֹּ֣ד דָּוִ֔ד אֵ֖ת מְצֻדַ֣ת צִיּ֑וֹן הִ֖יא עִ֥יר דָּוִֽד:
[ח] וַיֹּ֨אמֶר דָּוִ֜ד בַּיּ֣וֹם הַה֗וּא כָּל־מַכֵּ֤ה יְבֻסִי֙ וְיִגַּ֣ע בַּצִּנּ֔וֹר וְאֶת־הַפִּסְחִים֙ וְאֶת־הַ֣עִוְרִ֔ים שְׂנֻאֵ֖ו שְׂנוּאֵ֖י נֶ֣פֶשׁ דָּוִ֑ד עַל־כֵּן֙ יֹֽאמְר֔וּ עִוֵּ֣ר וּפִסֵּ֔חַ לֹ֥א יָב֖וֹא אֶל־הַבָּֽיִת:
[ט] וַיֵּ֤שֶׁב דָּוִד֙ בַּמְּצֻדָ֔ה וַיִּקְרָא־לָ֖הּ עִ֣יר דָּוִ֑ד וַיִּ֤בֶן דָּוִד֙ סָבִ֔יב מִן־הַמִּלּ֖וֹא וָבָֽיְתָה:
[י] וַיֵּ֥לֶךְ דָּוִ֖ד הָל֣וֹךְ וְגָד֑וֹל וַיהוָ֛ה אֱלֹהֵ֥י צְבָא֖וֹת עִמּֽוֹ: פ
[יא] וַ֠יִּשְׁלַח חִירָ֨ם מֶלֶךְ־צֹ֥ר מַלְאָכִים֘ אֶל־דָּוִד֒ וַעֲצֵ֣י אֲרָזִ֔ים וְחָרָשֵׁ֣י עֵ֔ץ וְחָרָשֵׁ֖י אֶ֣בֶן קִ֑יר וַיִּבְנוּ־בַ֖יִת לְדָוִֽד:
[יב] וַיֵּ֣דַע דָּוִ֔ד כִּֽי־הֱכִינ֧וֹ יְהוָ֛ה לְמֶ֖לֶךְ עַל־יִשְׂרָאֵ֑ל וְכִי֙ נִשֵּׂ֣א מַמְלַכְתּ֔וֹ בַּעֲב֖וּר עַמּ֥וֹ יִשְׂרָאֵֽל: ס
[יג] וַיִּקַּח֩ דָּוִ֨ד ע֜וֹד פִּֽלַגְשִׁ֤ים וְנָשִׁים֙ מִיר֣וּשָׁלִַ֔ם אַחֲרֵ֖י בֹּא֣וֹ מֵחֶבְר֑וֹן וַיִּוָּ֥לְדוּ ע֛וֹד לְדָוִ֖ד בָּנִ֥ים וּבָנֽוֹת:
[יד] וְאֵ֗לֶּה שְׁמ֛וֹת הַיִּלֹּדִ֥ים ל֖וֹ בִּירוּשָׁלִָ֑ם שַׁמּ֣וּעַ וְשׁוֹבָ֔ב וְנָתָ֖ן וּשְׁלֹמֹֽה:
[טו] וְיִבְחָ֥ר וֶאֱלִישׁ֖וּעַ וְנֶ֥פֶג וְיָפִֽיעַ:
[טז] וֶאֱלִישָׁמָ֥ע וְאֶלְיָדָ֖ע וֶאֱלִיפָֽלֶט: פ
[יז] וַיִּשְׁמְע֣וּ פְלִשְׁתִּ֗ים כִּֽי־מָשְׁח֨וּ אֶת־דָּוִ֤ד לְמֶ֙לֶךְ֙ עַל־יִשְׂרָאֵ֔ל וַיַּעֲל֥וּ כָל־פְּלִשְׁתִּ֖ים לְבַקֵּ֣שׁ אֶת־דָּוִ֑ד וַיִּשְׁמַ֣ע דָּוִ֔ד וַיֵּ֖רֶד אֶל־הַמְּצוּדָֽה:
[יח] וּפְלִשְׁתִּ֖ים בָּ֑אוּ וַיִּנָּטְשׁ֖וּ בְּעֵ֥מֶק רְפָאִֽים:
[יט] וַיִּשְׁאַ֨ל דָּוִ֤ד בַּֽיהוָה֙ לֵאמֹ֔ר הַאֶֽעֱלֶה֙ אֶל־פְּלִשְׁתִּ֔ים הֲתִתְּנֵ֖ם בְּיָדִ֑י פ
וַיֹּ֨אמֶר יְהוָ֤ה אֶל־דָּוִד֙ עֲלֵ֔ה כִּֽי־נָתֹ֥ן אֶתֵּ֛ן אֶת־הַפְּלִשְׁתִּ֖ים בְּיָדֶֽךָ:
[כ] וַיָּבֹ֨א דָוִ֥ד בְּבַֽעַל־פְּרָצִים֘ וַיַּכֵּ֣ם שָׁ֣ם דָּוִד֒ וַיֹּ֕אמֶר פָּרַ֨ץ יְהוָ֧ה אֶת־אֹיְבַ֛י לְפָנַ֖י כְּפֶ֣רֶץ מָ֑יִם עַל־כֵּ֗ן קָרָ֛א שֵֽׁם־הַמָּק֥וֹם הַה֖וּא בַּ֥עַל פְּרָצִֽים:
[כא] וַיַּ֥עַזְבוּ שָׁ֖ם אֶת־עֲצַבֵּיהֶ֑ם וַיִּשָּׂאֵ֥ם דָּוִ֖ד וַאֲנָשָֽׁיו: פ
[כב] וַיֹּסִ֥פוּ ע֛וֹד פְּלִשְׁתִּ֖ים לַעֲל֑וֹת וַיִּנָּטְשׁ֖וּ בְּעֵ֥מֶק רְפָאִֽים:
[כג] וַיִּשְׁאַ֤ל דָּוִד֙ בַּיהוָ֔ה וַיֹּ֖אמֶר לֹ֣א תַעֲלֶ֑ה הָסֵב֙ אֶל־אַ֣חֲרֵיהֶ֔ם וּבָ֥אתָ לָהֶ֖ם מִמּ֥וּל בְּכָאִֽים:
[כד] וִ֠יהִי בְּֽשָׁמְעֲךָ֞ כְּֽשָׁמְעֲךָ֞ אֶת־ק֧וֹל צְעָדָ֛ה בְּרָאשֵׁ֥י הַבְּכָאִ֖ים אָ֣ז תֶּחֱרָ֑ץ כִּ֣י אָ֗ז יָצָ֤א יְהוָה֙ לְפָנֶ֔יךָ לְהַכּ֖וֹת בְּמַחֲנֵ֥ה פְלִשְׁתִּֽים:
[כה] וַיַּ֤עַשׂ דָּוִד֙ כֵּ֔ן כַּאֲשֶׁ֥ר צִוָּ֖הוּ יְהוָ֑ה וַיַּךְ֙ אֶת־פְּלִשְׁתִּ֔ים מִגֶּ֖בַע עַד־בֹּאֲךָ֥ גָֽזֶר: פ

פרק ה
(א) חברונה - ט' (מלא וחסר): ראה ש"ב ב , א. ויאמרו לאמר - ג': שמ' טו , א; במ' כ , ג; ש"ב ה , א. הננו - ד': יהו' ט , כה; ש"ב ה , א; יר' ג , כב; *עז' ט , טו. (ב) את - ה"י פסוקים בסיפרא 'את את את': ראה ש"א כה , יג. אתמול - ג': ש"א ד , ז; ש"ב ה , ב; תה' צ , ד. הייתה - ב' מלא (בלישנא): שו' יא , ו; ש"ב ה , ב. והמבי - ט' חסר אל"ף (צורות שונות של 'בוא'): ראה ש"א כה , ח. את - עמי את - ישראל - ו': ש"ב ה , ב; ז , ז; מ"א ח , טז; יר' יב , יד; כג , יח; דה"א יא , ב. ואתה - י' בטעמא (תביר ללא משרתים , בלישנא): ראה ש"א כד , יא. ואתה - כ"ז בטעמא (תביר , ללא מקף וללא טעמים מחברים לפניו , כולל: 'אתה' , 'עתה' , 'ועתה'): ראה ש"א כד , יא. (ג) חברונה - ט' (מלא וחסר): ראה ש"ב ב , א. (ה) ובירושלם - כ"א: ש"ב ה , ה; מ"א ב , יא; מ"ב כא , ז; כג , כד; יש' י , יב; כד , כג; סו , יג; יר' ד , ה; כז , יח; יואל ג , ה; מל' ב , יא; עז' ט , ט; נחמ' ח , טו; יא , ד; יג , טז; דה"א ט , ג; כט , כז; דה"ב ב , ו; כד , ט; לג , ז , טו. על כל - ו' בסיפרא (בלישנא): ראה ש"א יא , ב. על כל - ישראל - כ': ראה ש"א יא , ב. (ו) היבסי - ה' חסר (בלישנא): ש"ב ה , ו , ח; כד , טז , יח; דה"א כא , יח. יושב - ח' מלא בסיפרא: ראה ש"א יד , ב. יושב הארץ - י"ב (בלישנא): בר' לד , ל; נ , יא; שמ' לד , יב , טו; במ' יד , יד; יהו' כד , יח; שו' יא , כא; ש"ב ה , ו; יש' כד , יז; כו , כא; יר' מז , ב; יח' ז , ז. (ז) מצדת - ב' וחסר: ש"ב ה , ז; דה"א יא , ה. (ח) יבסי - ה' חסר (בלישנא): ראה לעיל , ו. (ט) וביתה - ב': ש"ב ה , ט; יח' מד , יז. (י) וגדול - ח': ראה ש"א כה , לו. ויי' אלהי צבאות - י"א (בלישנא): ש"ב ה , י; מ"א יט , י , יד; יר' טו , טז; עמ' ד , יג; ה , יד , טו , כז; ו , ח , יד; תה' פט , ט. (יב) למלך - כ"ט: ראה ש"א טו , יא. (יג) דוד עוד - ד': ש"ב ה , יג; ז , כ; דה"א יד , ג (פעמיים). ויולדו - ה': ראה ש"ב ג , ב. (יד) הילדים - ג' , ב' חסר וחד מלא: יהו' ה , ה; ש"ב ה , יד; יר' טז , ג. ויעלו כל - פלשתים - ב': ש"ב ה , יז; דה"א יד , ח. (יח) וינטשו - ג': שו' טו , ט; ש"ב ה , יח , כב. (יט) אל - פלשתים - ב': ש"ב ה , יט; יר' מז , א. התתנם - ב': ש"א יד , לז; ש"ב ה , יט. הפלשתים - ח': ראה ש"א ד , ז. (כ) פרצים - ה': ש"ב ה , כ (פעמיים); יש' כח , כא; דה"א יד , יא (פעמיים). (כב) ויספו - ג' כתיב כן: שו' י , ו; יג , א; ש"ב ה , כב. לעלות - י"ד , וכל אוריתא ויהושע דכותהון בר מן ג': ראה ש"א ב , כח. וינטשו - ג': ראה לעיל , יח. (כד) ויהי - ל"ב (ו"ו בחיריק): ראה ש"א י , ה. בשמעך (כתיב; כשמעך קרי) - י"א כתיב בי"ת וקרי כ"ף: ראה ש"א יא , ו. בראשי - ד': ש"א כט , ד; ש"ב ה , כד; דה"א יב , יט; יד , טו. ושנים: ובראשי - במ' י , י; כח , יא. (כה) צוהו - י': ראה ש"א יז , כ.